ድርጊቱ ሩሲያ ጦርነቱን እያሰፋች እንደሆነ የሚያሳይ ነው- ዘለንስኪ

በሩሲያና በዩክሬን መካከል እየተካሄደ ባለው ጦርነት፣ ሩሲያ በዩክሬን መሠረተ ልማቶች ላይ በምትሰነዝረው ድንገተኛ የድሮን ጥቃት ምክንያት፣ በሮማኒያ አየር ክልል ላይ ጥሰት እንደተፈጸመ የአገሪቱ መከላከያ ሚኒስቴር አስታወቀ።

ይህን ተከትሎም የኔቶ አባልአገር የሆነችው ሮማኒያ፣ ሁኔታውን ለመከታተል ተዋጊ ጄቶቿን ማሰማራቷን ገልጻለች፡፡

የመከላከያ ሚኒስቴሩ ባወጣው መግለጫ፣ ሁለት F-16 ተዋጊ ጄቶች ወደ አየር ከተላኩ በኋላ፣ በሮማኒያ አየር ክልል ውስጥ የነበረ አንድ ድሮን መለየታቸውንና ከራዳር እስኪጠፋ ድረስ መከታተላቸውን አስታውቋል።

የዩክሬኑ ፕሬዚዳደንት ቮሎዲሚር ዘለንስኪ በጉዳዩ ላይ በሰጡት አስተያየት፤ የሩሲያ ድሮን ከሮማኒያ ግዛት እስከ 10 ኪሎ ሜትር ዘልቆ መግባቱንና ለ50 ደቂቃ ያህል በኔቶ አየር ክልል ውስጥ እንደቆየ መረጃዎች እንደሚያሳዩ ጠቅሰዋል።

ፕሬዚዳንቱ ይህንን ድርጊት ሩሲያ ጦርነቱን እያሰፋች እንደሆነ የሚያሳይ ነው ሲሉ ወቀሳቸውን አቅርበዋል።

ይህ ክስተት ፖላንድ የሩሲያን ድሮኖች አየር ክልሏን ከጣሱ በኋላ የኔቶን ምስራቃዊ ድንበር ለመከላከል ዕቅድ መያዙን ካስታወቀች ከጥቂት ቀናት በኋላ መከሰቱ፣ በአካባቢው ያለውን ውጥረት የበለጠ አባብሶታል ሲል መናኸሪያ ሬዲዮ ዘግቧል።

"በአገር ቤት የነበረኝ የፖለቲካ ተሳትፎ ምንም አልረዳኝም"

ከኢትዮጵያ ወደ ኖርዌይ ከሄደ አስር ዓመት ሆኖታል። ኢትዮጵያ ሳለ በጅማ ዩኒቨርስቲ ለ11 ዓመታት የቋንቋ እና ሥነ ልሳን መምህር ነበር። የሦስተኛ ዲግሪውን ለመሥራት ነበር ወደ ኖርዌይ ያመራው። በእርግጥ በኢትዮጵያ ሳለ ለፖለቲካ ባዕድ አልነበረም። የኦሮሞ ፌደራሊስት ኮንግረስ (ኦፌኮ) አባል በመሆን በፓርቲው የተለያዩ እንቅስቃሴዎች ውስጥ ተሳትፏል።

ቢቢሲ እንደዘገበው፤ ወደ ኖርዌይ ለትምህርት ሲሄድ በኢትዮጵያ የተለያዩ ከተሞች ውስጥ የተቃዋሞ እንቅስቃሴ ተስፋፍቶ ነበር። የቀድሞው የጅማ ዩኒቨርስቲ መምህር አማኑዔል ራጋ ወደ አገሩ መመለስ ስጋት ሲፈጥርበት በኖርዌይ ኑሮውን አደረገ። በኖርዌይ ዜግነት አግኝቶ መኖር ከጀመረ ወዲህ ደግሞ ፖለቲካ ውስጥ በመምረጥም ሆነ በመመረጥ መሳተፍ እንዳለበት ወሰነ።

ከዚያም በኋላ የክርስቲያን ዲሞክራቲክ ፓርቲ አባል ሆኖ መሳተፍ ጀመረ። ከሁለት ዓመት በፊት ፓርቲውን ወክሎ ለኦስሎ ከተማ ምክር ቤት ተወዳድሮ ነበር። ያ ተሳትፎ በፈጠረለት ዕድል የኦስሎ አንድ ክፍለ ከተማ የክርስቲያን ዲሞክራቲክ ፓርቲ ምክትል ሊቀመንበር ሆኖ ተመረጠ። በዚያውም በአካባቢው የክርስቲያን ዲሞክራቲክ ፓርቲ አስተዳደር አባል መሆን ቻለ።

ኖርዌይ ወደ አገራዊ ምርጫ ስታመራ የተለያዩ መንግሥታዊ ያልሆኑ ድርጅቶች፣ ፓርቲው እንዲሁም ግለሰቦችም ፓርቲውን ወክሎ እንዲወዳደር መረጡት። አሁን ደግሞ በአገራዊ ምርጫ ላይ ፓርቲውን ወክሎ እየተሳተፈ ነው።

የኖርዌይ ፖለቲካ ከኢትዮጵያ እጅጉን የተለየ ነው የሚለው አማኑዔል፤ በአገር ቤት የነበረው የፖለቲካ ተሳትፎ ምንም እንዳልረዳው ይናገራል።

"ዲሞክራሲና አካታች የሆነ መንፈስ መፍጠርን፣ ተቃዋሚ ቢመጣ እንደ ጠላት ማየት ሳይሆን የራሱ ዕይታ ያለው የአገሪቱ ዜጋ መሆኑን መቀበልን የተማርኩት እዚህ ነው" ሲል ከቢቢሲ ጋር በነበረው ቆይታ ወቅት ተናግሯል።

በአገሪቱ ውስጥ በርካታ ዕድሎች አሉ የሚለው አማኑዔል፤ "ቁጭ ብሎ ከመመልከት ይልቅ በመሳተፍ የበኩሌን አስተዋጽኦ በማድረግ የምፈልገውን ለመለወጥ መጣር እንዳለብኝ ወሰንኩ" ይላል።

አማኑዔል በኖርዌይ ፖለቲካ ውስጥ ሰፊ አንቅስቃሴ የሚያደርጉ ፓርቲዎች ቢኖሩም የክርስቲያን ዲሞክራቲክ ፓርቲን የመረጠበት ምክንያት በቤተሰብ ዕሴቶች፣ በሰው ልጆች መብትና በሰብዓዊነት ላይ አተኩሮ ስለሚሠራ መሆኑን ለቢቢሲ ተናግሯል።

ኬንያና ሩዋንዳ እስራኤል ባለፈው ማክሰኞ በኳታር ዋና ከተማ ዶሃ ላይ የፈጸመችውን ጥቃት ባወጡት መግለጫ አወገዙ።

የኬንያ የውጭ ጉዳይ ሚኒስቴር ትናንት ሐሙስ መስከረም 1 ቀን 2018 ዓ.ም ባወጣው መግለጫ፤ “ጥቃቱ የኳታርን ሉዓላዊነትና የግዛት አንድነት መጣስ ብቻ ሳይሆን ለመካከለኛው ምስራቅ ቀጠና እና ለአለም አቀፍ ሰላምና ደህንነት ከፍተኛ ስጋት ይፈጥራል” ብሏል።

ሩዋንዳ በበኩሏ ትናንት ባወጣችው መግለጫ፤ "እስራኤል መሠረታዊ የግዛት ሉዓላዊነትን ያለአግባብ መጣሷ አደገኛ ነው፤ ይህም ዓለምን ወደ ሥርዓት አልበኝነት እየመራት ነው" ብላለች።

የሁለቱ አገራት መግለጫዎች የተሰሙት ቀደም ሲል ሌሎች እንደ ናይጄሪያ፣ግብፅ፣ሞሮኮ፣አልጄሪያና ሶማሊያ ያሉ የአፍሪካ ሀገራት በተመሳሳይ እስራኤል በኳታር ላይ የፈጸመችውን ጥቃት ማውገዛቸውን ተከትሎ ነው።