Administrator

Administrator

 ሁለተኛው ዙር ምርጫ ጳጉሜ 1 ይካሄዳል

            በተለያዩ የምርጫ ክልሎች የድምጽ መስጫ ወረቀቶች ላይ ጉድለቶች መገኘታቸውን ተከትሎ ጉድለት የተገኘባቸው የምርጫ ክልሎች የድምጽ መስጫ ቀን መራዘሙን የብሄራዊ ምርጫ ቦርድ አስታወቀ።
የብሔራዊ ምርጫ ቦርድ ዋና ሰብሳቢ ወይዘሪት ብርቱካን ሚዴቅሳ ሰሞኑን ለመገናኛ ብዙኃን በሰጡት መግለጫ፤ ክፍተት የተገኘባቸው የምርጫ ክልሎች፣ የጸጥታ ችግር አለባቸው ተብለው ሰኔ 14 ድምጽ ከማይሰጥባቸው የምርጫ ክልሎች ጋር ድምጽ እንደሚሰጥባቸው አስታውቀዋል፡፡
የቦርዱ የኦዲት ክፍል ባካሄደው ማጣራትም በ54 ምርጫ ክልሎች ላይ ክፍተት የተገኘ ሲሆን ሁለተኛው  የምርጫ ቀን ጳጉሜን 1 ቀን 2013 ዓ.ም ይሆናል ተብሏል።
የድምጽ መስጫ ወረቀቶች ላይ ጉድለት ከተገኘባቸው 54 የምርጫ ክልሎች ውስጥ ግማሽ የሚሆኑት በደቡብና ሶማሌ ክልሎች የሚገኙ መሆኑን ያመለከተው ቦርዱ፤ ከሁለቱ በመቀጠል በርከት ያሉ የምርጫ ክልሎቹ በችግሩ ተጽዕኖ የደረሱበት የአማራ ክልል ነው። አፋር፣ ጋምቤላና ኦሮሚያ በተከታይነት የተቀመጡ ሲሆን  የድሬዳዋ ከተማ በአንድ የምርጫ ክልሉ ላይ የድምጽ መስጫ ወረቀት ህትመት ችግር ተገኝቶበታል ተብሏል።    
ከድምጽ መስጫ ወረቀቶች ህትመት ችግር ጋር በተያያዘ ያጋጠመውን እክል ለመቅረፍ ቦርዱ ባለፈው ረቡዕ  ከፖለቲካ ፓርቲዎች ጋር ባደረገው ውይይት ሁለት አማራጮችን  አቅርቦ ነበር፡፡ አንደኛው አማራጭ የድምጽ መስጫ ወረቀቶችን በሀገር ውስጥ ማሳተም ሲሆን፣ ሁለተኛው ደግሞ የህትመት ችግር በተከሰተባቸው የምርጫ ክልሎች ሊካሄድ የነበረውን ምርጫ ከሌሎች አካባቢዎች ጋር ደምሮ ማካሄድ የሚል ነው፡፡
ምርጫ ቦርድ በጸጥታ ችግርና በሌሎችም ምክንያቶች የመራጮች ምዝገባ ተስተጓጉሎባቸዋል ባላቸው 40 የምርጫ ክልሎች፣ ሰኔ 14 የድምጽ መስጠት ሂደት እንደማያከናውን መግለጹ የሚታወስ ሲሆን የድምጽ መስጫ ወረቀቶች ህትመት ላይ ጉድለት የተገኘባቸው 54 የምርጫ ክልሎች ከ40ዎቹ ጋር በመደመር፤ ምርጫውን በተለየ የጊዜ ሰሌዳ፣ በአንድ ላይ ማካሄድ የሚል አማራጭ አቅርቦ ነበር፡፡
በዚህም መሠረት ሁለተኛው ዙር ምርጫ ጳጉሜ 1 ቀን 2013 ዓ.ም እንደሚካሄድ አስታውቋል፡፡


 በዘንድሮው አገራዊ ምርጫ በግል እጩነት ለህዝብ ተወካዮች ምክር ቤት በምርጫ ክልል 28 የሚወዳደረው ዲያቆን ዳንኤል ክብረት፤ የምርጫ ቅስቀሳ ማጠቃለያውን ነገ በሲኤምሲ አደባባይ  ያካሂዳል፡፡
ከቀኑ 6 ሰዓት ጀምሮ እንደሚካሄድ በሚጠበቀው በዚህ የምርጫ ቅስቀሳ ማጠቃለያ ፕሮግራም ላይ የተለያዩ ኪነ- ጥበባዊ ዝግጅቶች የሚቀርቡ ሲሆን የብሔራዊ ቲያትር የሙዚቃ ባንድ ዝግጅቱን ያደምቀዋል ተብሏል፡፡
የምርጫ ቅስቀሳው የማጠቃለያ ፕሮግራም ከተለመደው በተለየ አዝናኝ እንዲሁም የምርጫ ክልሉን  ነዋሪና መራጭ ህብረተሰብ የሚያሳትፍ እንደሚሆን የዝግጅቱ አስተባባሪዎች ለአዲስ አደማስ ተናግረዋል፡፡ በፕሮግራሙ ላይ ኬሚካል ኢንጂነር ጌታሁን ሄራሞን ጨምሮ የተለያዩ ታዋቂ ሰዎችና በምርጫ ክልሉ ነዋሪ የሆኑት ተሰሚነት  ያላቸው ሰዎች ንግግር ያደርጋሉ ተብሏል፡፡ ዲያቆን ዳንኤልም ክብረት ቁምነገር አዘል የሆኑ መልዕክቶቹን  በዚህ መድረክ ላይ እንደሚያስተላልፍ አዘጋጆቹ ጠቁመዋል፡፡
ዲያቆን ዳንኤል ክብረት በምርጫ ክልል 28 በየካ ክፍለ ከተማና በለሚ ኩራ ክፍለ ከተማ ወረዳ 2,3,4,5 እና 10፣ በ151 ምርጫ ጣቢያዎች ለህዝብ ተወካዮች ምክር ቤት በግሉ እንደሚወዳደር ይታወቃል፡፡


 በዘንድሮው አገራዊ ምርጫ በግል እጩነት ለህዝብ ተወካዮች ምክር ቤት በምርጫ ክልል 28 የሚወዳደረው ዲያቆን ዳንኤል ክብረት፤ የምርጫ ቅስቀሳ ማጠቃለያውን ነገ በሲኤምሲ አደባባይ  ያካሂዳል፡፡
ከቀኑ 6 ሰዓት ጀምሮ እንደሚካሄድ በሚጠበቀው በዚህ የምርጫ ቅስቀሳ ማጠቃለያ ፕሮግራም ላይ የተለያዩ ኪነ- ጥበባዊ ዝግጅቶች የሚቀርቡ ሲሆን የብሔራዊ ቲያትር የሙዚቃ ባንድ ዝግጅቱን ያደምቀዋል ተብሏል፡፡
የምርጫ ቅስቀሳው የማጠቃለያ ፕሮግራም ከተለመደው በተለየ አዝናኝ እንዲሁም የምርጫ ክልሉን  ነዋሪና መራጭ ህብረተሰብ የሚያሳትፍ እንደሚሆን የዝግጅቱ አስተባባሪዎች ለአዲስ አደማስ ተናግረዋል፡፡ በፕሮግራሙ ላይ ኬሚካል ኢንጂነር ጌታሁን ሄራሞን ጨምሮ የተለያዩ ታዋቂ ሰዎችና በምርጫ ክልሉ ነዋሪ የሆኑት ተሰሚነት  ያላቸው ሰዎች ንግግር ያደርጋሉ ተብሏል፡፡ ዲያቆን ዳንኤልም ክብረት ቁምነገር አዘል የሆኑ መልዕክቶቹን  በዚህ መድረክ ላይ እንደሚያስተላልፍ አዘጋጆቹ ጠቁመዋል፡፡
ዲያቆን ዳንኤል ክብረት በምርጫ ክልል 28 በየካ ክፍለ ከተማና በለሚ ኩራ ክፍለ ከተማ ወረዳ 2,3,4,5 እና 10፣ በ151 ምርጫ ጣቢያዎች ለህዝብ ተወካዮች ምክር ቤት በግሉ እንደሚወዳደር ይታወቃል፡፡



            እውቁ ባለሃብት አቶ ወርቁ አይተነው በ5 ሚ.ብር ወጪ በደብረ ማርቆስ ያስገነቡት WA ዘይት ፋብሪካ ከነገ በስቲያ ሰኞ ይመረቃል፡፡ በአማራ ብሔራዊ ክልላዊ መንግስት በምስራቅ ጎጃም ዞን ዋና ከተማ ደብረ ማርቆስ ውስጥ በሊዝ በተገኘ 101 ሺህ 103 ካ.ሜትር ቦታ ላይ ያረፈውና ግንባታው አራት ዓመታትን የፈጀው የዘይት ፋብሪካው፤ የግንባታ፣ የማሽነሪና ሌሎች ቴክኖሎጂዎች ገጠማው ተጠናቆ ወደ ምርት መግባቱ ተገልጿል፡፡ የሰሊጥ፣ የአኩሪ አተር፣ የኑግ፣ የሱፍና የለውዝ  የምግብ ዘይት ከነዚህም በተጨማሪ ድፍድፍ የፓልም ዘይት ከውጭ በማስገባትና በግብዓትነት በመጠቀም አጣርቶ ያለቀለት ዘይት ለገበያ እንደሚያቀርብ ለማወቅ ተችሏል፡፡ ፋብሪካው በአሁኑ ወቅት ለ1 ሺህ 500 ሰዎች የስራ እድል የፈጠረ ሲሆን በሙሉ አቅሙ ስራ ሲጀምር ለ3 ሺህ ሰዎች የስራ እድል እንደሚጥርም ተገልጿል፡፡
ፋብሪካው በዋናነት በሀገር ውስጥ የሚመረቱ የቅባት እህሎችን ታሳቢ አድርጎ የተገነባ ሲሆን፣ በፋብሪካው አካባቢና በአቅራቢያ ቦታዎች ካሉ አርሶ አደሮች ጋር ትስስር በመፍጠር ብሎም ምርታማነት እንዲጨምሩ ድጋፍ በማድረግ፣ አርሶ አደሮች የቅባት እህሎችን በተመጣጣኝ ዋጋ ለፋብሪካው እንዲያቀርቡና ተጠቃሚ እንዲሆኑ በማድረግ በኩል ሰፊ የስራ እድል መፈጠሩም ተጠቁሟል፡፡
ፋብሪካው ሙሉ በሙሉ ወደ ስራ ሲገባ የአገር ውስጥ ገበያውን በማረጋጋት ማህረሰቡን ተጠቃሚ ያደርጋል ተብሎ የሚታሰብ ሲሆን ከዚህም በላይ አገሪቱ እስከዛሬ የዘይት ምርቶችን ለማስገባት የምታወጣውን የውጪ ምንዛሬ በማዳን ለአገር ኢኮኖሚ  ከፍተኛ አስተዋፅኦ ያደርጋል ተብሎ እንደሚጠበቅም ተገልጿል፡፡
WA የዘይት ማምረቻና ማከፋፈያ ኃ/የተ/የግ/ማህበር በቀጣይ ባለ 1 ሊትር ፣ ባለ3 ሊትር፣ ባለ5 ሊትር፣ ባለ 10 ሊትርና ባለ 20 ሊትር ዘይት በከፍተኛ ጥራትና ቴክኖሎጂ አምርቶ እንደሚያቀርብ ተነግሯል፡፡
የዘይት ፋብሪካው የWA ኢንቨስትመንት ግሩፕ  አካል ሲሆን ኢንቨስትመንት ግሩፑ በአሁኑ ወቅት ወርቁ ሜካናይዝድ እርሻ፣ ወርቁ አስመጪና ላኪ ፣ ወርቁ ሪል እስቴት፣ ጎልድስታር አቪየሽን ፣ ወርቁ ፔትሮሊየም፣ WA የማዕድን ማውጣትና ማምረት፣ ወርቁ ትራንስፖርት፣ “ውሃሃ” የውሃ ማጣሪያና ማሸጊያ ፋብሪካ፣ “ሰላ ጎጃም” የዘይት ፋብሪካና WA የሲሚንቶ ፋብሪካን በአንድ ላይ እያስተዳደረ፣ እንደሚገኝና ለበርካታ ዜጎች የስራ ዕድል እንደፈጠረ ተጠቁሟል፡፡ ፡፡

  የዛሬ ስድስት ዓመት የተመሰረተውና ንግዶችን ለማስተሳሰርና ለማቀላጠፍ ዓላማ የተመሰረተው TradEthiopia.com የኦንላይን ፕላት ፎርም፤ ከ30 በላይ የሀገር ውስጥና የውጪ አገራት የተውጣቱ ከ600 በላይ ኩባንያዎች የሚሳተፉበት የኦንላይን ኤክስፖ ሊያዘጋጅ መሆኑን አስታወቀ፡፡ ኩባንያው ባለፈው ሳምንት አጋማሽ በኢሊሌ ኢንተርናሽናል ሆቴል በሰጠው ጋዜጣዊ መግለጫ፤  ኤክስፖውን በመጪው ሀምሌ ወር 2013 እና ህዳር 2014 ዓ.ም እንደሚያዘጋጅ፣ ለዚህም ከ30 የውጪና የሀገር ውስጥ ሀገራት የተወጣጡ 600 ኩባንያዎች መመዝገባቸውን የ”TradEthiopia” መስራችና ዋና ስራ አስፈጻሚ አቶ በርናባስ ወ/ገብርኤል ተናግረዋል፡፡ እንደ ስራ አስፈጻሚው ገለጻ የTradEthiopia.com  ዋና ዓላማ የኑሮ ውድነትን ለማረጋጋት፣ የውጪ ምንዛሬ እጥረትን ለመቅረፍና ስራ አጥነትን ለመቀነስ የሚሰራ ሲሆን ለምሳሌ ወሳኝ የማህበረሰቡ ፍጆታዎችን ከአምራች አርሶ አደሩ በቀጥታ በመሰብሰብ፣ መሃል ያሉ የተጋነነ ትርፍ የሚፈልጉ ነጋዴዎችን በማስወጣት ሻጩ አርሶ አደርም ሆነ ተጠቃሚው ማህበረሰብ በቀጥታ እንዲገበያዩና ሚዛናዊ ተጠቃሚነትን እንዲያገኙ በማድረግ የኑሮ ውድነትን ማረጋጋት እንደሚቻ ገልፀው የኢትዮጵያን ምርቶች የሚገዙ የውጭ ኩባንያዎችን በቀጥታ ከአቅራቢ ጋር በማገናኘት የኢትዮጵያ ምርቶች ሳይባክኑና ሳይበላሹ ቀጥታ ለውጭ ገዢዎች ቀርበው ትክክለኛ የሆነ የውጪ ምንዛሬ እንዲያመጡ ማድረግ ይቻላል ብለዋል፡፡ አቶ በርናባስ አክለውም ገበሬው፣ ቆዳና ሌጦ አምራቹ የቅባትና ጥራጥሬ ላኪው ትክክለኛ ዋጋ ሲያገኝ ምርታማነት ይጨምራል፣ ያኔ እንቅስቃሴ  ይኖራል፡፡ እንቅስቃሴ ሲኖር የሚሰራ የሰው ሀይል ይፈልጋል በዚህም ስራ አጥነትን መቅረፍ ይቻላል ሲሉ አብራርተዋል፡፡
TradEthiopia.com  እንደ  ትሬድ ቻይና ዶት ኮም፣እንደ ኢንዲያ ትሬድ ዶት ኮምና እንደ ኮሪያ ትሬድ ዶት ኮም ሁሉ ግብይትን በኦን ላይን በማስተሳሰር ቀልጣፋና የዘመነ የገበያ ትስስር በመፍጠር ለአርሶ አደሩ ያለ ኢንተርኔት አገልግሎት የሚሰጡ የአጭር ጽሁፍ መላኪያ ኮድ፣ በየአካባቢው የገበያ ትስስር ኮርነሮችን በመክፈት፣ የማህበረሰብ ሬዲዮኖችንና በየአካባቢው ያሉ የህብረት ስራ ማህበራትን በመጠቀም ያመረተው ምርት ድካሙን በሚያካክስ መልኩ ለትክክለኛ ገበያ እንዲያቀርብ ቅድሚያ ለአርሶ አደሩ ይሰጣል ብለዋል ዋና ስራ አስፈጻሚው፡፡
ኩባንያው እስካሁን ከ1ሺህ በላይ ቋሚ አባል የሀገር ውስጥና የውጪ ኩባንያዎችን ያቀፈ ሲሆን የሚተዳደረው በአባላት የአባልነት ክፍያ እንጂ ስራ ባስተሳሳረ ቁጥር  የኮሚሽን ክፍያ እንደማይቀበል የገለጹት አቶ በርናባስ፣ ኩባንያቸው የሚሰራው በሚመለከተው የመንግስት አካል ፈቃድና እውቅና ካላቸው፣ ትክክለኛ አድራሻ ካላቸውና ለመንግስት ትክክለኛውን ግብር ከሚከፍሉት ጋር እንደሆነ ገልፀው፣ ከሚሊዮን በላይ ኩባንያዎች በቋታቸው ይዘው ከላይ የተዘረዘሩትን መስፈርቶች ያሟላሉ አያሟሉም የሚለውን እያጣሩ እንደሆነም ገልጸዋል፡፡
ሀምሌ 2013 እና ህዳር 2014 ዓ.ም በሚካሄዱት የኦን ላይን አለም አቀፍ ኤክስፖዎች ብዙ ልምዶች፣ እውቀቶችና፣ ግብይቶች ያካሄዳሉ ብለው እንደሚጠብቁም አቶ በርናባስ ወ/ገብርኤል ለአዲስ አድማስ ገልጸዋል፡፡

  በአገራችን የመጀመሪያ የሆነውና ከወለድ ነፃ የባንክ አገልግሎትን የሚሰጠው ዘምዘም ባንክ ተመርቆ አገልግሎት መስጠት ጀመረ። ከትናንት በስቲያ የእስልምና ጉዳዮች ጠቅላይ ምክር ቤት ፕሬዚዳንት ተቀዳሚ ሙፍቲ ኡመር ኢድሪስ በተገኙበት ቦሌ በሚገኘው ጋራድ ህንፃ ውስጥ በይፋ የተከፈተው ባንኩ አጠቃላይ ካፒታሉ 876 ሚሊዮን ብር መድረሱ ተገልጿል፡፡
ባንኩ በአሁኑ ወቅት ከ11ሺ በላይ አባላት ያሉት ሲሆን በሸሪአ ህግ መሰረት ከወለድ ነፃ የሆነ አገልግሎትን ይሰጣል ተብሏል፡፡
በዚሁ የባንኩ የመክፈቻ ፕሮግራም ላይ የተገኙት የብሔራዊ ባንክ ገዢ ዶ/ር ይናገር ደሴ ፤በኢትዮጵያ የባንክ ተደራሽነትም ሆነ የባንኮች ቁጥር እንዲሁም አቅማቸው ዝቅተኛ መሆኑን ገልፀው፤ ይህ ሁኔታ እንዲሻሻል በትኩረት እንሰራለን ብለዋል፡፡ 17 ያህል ባንኮች ፈቃድ ለማግኘት በመጠባበቅ ላይ እንደሆኑ ያመለከቱት ዶ/ር ይናገር፤ አስፈላጊውን መስፈርት ላሟሉት፤ በ6 ወራት ውስጥ ፈቃድ እንሰጣለን ብለዋል፡፡
የባንኩ ዋና ስራ አስፈጻሚ መሊካ በድሪ በነመክፈቻ ፕሮግራሙ ላይ እንደተናገሩት ባንኩ የሸሪአን ህግ ይከተል እንጂ አገልግሎቱ ለሁሉም ኢትዮጵያውያን የቀረበ ነው ብለዋል፡፡


Saturday, 05 June 2021 14:12

ወደ ኋላ

    “እየሰማሽኝ ነው?”
“ለመርሳት እየሞከርኩ ነው ... ግን ትንሽ ጊዜ ስጠኝ?”
ስጠኝ ብዬ ጉዳዩን የእኔ ብቻ አስመሰልሁት እንጂ ጊዜ መግዛቱ ለእኔም፣ ለእሱም የሚበጅ፣ የማንቆጭበትንም እርምጃ ለመራመድ አዋጪ ነው። አንዳንድ ውሳኔ የውስጥን ሰላም ካደፈረሰ መፍትሔው ቆም ብሎ ማሰብ አይደል።
“አልችልም! መሄድ አለብን! አልሁ አይደል? መሄድ!” ጠንከር ያለና ቁጣ ያዘለው ትዕዛዝ ኮመጠጠኝ።
እንኳን ጉዳዩ ሌላ ሆኖ በፍቅርም መሃል በስኅተት የገባ የትዕዛዝ ቃል ስለት ሆኖ ይታየኛል። ጦርነት የተከፈተብኝ ስለሚመስለኝ የራሴን ትጥቅ መወልወል እጀምራለሁ።
“አንቺ እንደሆንሽ ከአዎ አይ ... ከእሺ እንቢ ይቀልሻል። እንግዲህ ቁርጥሽን እወቂው! አንድ ቤት በሁለት ራስ አይመራም።” መልስ ያላገኘሁላቸው ጥያቄዎቼ ቦታ ሳይቀይሩ ሌላ ነገር ... ያውም ደግሞ የሥልጣን ጥያቄ። መቼ ነው ፋሲልን በላዬ የሾምሁት?
የሔዋን ቅጣት መራራ ነው። ምሬቱ ከእግር እስከ ራሴ ይሰማኛል። አሁን ማን ይሙት አዳምና እባብ ተቀጥተዋል ይባላል? ጉልበታቸው እንጂ ነፍሳቸው ምን ደረሰባት?
ለእባብ - “በሕይወትህ ዘመን ሁሉ በደረትህ እየተሳብህ ትሄዳለህ፤ አፈርም ትበላለህ” አጭርና ግልጽ።
ለአዳም - “ምግብህን ጥረህ ግረህ ከእርሷ ታገኛለህ። ምድርም እሾህና አሜከላ ታበቅልብሃለች ... እንጀራህን በፊትህ ላብ ትበላለህ” መጠኑ ቢለያይም ሁላችንም የምንበላው በላባችን አይደል?
ለሔዋን - ሔዋን እኮ ነፍሷን ነው የተቀጣችው። ተቀጣን ልበል እንጂ! “ፈቃድሽ ወደ ባልሽ ይሆናል” ሲላት ኡ ... ኡ ... ማለት አልነበረባትም? ፈቃድን ያህል ነገር ከአስረከቡ ወዲያ የሚቀጥል ማንነት አለ?
እኔ በሔዋን ቦታ ብሆን ኖሮ ለፈጣሪ እንዲህ ስል ጥያቄ አቀርባለሁ። አንደኛ፡ ቅጣቴ ለምን ከአዳም ጋር ተገናኘ? ደግሞስ ከእኔ ጋር እንድትኖር የሰጠኸኝ ሴት እርሷ ሰጠችኝና በላሁ ሲል እኔንም፣ አንተንም መወንጀሉም አይደል? እንዴት እንዲህ ዓይነት ስጦታ ትሰጠኛለህ? ማለቱን ስለ ምን በዝምታ አለፍኸው? ይሄ በራሱ ሌላ ጥያቄ እንድጠይቅህ ያስገድደኛል።
ለመሆኑ እኔን የፈጠርክበት ምክንያት ምንድነው? አዳምን እንድረዳ ብቻ ነው ወይስ በእኔ ላይ ዓላማ አለህ? እላለሁ። በጊዜው ባልኖርም ይሄ ጉዳይ በቀላሉ የሚታለፍ አይደለም። ሰማይ ቤት የጥያቄና መልስ ክፍለ ጊዜ ካለ ያኔ ከማነሳቸው ጥያቄዎች ውስጥ አንዱና ዋነኛው ይሄ ይሆናል።
አዳምንም ደግሞ እጠይቃለሁ። ለምን እስከ ዛሬ አብረኸኝ ኖርህ? የምትፈልገውን የምታውቅ ከሆንህ ለምን ከእጄ ተቀብለህ በላህ? እሷ እውቀት ወዳ፣ እኔ ደግሞ በሆዴ መጨከን አቅቶኝ ... ትዕዛዝህን ተላለፍን ብትል ምን ነበረበት? እለዋለሁ።  
የሆነ ሆኖ የቅጣት ውሳኔ በተላለፈበት በዚያች ቀን ያለ ምንም ኮሽታ የስልጣን ሽግግር ተከናወነ። አዳም ሳቀ። ሔዋን ውስጥ ውስጡን አለቀሰች። ያኔ የተጀመረው የወንበር ትግል ይኸውና በእኔና በመሰሎቼ ዛሬ ድረስ ቀጥሏል።  ይቀጥላልም ...
ሰው ሁሉ መንገስ፣ ነገሮችን በቁጥጥር ስር ማድረግ ይፈልጋል። ይሄን ምኞታቸውን ያረኩ ግን ጥቂቶች ናቸው። ያልታደሉት መግዛት ባይችሉ እንኳን ፈቃዳቸውን የሚሰጡት ፍቅርን ጉልበቱ ላደረገ ነው። ምንም ቢሆን ከራስ ጋር ያለውን ግብግብ ለመቀነስ፣ እንደ ሙሉ ሽንፈትም ላለመቁጠር ይረዳል።
ከዛ ውጪ ግን በጾታው መጫን ለሚፈልግ ማጎንበስ ልክ ሊሆን አይችልም! በእርግጥ የትኛውም ኅብረት መሪና ተመሪ ሊኖረው ግድ ነው። መሪ መሆን ያለበት ማን ነው? የሚል ጥያቄ ሲነሳ ግን አእምሮ ጋ እንጂ ጾታ ጋ የሚያስኬደን ጉዳይ የለም! የአስተሳስብ ልቀት፣ የመምራት ብቃት እና የሞራል ልዕልና ከጾታ ጋር ተጣብቀው አልተፈጠሩም።
("ወደ ኋላ" ከተሰኘው የዲድያ ተስፋዬ መጽሐፍ የተቀነጨበ)

ኮሮና በሚሊዮኖች የሚቆጠሩ አጫሾች ሲጋራ እንዲያቆሙ አነሳስቷል

              ብራንድ ፋይናንስ የተባለው ኩባንያ የ2021 የፈረንጆች አመት ከፍተኛ የገበያ ዋጋ ያላቸው 50 የአለማችን ቢራዎችን የንግድ ምልክቶች ዝርዝር ከሰሞኑ ይፋ ያደረገ ሲሆን፣ 5.8 ቢሊዮን ዶላር የተገመተው የሜክሲኮው “ኮሮና ቢራ” በአንደኛ ደረጃ ላይ ተቀምጧል፡፡
“ኮሮና ቢራ” ምንም እንኳን ስሙ ከአደገኛው ቫይረስ ጋር መመሳሰሉ በተጠቃሚዎች ዘንድ በፈጠረው መጥፎ ስሜትና በሌሎች ምክንያቶች የንግድ ምልክት የገበያ ዋጋው ባለፈው የፈረንጆች አመት ከነበረበት የ28 በመቶ ቅናሽ ቢያሳይም፣ በአሜሪካ በብዛት በመሸጥ ቀዳሚነቱን የያዘውና ከ120 በላይ አገራት የሚጠጣው ይህ ቢራ በንግድ ምልክት ዋጋው የሚስተካከለው አለመገኘቱ ተነግሯል፡፡
5.64 ቢሊዮን ዶላር እንደሚያወጣ የተነገረለት የሆላንዱ ሄኒከን ቢራ፤ በዘንድሮው የምርጥ 50 ቢራዎች ዝርዝር ውስጥ የ2ኛ ደረጃን ሲይዝ፣ የአሜሪካው ባድዋይዘር ቢራ በበኩሉ፣ በ4.79 ቢሊዮን ዶላር ሶስተኛ ሆኗል፡፡
የሜክሲኮው ቪክቶሪያ በ4 ቢሊዮን ዶላር፣ የአሜሪካው ቡድ ላይት በ3.9 ቢሊዮን ዶላር፣ የቻይናው ስኖው በ3.45 ቢሊዮን ዶላር፣ የሜክሲኮው ሞዴሎ ስፔሻል በ3.3 ቢሊዮን ዶላር፣ የጃፓኑ ኪሪን በ2.853 ቢሊዮን ዶላር፣ የአሜሪካው ሚለር ሊቴ በ2.850 ቢሊዮን ዶላር፣ የጃፓኑ አሳሺ በ2.84 ቢሊዮን ዶላር የገበያ ዋጋ ከአራተኛ እስከ አስረኛ ያለውን ደረጃ መያዛቸውንም ለማወቅ ተችሏል፡፡
የአለማችን ምርጥ 50 ቢራዎች በፈረንጆች አመት 2020 የነበራቸው የ94.9 ቢሊዮን ዶላር የገበያ ዋጋ፣ በ2021 አመት በ16 በመቶ ቅናሽ በማሳየት ወደ 80.2 ቢሊዮን ዶላር ዝቅ ማለቱን የጠቆመው ኩባንያው፤ ለዚህ ቅናሽ በምክንያትነት የጠቀሰው ደግሞ የኮቪድ 19 ክልከላዎችን ነው፡፡ በአመቱ ከፍተኛ የገበያ ዋጋ ጭማሪ ያደረገው ቀዳሚው ቢራ የቤልጂየሙ ሚቼሎብ ሲሆን፣ ዋጋው በ39 በመቶ ጭማሬ በማድረግ፣ ወደ 1.2 ቢሊዮን ዶላር መድረሱንም ለማወቅ ተችሏል፡፡
በሌላ ተያያዥ ዜና ደግሞ፣ ወረርሽኙ በሚሊዮኖች የሚቆጠሩ የአለማችን ሲጋራ አጫሾችን ሲጋራ ለማቆም እንዳነሳሳቸው የአለም የጤና ድርጅት ባወጣው ሪፖርት አስታውቋል፡፡ ከማያጨሱት ጋር ሲነጻጸር አጫሾች በኮሮና ቫይረስ ከተጠቁ ለከፍተኛ ህመምና ሞት የመጋለጥ ዕድላቸው በ50 በመቶ ያህል እንደሚጨምር ማረጋገጡንና ይህም በመላው አለም የሚገኙ በሚሊዮኖች የሚቆጠሩ አጫሾችን ስጋት ውስጥ እንደከተታቸውና ሲጋራ ለማቆም እንዳነሳሳቸው የጠቆመው ድርጅቱ፤ ይህም ሆኖ ግን አስፈላጊው ድጋፍና ክትትል ካልተደረገላቸው ሲጋራ የማቆም እድላቸው እጅግ ጠባብ መሆኑን አመልክቷል፡፡
በአሁኑ ጊዜ በመላው አለም ከሚገኙት 1.3 ቢሊዮን ያህል የትምባሆ ተጠቃሚዎች መካከል ከ70 በመቶ በላይ የሚሆኑት ሲጋራ ለማቆም የሚያስችላቸው ሁሉን አቀፍ ድጋፍ እንደማይደረግላቸው የጠቆመው ድርጅቱ፤ በአለማችን 39 በመቶ ያህል ወንዶችና 9 በመቶ ያህል ሴቶች ትምባሆ እንደሚጠቀሙ ማረጋገጡንም ገልጧል፡፡
በአለማችን በየአመቱ 8 ሚሊዮን ያህል ሰዎች በሲጋራ ሳቢያ ለሞት እንደሚዳረጉ የጠቆመው ድርጅቱ፤ አጫሾች ለሲጋራና  ከሲጋራ ማጨስ ጋር በተያያዘ ለህክምና የሚያወጡትን ገንዘብ ጨምሮ በየአመቱ 1.4 ሚሊዮን ዶላር እንደሚያወጡም አክሎ ገልጧል፡፡


       ‹ላካታ ሴንተር 2› የሚል ስያሜ የተሰጠውና በአለማችን በቁመቱ 2ኛውን ደረጃ ይይዛል የተባለው ሰማይ ጠቀስ ህንጻ በሩስያዋ ሴንት ፒተርስበርግ ከተማ ሊገነባ መሆኑን ሲኤንኤን ዘግቧል፡፡
ተቀማጭነቱ በስኮትላንድ በሆነው ኬትሊ ኮሎክቲቭ የተባለ የስነህንጻ ኩባንያ ዲዛይን የተደረገው ይህ ሰማይ ጠቀስ ህንጻ፤ ቁመቱ 703 ሜትር እንደሚሆን የጠቆመው ዘገባው፤ በአሁኑ ወቅት በቁመቱ 1ኛ ደረጃን የያዘው 828 ሜትር የሚረዝመው የዱባዩ ቡርጂ ከሊፋ መሆኑንም አክሎ ገልጧል፡፡
150 ወለሎች እንደሚኖሩት የተነገረለት ህንጻው፤ የመኖሪያ ቤቶችና የገበያ አዳራሽን ጨምሮ የተለያዩ የመዝናኛና የንግድ እንዲሁም የስነጥበብ ተቋማት እንደሚያካትት የጠቆመው ዘገባው፤ግንባታው እየተገባደደ እንደሚገኝም አክሎ አስረድቷል፡፡


 በአከርካሪ አጥንት ህመም ሲሰቃይ የቆየው እንግሊዛዊ የ5 ወር ጨቅላ በአለማችን በዋጋው ውድነት አቻ እንደማይገኝለት የተነገረውንና ዞጌንስማ የተባለውን በ1.79 ሚሊዮን ፓውንድ የሚሸጥ መድሃኒት በመውሰድ የመጀመሪያው ታካሚ ሊሆን መዘጋጀቱን ስካይ ኒውስ ዘግቧል፡፡
አርተር ሞርጋን የተባለውና በለንደኑ ኤቪሊና የህጻናት ሆስፒታል ክትትል እየተደረገለት የሚገኘው ይህ ጨቅላ፣ ከዘረመል ጋር ተያይዘው የሚመጡ በሽታዎችን በመፈወስና ከሞት በመታደግ ረገድ ውጤታማ ነው የተባለውን ይህን አሜሪካ ሰራሽ መድሃኒት ለመውሰድ መዘጋጀቱን ነው ዘገባው ያመለከተው፡፡
ጨቅላው ይህንን ውድ መድሃኒት የመውሰድ ዕድል ያገኘው፣ የእንግሊዝ የማህበረሰብ የጤና ተቋም ባደረገለት የገንዘብ ድጋፍ መሆኑን የጠቆመው ዘገባው፤ እዚህ ግባ የሚባል ገቢ የሌለው የጨቅላው አባት ልጁን ከሞት ለመታደግ የሚያስችለውን ይህንን ውድ መድሃኒት ለመግዛት አቅም እንደሌለው ስለሚያውቅ በከፍተኛ ሁኔታ ተጨንቆ እንደነበር፣ በተደረገለት ድጋፍም መደሰቱንና ልጄ ይተርፋል ብሎ ተስፋ እንደሚያደርግ መናገሩን አመልክቷል፡፡

Page 3 of 531