ኦፕራ ዊንፍሬይ በደንብ ሳንዘጋጅ እና ሳንደራጅ ስርጭት መጀመራችን ዋጋ እያስከፈለን ነው ማለቷን  የጠቆመው አሶስዬትድ ፕሬስ፤ የኦፕራ ጣቢያ  ከታዋቂዎቹ ሲቢኤስ፤ ኤንኤቢሲ እና ጂኤምኤ ኔትዎርኮች ጋር የመፎካከር አቅም የለውም ብሏል፡፡ በቴሌቭዥን ጣቢያው ከኦፕራ ዊንፍሬይ ጋር በመሻረክ ከ300 ሚሊዮን ዶላር በላይ ኢንቨስት ያደረገው “ዲስከቨሪ ኮሚኒኬሽን”ም ጣቢያው በደረሰበት ኪሳራ እየተጎዳ ነው፡፡ ኩባንያው በቅርቡ የማኔጅመንት ቀውስ እንደገጠመውና ከሰራተኞቹ እንደቀነሰ ተገልጿል፡፡

የኦውን ጣቢያ ስርጭት በየቀኑ የሚያገኘው ተመልካች በአማካይ ከ180ሺ አይበልጥም፡፡ ኦፕራ የዊትኒ ሂዩስተንን ቤተሰብ ቃለ መጠይቅ ስታደርግ 3.5 ሚሊዮን እንዲሁም ከሌዲ ጋጋ ጋር በቀጥታ ስርጭት ሲያወጉ 800ሺ ታዳሚዎች እንደነበሯት ያመለከተው ሲቢኤስ፤ ከዚያ ውጭ ግን በጣቢያው መደበኛ ፕሮግራሞች እንዳልተሳካላት ጠቁሟል፡