Administrator

Administrator

የታጠቁና በውጊያ ላይ ያሉ ተቃዋሚ ቡድኖችን ያሳተፈና ሁሉን አቀፍ የሆነ ብሄራዊ ውይይት እንዲካሄድ የኦሮሞ ፌደራሊስት ኮንግረስ (ኦፊኮ) ጠየቀ፡፡
መንግስት በአገሪቱ የፖለቲካ ሃይሎች መካከል መግባባትን ለመፍጠር ሁሉን አካታች ውይይት በሚቀጥለው እንደሚካሄድ አስታውቋል። ኦፊኮ በዚህ ሁሉን አካታች ውይይት ውስጥ ለመሳተፍ አራት ቅድመ ሁኔታዎችን ያካተተ መግለጫ ሰሞኑን አውጥቷል፡፡ በዚህ መግለጫውም በሰሜን ኢትዮጵያ እየተካሄደ ያለው ጦርነት በአፋጣኝ እንዲቆምና ተፋላሚ ወገኖች ለውይይት እንዲቀመጡ፣ ብሄራዊ ውይይቱ ታጣቂ ተቃዋሚ ቡድኖችን ያካተተ እንዲሆን፣ ውይይቱ በገለልተኛ ነፃ አካላት እንዲሁም በእስር ላይ የሚገኙ የፖለቲካ እስረኞች እንዲፈቱ የሚል ባለ አራት ነጥብ ቅድመ ሁኔታዎች አስቀምጧል፡፡
በዚህ ጉዳይ ላይ የኦፌኮን ምክትል ሊቀመንበር አቶ ሙላቱ ገመቹን ጋዜጠኛ መታሰቢያ ካሳዬ አነጋግራቸዋለች።
በብሔራዊ ውይይቱ ላይ ለመሳቱፍ ያቀረባችኋቸው አራቱ ቅድመ ሁኔታዎች ተቀባይነትን አግኝተው በውይይቱ ላይ እንድንሳተፍ ያደርገናል ብላችሁ ታስባላችሁ?
ለማካሄድ የታሰበውን እውነተኛና ሀቀኛ ብሔራዊ ውይይት ከሆነና አገሪቱ ከገባችበት ፖለቲካዊ ቀውስ ሊያወጣት የሚችል ሁሉን አቀፍ ውይይት ከሆነ፣ ያቀረብናቸውን አራት ቅድመ ሁኔታዎች መቀበል የማይቻልበት ምንም ምክንያት የለም፡
ካቀረባችሁት ቀድመ ሁኔታ መካከል አንዱ ጦርነቱ እንዲቆምና ተፋላሚ ወገኖች ለወይይት እንዲቀመጡ የሚል ነው። በህውሃት ሃይሎችና በመንግስት መካከል የሚደረገውን ጦርነት ማለታችሁ ነው?
አዎ፣ እሱንም የሚያካትት ነው። ግን ልብ ሊባል የሚገባው ጉዳይ፣ በአሁኑ ወቅት ጦርነት የማይካሄድበት የአገሪቱ ክፍል የለም። በአፋርና በሱማሌ በኩል፣ በኦሮሚያ ሁሉም አካባቢዎች፣ በቤንሻንጉል ጉሙዝ 200 ሰዎች እንደ ጎመን በአንድ ቀን የታጨዱበትና  ተጠያቂ  እንኳን የሌለበት፣ በደቡብ፣ በጋምቤላ፣ በአማራና ቅማንት በኩል… በሁሉም የኢትዮጵያ ክፍል ውስጥ ጦርነት አለ። እነዚህ ሁሉ ጦርነቶች ቆመው ሁሉም ወገን በአገሩ ጉዳይ ላይ ቁጭ ብሎ የጋራ ውይይት ሊያደርግ ይገባል።
የህዝብ ተወካዮች ምክር ቤት በአሸባሪነት ከፈረጃቸውና በርካታ ንፁሃንን በግፍ እየገደሉ ካሉ ሽብርተኛ ከተባሉ ወገኖች ጋር እንዴት ውይይት ማድረግ ይቻላል ብለው ያምናሉ?
ማነው አሸባሪ ያላቸው? የተወካዮች ምክር ቤት ነው አይደል። የዚህ ምክር ቤት አባላት ደግሞ ከአንድ ፓርቲ የወጡ ናቸው። የጠሉትን ሰው የተለያየ የጅብ ቆዳ ማልበስ የተለመደ ተግባር ነው። ይህ መፈራረጅ ቆሞ ሁሉም ወደ መድረክ ይምጣ ነው የምንለው። የተወካዮች ምክር ቤት አባላት፣ ሁሉም ኢህአዴግ የነበሩ አይደሉም? ኢህአዴግ ደግሞ አሁን ብልፅግና ሆኗል። ለምንድነው እውነቱን የማንነጋገረው። እነዚህን ወገኖች ሽብርተኛ ያሏቸው የብልፅግና አባላት ናቸው።
እዚህ ላቋርጥዎትና እነዚህ ሁለት ቡድኖች ማለትም ህውሃት እና ኦነግ ሸኔ በንጹሃን ላይ እየፈጸሙት ያለው ወንጀልና ዘግናኝ ጭፍጨፋ “አሸባሪ” ሊያሰኛቸው አይችልም እያሉኝ ነው?
 በእውነት እንነጋገር ከተባለ በየአካባቢው የሚደረገውን ጭፍጨፋና ሽብር የሚያካሂደው አንድ አካል ብቻ ነው። በአሁኑ ወቀት በጠቅላላው በአገሪቱ ውስጥ ለተካሄደው ጭፍጨፋና ለሞቱ ሰዎች ሁሉ ተጠያቂው ገዥው መንግስት ነው።
በአገራችን አብዛኛው አካባቢዎች በንፁሃን ላይ የተፈጸሙ ጭፍጨፋዎችን፣ ግድያዎችንና የንብረት ውድመቶች የተፈጸሙት መንግስት አሸባሪ በሚል በፈረጃቸው ቡድኖች ሆኖ እያለ እንዴት መንግስት ለግድያዎቹና ለተፈጸሙት ወንጀሎች ተጠያቂ ሊሆን ይችላል? ቡድኖቹ አሸባሪ ሊባሉ አይገባቸውም ማለትስ እንዴት እንችላለን?
ከሶማሌ የተፈናቀሉትን ከአንድ ሚሊዮን በላይ ኦሮሞዎች፣ ከጉጂና ጌዲኦ ግማሽ ሚሊዮን ህዝብ ያፈናቀለው መንግስት ነው። ለዚህ አንድም ሰው ተጠያቂ አልሆነም። ወረድ ብሎ በምዕራብ ኢትዮጵያ በወለጋ በኩል 200ሺ ህዝብ ተፈናቅሏል።
እነሱ ግን “ጎላን በጎሳላይ ለማነሳሳት ይሞክራሉ፤ የኢትዮጵያ ህዝብ ንፁህ ህዝብ ነው፤ በምንም ሁኔታ አይነካካም። እያሉ የሚያሴሩትን ሴራ ሁልጊዜም እየተቃወምን ነው ያለነው። በቅማንትና በአማራ በወልቃይትና ጠገዴ መካከል ችግር የፈጠረው ማነው መንግስት ራሱ ነው። ለዚህ ሁሉ ጣጣ የዳረገን ኢህአዴግ ነው። ራሳቸው ኢህአዴጎቹ ዛሬ ለሁለት ተከፍለው እሳት እያነደዱብን ነው። ስለዚህ እከሌ አሸባሪ ነው። እከሌ ንፁህ ነው ማለት አንችልም። መፈራረጁን እናቁምና- እንነጋገር ነው የምንለው አለምም ተነጋገሩ እያለን ነው።
የውጪ አገራት በኢትዮጵያ የውስጥ ጉዳይ የሚያደርጉትን ጣልቃ ገብነት  ትደግፋላችሁ ማለት ነው?
አሜሪካም ሆነች ሌሎች የምዕራብ አገራት “በውስጥ ጉዳያችን ገቡ፣ ሉአላዊነታችንን ነኩ” እየተባለ ይነገረናል። “ችግራችሁን በንግግር ፍቱ፤ አትታኮሱ” ማለት እንዴት ነው ሉአላዊነትን መዳፈር የሚሆነው። እኛ ከመበታተን እንድንድን እንጂ እንድንበታተን የሚፈልጉ አይደሉም፤ አውሮፓ ህብረትም አሜሪካም።  ለራሳቸው ሲሉ ነው የሚወተውቱት።  አገር ሲፈርስና 110 ሚሊዮን ህዝብ ሲበታተን ችግሩ ወደ እነሱ መምጣቱ የማይቀር ስለሆነ ያቦካችሁትን እዛው ጋግሩ እንጂ ወደ እኛ  አታምጡት” እያሉን ነው። ይኼ ሊገባን ይገባል። እኛ ግን ለስልጣን ስንል እዚህ እየተባላን ነው።
ከቅድመ ሁኔታዎቻችሁ መካከል አንደኛው የታሰሩት አመራሮቻችንና አባሎቻችን እንዲሁም ሌሎች ፖለቲካ እስረኞች ይፈቱ የሚል ነው? በወንጀል ተግባር የተጠረጠረው በእስር ላይ የሚገኙ ሁሉ መፈታት አለባቸው እያላችሁ ነው?
ወንጀል የሰራ ሰው በስራው ወንጀል መጠየቁና መቀጣቱ ተገቢ ነው። ማንም ሰው ቢሆን ማለቴ ነው። ግን ስልጣን  ስለአለን የፈለግነውንና የጠላነውን ሰው ሁሉ እያሰርን ወንጀለኛ ነው ማለት አይቻልም።
ለምሳሌ የእኛ አባሎችና አመራሮች ከሃጫሉ ሞት በኋላ  በግፍ ታስረዋል። ከ206 ቢሮዎቻችን መካከል አሁን ክፍት የሆኑት 3 ብቻ ነው። ቢሮዎቹ በሙሉ ተዘግተዋል። ሰዎቹ ታስራዋል፣ ንብረቶቻችን ተዘርፈዋል። ቢሮዎቹን ይመሩ የነበሩ ሰዎች  በሙሉ እስር ቤት ነው ያሉት። ፍ/ቤት በነጻ የለቀቃቸውን ጭምር ፖሊስ አልቅም ብሏል። “የበላይ አካል አትፍታ ብሎኛል” ይላል። የእነ አቶ ጁዋር መሐመድና የእነ አቶ በቀለ ገርባ ጉዳይም ከዚሁ ጋር የተያያዘ ነው። እነዚህ ሰዎች ቀደም ብለው የተያዙት ከሃጫሉ ግድያ ጋር በተያያዘ ነው ተብለው ነበር። ያ ሳይሆንላቸው ሲቀር በሌላ አሳበው አስረዋቸው ነው ያሉት። እነሱም የሕግ የበላይነት በሌለበት ሁኔታ ፍ/ቤት አንመላለስም ብለው ቀሩ። እስክንድር ነጋም ቢሆን እኛን የሚቃወም ሰው ነው ግን፤ የዚህንም ሰው ሰብአዊ መብቱ ይከበርለት፣ ቅሬታው በጠረጴዛ ዙሪያ ተሰምቶ ይፈታ” ነው የምንለው። የመጨረሻ መፍትሄ ሊሆን የሚችለው ይህ ብቻ። ከአሁን በፊት ኤርትራን አስገንጥለናል፤ አሁን ደግሞ ወደ ትግራይ እየሄድን ው። ይሄ ነገር ስር ሳይሰድ ቁጭ ብለን በማንግባባቸው ጉዳች ላይ እንነጋገር ነው የምንለው።
በኦፌኮ አመራሮች መካከል መከፋፈል መፈጠሩንና አለመግባባቶች መኖራቸው ይነገራል። ይህ ምን ያህል እውነት  ነው?
ይህ  ፈጽሞ ከእውነት የራቀ ጉዳይ ነው። እኛን ለመከፋፈል የሚፈልጉ ሰዎች ናቸው እንዲህ የሚሉት። ከዚህ ቀደም በአንድ ሚዲያ ላይ “መረራ የፈለገውን ነው የሚያደርገው፤ ኦፌኮ ተከፋፍሏል” ብለው ጽፈው ሁሉ ነበር። ግን ሀሰት ነው። እኛ በጋራ ሆነን እየሰራን ነው። ይህ የብልጽግና ካድሬዎች ወሬ ነው፤ ምንም ልዩነት በመካከላችን የለም።
ከዚህ ቀደም ግን ፕሮፌሰር መረራ “የሽግግር መንግስት እናቋቁማለን ብለው በተናሩ ጊዜ፣ እናንተ ይህ የእኛ አቋም አይደለም፤ የመረራ የራሱ ነው” ብላችሁ ነበር…?
የዛን ጊዜ የሆኑ ቡድኖች በኦሮሚያ ውስጥ የሽግግር መንግስት እናቋቁም የሚል ነገር አንስተው ነበር። ግን ያኔ እኛ “ከምርጫ በፊት ብሔራዊ ውይይ ይደረግ” ፤  “የአንድ ፓርቲ አባላት ህግ አውጪውንም ተርጓሚውንም አስፈጻሚውንም ይዘውታል። ይህ ሁኔታ አግባብ አይደለም የሚለው አቋም ይዞ ነበር። አገራችንን ከጥፋ ለማዳን ሁላችንም የየራሳችንን ሃሳብ ይዘን፣ በጋራ ለመስራት እንችላለን ነው- የእኛ አቋም ይሄ ዝም ብሎ መፈራረጁና መነካከስ አገራችንን ያጠፋታል እንጂ የትም አያደርሳትም። ከሁሉም በፊት ብሔራዊ ውይይት ሊቀድምና ሁሉም ወገን  መሳሪያውን አስቀምጦ፣ በጠረጴዛ ዙሪያ ሊወያይ ይገባል ነው የምንለው።

በቴክኖሎጂው ዘርፍ የተሰማሩ የአለማችን ታላላቅ ኩባንያዎች አጠቃላይ ገቢ፣ ትርፍና ኪሳራዎችን የተመለከቱ ዘገባዎች ከያቅጣጫው እየወጡ ሲሆን፣ ከእነዚህም መካከል ቴስላ ከ1 ትሪሊዮን ዶላር በላይ ሃብት ካፈሩት ጥቂት ኩባንያዎች ተርታ መሰለፉ ይጠቀሳል፡፡
የአሜሪካው የኤሌክትሪክ መኪና አምራች ኩባንያ ቴስላ አጠቃላይ የገበያ ዋጋ ባለፈው ሰኞ ከ1 ትሪሊዮን ዶላር ማለፉንና በዚህም ኩባንያው ከ1 ትሪሊዮን በላይ ሃብት ያፈራ አምስተኛው የአለማችን ኩባንያ ለመሆን መብቃቱን ቢቢሲ ዘግቧል፡፡
ከዚህ በፊት ከ1 ትሪሊዮን ዶላር በላይ ሃብት በማፍራት በታሪክ መዝገብ ላይ መስፈር የቻሉት አራት ብቸኛ የአለማችን ግዙፍ ኩባንያዎች አፕል፣ ማይክሮሶፍት፣ አማዞንና አልፋቤት መሆናቸውንም ዘገባው አስታውሷል፡፡
ወደ ሌላ ዜና ስንሻገር ደግሞ፣ ታዋቂው የማህበራዊ ድረገጽ ፌስቡክ አፈትልከው በወጡ የደንበኞቹ ሚስጥራዊ መረጃዎች ሳቢያ ክፉኛ ሲብጠለጠል በሰነበተበት በዚህ ሳምንት፣ እስከ ነሐሴ በነበሩት 3 ወራት 9 ቢሊዮን ዶላር ገቢ የማግኘቱ መልካም ዜና በስፋት ተነግሮለታል፡፡ ፌስቡክ በሩብ አመቱ ያገኘው ገቢ ባለፈው አመት ተመሳሳይ ወቅት ከነበረው የ7.8 ቢሊዮን ዶላር ብልጫ እንዳለው መነገሩን ነው ዘ ኢንዲፔንደንት የዘገበው፡፡
በሌላ በኩል ደግሞ፣ የማይክሮሶፍት ኩባንያ የሩብ አመት ትርፍ ባለፈው አመት ከነበረው በ48 በመቶ በማደግ 20.5 ቢሊዮን ዶላር መድረሱንና ለዚህ ስኬት ከፍተኛውን ሚና የተጫወተው በክላውድ ቴክኖሎጂ የጀመራቸው አገልግሎቶች ትርፋማነት መሆኑንም ኒውዮርክ ታይምስ ከሰሞኑ ባወጣው ዘገባ አስነብቧል፡፡ ኩባንያው እስከ መስከረም በነበሩት ሶስት ወራት 45.3 ቢሊዮን ዶላር አጠቃላይ ገቢ ማግኘቱን የጠቆመው ዘገባው፣ ገቢው ካለፈው አመት ተመሳሳይ ወቅት በ22 በመቶ ያህል ጭማሪ ማሳየቱንም አክሎ ገልጧል፡፡
ሮይተርስ ባለፈው ረቡዕ ያወጣው ሌላ ዜና ደግሞ፣ ታዋቂው ኩባንያ ጎግል ባለፈው ሩብ አመት፣ ክብረ ወሰን ያስመዘገበበትን የ53.1 ቢሊዮን ዶላር የማስታወቂያ ገቢ ማስመዝገቡንና ይህም ገቢ ካለፈው አመት ተመሳሳይ ወቅት በ41 በመቶ ያህል ማደጉን ያሳያል፡፡ ጎግል በሶስተኛው ሩብ አመት ያገኘው ትርፍ 18.936 ቢሊዮን ዶላር መሆኑን የጠቆመው ዘገባው፣ ባለፉት ሶስት ተከታታይ አመታት ክብረ ወሰን ያስመዘገበባቸውን ከፍተኛ ትርፎች እያገኘ መዝለቁንም አክሎ ገልጧል፡፡ በተመሳሳይ የቴክኖሎጂው ዘርፍ ሰሞንኛ ወሬ የሆነው ሌላኛው የማህበራዊ ድረገጽ ኩባንያ ትዊተር በአንጻሩ፣ ባለፈው ሩብ አመት የ537 ሚሊዮን ዶላር ኪሳራ እንዳጋጠመው ተነግሯል፡፡

በሴራሊዮን በፈጸሟቸው የጦር ወንጀሎች በአለማቀፉ ፍርድ ቤት የ50 አመታት እስር ተፈርዶባቸው ከ2012 አንስቶ በእስር ላይ የሚገኙት የቀድሞው የላይቤሪያ ፕሬዚዳንት ቻርለስ ቴለር፣ #የጡረታ መብቴን አላከበረልኝም፤ ጥቅማጥቅሜን ከለከለኝ; በሚል በአገሪቱ መንግስት ላይ ክስ መመስረታቸው ተዘግቧል፡፡
ከአስርት አመታት በፊት በሴራሊዮን በተቀሰቀሰውና ብዙዎችን ለሞት በዳረገው የከፋ የእርስ በእርስ ግጭት አሰቃቂ የጦር ወንጀሎችን ፈጽመዋል በሚል በቀረቡባቸው 11 ክሶች ጥፋተኛ ሆነው የተገኙትና በ2012 ዘ ሄግ በሚገኘው ፍርድ ቤት የ50 አመታት እስር ተፈርዶባቸው በአንድ የእንግሊዝ ወህኒ ቤት ታስረው የሚገኙት ቻርለስ ቴለር፤ #ላለፉት ሃያ አመታት ገደማ ሊከፍለኝ የሚገባውን የጡረታ ገንዘብና ጥቅማ ጥቅም ከልክሎኛል; በሚል የላይቤሪያን መንግስት በኢኮአስ ፍርድ ቤት መክሰሳቸውን አጃንስ ፍራንስ ፕሬስ ዘግቧል፡፡
እ.ኤ.አ በ1989 በላይቤሪያ የተቀሰቀሰውን ህዝባዊ አብዮት በመምራት አገሪቱን ለ13 አመታት ለዘለቀ ደም አፋሳሽ የእርስ በእርስ ጦርነት እንደዳረጉ የሚነገርላቸውና ፕሬዚዳንት ሳሙኤል ዶኢን ከስልጣን በማውረድ ከ1997 እስከ 2003 አገሪቱን ያስተዳደሩት ቻርለስ ቴለር፣ ለእስር የተዳረጉት ላይቤሪያ ውስጥ በፈጸሙት ወንጀል ባለመሆኑ መብታቸው መጣስና ማግኘት የሚገባቸውን ጥቅማ ጥቅም ማጣት የለባቸውም ሲሉ የአገሪቱ የመብት ተሟጋቾች ድጋፍ እንደሰጧቸውም ተነግሯል፡፡ ፍርድ ቤቱ ቻርለስ ቴለር በወቅቱ የላይቤሪያ መንግስት ላይ ያቀረቡትን ክስ ለመስማት የሚሰየምበትን ቀን አለማስታወቁንም ዘገባው አክሎ ገልጧል፡፡


ግዕዝን ጨምሮ ቅኔ፣የኔታ ቤትና ሌሎችንም የጥንት ትምህርቶች ከዘመናዊ ትምህርት ጎን ለጎን ለማስተማር ያለመ አዲስ ት/ቤት ሥራ ሊጀምር ነው፡፡ ት/ቤቱ በአዲስ አበባ ሀገረ ስብከት ስር ከሚተዳደሩት አብያተ ክርስቲያናት አንዱ በሆነውና እስራኤል ኤምባሲ ጀርባ በሚገኘው አቡነ አረጋዊ ቤተ ክርስቲያን  ግቢ ውስጥ በ2 ሺህ ካሬ ሜትር ላይ ግንባታው የተጀመረ ሲሆን በቀጣዩ 2015 ዓ.ም ተማሪዎችን ተቀብሎ ማስተማር እንደሚጀምር የት/ቤቱ ባለቤት ደራሲ ይባቤ አዳነ ገልጸዋል፡፡ የእኛ ሀብት የሆነውና “አሁን ትልልቅ የአውሮፓ ሀገራት በዩኒቨርስቲ ደረጃ እያስተማሩበት ያለው ግዕዝ ትምህርት በሀገራችን ያን ያህል ትኩረት አግኝቷል ለማለት ያስቸግራል” ያሉት ደራሲ ይባቤ አዳነ በሚከፍቱት ት/ቤት ከየኔታ ቤት ጅምሮ ግዕዝ ቅኔና ሌሎችም ትውልድን የሚያንፁ የግብረ ገብ ትምህርቶች ከዘመናዊው ሥርዓተ ትምህርት ጎን ለጎን እንደሚሰጡ ባለፈው ቅዳሜ የግንባታው ማስጀመሪያ ስነ-ሥርዓት ላይ ተናግረዋል፡፡ ት/ቤቱ ከመዋዕለ ህጻናት ጀምሮ እስከ ኮሌጅ የሚዘልቅ ሰንሰለት ያለው ሲሆን ግንባታውም ሆነ ሌላው ጉዳይ በዚያው መጠን እያደገ እንደሚሄድ ተናግረዋል፡፡ ከግንባታ ማስጀመሪያ ሥነ ሥተርዓቱ መልስ በቤልቪው ሆቴል በተደረገ ምክክር የደብሩ አስተዳዳሪና ካህናት፣ደራሲ፣ሀያሲና መምህር ሀይለመለኮት መዋዕል፣ መምህር ታዬ ቦጋለ፣ተቋራጩ ድርጅትና አርክቴክቸራል ዲዛይኑን የሰሩት ባለሙያዎች የታደሙ ሲሆን ደራሲና መምህር ሀይለመለኮት መዋዕልና መምህር ታዬ ቦጋለ ይህንን የተቀደሰ ሀሳብ ለመደገፍና የበኩላቸውን አስተዋፅኦ ለማድረግ ቃል ገብተዋል፡፡
የት/ቤቱ ባለቤት ደራሲ ይባቤ አዳነ ቦታውን ከቤተክርስቲያኗ በጨረታ ያገኙ ሲሆን የትውልድ መቅረጫ ቦታ ለማድረግ ቃል ገብተዋል፡፡ ደራሲው “ሰገነት አሳታሚ” የተባለ ድርጅት ያላቸው ሲሆን “በመማርና በማንበብ ለውጥ ማምጣት ይቻላል” በሚል ለህብረተሰቡ ይጠቅማሉ ያሏቸውን ነገር ግን የህትመት ብርሃን ያላገኙ መፅሀፍትን በማሳተም ስራ ላይ ከማሰማራታቸውም በላይ፣ “ሰባት ቁጥርና  ህይወት”፣ “የእግዜር ድርሰት” አክሳሳፎስ፣ “የከተማው አህያ” ስልጡን ድንቁር” የተሰኙና ሌሎችም መፅሀፍት ደራሲ ናቸው፡



Saturday, 30 October 2021 00:00

“ሁለት ገፆች”

መፅሀፍ ዛሬ ይመረቃል

በደራሲ አማን እንድሪስ ሽኩር የተሰናዳው “ሁለት ገፆች” መፅሀፍ ዛሬ ጥቅምት 20 ቀን 2014 ዓ.ም ከቀኑ 9፡00 ጀምሮ መሳለሚያ እሳት አደጋ ዝቅ ብሎ በሚገኘው ሴፓቶፖል ሲኒማ ይመረቃል፡፡
በእለቱም የመፅሀፍ ዳሰሳ፣ ከመፅሀፉ የተመረጡ ገፆች ንባብ፣ግጥምና ሌሎችም ኪነ ጥበባዊ ዝግጅቶች የሚቀርቡ ሲሆን  አንጋፋና ወጣት ደራሲያን፣ ገጣሚያን፣ ጋዜጠኞች ዶክተሮች ደራሲና ፈላስፋው መሃመድ አሊ (ቡርሃን)ን ጨምሮ በርካታ ተገባዥ እንግዶች ይገኛሌ ተብሏል፡
በምረቃ ሥነ-ሥርዓቱ በቦታው በመገኘት የስነ ሥርዓቱ ተካፋይ እንዲሆኑ ደራሲው አማን እንድሪስ ጋብዟል፡፡

የሽብር ቡድኑ ሕወሓት፣ ያሳደገች እናቱ ላይ የመከራ ቋጥኝ እንደሚጭን ክፉ ልጅ፣ አሁንም ለኢትዮጵያ የመከራ ቋት መሆኑን ቀጥሏል። በጥላቻ ፕሮፓጋንዳው አነሳስቶ የሰበሰባቸውን ኃይሎች ይዞ በአራት ግንባሮች ተኩስ ከፍቶ ሀገር የማፍረስ ተግባሩን ገፍቶበታል። መከላከያ ሠራዊታችና የእናት ሀገር ጥቃት ግድ የሚለው የወገን ጦር በአንድነት ሆነው ኢትዮጵያ ላይ የተከፈተውን ጥቃት ለመመከት በሁሉም ግንባሮች ተሰልፏል። ጠላት የመጨረሻ አቅሙን አሟጥጦ ለማጥቃት የሚያደርገውን ጥረት ሠራዊታችን በምድርና በአየር እየታገዘ እንዳይነሳ አድርጎ እየሰበረው ይገኛል።
በሦስቱ ግንባሮች እንደማያዋጣው የተገነዘበው አሸባሪው ሕወሐት፣ ሰሞኑን ያለ የሌለ ኃይሉን ወደ ወሎ ግንባር አምጥቷል። ለበቀለበት ሕዝብ ጨምሮ ለማንም ርህራሄ የሌለው ቡድኑ በዘመቻው ከ12 ዓመት ሕጻን እስከ 65 ዓመት አዛውንት ያገኘውን ሁሉ ሰብስቦ አዝምቷል። ይኼን ሲያደርግ ዓላማው ሁለት ነው። አንድም ያሰማራው ኃይል ጨርሶ ተስፋ እንዳይቆርጥና ሞራሉ እንዲያንሰራራ ለማድረግ በወሎ በኩል ድል የማግኘት ምኞት አድሮበታል። ሁለትም በቅርቡ አየር ኃይላችን ጥቃት ሰንዝሮ ያወደመበትን ከባድ መሣሪያ ከመከላከያ ሠራዊት ማርኮ ለመተካት በማሰብ የሞት ሽረት ትግል አድርጓል። ለድል ቋምጦ መጥቶ ጠላት በወሎው ግንባር ሰፊ ቁጥር ያለው ኃይሉን ያጣ ሲሆን፣ ጀግናው ሠራዊታችን በሁሉም መስክ መሥዋዕትነትን ከፍሎ እየተጋደለ ነው።
በቀጣይ ጊዜያትም ጠላት የተረፈውን ኃይል አሰባስቦ ተመሳሳይ ጥቃቶችን መሠንዘሩ አይቀርም። የጠላት የጥንካሬ ምንጭ የእኛ ድክመትና መዘናጋት እንደሆነ አውቀን ነቅተንና ተባብረን ልንጠብቀው ይገባል። ብዛታችን ጥንካሬ የሚሆነው ተግባብተን በአንድነት ስንቆም ነው። መነጣጠላችን ለጠላት ይመቻል። በሚነዛው ፕሮፓጋንዳ መረበሻችን እሱን ካልሆነ በቀር ማንንም አይጠቅምም። እርስ በእርሳችን መደማመጥና መተባበር ከቻልን መፍረክረክ የጀመረ የጠላት ጉልበት ይንበረከካል፤ እንደ ክር የሰለለ ምኞቱም ይጨነግፋል። ሀገር ለማጥፋት የመጣ መንጋ ሀገር ለማዳን የተነሣን ኃይል ይረብሸው ይሆናል፣ ሊያሸንፈው ግን አይችልም።
ሥራችንን በተናበበና በተቀናጀ መልኩ ከማከናወን ባለፈ፣ በመካከላችን ሆኖ ለጠላት የሚሠራውን የሕወሐት ወኪል በንቃት መከታተል ያስፈልጋል። ለዘመናት ከጠላት ጋር የጥቅም ትስስር የፈጠሩ ሰዎች ዛሬም በጉያችን ሆነው የጠላትን ምኞት ከዳር ለማድረስ ደፋ ቀና ይላሉ። ስለዚህ ሁሉም ዜጋ ከጸጥታ ኃይሎች ጋር በመሆን የጠላት ወኪሎችን ማጋለጥ ይገባል።
በሚገጥመን ፈተና ሳንረበሽ ሁላችንም የበኩላችንን ሚና ከተጫወትን ፈተናችን የሚወገድበት ጊዜው ሩቅ አይሆንም። በተቃራኒው ተግባሩን ትተን የምንጠይቅ ብቻ ከሆንን የድላችን እድሜ ይዘገያል። ሀገርን ከጥቃት የመከላከል ኃላፊነት የጥቂቶች ሳይሆን የሁላችንም ነው። እያንዳንዱ ዜጋ ከእኔ ምን ይጠበቃል? እኔ ምን እያደረኩ ነው? ማለት አለበት። የእሱ ደህንነት እንዲጠበቅ፣ እሱ ሰላም ውሎ እንዲያደር፣ ሠርቶ እንዲያተርፍ ለእሱ ሲሉ ሌሎች የሚሰውበት ምክንያት የለም። ሁሉም ከወዙ ጨልፎ፣ ከደሙ ቀንሶና ከአጥንቱ ፈልጦ በሚያተበረክተው አስተዋጽኦ ነው ሀገር ነፍስ ኖሯት፣ በሁለት እግሯ የምትቆመው። ለኢትዮጵያ የመሞት ግዴታ የሁላችንም እንጂ፣ የተለየ ሞት እንዲሞት የሚጠበቅበት የተለየ አካል የለም።
ስለዚህ ሕዝባችን የክት ጉዳዩን ለጊዜው አቆይቶ፣ ለማጥፋት የመጣውን አሸባሪውን ሕወሓት ለመመከት፣ ለመቀልበስና ለመቅበር ማናቸውንም መሣሪያና ዐቅም ይዞ፣ በሕጋዊ አደረጃጀት መዝመት አለበት። ይህ ታላቅ ሕዝብ ታላላቅ ታሪካዊ ፈተናዎችን ድል የነሳው ዳር ቆሞ በማየት ወይም በጥቂት ድል ረክቶ በመቀመጥ አይደለም። የተሰነዘሩብንን ጥቃቶች ያሸነፍነው በአንድነት ለሀገራችን ጸንተን ዘብ በመቆም ነው።
የቀደምት አያቶቻችንን የጀግንነት ፈለግ በመከተል ማንኛውንም እኩይ ተግባር ማክሸፍ እንደምንችል ማመን አለብን። አሁን የገጠሙን ፈተናዎች የማይታለፉ እና ውስብስብ ሊመስሉ ይችላሉ። ነገር ግን ቀደምቶቻችን ካዩት መከራ የሚከብዱ አይደሉም። ቁልፉ ጉዳይ በአንድነት መቆም፣ በጥሞና መደማመጥ እና ተቀናጅቶ መንቀሳቀስ ናቸው። ይኼን ካደረግን የቀደመው ትውልድ ሀገርን ጠብቆ ወደ እኛ ማስተላለፍ እንደቻለው፣ እኛም ኢትዮጵያን አስከብረን ለቀጣዩ ትውልድ እናወርሳለን። ጫጫታና ማወናበዱ ቢበረታም ዛሬን በትኩረት እንድንቆም፣ ያለ አንዳች ማመንታት ኢትዮጵያን በአንድነት ከጥቃት እንድንከላከላት ጥሪዬን አቀርባለሁ።
ኢትዮጵያ በልጆቿ ጥረት ታፍራና ተከብራ ለዘላለም ትሩር!!
ፈጣሪ ኢትዮጵያንና ሕዝቦቿን ይባርክ!
 
 
Sunday, 31 October 2021 18:08

ሱዳን ከየት ወዴት…?

እ.ኤ.አ በ2019…
በአምባገነናዊ አገዛዝ ለዘመናት ስትንገሸገሽ ኖራ፣ ሽራፊ የዳቦ ዋጋ ጭማሪ እንደ ሰበብ ሆኖ በአልገዛም ባይነት ፈንቅሎ አደባባይ ያስወጣት ሱዳን፣ ለ30 አመታት አንቀጥቅጠው የገዟትን ፕሬዚዳንት ኦማር አልበሽር፣ በህዝባዊ አመጽ ከመንበረ ስልጣን አውርዳ፣ የዲሞክራሲ ብርሃን ፈነጠቀልኝ ብላ እልልታዋን አቀለጠች፡፡
246 ሱዳናውያንን ህይወት ቀጥፎ፣ ከ1 ሺህ 300 በላይ የሚሆኑትን ደግሞ ለመቁሰል አደጋ ዳርጎ በስኬት የተጠናቀቀው ህዝባዊ አብዮት፤ አገሪቱን ከአልበሽር ነጥቆ የጦር ሰራዊቱና ሲቪሉ ለተጣመረበትና ወደ ዲሞክራሲ ያሻግራታል ተብሎ ተስፋ ለተጣለበት ጊዜያዊ የሽግግር መንግስት ምክር ቤት አስረከባት፡፡
እየዋለ እያደር ግን፣ ጦሩና የሲቪል አመራሩ በፖለቲካ ሽኩቻ እርስ በእርስ መጠላለፋቸውን ተያያዙት፡፡ በስልጣን ሽሚያ የተጠመዱ ወታደሮችና ሲቪሎች ሱዳንን ዕጣ ይጣጣሉባት ያዙ፡፡
ከአንድ ወር በፊት በሲቪል መንግስቱ ላይ የከሸፈ መፈንቅለ መንግስት መሞከሩ ተነገረ፡፡ ይህን ተከትሎ በሲቪሉና በወታደሩ መካከል ያለው ፍጥጫ የበለጠ ተካረረ፤ የፖለቲካ ውጥረቱና ትኩሳቱ ከቀን ወደ ቀን እየተባባሰ መሄዱን ቀጠለ፡፡
በስተመጨረሻም የጦር ሃይሉ በአገሪቱ ልዑዋላዊ ምክር ቤት ሊቀመንበር ጄኔራል አል ቡርሃን መሪነት ባለፈው ሰኞ  ባካሄደው መፈንቅለ መንግስት፣ የሲቪሉን መንግሥት በታትኖ፣ ስልጣኑን መረከቡን አወጀ፡፡
ጄኔራሉ በዕለቱ በቴሌቪዥን ብቅ ብለው በሰጡት መግለጫ፤ ጠቅላይ ሚኒስትር ሃምዶክ በቁጥጥር ስር መዋላቸውን፤ ሲቪል አስተዳደሩ መፍረሱንና ባለስልጣናቱ መታሰራቸውን፣ በመላ ሱዳን የአስቸኳይ ጊዜ አዋጅ መታወጁን፤ በሐምሌ ወር 2023 ምርጫ ተደርጎ ህጋዊ መንግስት እስኪቋቋም ድረስም አገሪቱን የሚገዛት ወታደሩና ወታደሩ ብቻ እንደሆነ በይፋ አስታወቁ፡፡
በጄኔራል አብዱል ፈታህ አል ቡርሀን የሚመራው የሱዳን የጦር ሃይል፣ በአገሪቱ የሽግግር መንግስት ሲቪል አስተዳደር ላይ መፈንቅለ መንግስት በመፈጸም የአገሪቱን ጠቅላይ ሚኒስትር አብደላ ሃምዶክን፣ የካቢኔ ሚኒስትሮቻቸውንና ሌሎች ታዋቂ ፖለቲከኞችን ማሰሩ የአለማችን መገናኛ ብዙሃን ትኩስ ወሬ ሆነ፡፡
የጦር ሃይሉ በመፈንቅለ መንግስት ስልጣን መንጠቁን የተቃወሙ በርካታ ሱዳናውያን፣ የካርቱምን ጎዳናዎች አጥለቀለቋቸው፤ መንገዶችን በጎማ ጭስና በድንጋይ በመዝጋት ንዴታቸውን በእሳት ነበልባል ገለጹ፡፡ ህዝባዊ ተቃውሞውን በቁጥጥር ስር ለማዋል እስከ አፍንጫው ታጥቆ የወጣው የጄኔራሉ ጦር በወሰደው እርምጃ፣ ከ10 በላይ ሰዎች ሲገደሉ ከ140 በላይ የሚሆኑት ደግሞ ቆሰሉ፡፡
ወታደሮች ተቃውሞውን አስተባብረዋል ያሏቸውን ግለሰቦች በቤት ለቤት አሰሳ እያደኑ፣ ወደ እስር ቤት ማጋዛቸውንና ተቃውሞው መባባሱን ተከትሎም፣ የጦር ሃይሉ በኡምዱርማን ከተማ የሚገኙትን የመንግስት የቴሌቪዥንና የሬዲዮ ጣቢያዎች መቆጣጠሩንና የስልክና የኢንተርኔት አገልግሎትም ሙሉ በሙሉ መቋረጡን ዘገባዎች ያመለክታሉ፡፡
የሱዳን ማዕከላዊ ባንክ ሰራተኞችንና ከድንገተኛ ህክምና ውጭ አገልግሎት መስጠት ያቆሙ የህክምና ባለሙያዎችን ጨምሮ በርካታ የመንግስት ሰራተኞች በስራ ማቆም አድማ ላይ ሲሆኑ፣ የንግድና የአገልግሎት መስጫ ተቋማት መዘጋታቸውን የዘገበው ቢቢሲ፤ ከሰኞ ጀምሮ ተዘግቶ የቆየው የካርቱም አለማቀፍ የአውሮፕላን ማረፊያ ጣቢያ ረቡዕ ማለዳ መከፈቱን አስታውሷል፡፡
የሱዳን መፈንቅለ መንግሥት በአለም ዙሪያ ከሚገኙ በርካታ አገራት መንግስታትና ተቋማት ከፍተኛ ውግዘት የገጠመው ሲሆን፣ የተባበሩት መንግስታት ድርጅት ዋና ጸሀፊ አንቶኒዮ ጉቴሬስ፣ የወታደሩን ድርጊት በጽኑ በመኮነን የጸጥታው ምክር ቤት በሱዳን ላይ ፈጣንና ከበድ ያለ እርምጃ እንዲወስድ ማሳሰቢያ ሰጥተዋል፡፡
አሜሪካ መፈንቅለ መንግስቱን ከማውገዝ ባለፈ በፍጥነት ባሳለፈው ውሳኔ፣ ለሱዳን ሊሰጠው የነበረውን የ700 ሚሊዮን ዶላር እርዳታ ማገዱን ያስታወቀ ሲሆን፣ በአፋጣኝ ወደ ሲቪል መንግስት አስተዳደር እንድትመለስ ጠይቋል፡፡ የአፍሪካ ህብረት ሱዳንን ከአባልነት በፍጥነት ያገደ ሲሆን የአውሮፓ ሕብረትም፣ መፈንቅለ መንግስቱን በማውገዝ ወታደሩ ያሰራቸውን ፖለቲከኞች ያለምንም ቅድመ ሁኔታ እንዲፈታ ጥሪ ያቀረበ ሲሆን፣ ይህ ካልሆነ ግን የራሱን እርምጃ እንደሚወስድ አስጠንቅቋል፡፡ የአረብ ሊግ፣ የሱዳን ጉዳይ በእጅጉ እንደሚያሳስበው በመግለጽ ጦሩ አገሪቱን ወደ ከፋ ብጥብጥና ቀውስ ከሚያስገቡ ድርጊቶች እንዲታቀብ ያሳሰበ ሲሆን ሩስያና እንግሊዝን ጨምሮ የተለያዩ አገራት መንግስታትም ውግዘት አሰምተዋል።
ጄኔራል አል ቡርሃን በወቅታዊ ሁኔታ ላይ ባለፈው ማክሰኞ በሰጡት ጋዜጣዊ መግለጫ፤ "ሚኒስትሩን ያሰርናቸው ለደህንነታቸው ሰግተን ነው፤ ነገሮች ሲረጋጉ በሰላም ወደ ቤታቸው ይመለሳሉ አትስጉ" በማለት ህዝቡንም የተቀረውን አለምም ለማረጋጋት ሞከሩ፡፡
በመፈንቅለ መንግስት ከስልጣን ተነስተው በጄኔራል አብዱል ፈታህ አል ቡርሃን ቤት ከባለቤታቸው ሙና አብደላ ጋር በእስር ላይ የነበሩት ጠቅላይ ሚኒስትር ሃምዶክ፣ በዚያው ዕለት አመሻሽ ላይ ከእስር ተለቅቀው ወደ መኖሪያ ቤታቸው መመለሳቸው ተነገረ፡፡ ሃምዶክ ከእስር መለቀቃቸውን ተከትሎ ከአሜሪካው የውጭ ጉዳይ ሚኒስትር አንቶኒ ብሊንከን ጋር በስልክ መወያየታቸውንም ቢቢሲ ዘግቧል፡፡
ጠ/ሚኒስትሩ ከአንድ ቀን እስር ቢፈቱም፣ ሚኒስትሮችና ፖለቲከኞች እንዲሁም የተቃዋሚ ፓርቲዎች አመራሮች ግን አሁንም ባልታወቀ ስፍራ በእስር ላይ እንደሚገኙና ምናልባትም ነውጥ በመቀስቀስ ክስ ሊመሰረትባቸው እንደሚችል መነገሩን ዘ ጋርዲያን ዘግቧል፡፡
ከውጭም ከውስጥም ውግዘቱ የበረታባቸው የመፈንቅለ መንግስቱ መሪ ጄኔራል አል ቡርሃን ረቡዕ ዕለት በሰጡት መግለጫ ደግሞ፣ ጦሩ መፈንቅለ መንግስቱን ለማድረግ ውሳኔ ላይ የደረሰው አገሪቱን ካንዣበበባት የቀውስ አደጋ ለመታደግና ህዝቡን ከከፋ የእርስ በእርስ ጦርነት ለማትረፍ ከማሰብ ቅንነት ብቻ መሆኑን ለማስረዳት ሞክረዋል፡፡ “ቅን ሃሳብ” በወለደው መፈንቅለ መንግስት ሲቪሉን ገፍትሮ መንበሩን ለብቻው የተቆናጠጠው ወታደሩ፤ ሱዳንን ወዴት ሊያቀናት እንደሚችል በእርግጠኝነት መናገር እንደሚያዳግት ነው የፖለቲካ ተንታኞች የሚናገሩት፡፡


 ከዕለታት አንድ ቀን አንድ የልምድ አዋላጅ የሚባል ለብዙ ዓመታት የሠራ ነገረ ፈጅና ነገር የበላ ጠበቃ የተባለ፤ስመ-ጥሩ ጠበቃ፤በውርስ ምክንያት ጭቅጭቅ ላይ ያሉ ቤተሰብ አባላትን ሊያማክር ሲጠብቅ፤በቀጠሮ ቦታ ላይ ሳይመጡለት ይቀራሉ፡፡
ቆሞ ተስፋ ሳይቆርጥ ሲያስብ ቆይቶ ቢያንስ የጥብቅና ገቢውን የነጠቀው ማን እንደሆነ ለማወቅ ወደ ልደታ ከፍተኛ ፍርድ ቤት አመራ፡፡
ልደታ ፍርድ ቤቱ ፊት ለፊት ገደማ ቆሞ ግራ ቀኙን ሲያማትር ፣አንድ ሌላ ጠበቃ ያገኛል፡፡ ቀልደኛ ወዳጁ ነው፡፡ ሰላምታ ከተለዋወጡ በኋላ፤
“ወዳጄ እንደ ምን ከርመሃል?”ይለዋል፡፡
“ደህና ነኝ፡፡ አንተስ ወዳጄ? ስራ እንዴት ይዞሀል?”
“ምንም አይል፡፡ ምን የእኛ ነገርኮ ዛሬ፡-
‹ነገረ-ፈጅ፣
 ከርሞ ልቡን ይፈጅ›
እንደሚባለው ሆኗል፡፡ የቀጠሮ ብዛት እንጀራ አላስበላ ብሎናልኮ፡፡” አለው፡፡
“ይሁን እስኪ፡፡ እንዲያውም የዛሬዎቹ ደንበኞቼማ ከናካቴው አልመጡም፡፡ እስኪ ዘወር ዘወር ብዬ ልያቸው  “ብሎት ደንበኞቹን ፍለጋ ሄደ፡፡
ከሩቅ ደንበኞቹ ሲመጡ ተመለከተና ወደ ታችኛው በር እያመሩ መሆኑን ሲገነዘብ፣ ፈጠን ብሎ ሊደርስባቸው ይሮጥ ጀመር፡፡ ሊከተላቸው እየሞከረ ሳለ፣ከሌላ ወጣት ጠበቃ ጋር እንደ ሆኑ አየ፡፡ አዲሱ ቀልጣፋ ጠበቃ ገበያውን እየነጠቀው መሆኑን ተገነዘበ፡፡
አሁን ፈጥኖ እየሮጠ ሊከተላቸው ቢሞክርም የሚደርስባቸው አይደሉም። እያለከለከ ሊከተላቸው ሞከረ፡፡ ነገር ግን ሊደርስ አልቻለም፡፡ ልቡ ልትፈነዳ ስትቃረብ ደክሞት ቆመና፤እንዲህ አላቸው፡-
“የው፤ በዚህ አይነት ፍርድ ቤቱን ታልፉታላችሁ!”
እነሱ መንገዳቸውን ቀጠሉ፡፡
“The dog barkes but the caravan goes” ይላሉ ፈረንጆቹ፡፡ “ውሾቹ ይጮሀሉ ግመሎቹ ግን መጓዛቸውን ቀጥለዋል” እንደ ማለት ነው፡፡ በማንም ጩኀት ሳይበገር መንገዱን የሚቀጥል ሰው እግቡ ይደርሳል ወይም የልቡን ያደርሳል ነው፡፡ አልመንና አቅደን የተጓዝነውን መንገድ አለማቋረጥ የልበ ጥሩነትም ፣የልበ ሙሉነትም ዕፁብ ተግባር ነው፡፡ ማቀድ ዝግጁነትን፣ ዝግጁነት ደግሞ ለፍጻሜ መብቃትን ያመላክታል፡፡ ለዳገት የጫንከው ፈረስ፤ ሜዳ ላይ እንዳይደክም በጽናት እንንቀሳቀስ፡፡ ያለንን ምጥን “ሐብትና ሀይል በእግባቡ መጠቀም ፤ብክነትን መከላከል ዋና ነገር ነው ፡፡
ገናላደርግ ነው ፤ልዋጋ ነው ብሎ መፎከር ሳይሆን፤ ካደረግን በኋላና ካሸነፍን ወዲያ መናገር ብልህነት ነው ማወቅ ላይ ብልህነት  (WISDOM) ካላከልንበት፣ አልፈን ተርፈንም ወደ ተግባር ክልለወጥነው ግብረ ቢስ-ነባቤ ብቻ ይሆንና ፍሬ-አልባ እንሆናለን፡፡የሚታይ እንጂ የማይበላ ፍሬ ለምንም አይበጅም፡፡
ምንም ነገር ስንሰራ ፍጥነትን ግምት ውስጥ እናስገባ፡፡ ”የትም ፍጭው ዱቄቱን አምጪው”ማለት ብቻ ሳይሆን “ደህና ቦታ ፈጭተሽ ፤ዱቄቱን አምጪው” ማለት መልካም ነው፡፡” በዱሮ በሬ ያረሰ  የለም “የሚለውንም፤ ”ዱሮም ታርሷል፤ዛሬ የተሻለ ይታረሳል፤ነገ እጅግ የበዛ ይታረሳል!” እንበለው፡፡ ለውጥ እጃችን ላይ ነው ያለው፡፡ እጃችንን አንጠፈው፡፡ መንፈሳዊ ፉክክራችንን አናቋርጥ፡፡ የተሻለ አለም እንፍጠር፡፡ አዲሱ እንደሚያሸንፍ አንርሳ (THE NEW IS INVINCIBLE- እንዲል መጽሐፉ) አዲስ ለውጥ እናፍራ፡፡ ለዋጭም ተለዋጭም እንሁን!
ለውጣችንም የወረት አይሁን፡፡ የአንድ ሰሞን ንግግር ሳይሆን ዘላቂ ህይወትን ለመምራት የሚበጅ ስልት እናኑር ፡፡
ገጣሚው፤እንዳለው፡-
“ማሸነፍን እናስብ
መሸነፍ እንዳለ አንርሳ
መሸነፍ ሲደርስብንም
ማሸነፍ እንዳለ እናውሳ
መውደቅ ከመነሳት ጋር
የሳንቲም ሁለት ገጽታ
አገለባበጡን ማወቅ፤ ብቻ ነው ድል ሚያስመታ
 በዘውድና በጎፈር፤ በሰው በአውሬ ጨዋታ!
ውሉ የሚለይበት ነው፤ ቀን ውለን የማታ የማታ!
አፈራርቀን መያዝ ስንችል፤ ቅን ፍጥነትን ከዝግታ
 -ሩጫን ከልባም ፋታ!!”
ሁሉንም ነገራችንን የበሰለ ዕድልና፤ የበሰለ ጊዜ እንዳያመልጠን አድርገን እንያዘው፡፡ አበው፤ "ጓሣና ድንግል ያለ አንድ ቀን አይበቅል” የሚሉን ይሄንኑ ሊያስረግጡልን ነው!!    

ህወኃት በወረራ ይዟቸው በነበሩ የሰሜን ጎንደርና ደቡብ ጎንደር ዞኖች እንዲሁም በአፋር ክልል በሚገኙ ወረዳዎች በንፁሀን ዜጎች ላይ የፈፀማቸውን ጥቃቶች አስመልክቶ የፍትህ ሚኒስቴር ሲያካሂድ የነበረውን ምርመራ ሪፖርት ትናንትና ይፋ አድርጓል፡፡
በዚህ ምርመራ በተገኘው ውጤት መሰረት፤ በሰሜን ጎንደር ዞን የህወኃት ታጣቂዎች 96 ሰላማዊ ሰዎችን መግደላቸውን፣ በ53 ሰዎች ላይ አካላዊ ጉዳት ማድረሳቸውን፣29 ሴቶችን አስገድደው መድፈራቸው 6 የእገታ ድርጊት መፈጸማቸውን ሪፖርቱ ይጠቁማል።
በተጨማሪም በመንግስት የግልና የሃይማኖት ተቋማት ላይ ዘረፋና ውድመት መፈፀማቸውም ተመልክቷል፡፡
በደቡብ ጎንደር ዞን ባሉ አምስት ወረዳዎች ደግሞ 129 ሰዎች በታጣቂዎቹ መገደላቸውን በ54 ያህሉ ላይ አካላዊ ጉዳቶች መድረሱን እንዲሁም በንፋስ መውጫ ከተማ ብቻ 73 ሴቶች ላይ የአስገድዶ መደፈር ወንጀል መፈፀሙን  ሪፖርቱ አመልክቷል፡፡
በአፋር ክልል ደግሞ ነሐሴ 29 ቀን 2013 በጋሊኮማ ቀበሌ መጠለያ ጣቢያ ውስጥ በነበሩ ተፈናቃዮች ላይ በተፈፀመ ጥቃት 24 ንጹሀን መገደላቸውን፣ 42 ያህል መቁሰላቸውን፣በሌሎች ወረዳዎች 17 ሰዎች መገደላቸውን እንዲሁም 17 መቁሰላቸውንና 7 ሴቶች የአስገድዶ መደፈር ጥቃት እንደደረሰባቸው በሪፖርቱ ተጠቁሟል፡፡
በሁለቱም ክልሎች የህወኃት ታጣቂዎች በፈፀሙት ጥቃት በድምሩ 482 ሰዎች መገደላቸውን፣ 165 ሰዎች መቁሰላቸውን እንዲሁም 109 የአስገድዶ መደፈር ድርጊት መፈጸሙን በፍትህ ሚኒስቴር ሪፖርት ተመልክቷል፡፡





 

ኢትዮጵያ በአጎዋ ተጠቃሚነት የመቀጠል ያለመቀጠል ጉዳይ በቀጣይ ቀናት ውሳኔ ያገኛል

ምርታቸውን ከቀረጥ ነፃ ወደ አሜሪካ ገበያ የማስገባት እድል ከሚሰጠው የአጎዋ ስምምነት ኢትዮጵያን ለመሰረዝ የአሜሪካ መንግስት ማቀዱን ተከትሎ፣ በአሜሪካ የሚኖሩ ኢትዮጵያውያንና ትውልደ ኢትዮጵያውያን እቅዱን ለማስለወጥ የተደራጀ እንቅስቃሴ እያደረጉ ነው፡፡
በአሁኑ ወቅት ኢትዮጵያን ከአጎዋ እድል ተጠቃሚነት የሚያሳግድ ምክንያት እንደሌለ የሚያስረዱት በአሜሪካ የኢትዮጵያውያን የህዝብ ጉዳይ  ኮሚቴ ሠብሳቢ አቶ መስፍን ተገኑ፤ ኢትዮጵያ ከአጎዋ ስምምነት የምትሰረዝበት አንዳችም ምክንያት እንደሌለ ያስረዳሉ፡፡
ለ21 ዓመታት በዘለቀውና ኢትዮጵያን ጨምሮ ከ40 በላይ የአፍሪካ ሃገራትን ተጠቃሚ ባደረገው የአጎዋ ስምምነት መሰረት በርካታ የአሜሪካ ኩባንያዎች ወደ ኢትዮጵያ ገብተው ወደ 1 ሚሊዮን የሚሆኑ ዜጎች የስራ እድል ተጠቃሚ ከማድረጋቸው ባሻገር ለሃገሪቱም ከፍተኛ የውጭ ምንዛሬ እያስገኘ እንደሆነ ተጠቁሟል።
በአጎዋ ስምምነት ላይ የተጠቀሱ  የስምምነቱ መመሪያዎችን ያስታወሱት አቶ መስፍን ከእነዚህ መመሪያዎች የሰብአዊ መብት ጥሰቶችን በተመለከተ የተቀመጠውን በመጥቀስ፤ “ኢትዮጵያ ጥሰቶችን እየፈፀመች ነው” በሚል ክስ ከእድሉ ተጠቃሚነት እንድትሰረዝ በተለያዩ አካላት  ማግባባቶች እየተደረገ መሆኑን ይናገራሉ፡፡
ይሁን እንጂ ይህ ውንጀላ ትክክል አለመሆኑን ራሳቸው የሚመሩት ኮሚቴ ለአሜሪካ የውጭ ጉዳይ መ/ቤት  ማስረዳቱን እንዲሁም 10 ሺህ ሰዎች የፈረሙትን የተቃውሞ ፊርማ ማስገባታቸውን  ገልፀዋል፡፡
በመጪው ሳምንት በጉዳዩ ላይ 19 ድርጅቶች ያሉበት የአጎዋ ጉባኤ በቀረበው ሃሳብ ላይ በድምጽ ብልጫ ውሳኔ እንደሚያሳልፉ የታወቀ ሲሆን በዚህም በአሜሪካ የሚገኙ ኢትዮጵያውያንና ትውልደ ኢትዮጵያውያን የማግባባት ስራዎችን እየሰሩ እንደሚገኙ ተመልክቷል፡፡
አሜሪካ ኢትዮጵያን ከአገዋ አባልነት የምትሰርዝ ከሆነ 1 ሚሊዮን ያህል ዜጎች የስራ እድል በማጣት በቀጥታ ተጎጂ ሊሆኑ እንደሚችሉ ባለሙያዎች እያሳሰቡ ይገኛሉ፡፡

Page 10 of 566