የአፍሪካ ኩራት የሆነው የኢትዮጵያ አየር መንገድ ግሩፕ 80ኛ ዓመት የምሥረታ በዓሉን ምክንያት በማድረግ ያዘጋጀው ልዩ የማይንቀሳቀስ የኤር ትርዒት (Static Air Show) ዛሬ በቦሌ ዓለም አቀፍ አውሮፕላን ማረፊያ በድምቀት ተከፍቷል። አየር መንገዱ ባለፉት ሰማንያ ዓመታት በጽናት ተጉዞ ለደረሰበት ዓለም አቀፋዊ ስኬት ማስታወሻ ይሆን ዘንድ በተከፈተው በዚህ ዝግጅት ላይ፣ ታሪካዊና ዘመናዊ አውሮፕላኖች ለዕይታ ቀርበዋል። ይህ ልዩ ትርዒት የአየር መንገዱን ጥንካሬና የደረሰበትን የላቀ የአቪዬሽን ቴክኖሎጂ አቅም ለጎብኚዎች በቅርበት የሚያሳይ ድንቅ አጋጣሚ ሆኖ ተገኝቷል።

ይህ በዓይነቱ ለየት ያለ ዝግጅት የኢትዮጵያ አየር መንገድ ከአነስተኛ አጀማመር ተነስቶ እንዴት የዓለም ተመራጭ መሆን እንደቻለ ትውልድ ትምህርት እንዲቀስምበት ታስቦ የተዘጋጀ ነው። ጎብኚዎች የአየር መንገዱን ታሪካዊ ጉዞ የሚያሳዩ ልዩ ኩነቶችን ከመመልከታቸውም በላይ፣ የደንበኞቹ የልብ አድራሽ የሆነውን የዚህን ታላቅ ተቋም የ80 ዓመታት የድል ጉዞ በጋራ እያከበሩ ይገኛሉ።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ በመንፈስ ቅዱስ መሪነት ባካሄደው ስብሰባ፣ በሀገራችንና በዓለም ዙሪያ እየታየ ያለው የሰላም መታጣትና ግጭት በእጅጉ እንዳሳሰበው ገልጿል። በመሆኑም ስለ ዓለምና ስለ ሀገራችን ሰላም፣ ስለ ሰው ልጆች ደኅንነት እንዲሁም በሃይማኖታቸው ምክንያት መከራ እየደረሰባቸው ያሉ ኦርቶዶክሳውያንን በማሰብ በመጪው የ2018 ዓ.ም የሐዋርያት ጾም ወቅት በመላው ዓለም በሚገኙ አድባራትና ገዳማት ታላቅ የጸሎተ ምሕላ መርሃ ግብር እንዲከናወን በሙሉ ድምፅ ወስኗል።

ይህ የቅዱስ ሲኖዶስ ውሳኔ የቤተ ክርስቲያኒቱን ሁለንተናዊ ዕድገትና ተቋማዊ ሕልውና ከማስጠበቅ ባሻገር፣ በየቦታው በጦርነትና በስደት የሚገኙ ወገኖችን በጸሎት ለማሰብ ያለመ ነው። በዚህም መሠረት ከሀገር ውስጥ እስከ አጽናፈ ዓለም የሚገኙ የኢትዮጵያ ኦርቶዶክስ ተዋሕዶ ቤተ ክርስቲያን ምእመናን በታወጀው የምሕላ ጸሎት ላይ በንቃት እንዲሳተፉ ጥሪ የቀረበ ሲሆን፣ ፈጣሪ ለሀገራችንና ለዓለም ሰላሙን እንዲያወርድ በጋራ የሚማጸኑበት ወቅት እንደሚሆን ይጠበቃል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የሩዋንዳው ፕሬዝዳንት ፖል ካጋሜ በኪጋሊ እየተካሄደ ያለውን የአፍሪካ ሲኢኦ (CEO) ፎረም ሲከፍቱ፣ በዶናልድ ትራምፕ የሚመራው የአሜሪካ አስተዳደርና ሌሎች ኃያላን ሀገራት በአፍሪካ ላይ የሚያሳዩትን "አምባገነናዊ" አካሄድ በጽኑ ተችተዋል። ፕሬዝዳንቱ በንግግራቸው አፍሪካ በሀብት የታደለች ቢሆንም፣ ኃያላን ሀገራት ግን በአንድ እጃቸው ስለ ዲሞክራሲና ሰብዓዊ መብት እየሰበኩ በሌላ እጃቸው የአፍሪካን የተፈጥሮ ሀብት በግልጽ እየዘረፉ ነው ሲሉ በቁጭት ተናግረዋል። አሜሪካ የአፍሪካ ሀገራት የግል የጤና መረጃዎቻቸውንና የማዕድን መብቶቻቸውን አሳልፈው እንዲሰጡ የምታደርገውን ጫና ውድቅ ያደረጉትን እንደ ዛምቢያ፣ ጋና እና ዚምባብዌ ያሉ ሀገራትንም ካጋሜ አድንቀዋል።

እንደ ዘ አፍሪካ ሪፖርት ዘገባ፣ ካጋሜ አፍሪካ በኃያላን ሀገራት መካከል ለሚደረገው የፖለቲካ ፍላጎት እንደ መጠቀሚያ መሆን የለባትም ብለዋል። በተለይም አሜሪካ በኮንጎ ጦርነት ምክንያት በሩዋንዳ ወታደራዊ ኃይል ላይ የጣለችውን ማዕቀብ በመጥቀስ፣ ኃያላን ሀገራት የበለጠ ጥቅም ወደሚያገኙበት ወገን እንደሚያደሉና አፍሪካን እንደ እኩል አጋር ሳይሆን እንደ ጥሬ ዕቃ ምንጭ ብቻ እንደሚመለከቱ አስረድተዋል። ትራምፕ በማህበራዊ ሚዲያ በሚያሰራጩት ትችቶች ዙሪያ የተጠየቁት ካጋሜ፣ "አስደንጋጭ ክስተቶች የመከላከል አቅም አዳብሬያለሁ" በማለት በፈገግታ ምላሽ ሰጥተዋል።

በመድረኩ ላይ የተገኙት የአፍሪካ መሪዎችና የንግድ ዘርፍ ባለቤቶች አፍሪካን የሚመጥን አቅም ለመገንባትና በዓለም አቀፍ ደረጃ ተደራዳሪ ለመሆን በጋራ መቆም እንዳለባቸው ጥሪ ቀርቧል። ካጋሜ የግል ዘርፍ ባለሙያዎችን በማበረታታት፣ አፍሪካ በሌሎች ሀገራት እርዳታና ብዝበዛ ላይ ከመታመን ይልቅ የራሷን የንግድ ትስስር በመፍጠር "አይቻልም" ወይም "አይሆንም" ማለት መለማመድ እንዳለባት አጽንኦት ሰጥተዋል። የአፍሪካ ሲኢኦ ፎረም መስራች አሚር ቤን ያህመድ በበኩላቸው፣ አፍሪካ ሁሌም የሌሎች ሀገራት ቀውስ ሰለባ መሆኗ ማብቃት እንዳለበትና የራሳችንን የኢኮኖሚ አቅም መገንባት ለድርድር የማይቀርብ ጉዳይ መሆኑን ገልጸዋል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የመንበረ ፓትርያርክ ጠቅላይ ቤተክህነት የቤተክርስቲያንን መንፈሳዊና ማኅበራዊ አገልግሎት ወደ ላቀ ደረጃ የሚያሸጋግር ግዙፍና ዘመናዊ ሕንጻ እያስገነባ ይገኛል። ይህ ታሪካዊ ፕሮጀክት በዋናነት 2300 ሰዎችን በአንድ ጊዜ መያዝ የሚችል ግዙፍ አዳራሽ ያለው ሲሆን፣ በአነስተኛ አዳራሾቹ ደግሞ ተጨማሪ 900 ሰዎችን ማስተናገድ ይችላል። ሕንጻው 120 አባላትን የሚይዝ ልዩ የቅዱስ ሲኖዶስ መሰብሰቢያ አዳራሽን ጨምሮ፣ በመድረኩ ላይ ብቻ 104 መቀመጫዎች ያሉት በመሆኑ ለታላላቅ መንፈሳዊ ጉባኤዎች ምቹ ሆኖ ተዘጋጅቷል። በተጨማሪም ዘመናዊ ማብሰያ የተገጠመለትና በአንድ ጊዜ 1000 ሰዎችን የሚያስተናግድ ሰፊ የመመገቢያ አዳራሽ እንዲሁም በቂ የመኪና ማቆሚያ ተካቶበታል።

ይህ አዳራሽ በቴክኖሎጂ ረገድ እጅግ ዘመናዊ ሲሆን፣ በአንድ ጊዜ እስከ 24 ቋንቋዎች የትርጉም አገልግሎት መስጫ ክፍሎችና የመጨረሻው የቴክኖሎጂ ውጤት የሆኑ ግዙፍ ስክሪኖች ይገጠሙለታል። ለኪናዊና መንፈሳዊ ዝግጅቶች የሚሆኑ ዘመናዊ መጋረጃዎችና የኦዲዮ ቪዥዋል መሣሪያዎች የተሟሉለት ሲሆን፣ በአሁኑ ወቅት ከ24 ኮንቲነር በላይ ወንበሮችና የኤሌክትሮ ሜካኒካል መሣሪያዎች ወደ ሀገር ውስጥ እየገቡ ይገኛሉ። ይህ ታላቅ ፕሮጀክት ሲጠናቀቅ ቤተክርስቲኗ ለምታከናውናቸው አህጉራዊና ዓለም አቀፋዊ ጉባኤዎች ትልቅ አቅም ከመሆኑም በላይ፣ የስብከተ ወንጌልና የአስተዳደራዊ አገልግሎቷን በከፍተኛ ሁኔታ እንደሚያዘምነው ይጠበቃል።

/ EOTC Broadcasting Service Agency/

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የአዲስ አበባ ባህልና ኪነ-ጥበብ ቢሮ "የማህበራዊ ሚዲያ ተጽዕኖ በኢትዮጵያ ፊልም ኢንዱስትሪ" በሚል መሪ ቃል ባዘጋጀው የሂስ መድረክ፣ በቴክኖሎጂው መስፋፋት ምክንያት ዘርፉ የገጠሙትን ስጋቶችና መልካም አጋጣሚዎች በዝርዝር ገምግሟል። በመድረኩ ላይ ጥናታዊ ጽሑፍ ያቀረቡት ዶ/ር ተሻለ አሰፋ፣ የማህበራዊ ሚዲያ መስፋፋት የፊልም ተመልካቾችን ፍላጎትና የገበያ ሁኔታ በእጅጉ እየቀየረው መሆኑን ጠቁመዋል። ይህ አዲስ ክስተት በፊልም ኢንዱስትሪው ላይ የፈጠረውን አዎንታዊና አሉታዊ ተፅዕኖ በምሁራዊ ጥናት በማስደገፍ፣ ዘርፉ ካለበት መቀዘቅዝ ወጥቶ ከዘመኑ ጋር አብሮ መራመድ ስላለበት ሁኔታ ሰፊ ውይይት ተደርጓል።

ዶ/ር ተሻለ ለመጪው ስጋት መፍትሄ ይሆናሉ ያሏቸውን ነጥቦች ሲያመለክቱ፤ አዲስ የፊልም ተመልካች መፍጠር፣ የፊልም ማሳያ አዳራሾችን በቴክኖሎጂ ማዘመንና በይዘትም ሆነ በቅርጽ ተወዳዳሪ የሆኑ ስራዎችን ማምረት ወሳኝ መሆናቸውን አጽንኦት ሰጥተዋል። በተጨማሪም መንግስት የፊልም መስሪያ መሳሪያዎች ያለ ቀረጥ የሚገቡበትን መንገድ በማመቻቸት ለባለሙያው ድጋፍ እንዲያደርግ ጥሪ ቀርቧል። የቢሮው ም/ኃላፊ ወይዘሮ ሉባባ ጀማል በበኩላቸው፣ ቴክኖሎጂው ያስከተለውን ተፅዕኖ በአዎንታዊ መልኩ በመረዳት ለዘርፉ እድገት እንደ ትልቅ እድል ልንጠቀምበት እንደሚገባና ባለሙያዎች ራሳቸውን ማዘመን እንዳለባቸው አሳስበዋል።

በአሜሪካ እና በቻይና መካከል ያለው የእንግዳ አቀባበል ወይም የዲፕሎማሲያዊ ፕሮቶኮል ልዩነት ታዝባችኋል? አሜሪካ እንደቻይና ሰልፍ ትርኢት ብሎ ነገር የለም። ዋይት ሀውስ ትሄዳለህ የምትለውን ብለህ ፣ ምሳህን በልተህና ፎቶ ተነስተህ በአዳሪው አውሮፕላን ወደአገርህ።

ቻይና እንግዶችን በደመቀ ሁኔታ፣ በብዙ ሺህ በሚቆጠሩ ሰዎች ሰልፍ እና በታላቅ ትርኢት ትቀበላለች። ያ ሁሉ ሕዝብ እንደአንድ ሰው አንድ አይነት ስቴፕ ሲከተል ይደንቀኛል። ያው የቻይና የመንግስት መዋቅር ማዕከላዊ በመሆኑ፣ መንግስት ብዙ ሰዎችን በአጭር ጊዜ ውስጥ አስተባብሮ ለትልቅ ትርኢት የማሰለፍ አቅሙ ከፍተኛ ነው። ማንኛውም ሰው ና ከተባለ ሂዶ ይሰለፋል። እንዲህ ያሉ ሰልፎች የሀገሪቱን አንድነት፣ ስርዓት እና ለታላቅ እንግዳ የሚሰጠውን ክብር ለመግለጽ እንደ መሣሪያ ያገለግላሉ።

 

ወዳጀ... ወደአሜሪካ ተሻገር... በአሜሪካ ሰዎችን የግድ በሰልፍ እንዲወጡ ማድረግ ወይም ተማሪዎችን ከትምህርት ቤት አውጥቶ እንግዳ እንዲቀበሉ ማድረግ እንደ ግለሰብ ነፃነት ጥሰት ሊታይ ይችላል። አይታሰብም። ኢንዲቪጅዋሊዝም መጅኑን ነው። ና ተሰለፍ ብትለው ፒዛውን እየገመጠና በደምበጃን ኮካውን እየከካ መሃል ጣቱን ሊያሳይህ ይችላል። እንግዳ አቀባበሉ ብዙውን ጊዜ በዲፕሎማሲያዊ ክበቦች እና በታወቁ የክብር ቦታዎች (ለምሳሌ በዋይት ሀውስ ግቢ) ብቻ የተገደበ ነው። ዋናው የመጣህበት ነዳጅ (ማነው ጉዳይ) ነው።

 

ማንኛውም ለመንግስት እንግዳ የሚወጣ ወጪ በግብር ከፋዩ ገንዘብ የሚሸፈን በመሆኑ፣ በጣም የተጋነኑ እና እጅግ ብዙ ሰው የሚሳተፍባቸው ትርኢቶች "የሕዝብን ገንዘብ ማባከን" ተብለው በፖለቲከኞች እና በሕዝብ ዘንድ ትችት ሊያስከትሉ ይችላሉ። ቻይና እንዲህ ያለ መዘባነን የለም። ባከነ ብትል "በኡንቱዙ ካንቱዙ" ካራቴ ያባክንሃል። ሕዝብ ነህ እንጅ ምንድነህ!

የሆነ ሆኖ ሶስተኛ ክፍል ተማሪ እያለሁ ስፖርት አስተማሪያችን ግንቦት 20ን ማስስፖርት? በሚባል ነገር ለማክበር ወደመቶ ሃምሳ ተማሪ መረጠ። እኔ አልፈልግም ብልም አስገድዶ ነው ያስገባኝ። ሁለት ወር አሰለጠነን (ግነት አይደለም... ከዚያ ሁሉ ተማሪ ፈፅሞ የማይሆንልኝ ወንጋራ እኔ ብቻ ነበርኩ። የግሩፕ ስራ አይሆንልኝም)

የመጀመሪያው ፊሽካ ወደቀኝ፣ ሁለተኛው አምስት እርምጃ ወደኋላ፣ ሶስተኛው አስር እርምጃ በሩጫ ወደቀኝ ነጭ ጨርቅ እያውለበለቡ ሄዶ ... በጀርባ መተኛት.... ወዘተ በመጨረሻ እንግዶቹ መጥተው ትርኢቱ ቀረበ። ገና የመጀመሪያ ፊሽካ ሲጮህ ይዟዟርብኝ ጀመረ። የመጨረሻው ፊሽካ ሲነፋ ሁሉም የሮጠውን ሩጦ በጀርባው ሲለሸለሽ እኔ የእርምጃው ቁጥርና አቅጣጫ ተወጫበረብኝ። (ደሴ ሆጤ ሜዳን ካወቃችሁት) እጅ ሊሰጥ ወደጠላት ምሽግ እንደሚሮጥ ወታደር ነጭ ጨርቅ እያውለበለብኩ ሜዳውን አልፌ በካታንጋ በኩል መብራት ሃይል ግቢ ልገባ ስል ተመልካቹ ነው እጅና እግሬን ይዞ ወደሰልፉ የመለሰኝ (እንኳን ቲክቶክ የሌለበት ጊዜ ሆነ )

ቲቸር ተናዶ "ገና ቦርከና ትገባለህ" አለኝ።(ቦርከናን ለማታውቁ ለእኛ ለደሴ ልጆች ከአለም አንደኛ ወንዝ ነው) ነፍሱን ይማር በወሩ ነው መሰል አረፈ። (በአንተ ብስጭት ነው ቲቸር ያረፈው የሚለኝ ልጅ አለ እስከአሁን) ኧረ በመኪና አደጋ ነው ብል፣ እኮ ብቻውን በብስጭት እያወራ መንገድ ሲሻገር...!

የቀጣዩን የዓለም ዋንጫ ትኬት ለገዙ ተመልካቾች የአሜሪካ መንግሥት ልዩ እፎይታ የሚሰጥ ውሳኔ አስተላለፈ። ቀደም ሲል የቪዛ ቆይታ ጊዜያቸውን የሚያሳልፉ ሰዎችን ለመቀነስ በሚል ተጥሎ የነበረው የ15,000 ዶላር (ከ850,000 ብር በላይ) የቪዛ ማስያዣ ክፍያ፣ ትኬት በገዙ የ50 አገራት ዜጎች ላይ ተፈጻሚ እንደማይሆን የትራምፕ አስተዳደር በይፋ አስታውቋል።

ይህ ውሳኔ በተለይ ለአምስቱ የአፍሪካ አገራት (አልጄርያ፣ ኬፕ ቨርዴ፣ አይቮሪ ኮስት፣ ሴኔጋል እና ቱኒዝያ) ደጋፊዎች ትልቅ እድል የፈጠረ ሲሆን፣ ተጫዋቾችና አሠልጣኞችም ከዚህ ቀደም ከክፍያው ነፃ መደረጋቸው ይታወሳል። ይሁን እንጂ እንደ ኢራን እና ሔይቲ ያሉ አገራት ደጋፊዎች አሁንም በውሳኔው ውስጥ ያልተካተቱ ሲሆን፣ ቱሪስቶች የአምስት ዓመት የማኅበራዊ ሚዲያ ታሪካቸውን እንዲያቀርቡ የሚጠይቀው ደንብ እንደጸና ይገኛል።

ፊፋ ከዋይት ሀውስ ጋር በመተባበር ስኬታማ ውድድር ለማካሄድ እየሰራ መሆኑን ገልጾ፣ የአሜሪካ መንግሥት ላሳየው ትብብር ምስጋናውን አቅርቧል። አሜሪካ፣ ካናዳ እና ሜክሲኮ በጋራ በሚያስተናግዱት በዚህ ታላቅ ስፖርታዊ ኩነት ላይ ተመልካቾች የቪዛ ቆይታቸውን አክብረው ከወጡ ያስያዙት ገንዘብ (ክፍያው በሚመለከታቸው ላይ) ተመላሽ እንደሚደረግላቸው ተገልጿል።

የአሜሪካ መከላከያ ሚኒስቴር በቅርቡ ይፋ ያደረጋቸውን ያልታወቁ በራሪ አካላት (UFO) የሚያሳዩ ምስሎችና ቪዲዮዎችን ተከትሎ፣ ታዋቂ የሃይማኖት ምሁራን ነገሩ ከሌላ ፕላኔት ፍጡራን ይልቅ ከመንፈሳዊው ዓለም ጋር የተያያዘ ሊሆን እንደሚችል ገለጹ። እንደ ጄረሚ ጆንስተን ያሉ የቲዎሎጂ ምሁራን፣ እነዚህ በሰማይ ላይ የሚታዩ እንግዳ ብርሃናትና አካላት "ከሌላ ፕላኔት የመጡ" ሳይሆኑ "ከሌላ ዓለም/ልኬት የመጡ" ወይም "የወደቁ መላእክት" ሊሆኑ እንደሚችሉ ጥርጣሬያቸውን ሰንዝረዋል።

ፔንታገን ይፋ ያደረገው መረጃ ከአፖሎ ጠፈርተኞች ጀምሮ በተለያዩ ጊዜያት የታዩ ከ160 በላይ ፋይሎችን፣ ቪዲዮዎችንና ፎቶግራፎችን ያካተተ ቢሆንም፣ የክርስትና መሪዎቹ ግን በቀረቡት ምስሎች እንዳልተደነቁ ገልጸዋል። ጄረሚ ጆንስተን ባሰፈሩት ጽሑፍ፣ ባዕድ ፍጥረታት መኖራቸውን የሚያረጋግጥ አሳማኝ ማስረጃ አለመኖሩን ጠቅሰው፣ የቀረቡት ምስሎችም ጥራት የሌላቸውና ግልጽ ያልሆኑ መሆናቸውን ተችተዋል። የቀድሞው ፕሬዝዳንት ባራክ ኦባማ በአንድ ወቅት የተናገሩትን በመጥቀስም፣ "መንግሥት እውነትም የባዕድ ፍጥረታት አስከሬን በእጁ ቢኖር ኖሮ፣ አንድ ተራ ጥበቃ እንኳ ፎቶ አንስቶት በወጣ ነበር" ሲሉ ምስጢራዊነቱን አጣጥለዋል።

ይህ አዲስ መላምት በሳይንሱና በሃይማኖታዊው አስተሳሰብ መካከል ያለውን ልዩነት ይበልጥ ያጎላ ሲሆን፣ በተለይ በቤተ ክርስቲያን መሪዎች ዘንድ እነዚህ ክስተቶች እንደ መንፈሳዊ ምልክት እየታዩ ነው። የአሜሪካ መንግሥት ፋይሎቹን ይፋ ማድረጉን ቢቀጥልም፣ የሃይማኖት ምሁራኑ ግን ሰዎች ከሳይንሳዊ ግምቶች ይልቅ ነገሩን ከመጽሐፍ ቅዱሳዊው "የወደቁ መላእክት" እና "መጥፎ መናፍስት" እንቅስቃሴ አንፃር እንዲመለከቱት እያሳሰቡ ይገኛሉ።

በዓለም አቀፍ የማራቶን ውድድሮች ስሟ በደመቀ ሁኔታ የሚነሳውና የበርካታ ድሎች ባለቤት የሆነችው አትሌት የብሩጓል መለሰ፣ በ36 ዓመቷ ከዚህ ዓለም በሞት ተለይታለች። አትሌቷ ለታማራክ ሆምስ ኦታዋ ዓለም አቀፍ ማራቶን ዝግጅቷን በአዲስ አበባ በማድረግ ላይ ሳለች፣ በድንገት ባጋጠማት የጤና እክል ወደ ሆስፒታል ብትወሰድም ህይወቷ ሊተርፍ አልቻለም።

የብሩጓል መለሰ ላለፉት 15 ዓመታት በሩጫው ዓለም ስሟ በከፍተኛ ደረጃ ሲጠቀስ የቆየ ሲሆን፣ በተለይም እ.ኤ.አ በ2018 እና 2019 የሻንጋይ ማራቶንን በበላይነት በማጠናቀቅ ታሪክ ሰርታለች። በተጨማሪም በ2015 የፕራግ እና የሂውስተን ማራቶን አሸናፊ የነበረች ሲሆን፣ በቺካጎ ማራቶንም ሁለተኛ በመውጣት ድንቅ ብቃቷን አሳይታለች። የግል ምርጥ ሰዓቷን (2:19:36) በዱባይ ማራቶን ያስመዘገበችው የብሩጓል፣ በሩጫው ዓለም እጅግ ፈታኝ የሚባለውን የ2 ሰዓት ከ20 ደቂቃ በታች ማጠናቀቅ የቻለች ድንቅ አትሌት ነበረች። በመጨረሻው የውድድር ዘመኗም በባርሴሎና ማራቶን ሁለተኛ በመውጣት አሁንም ድረስ በብቃት ላይ መሆኗን አስመስክራ ነበር።

አትሌት የብሩጓል መለሰ በውድድር መድረኮች ላይ ባላት ብቃት ብቻ ሳይሆን፣ በመጨረሻዎቹ 10 ኪሎ ሜትሮች ላይ በምታሳየው አስደናቂ ፍጥነትና ብርታት ትታወቃለች። ይህቺ ጀግና በሞት ብትለየንም በስፖርቱ ዓለም ያስመዘገበቻቸው ድሎች ሁሌም ሲታወሱ ይኖራሉ። የብሩጓል መለሰ ባለትዳርና የሁለት ልጆች እናት የነበረች ሲሆን፣ ህልፈቷ ለቤተሰቦቿ ብቻ ሳይሆን ለመላው የሀገራችን ስፖርት ትልቅ ኪሳራ ነው። ለአትሌቷ ቤተሰቦች፣ ለጓደኞቿና ለደጋፊዎቿ በሙሉ መጽናናትን እንመኛለን። ነፍስሽ በሰላም ትረፍ ጀግናዋ!