በትግራይ ክልል ተቋርጦ የቆየው የትጥቅ ማስፈታትና ታጣቂዎችን ወደ ሰላማዊ ሕይወት የመመለስ ሂደት እንደገና ተጀምሯል። በዚህም መሠረት ከወታደራዊ ሕይወት ወጥተው ወደ መደበኛ ኑሮ መመለስ የሚፈልጉ ወጣቶች መሣሪያዎቻቸውን ለሀገር መከላከያ ሠራዊት ካስረከቡ በኋላ፣ በመቐለ በሚገኘው የትግራይ ፖሊስ ኮሚሽን ማዕከል በመቅረብ ላይ እንደሚገኙ የመንግሥት ሚዲያ ዘግቧል፡፡

የብሔራዊ ተሃድሶ ኮሚሽን የቀደሙ ታጣቂዎች ወደ ህብረተሰቡ ተቀላቅለው በሰላምና በልማት ሥራዎች እንዲሳተፉ ጥሪውን አስተላልፏል። ሂደቱ ስኬታማ እንዲሆን የመንግሥት፣ የአካባቢ ተቋማት እና የዓለም አቀፍ አጋሮች ቅንጅታዊ ድጋፍ ወሳኝ መሆኑ የተጠቆመ ሲሆን፣ መመዝገብ የሚፈልጉ ታጣቂዎች በመቐለ በሚገኙት የትግራይ ፖሊስ ኮሚሽን ወይም የሰሜን እዝ ማዕከላት በመቅረብ እንዲመዘገቡ ጥሪ ቀርቧል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

በትግራይ ክልል የዓዲ ጉዶም ከተማ ነዋሪዎች የፌደራል መንግሥት ወደ አካባቢያቸው መግባቱን የሚደግፍና የሕገ-ወጡን የሕወሓት ቡድን ድርጊት የሚያወግዝ ሰፊ ሰላማዊ ሰልፍ አካሂደዋል። ነዋሪዎቹ ቀደም ሲል በቡድኑ ይካሄድ በነበረው አስገዳጅ የታጣቂዎች ምልመላ፣ የሕፃናትና ወጣቶች አፈና እንዲሁም የማያቋርጥ የጦርነት ስጋት ተስፋ ቆርጠው ይኖሩ እንደነበር አስታውሰዋል። ነገር ግን የፌደራል መንግሥት አካባቢውን ከተቆጣጠረ በኋላ የተፈጠረው ሰላምና መረጋጋት አዲስ የተስፋ ብርሃን ፈንጥቆልናል ሲሉ መናገራቸውን አዲስ ሚዲያ ኔትዎርክ ዘግቧል።

በሰልፉ ላይ አስተያየታቸውን የሰጡት ነዋሪዎች እንደተናገሩት፣ ቡድኑ በግዴታ ወደ ጦር ግንባር የወሰዳቸው ወጣቶችና ሕፃናት አብዛኞቹ ተመልሰው እንዳልመጡና የመጡትም ቢሆኑ በደረሰባቸው ከባድ የአካል ጉዳት ምክንያት አሰቃቂ ሕይወት ለመኖር መገደዳቸውን በቁጭት ገልጸዋል። በመሆኑም ከጦርነት ይልቅ ሰላም በመስፈኑ ደስተኛ መሆናቸውንና አሁን ልጆቻቸውን አሳድገው ለቁም ነገር ለማብቃትና ሰላማዊ ሕይወት ለመኖር እንደሚፈልጉ ተናግረዋል።

በተጨማሪም ነዋሪዎቹ ቀደም ሲል በነበረው አስተዳደር ምንም ዓይነት የልማት ሥራ እንዳልተሰራና አሁንም የመብራት፣ የውሃ እና የመንገድ መሰረተ ልማት ችግሮች እንዳሉባቸው ጠቁመዋል። «እኛ ኢትዮጵያውያን ነን፤ ወደፊት ከሌሎች ኢትዮጵያውያን ወንድምና እህቶቻችን ጋር በመሆን አካባቢያችንን ለማልማት ዝግጁ ነን» ሲሉም ተናግረዋል፡፡

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የኢትዮጵያ መከላከያ ሠራዊት ከትግራይ የሰላም ኃይል ጋር በመሆን ወደ አኽሱም፣ ሸራሮ፣ ዛላንበሳ እና ኢሮብ እየገሰገሱ መሆናቸው ተገለጸ።

የትግራይ የሰላም ኃይል ቃል አቀባይ ኮለኔል ሰሎሞን ኃይለማሪያም በሰጡት መግለጫ፤ በሰሜን ምዕራብ አቅጣጫ የተሰማራው ኃይል ዓዲ ዳዕሮ፣ ዓዲ ነብሪኢድ እና ዓዲ ሃገራይን ነፃ በማውጣት ወደ ሸራሮ በመገስገስ ላይ እንደሚገኝ አስታውቀዋል። በተጨማሪም ሰለኽለኻንና ውቕሮ ማራይን ነፃ ያወጣው ስብስብ ወደ አኽሱም ከተማ እየተጠጋ ሲሆን፣ በታንቤን በኩል የተሰማራው ኃይል ደግሞ ወደ ኤርትራ ድንበር አቅራቢያ ወደሚገኙት ራማ እና ጭላ አካባቢዎችን እያቀና ነው። በምስራቅ ትግራይ ያለው ሰራዊትም እንዲሁ ወደ ጉሎመኸዳ፣ ዛላንበሳ እና ኢሮብ እንቅስቃሴውን ቀጥሏል።

በሌላ በኩል፣ የመከላከያ ሠራዊትና አጋሩ የሰላም ኃይል ስልታዊ የነበረችውን የዓድዋ ከተማን ሙሉ በሙሉ ተቆጣጥረዋል። የፈረንሳይ ዜና አገልግሎት (AFP) የከተማዋን ነዋሪዎች ጠቅሶ እንደዘገበው፣ የፌዴራል ኃይሎች ወደ ዓድዋ ሲገቡ ከህወሓት ወታደሮች ምንም ዓይነት ፍልሚያ ወይም መከላከል አልገጠማቸውም። የትግራይ ኃይሎች ከተማዋን ለቀው የወጡት ቀደም ብሎ በመሆኑና በኃይሎቹ መውጣት እና መግባት መካከል የጊዜ ክፍተት በመፈጠሩ፣ በአድዋ ሆስፒታል እና በተለያዩ የመንግስት ተቋማት ላይ የዘረፋ ድርጊቶች መፈጸማቸውን የአይን ምስክሮች ገልጸዋል።

በተመሳሳይ የከተማዋ ነዋሪዎች የመንግሥት ወታደሮች ቢገቡም ገና ሙሉ በሙሉ ባለመረጋጋቱ ምክንያት በስጋት ሳቢያ መንገዶች ባዶ መሆናቸውን ተናግረዋል። ከዚህ ቀደም መስከረም 24 ቀን 2019 ዓ.ም በአድዋ ከተማ የሚገኝ አንድ ሆቴል በድሮን ጥቃት ጉዳት ደርሶበት እንደነበር ኤሲኤልኢዲ (ACLED) የተባለው የጥናት ቡድን ማስታወቁ ይታወሳል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

ኦነግ ዛሬ ባወጣው መግለጫ የመንግሥትን የባሕር በር የማግኘት ጥረት በቅንነት እንደሚደግፍ አስታውቋል። የኢትዮጵያ ህዝብ ቁጥር በከፍተኛ ሁኔታ እየጨመረና ኢኮኖሚዋም እያደገ መሄዱን የገለጠው ኦነግ፣ ለዚህ ደሞ የባሕር በር ማግኘት አማራጭ የለውም ብሏል።

ሁሉም የኦሮሞ የፖለቲካ ኃይሎች የሀሳብ ልዩነታቸውን ወደ ጎን በመተው ለኦሮሞ ሕዝብ ጥቅምና ደኅንነት በጋር የሚሠሩበት ጊዜው አሁን ነው ሲል ኦነግ ጥሪ አቅርቧል።

በሌላ በኩል በሰሜን ኢትዮጵያ የሚደረጉ ጦርነቶች የኦሮሚያን ሀብት ለመበዝበዝ ያለሙ ናቸው ያለው ድርጅቱ፤ "በዚያ አካባቢ የሚደረጉ ወታደራዊ ጥምረቶች ኦሮሞንና ኦሮሞነትን ለማጥፋት ያለሙ ናቸው" ሲል አቋሙን ገልጿል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

ሶማሊላንድ ኢትዮጵያ የቀይ ባሕር ዳርቻዎችን እና የበርበራ ወደብን እንድትጠቀም ሁኔታዎችን ለማመቻቸት አሁንም ዝግጁ መሆኗን ገለጸች። የሶማሊላንድ የውጭ ጉዳይ ሚንስትር አብዲራህማን ዳሂር ባካል እንደተናገሩት፣ ኢትዮጵያ ልትጠቀምበት የምትችል ረጅም የባሕር ዳርቻ አለን፤ በተጨማሪም የበርበራ ወደብ ከ30 እስከ 40 በመቶ የሚደርሰው አቅሙ እስካሁን ጥቅም ላይ አልዋለም ብለዋል።

ሚንስትሩ አክለውም ኢትዮጵያ ሉዓላዊነቷን ከሚጥስ ማንኛውም ኃይል ራሷን የመከላከል መብት እንዳላት ገልጸዋል። አያይዘውም በኢትዮጵያ እና በኤርትራ መካከል ያለው ውዝግብ በንግግር እንዲፈታ ጥሪ ማድረጋቸውን ስካይ ኒውስ ዓረቢያ ዘግቧል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

ጠቅላይ ሚኒስትር ዐቢይ አሕመድ ከእስራኤሉ አቻቸው ከጠቅላይ ሚኒስትር ቤንያሚን ኔታንያሁ ጋር በሁለትዮሽ ግንኙነት እና በቀጣናዊ ጉዳዮች ዙሪያ በስልክ ውይይት አድርገዋል።

ጠቅላይ ሚኒስትር ዐቢይ በማህበራዊ ሚዲያ ገጻቸው ባስተላለፉት መልዕክት፣ ውይይታቸው ፍሬያማና ገንቢ መሆኑን ገልጸው፤ ሁለቱ መሪዎች በኢትዮጵያና በእስራኤል ግንኙነት እንዲሁም በዋና ዋና ቀጣናዊ ሁነቶች ላይ መክረዋል።

በውይይታቸውም ሁለቱ ሀገራት በጋራ ጉዳዮች ላይ ያላቸውን የትብብር ቁርጠኝነት በድጋሚ ማረጋገጣቸውን ጠቅላይ ሚኒስትሩ አብራርተዋል።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

የኢትዮጵያ ከ17 ዓመት በታች ብሔራዊ ቡድን የሴካፋ ማጣሪያ ጨዋታውን ከቡሩንዲ ጋር አድርጎ 3 ለ 0 በሆነ ውጤት አሸንፏል፡፡

በኪጋሊ ፔሌ ስታዲየም በተደረገው በዚህ ጨዋታ የኢትዮጵያን የማሸነፊያ ግቦች ዘሚካኤል ምንያህል፣ አክረም አብዱሰላም እና አብዲሳ ጉተማ ከመረብ አሳርፈዋል፡፡

በሴካፋ ከ17 ዓመት በታች አፍሪካ ዋንጫ ማጣሪያ ውድድር ላይ ተሳታፊ የሆነው የኢትዮጵያ ከ17 ዓመት በታች ብሔራዊ ቡድን ዛሬ ያደረገው ጨዋታ የምድቡ የመጀመርያው መርኃ ግብር ነው፡፡

በአሰልጣኝ ቤንጃሚን ዚመር የሚመራው የኢትዮጵያ ከ17 ዓመት በታች በሔራዊ ቡድን ከሁለት ቀናት በኋላ ከዩጋንዳ አቻው ጋር ሁለተኛ የምድብ ጨዋታውን ያከናውናል።

ጄነራል ታደሰ ወረደ እና ሌሎች የቀድሞ የሕወሃት መኮንኖች ከእስር መለቀቃቸውን ምንጮች አስታወቁ። በአሁኑ ጊዜ መኮንኖቹ በሀገር መከላከያ ሰራዊት እጅ የሚገኙ ሲሆን፣ በደህና ሁኔታ ላይ መሆናቸውም ታውቋል።

እነዚህ መኮንኖች በህወሓት ከታሰሩበት ከመቀሌ ወደ ሰሜን ድንበር ተወስደው እንደነበር ይታወሳል። ይህም ለኤርትራ መንግሥት ይሰጣሉ የሚል ትልቅ ስጋት ፈጥሮ እንደነበር አይዘነጋም።

ጄነራል ታደሰ ወረደ በፌዴራሉ መንግሥት የትግራይ ክልል ጊዜያዊ አስተዳደር ፕሬዚዳንት ሆነው ዳግም መመረጣቸውን ተከትሎ፣ የህወሃት አመራሮች በሃይል ከሥልጣናቸው በማውረድ ለአጭር ጊዜም ቢሆን የራሳቸውን አስተዳደር መሥርተው እንደነበር ይታወቃል፡፡

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…

ታዋቂዋ ድምፃዊት ቬሮኒካ አዳነ «ቢሮኒካ» በተሰኘው ዘፈኗ በአፍሪካው የዚኮሞ አዋርድስ (Zikomo Awards) በ5 ዘርፎች እጩ ሆና መመረጧን ገለጸች። ባለፈው ዓመትም በ4 ዘርፎች ታጭታ የ2 ዘርፎች አሸናፊ በመሆን ሀገሯን ኢትዮጵያን ማስጠራቷ ይታወሳል።

ድምፃዊቷ አሁን ድምፅ መስጠት ስለተጀመረ አድናቂዎቿ ድጋፋቸውን እንዲሰጧት ጠይቃለች። ወደ ታንዛኒያ በመሄድ አምስቱንም ሽልማቶች ይዛ ለመመለስ ትልቅ ተስፋ እንዳላት ጠቁማ፣ ለመላው አድናቂዎቿና ቤተሰቦቿ ያላትን ፍቅር ገልጻለች።

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…