Administrator

Administrator

    በኢትዮጵያ በቴሌው ዘርፍ 8.5 ቢሊዮን ዶላር ድረስ ፈሰስ የማድረግ ዕቅድ አለው

         ሳፋሪኮም ኢትዮጵያ በቴሌኮሚዩኒኬሽን ዘርፍ በመጪው የፈረንጆች ዓመት አገልግሎት መስጠት እንደሚጀምር ገለፀ። ኩባንያው በኢትዮጵያ በቴሌው ዘርፍ እስከ 8.5 ቢሊዮን ዶላር ፈሰስ  ለማድረግ ዕቅድ አለን ብሏል።
የኩባንያው ኃላፊዎች ትናንት ለጋዜጠኞች በሰጡት ጋዜጣዊ መግለጫ ላይ እንደተገለጸው፤ ኩባንያው በኢትዮጵያ የቴሌኮሚኒኬሽን ዘርፍ ላይ ተሰማርቶ አገልግሎት ለመስጠት የሚያስችለውን ፍቃድ አግኝቷል። የኩባንያው ዋና ስራ አስኪጅ ፒተር ኔድግዋ በዚሁ ወቅት እንደተናገሩት፤ ኢትዮጵያ በከፍተኛ ሁኔታ ዕድገት እያላየች ያለች አገር በመሆኗ በዚህች አገር ውስጥ ስራ መጀመሩን ለእኛ ከፍተኛ ዕድል ነው ብለዋል። ኩባንያው በመጪው ፈረንጆች አዲስ ዓመት ወደ ስራ ሲገባ ዘመናዊ የቴሌኮሚኒኬሽን አገልግሎቶችን ተደራሽ እንደሚያደርግም ተጠቁሟል።

በኦሮሚያ ክልል ምሥራቅ ወለጋ ዞን ሳሲጋ ወረዳ፣ ታጣቂዎች በአንድ ፖሊስ ጣቢያ ላይ በፈጸሙት ጥቃት እስረኞችን አስመልጠው በርካታ የፖሊስ አባላትን ማቁሰላቸው ተነገረ።
ቢቢሲ ከአካባቢው ነዋሪዎችና ከሆስፒታል ምንጮች ማረጋገጥ እንደቻለው፣ ጥቃቱ የተፈጸመው ማክሰኞ ነሐሴ 25 ቀን 2013 ዓ.ም ነው። ራሱን የኦሮሞ ነጻነት ጦር እያለ የሚጠራውና ከወራት በፊት በሕዝብ ተወካዮች ምክር ቤት በአሸባሪ ድርጅትነት የተፈረጀው፣ መንግሥት ሸኔ እያለ የሚጠራው ታጣቂ ቡድን ጥቃቱን ስለመፈጸሙ አስታውቋል።
በሳሲጋ ወረዳ የጋሎ ከተማ ነዋሪ የሆኑ አንድ ግለሰብ ጥቃቱን በተመለከተ ለቢቢሲ ሲናገሩ፤ ማከሰኞ ረፋድ 3፡30 አካባቢ በከተማዋ የተኩስ ድምጽ መሰማት እንደጀመረ ገልጸዋል።
የተኩስ ልውውጡም በአካባቢው በነበሩ በመንግሥት የጸጥታ ኃይሎችና ታጣቂዎቹ መካከል መሆኑንና ይህም እስከ እኩለ ቀን መቀጠሉን ይናገራሉ። ታጣቂ ቡድኑ ጥቃት የፈጸመው በሳሲጋ ወረዳ ፖሊስ ጣቢያ ላይ ሲሆን በዚህም ጥቃት እስረኞችን ማስመለጡን ነዋሪው ይገልጻሉ።
“ከእስር ቤቱ ያመለጡ ስድስት ሰዎች እኔ ወደ ምሠራበት ቦታ ሸሽተው ገብተው ነበር። ክፍት በር ሲያገኙ ነው ዘልቀው የገቡት። ከዚያ በኋላ ወጥተው ሄዱ። እኔም የሥራ ቦታዬን ዘግቼ ከአካባቢው ሄድኩ” በማለት የገጠማቸውን  ገልጸዋል።
የታጣቂ ቡድኑ ቃል አቀባይ በተረጋገጠው የትዊተር ገጽ ላይ፣ ቡድኑ በሳሲጋ ወረዳ ፖሊስ ጣቢያ ላይ ጥቃት ስለመፈጸሙ አስፍሯል። በዚህም ጥቃት “ከ100 በላይ የፖለቲካ እስረኞች ተለቀዋል” ብሏል።
ቢቢሲ ከእስር ያመለጡ እስረኞችን ትክክለኛ ቁጥር ከገለልተኛ ወገን ማጣራት አልቻለም።
ጥቃቱን ተከትሎ በቁጥር ከ40 በላይ የሚሆኑ የአካባቢው የፖሊስ አባላት፣ የተለያየ ጉዳት ደርሶባቸው ለሕክምና ወደ ወለጋ ዩኒቨርሲቲ ሪፈራል ሆስፒታል መምጣታቸውን ከሆስፒታሉ ማረጋገጥ ተችሏል።
ከፍተኛ ጉዳት የደረሰባቸው ስድስት የፖሊስ አባላት ቀዶ ሕክምና እንደተደረገላቸውና ሌሎች ስምንት የፖሊስ አባላትም የቀዶ ሕክምና እንደሚደረግላቸው  የሆስፒታሉ ሠራተኛ ለቢቢሲ ተናግረዋል። በተጨማሪም “ስድስት ሰዎች ደግሞ ወደ አዲስ አበባ ሪፈር ተብለዋል” በማለት ለተጨማሪ ሕክምና ወደ ሌላ የጤና ተቋም የተላኩ የፖሊስ አባላት መኖራቸውንም ጨምረው ተናግረዋል። በዚህ ጥቃት ሕይወቱ ያለፈ የፖሊስ አባል ስለመኖሩ እስካሁን ማወቅ አልተቻለም።
የኦሮሚያ ክልል ቃል አቀባይ አቶ ጌታቸው ባልቻ ስለ ጉዳዩ ተጠይቀው፤ “እኔ አላውቅም። በዚህ ጉዳይ ላይ መረጃ የለኝም” በማለት ለቢቢሲ ምላሽ ሰጥተዋል።
(ቢቢሲ አማርኛ)

      በቤኒሻንጉል ጉሙዝ ክልል መተከል ዞን ስር ወዳለችው ቡለን ወረዳ፤ ሰሞኑን  በባጃጅ ሲጓዙ የነበሩ አምስት ሚሊሺያዎች በታጣቂዎች መገደላቸውን የአካባቢው ነዋሪዎች ተናገሩ። የክልሉ የሰላም ግንባታ እና ጸጥታ ቢሮ ኃላፊ አቶ አብዮት አልቦሮ፤ በአካባቢው የሚንቀሳቀሱ የጉሙዝ ታጣቂዎች አምስት ሚሊሺያዎችን መግደላቸውን ለ“ኢትዮጵያ ኢንሳይደር” አረጋግጠዋል።
ሚሊሺያዎቹ ጥቃቱ የተፈጸመባቸው “ለአካባቢ መጠበቂያ የሚሆን [ትጥቅ] ሊታጠቁ ወደ ከተማው ማዕከል በመጓዝ ላይ እያሉ” መሆኑን አቶ አብዮት ገልጸዋል። በመተከል ዞን ከምትገኘው ዶቤ ቀበሌ እንደተነሱ የተነገረላቸው ሚሊሺያዎች፤ ወደ ቡለን ከተማ ሲጓዙ የነበረው በሶስት ባጃጆች ተሳፍረው ነበር ተብሏል።
ታጣቂዎቹ ጥቃቱን የሰነዘሩት በአንደኛው ባጃጅ ውስጥ በነበሩ ሰባት ሚሊሺያዎች ላይ መሆኑን የአካባቢው ነዋሪዎች ለ“ኢትዮጵያ ኢንሳይደር” አስረድተዋል። በጥቃቱም አምስት ሚሊሺያዎች ሲገደሉ፤ ሁለቱ መቁሰላቸውን በቡለን ወረዳ የሚኖሩ ስማቸው እንዳይገለጽ የጠየቁ የመንግስት ሰራተኛ ለ“ኢትዮጵያ ኢንሳይደር” ተናግረዋል።
ጥቃቱ የተፈጸመበት፤ በዶቤ ቀበሌ የሚገኘው በተለምዶ “እሪ በከንቱ” ተብሎ የሚጠራው አካባቢ፤ ከዚህ በፊትም ስጋት ያለበት እና ለትራንስፖርት የማይመች እንደሆነ የሚጠቅሱት ሌላ የቡለን ከተማ ነዋሪ፤ የዛሬው ጥቃት የተፈጸመው “በተጠና መልኩ” ሳይሆን እንደማይቀር ግምታቸውን ያስቀምጣሉ። ለዚህም በማስረጃነት የሚያቀርቡት፤ በቡለን ወረዳ የነበረው የመከላከያ ሰራዊት ትላንት ማምሻውን አካባቢውን ለቅቆ መውጣቱን ተከትሎ ጥቃቱ መሰንዘሩን ነው።
በቡለን ወረዳ የነበረው የመከላከያ ሰራዊት ለሌላ ግዳጅ ወደ ጉባ ወረዳ አልመሃል አካባቢ ከተንቀሳቀሰ በኋላ፤ አሁን በስፍራው የሚገኙት የሲዳማ ልዩ ኃይል እና የፌደራል ፖሊስ ብቻ መሆናቸውን ነዋሪው አብራርተዋል። የቤኒሻንጉል ጉሙዝ ክልል የሰላም ግንባታ እና ጸጥታ ቢሮ ኃላፊ ግን ጥቃቱ ከኃይል እንቅስቃሴው ጋር የተያያዘ “ሊሆንም፤ ላይሆንም ይችላል” ብለዋል።
“ኃይል እንደ አስፈላጊነቱ ከአንድ ቦታ ወደ አንድ ቦታ ሊንቀሳቀስ ይችላል” ያሉት አቶ አብዮት፤ በአሁኑ ወቅት በአካባቢው የልዩ ኃይል አባላት፣ ሚሊሺያዎች እና የታጠቁ ግለሰቦች መኖራቸውን ገልጸዋል። “በአካባቢው የኃይል እጥረት ካለ ከሚመለከተው አካል ጋር ተነጋግሮ የኃይል እጥረቱ አንዲቀረፍ ማድረግ ይቻላል” ሲሉም የአካባቢው ነዋሪዎች ስጋት ሊገባቸው እንደማይገባ አስገንዝበዋል።
እርሳቸው ይህን ቢሉም፤ የአካባቢው ነዋሪዎች ግን የመከላከያ ሰራዊት ስፍራውን ለቅቆ በመውጣቱ ገና ከአሁኑ ችግሮች መስተዋል መጀመራቸውን ለ“ኢትዮጵያ ኢንሳይደር” አስረድተዋል። በቡለን ከተማ በባጃጅ ሹፌርነት የሚሰራው ሀብታሙ ደሬሳ፤ ከወንበራ እና ሌሎች አካባቢዎች የመጡ በርካታ ሰዎች በስጋት ምክንያት ወደ ሌሎች ቦታዎች መንቀሳቀስ እንዳልቻሉ ተናግሯል።
ሰዎቹ ወደ ቡለን ከተማ የመጡት፤ በመከላከያ ሰራዊት ታጅበው በአማራ ክልል ወደምትገኘው ቻግኒ ከተማ ለመጓዝ እንደነበር የጠቆመው ሀብታሙ፤ ሰራዊቱ አካባቢውን ለቅቆ በመሄዱ መሄጃ ማጣታቸውን አብራርቷል። “እንኳን ያለ አጃቢ [መንቀሳቀስ]፤ ዱር ወጥቶ አንድ ፍየል ይዞ መምጣት አይቻልም” ሲልም በአካባቢው ያለውን የስጋት ደረጃ ገልጿል።
የቡለን ወረዳ ነዋሪዎች በአካባቢያቸው ላለው የጸጥታ ስጋት እና ዛሬው ለተፈጸመው ጥቃት ተጠያቂ የሚያደርጉት የጉሙዝ ታጣቂዎችን ነው። የቤኒሻንጉል ጉሙዝ ክልል የሰላም ግንባታ እና ጸጥታ ቢሮ ኃላፊም “ጥቃቱን የፈጸሙት የጉሙዝ ታጣቂዎች ናቸው” ሲሉ ወንጅለዋል።
(ኢትዮጵያ ኢንሳይደር)





  በሰሜኑ የሃገሪቱ ክፍል እየተካሄደ ያለው የህልውና ዘመቻና ጦርነት ሀገሪቱ ላይ የከፋ ጉዳት እንዳያደርስ ገቢ የመሰብሰብ አቅምን እና የታክስ መሰብሰቢያ ማእከላትን በማስፋፋት እየተሰራ መሆኑን የገንዘብ ሚኒስትር ዴኤታው እዮብ ተካልኝ (ዶ/ር) ገለጹ።
ሚኒስትር ዴኤታው በጠቅላይ ሚኒስትር ፅህፈት ቤት በተዘጋጀው ሳምንታዊ መግለጫ ላይ የሀገሪቷን ወቅታዊ የኢኮኖሚ ሁኔታ አስመልክቶ ማብራሪያ ሰጥተዋል፡፡
በወቅቱ እንደገለፁትም ጦርነቱ የከፋ ጉዳት እንዳያስከትል የገቢ መሰብሰብ አቅም እንዲጨምር ተደርጓል፡፡
አሸባሪው ህወሓት በከፈተው ጦርነት በቅርቡ ለምግብና ለሌሎች ወጪዎች 9 ቢሊየን ብር ወጪ መሆኑንም ተናግረዋል፡፡
የኢትዮጵያ ህዝብ በሃገር ውስጥና በውጪ የሀገር ህልውና ዘመቻን አጀንዳው ማድረጉም ያለውን የትብብር መንፈስ ያጠናከረና የችግር ግዜን ለመውጣት ያስቻለ መሆኑን ገልጸዋል፡፡ ኢትዮጵያ በቅርቡ ያደረገችውና ሚሊየኖች የተሳተፉበት ምርጫም የሃገራዊ አንድነትን አመላካች ነው ብለዋል፡፡
በቀጣይ አመት ኢኮኖሚውን የማነቃቃት ስራ ይቀጥላል ያሉት ሚኒስትር ዴኤታው፤ የገቢ ማሰባሰብ አቅምን ማሳደግ፣ ምርታማነትንና የካፒታል ገበያን ማስፋፋት፣ ፕራይቬታይዜሽን ተጠናክረው ይቀጥላሉ ማለታቸውን ኢዜአ ዘግቧል፡፡
(ዋልታ)

 በወረባቦ ወረዳ ሰርጎ ገብቶ የነበረው ቁራጭ የህወሓት  ሃይል እየተደመሰሰ መሆኑን የወረዳው አስተዳደር የህዝብ ሰላምና ደህንነት ጽህፈት ቤት አስታወቀ።
የጽህፈት ቤቱ ሃላፊ አቶ መሃመድ ሰይድ ለፋና ብሮድካስቲንግ ኮርፖሬት እንደገለጹት÷ ተንቀዥቅዦ ወደ ወረዳው ገብቶ የነበረው ቡድን በመከላከያ፣ በአማራ ልዩ ሃይልና ሚሊሻ አባላትና በማህበረሰቡ እየተደመሰሰ ነው፡፡
ቡድኑ  ወረዳውን ለቆ መሸሹን የገለጹት ሀላፊው÷ የጸጥታ ሃይሉ በገባበት እየተከተለ እየቀበረው መሆኑን ነው የገለጹት።  በየትኛውም በኩል ማምለጫ የሌለው የጁንታው ሃይል፣ አማራጩ መደምሰስ ብቻ መሆኑን አቶ መሃመድ ተናግረዋል።
 ወጣቶች በግንባር ለሚገኘው የጸጥታ ሃይል ከኋላ ደጀን በመሆን ከከተማው ማህበረሰብ ምግብ በማሰባሰብ ግንባር ድረስ በማድረስ ለሰራዊቱ ያለውን ደጀንነት በተግባር እያሳዩ መሆኑ ተገልጿል፡፡ በተጨማሪም ከጠላት ሃይል ጋር በሚደረገው ፍልሚያ የወረዳው ወጣቶች በከፍተኛ ወኔና ተነሳሽነት ያላቸውን መሳሪያ በመያዝ በጦር ግንባር ድረስ በመግባት ከጠላት ሃይል ጋር እየተፋለመ ይገኛል፡፡
በተመሳሳይ ዜና፤ በከሃዲው ጄኔራል ምግበይ ሀይለ እየተመራ በማይጠብሪ ግንባር በደባርቅና ዳባት ወረዳዎች አዋሳኞች በጫንቅ፣ ጭና እና ወቅን አካባቢዎች የመጣው የአሸባሪው የህወሓት ቡድን ተደመሰሰ፡፡ የመከላከያ ሰራዊት መረጃ እንዳመለከተው፤ ይህ ወራሪና ዘራፊ የህወሓት ቡድን የእነ ወዲ ረዳን ሒሳብ የማወራረድ ስሌት ይዞ የመጣ ነው፡፡
ከግንባሩ አዛዦች መካከል አንዱ ኮሎኔል ሀብታሙ ምህረቴ እንደገለጹት፤ በሠራዊታችን አባላት መሪነት በግንባሩ ከተሰለፈው የወገን ሀይል ጋር በሳምንቱ ጠላት የከፈተውን ተደጋጋሚ ጥቃት በመመከትና ወደ ማጥቃት በመሸጋገር የመጣውን ጠላት ለመደምሰስና ድል ለመቀዳጀት ተችሏል፡፡
በወቅን ጭና የተሰለፈው የወገን ሀይል በወሰደው እርምጃ ከፍተኛ ቁጥር ያለው የህወሓት ሀይል የተደመሰሰና የተማረከ ሲሆን÷ ፀረ-ታንክ፣ ዲሽቃ ፣ ብሬን፣ ላውንቸር እና ስናይፐርን ጨምሮ የተለያዩ የነፍስ ወከፍና የቡድን መሳሪያዎች ፤ ከ15 ሺህ 600 በላይ የተለያዩ ጥይቶች፣ የመገናኛ ሬዲዮና የእጅ ስልኮች እንዲሁም የብር ኖቶች ከጠላት ተማርከዋል፡፡
(ፋና ብሮድካስቲንግ ኮርፖሬት)



            መንግሥት ከአገር ውስጥና ከውጭ አበዳሪ ምንጮቹ ላለፉት ዓመታት የተበደረው ውዝፍ የዕዳ መጠን 2.4 ትሪሊዮን ብር ደረሰ። የአገሪቱ አጠቃላይ የአገር ውስጥና የውጭ ውዝፍ ዕዳ እ.ኤ.አ. እስከ ጁን 30 ቀን 2021 ድረስ 2.4 ትሪሊዮን ብር ሆኖ መመዝገቡን ይፋ ያደረገው፣ የገንዘብ ሚኒስቴር ሰሞኑን ያወጣው የዕዳ መግለጫ ሰነድ ነው።
ብሔራዊ ባንክ ላለፈው አንድ ዓመት ባደረገው የብር ምንዛሪ ተመን ለውጥ ምክንያት የብር የመግዛት አቅም በከፍተኛ ደረጃ በመውረዱ፣ አጠቃላይ የአገሪቱ ውዝፍ ዕዳ በ221.5 ቢሊዮን ብር እንዲያሻቅብ ምክንያት እንደሆነም ሰነዱ ያመለክታል። አጠቃላይ የአገሪቱ የዕዳ መጠን በውጭ ምንዛሪ ሲሰላ 55.6 ቢሊዮን ዶላር እንደደረሰም ሰነዱ ያመለክታል።
ከአጠቃላይ ውዝፍ ዕዳ ውስጥ የአገር ውስጥ አጠቃላይ ውዝፍ ዕዳ መጠን 1.14 ትሪሊዮን ብር ሲሆን፣ የአገር ውስጥ የዕዳ መጠን ባለፈው ዓመት 918.9 ቢሊዮን ብር ነበር።
በተመሳሳይ ከውጭ የተበደረው አጠቃላይ ውዝፍ ዕዳ መጠን ወደ 1.29 ትሪሊዮን ብር ያሻቀበ ሲሆን፣ ባለፈው ዓመት መጨረሻ ላይ ተመዝግቦ የነበረው የውጭ የዕዳ መጠን 1.01 ትሪሊዮን ብር እንደነበር ሰነዱ ይገልጻል።
መንግሥት ከአጠቃላይ የውጭ ውዝፍ ዕዳውን ለማቅለል በዘንድሮው በጀት ዓመት መዝጊያ ድረስ 73.1 ቢሊዮን ብር ወይም 1.8 ቢሊዮን ዶላር ለውጭ አበዳሪዎቹ ከፍሏል። ይህም ባለፈው ዓመት ተመሳሳይ ወቅት ከከፈለው 64.03 ቢሊዮን ብር ከፍ ያለ ቢሆንም፣ በወቅቱ በነበረው የምንዛሪ ተመን መሠረት ግን ሁለት ቢሊዮን ዶላር በመሆኑ ባለፈው ዓመት የከፈለው የዕዳ መጠን ብልጫ አለው።
በሌላ በኩል መንግሥት ዘንድሮ 1.4 ቢሊዮን ዶላር በተጨማሪ ከዓለም ባንክ ተበድሯል። ነገር ግን በዚሁ ዓመት 1.8 ቢሊዮን ዶላር የዕዳ ክፍያ በማድረጉ ምክንያት የተጣጣው የብድር ገቢ፣ በዓመቱ መጨረሻ ዜሮ ወይም በዓመቱ ከተገኘው የውጭ ብድር ፍሰት በ432 ሚሊዮን ዶላር ብልጫ ያለው ገንዘብ ለዕዳ ክፍያ ውሏል።
የዛሬ አምስት ዓመት ማለትም እ.ኤ.አ. በ2016/17 የነበረው የአገሪቱ አጠቃላይ የውጭ የብድር ዕዳ መጠን 23.3 ቢሊዮን ዶላር፣ ወይም በወቅቱ የብር ምንዛሪ ተመን 539.5 ቢሊዮን ብር እንደነበር መረጃው ያመለክታል።
ባለፉት አምስት ዓመታት ውስጥ የውጭ የዕዳ መጠኑ ከ23.3 ቢሊዮን ዶላር ወደ 29.5 ቢሊዮን ዶላር ከፍ ብሏል፡፡ ይሁን እንጂ በሰኔ ወር 2013 ዓ.ም. በነበረው የብር ምንዛሪ ተመን ሲሰላ ግን 1.29 ትሪሊዮን ብር እንደሆነ መረጃው ያስረዳል።
በተመሳሳይ የዛሬ አምስት ዓመት የነበረው አጠቃላይ የአገር ውስጥ የዕዳ መጠን 522.8 ቢሊዮን ብር የነበረ ሲሆን፣ በሰኔ ወር በ2013 ዓ.ም. ላይ የዕዳ መጠኑ ከእጥፍ በላይ በመጨመር 1.14 ትሪሊዮን ብር ደርሷል።
የዛሬ አምስት ዓመት የአገሪቱ አጠቃላይ የአገር ውስጥና የውጭ ዕዳ መጠን 1.06 ትሪሊዮን ብር የነበረ ሲሆን፣ በአምስት ዓመታት ውስጥ ወደ 2.4 ትሪሊዮን ብር አሻቅቧል።
ከአጠቃላይ የዕዳ መጠን ውስጥ 1.29 ትሪሊዮን ብር የሚሆነው የዕዳ መጠን በዶላር ተመንዝሮ ለውጭ አበዳሪዎች የሚመለስ በመሆኑ፣ የአገሪቱ የውጭ ምንዛሪ ግኝትን ማሻሻል ከተቻለ አሳሳቢ እንደማይሆን ባለሙያዎች ያስረዳሉ።
(ሪፖርተር)


Saturday, 28 August 2021 14:42

ከፌስቡክ ገጾች በጨረፍታ

      አሜሪካ ልክ ልካችንን ነገረችን!
                       ዘውድአለም ታደሠ


           (አማን መዝሙር)
አሜሪካ በኤምባሲዋ በኩል “ልካችሁን እወቁ” ብላናለች። «እናንት መናጢ ድሆች» ብላ ሰድባናለች። ወገን ተዋርደናል።
ሲያንቀለቅለን “USAID ለህዝቡ እያለ ጁንታውን ይቀልባል” ብለን ከሰን ነበር። ምነው አፋችንን በቆረጠው። አሜሪካ ዛሬ በፌስቡክ ገፅዋ አስገባችልን። (ኩሩው የጦቢያ ህዝብ ሆይ፤ ስድብህን እነሆ ወደ አማርኛ ተርጉሜልሀለሁ፡-)
«እናንት ንገሩኝ ባይ ችስቶች። እናንት ረሃብተኞች። ወልዳችሁ የትም የጣላችኋቸውን ድሆች ባበላን እጃችን አመድ አፋሽ ሆነ ማለት ነው? የኢትዮጵያን 7% ህዝብ የምንቀልበው እኛ መሆናችንን ምነው ረሳችሁት? በርግጥ ጁንታው ከምንወስደው ምግብ ላይ ሰርቆ ሊበላ ይችላል። እና ጁንታው ይበላል ተብሎ ህዝብ በረሃብ ይለቅ ወይ? እናንት ዘላለማችሁን ከጦርነት አትወጡ። ወይ ጠግባችሁ አትዋጉ። ዘላለማችሁን የኛ ሸክም ናችሁ። ሰው እናድርጋችሁ ብለው አውሮፓውያኑ በቅኝ ግዛት ቢይዟችሁ ነፃነት ይሻለናል ብላችሁ ገፋችኋቸው። ከዚያ እነሱ ሲለቋችሁ እርስ በርስ ትገዳደሉና የድል ቀን ታከብራላችሁ። ጦርነቱ ጋብ ሲልላችሁ ደግሞ ረሃብ ይገድላችኋል። ምን አፍ አለን ብላችሁ ነው ምታወሩት። ክፍት አፎች። በሐገራችሁ ሀፍረት የሚባል ነገር የለም ወይ? በማያገባን ገብተን 7 ፐርሰንቱን ድሃችሁን የምናበላው´ኮ ከፈጣሪ እናገኘዋለን ብለን ነው። እናንተ ግን ስንዴያችንን ጥርግ አርጋችሁ እየበላችሁ እኛኑ ሴጣን ታረጉናላችሁ። ወይ ነዳጅ ፣ ወይ አልማዝ በሌለው ደረቅ መሬት ምክኒያት ትዋጉና “አሜሪካኖች አዋጉን” ትላላችሁ። ለሃጢአታችሁ ሰይጣንን ለጠባችሁ ደግሞ አሜሪካን እስከ መቼ ሰበብ እያደረጋችሁ ትኖራላችሁ? ሼም የለም እንዴ?  ደግሞኮ እየሰደባችሁንም እርዳታችንን ትሻላችሁ። አልበዛም እንዴ? “እፀድቅ ብዬ ባዝላት ተንጠልጥላ ቀረች” አለች አሉ፤ ሂላሪ ክሊንተን»



Saturday, 28 August 2021 14:33

ከፌስቡክ ገጾች በጨረፍታ

   "ችግሩን ለመፍታት የኢትዮጵያ መንግስት በቂ ነው!"
                                         ደጀኔ አሰፋ


                    ወዳጅ ሃገራት ዛሬ ነሐሴ 20 ቀን 2013 በፀጥታው ምክር ቤት ያስተጋቡት ድምፅ፡-
••••••
አባት ሃገር ራሽያ ቃል የለንም!!! በቃ ዝም ብለናል!!
እህት ሃገር ቻይና ውለታሽን ለመመለስ ያብቃን!!
ወዳጅ ሃገር ህንድ ያደረግሽውን አንረሳውም!!
ወዳጅ የሰጠን የኢትዮጵያ አምላክ የተመሰገነ ይሁን!! ኢትዮጵያ ብቸኛ አይደለችም!! ኢትዮጵያ አትረሳውም!!
ኬንያ እንዳለች አይቆጠርም!! አፍሪካዊ ስትሆን ያኔ እንገናኛለን!! ከቅኝ ግዛት ነፃ ስትወጣ እናወራለን!!
እንኳንም ጆሞ ኬንያታ ያልኖሩ!!! ለኡሁሩ አዘንኩ!!
ዛሬ .... የአሜሪካ ሸፍጥ ተደፍቋል!!
የእንግሊዝ ሴራ መና ቀርቷል!!
አሜሪካ ብቻዋን ቆማ እራቁቷን ቀረች!!
እንግሊዝ ክፋቷን ይዛ ተቁለጭልጫ ቀረች!!
ጌታቸው ረዳ፣ ባይደን ያድንህ እንደሆን ዛሬ ተናገር!!
ጁንታው ህፃናትን ለጦርነት መማገዱን ግፍና ሰቆቃ መፈፀሙን፣  የተኩስ አቁም ስምምነትን መግፋቱን፣ አማራና አፋር ክልሎችን መውረሩ... በአጠቃላይ በአሜሪካ ቀሚስ ስር ለወራት የተደበቀው የጁንታው ግፍ እና ወንጀል ተጋለጠ!!
 እውነት አሸነፈ!!!
አሜሪካም እንግሊዝም ጁንታውም በፀጥታው ምክር ቤት ተወቀጡ!! ተሸከሸኩ!! ፈጣሪ በወዳጆቻችን በኩል አሳፈራቸው!! ረፈረፋቸው!! ከእውነት ጋር ተጣልተዋልና ያፍራሉ!! ገና ይሸማቀቃሉ!! ኢትዮጵያ እያሸነፈች እየጎመራች ትቀጥላለች!! ተመስገን!!
“በዚህ ጊዜ ከኢትዮጵያ ጎን የቆማችሁ ሃገራትን አመሰግናለሁ!! በአንፃሩ ጫና እናድርግ የምትሉና “ነገሽን ልወስንልሽ” የሚሏት ሃገራት ግን ሃገሬ ኢትዮጵያ ከጥንት ጀምሮ የነፃነት ታሪክ ያላት ናት!! እሴትና ሞራል ያላት ሃገር ነች!! ማንም ጫና ስላደረገብን ወይም ጉዳዩን ሴንሴሽናል በማድረግ አይሆንም!! ለህዝባችን መደረግ የሚገባውን ነገር እናውቃለን!! የውጭ ጫናን የሚቀበል አንዲትም ኢትዮጵያዊት_ነፍስ እንደሌለች ካለፈው ተምራችሁ አሁን ትክክለኛውን ትምህርት ብትወስዱ እመክራችኃለሁ!!” ብሏቸዋል - የኢትዮጵያ ልጅ፣ ታዬ አፅቀስላሴ - ለአሜሪካ ለእንግሊዝና መስሎቻቸው....
አሁን በዓለም አደባባይ .....
ቅቡልነትና አቅም ያለው መንግስት እንዳለን ወዳጆቻችን መስክረዋል!! ችግሩን በራሳችን እንደምንፈታው ተነግሯል!! በሰብአዊ እርዳታ ስም የኢትዮጵያን ሉዓላዊነት መዳፈር ክልክል ነው ብለዋል!! ከኢትዮጵያ ህዝብና መንግስት ጎን መሆናቸውን ደግመው ደጋግመው አረጋግጠዋል!! ሌሎችም ከኢትዮጵያ ጎን እንዲቆሙ ጠይቀዋል!! ዶክተር አብይ አሻንጉሊት መንግስት ስላልሆነላቸው፣ ለጊዜው ምጣችን ቢበዛም ዘለቄታዊ ጥቅማችን፣ ታሪካዊ የነፃነት ክብራችንና ሉዓላዊነታችን ተከብሮ ለዘላለም እንዲኖር ስለሚሆን የወቅቱን ፈተና እንደ ሙሉ ደስታ እንቆጥረዋለን!! አብቹ በርታ!! የምወድህ የሃገሬ ህዝብ በርታልኝ!! የኢትዮጵያ ህዝብ አንድነቱን ማስጠበቁ ለዛሬው ውጤት ማማር ሚናው የትየለሌ ነው!! አንድ ስንሆን ወዳጆቻችን ደስ ይላቸዋል!! ጠላት ይዋረዳል!! ጉልበታችን ያይላል!! አሁንም እንቀጥል!! አንድ እንሁን!! እንበርታ!! እንያያዝ!! መጭው መስከረም ለኢትዮጵያውያን ልዩ ነው!! በጣም ደስ ብሎኛል!! ደስስስስ ይበላችሁ!! የኢትዮጵያ አምላክ ዛሬም የተመሰገነ ይሁን!! ወዳጆቻችን ይባረኩ!! ኢትዮጵያ ለዘላለም ትኑር!!



    ...እስከ መቼ? እላለሁ።  "እስከ መቼ እንደዚህ የተደጋገመ ጣዕም አልባ ኑሮ እኖራለሁ፤ እንኖራለን?  ሰዎች ይወለዳሉ፤ ሰዎች ይወልዳሉ፤ ሰዎች በምቾትና በአግባብ የማያሳድጉትን ልጅ ይወልዳሉ፤ ሰዎች ይበደላሉ፤ ሰዎች ይበድላሉ፣ ጥፋተኞች የወንጀላቸውን ዋጋ አያገኙም። እንዴት ነው ነገሩ? ይሄን ሁላ እየታገስን የምንኖረው እስከ መቼ ነው?’ የሚሉ ጥያቄዎችን አደብ የሚያስገዛልኝ የልማዴን አንድ ስኒ ቡና ስጠጣበት ነው። ከዚህ ሁሉ ነገር ጋር ‹ኦኬይ› ሲያስኮነኝ የዚህን ዕጽ አታላይነት አትኩሬ አሰላስላለሁ። ሆኖም በሚቀጥለው ቀንም እሱው ነው በስመአቤ። ከልጅነት እስከ እውቀት ስንት አዳዲስ ነገሮች ሞክሬ ስተው እስከዛሬ ድረስ ‹ፍሰስ በገላዬ› እያልሁት ከኔ ጋር የቀረ ይሄ ባለ ካፌይን አጅሬ ነው።
“ፍጥረት ተሰቃየ፤ ፍርድ ተጓደለ፣ እናት ልጆቿን የምታበላቸው አጥታ አለቀሰች፤ እህት ቤተሰቧን ለመርዳት አረብ ሀገር ሄዳ ተደፈረች፤ እና ምን ይጠበስ አንቺ ፈጥረሻቸዋል? የሚያምኑት አምላክ ምን ይሠራል? አርፈሽ ኑሮሽን ኑሪ፤ ቢሆንልሽ በተሰማራሽበት የሥራ መስክ እነዚህን ችግሮች ለመቀነስ ከልብሽ ሥሪ” እያለ መቀመጫዬን እየኮረኮረ፣ የሚያነቃቃኝ ይሄ ጉዳ ጉድ ነው። እሺ ብዬው በጧት ተነስቼ ሥራዬ ላይ ተደፍቼ ውዬ ብገባም፣ ለሊቱን የማሰላስለው ግን መፍታት ስለማልችለው በየትኛውም ዓለም ስላሉ ፍጡራን ሁሉ ችግር ነው። እንዲህ የሚያደርገኝ ደሞ ስለ ሁሉ ነፍሳት የመቆርቅር ዓላማ ሳይሆን ‹እኔ ብሆንስ› የሚለው ሀሳብ አንገፍጋፊነት ነው።
ቡናዬን ከጠጣሁ በኋላ ሳቅ ሳቅ እያለኝ፣ ዳማሴን እያሽከረከርኩ እጓዛለሁ። ዝናቡ ጥሎ በቅቶት አየር ላይ ያለው ወደ ላይ ለመውጣት ወይ ወደ መሬት ለመውረድ ያልወሰነ የሚመስል ብናኝ የውሃ ቤተሰብ ነው። ወደ መሬት ይወርዳል ቀስ እያለ። ዳር ላይ የቆሙ ከባድ መኪናዎች ካልሆኑ ብዙ ተሽከርካሪ አስፓሉቱ ላይ ሲንቀሳቀስ አለማየቴ በጧት መነሳቴን አስታወሰኝ። የአስፓልቱ ጽዳት መንፈሴን ጥርት ያደረገልኝ ይመስለኛል። ወይም ቡናው ይሆናል እንጃ ብቻ። ቀዝቃዛ አየር ፊቴን እየዳበሰኝ ዐይኔን ጥቁር አስፓልት ላይ ተክዬ እየነዳሁ የማስበው የተገነፈለ በቆሎና ትኩስ የበቆሎና የደንጎሎ ንፍሮ ነው። እነዚህን ሁለቱን እያሰብኩ ምራቄ አፌ ላይ፣ በምላሴ መቅመሻዎች አዳምጣለሁ። አንድ የልጄ ተውኔት እኩያ የሚሆን ልጅ ባጃጅ እያሽከረከረ ቀደመኝና ከፊቴ ዚግዛግ እያደረገ ማሽከርከር ጀመረ። ጉሮሮዬን አንቆ አላስተነፍስ የሚል እልህ ሰፈረብኝ። አፍንጫውን በሽቶ ጠርሙስ ልሰብርለት አስቤ መኪናዬን ዳር አስይዤ አቁሜ ልወርድ ስል ፍጥነት ጨምሮ ይርቀኛል። መኪናዬን ቀስቅሼ መንገድ ስጀምር ዝግ ብሎ ይጠብቀኝና እንደ መጀመሪያው ፊት ፊቴ፣ እንደ ልጄ እንደ ተውኒዬ ውሻ፣ ባጃጁን ሱት ሱት እያደረገ ይሄዳል።
***
የዚህ ያልተቆነጠጠ ቀንበጥ ድርጊት በሕይወቴ ዳር፣ መሃል፣ ዙሪያና ጫፍ ያለፉትን ወንዶች ሁሉ ተራ በተራ እያመጣ ዐይነ ልቦናዬ ፊት አመላለሰብኝ። አባቴ ከቤት ውጪ በሥነ ምግባሩ የተመሰገነ፣ በሥራውም የሚጨበጨብለት ነበር። ልጆቹን ይወደን ነበር። በእንክብካቤው ችግርን ሳናውቅ ነው ያደግነው ልጆቹ። ከነዚሁ ሁሉ በልጦ በአዕምሮዬ ስለእሱ ደምቆ የተጻፈው ግን እናቴን በቀበቶ የሚገርፋት ነው።  ቀጣዩ ወንድ፣ የሁለተኛ ደረጃ ትምህርት ቤት ተማሪ እያለሁ እወድሻለሁ ይል የነበረ ሰውነቱን ያደለበ ወጣት ነው። እንዲህ ያለ ቀልድ አይመቸኝም አልኩት። አንድ ቀን ከትምህርት ስንለቀቅ በር ላይ ጠብቆ ፈሱን እጁ ላይ ፈስቶ፣ አፍና አፍንጫዬን በዚያ እጁ አፍኖ ያዘኝ። የምሞት መስሎኝ ነበር በሰዓቱ። የተውኔትን አባት እስክተዋወቅ ድረስ ወንዶች ሁሉ "ግማታሞች" ይመስሉኝ ነበር።
ቲያትር ይወድ ነበር። ልጃችንን ተውኔት ብሎ ስም ያወጣላት እሱ ነው። ፍቅር መስጠትም ይችል ነበር። መሥራትስ ቢሆን። ብቻ የበላይ መሆኑን ማረጋገጥ ይፈልጋል ሁልጊዜ። የጀብዱ ፊልሞች እያየ ይመጣና አለቃ ነኝ ይላል። በሕይወቴ አለቃ ሲሆኑብኝ አልወድም። ያላወቅሁትን ሲያስረዱኝ እንጂ ሲጮሁብኝ አልወድም። ላጠፋሁት ሲመክሩኝ እንጂ ሲቆጡኝ አይስማማኝም። እጁን ሰንዝሮ ደብድቦኝ አያውቅም። ያም ሆኖ ለኔ በቂ አልሆነም። በአካልም ሆነ በመንፈስ መለካካት የሌለበት ሕይወት ካልሆነ አሻፈረኝ አልኩ። አንዴ ወጣ አንዴ ወረድ ማለት ‹ኖርማል› ነው አልኩት። ያንን አምኖ መቀበል አልሆነለትም። እያለቀስኩለት ተለያየን።  ከምሳሳላት ከልጄ ከተውኔት ጋር እንደ ሩቅ ዘመድ የተራራቅሁት በወንድ ነው። ከወንዶች ጋር ሳያት፤ ወንዶቹን። ድርጊቴ ሲደጋገም የሆነ ቀን ክፉኛ ተጣላችኝ። የምትወደው ልጅ በኔ ጸባይ ተማርሮ እንደተጣላት ምናምን ለፈለፈች። ምን አስቤ እንደነበር አላውቅም። አሁን አሁን ስናስበው በዚያ ሁኔታዬ ጭራሽ ያለወንድ ላኖራት እችል እንደነበረ እያሰብን እንስቃለን። በዚያ ትቷት የሄደ ፍቅረኛ ሰበብ ተሸካክረን ብዙ ከረምን። ከሌላ ወንድ ጋር ሳያት መላ ሰውነቴን ቢያሳክከኝም፣ የበለጠ እንዳትጠላኝ ብዬ መቆጣቴን ተውኩ። በነጭናጫነቴ ተማርራብኝ አባቷ ጋር ጥላኝ ባለመሄዷ ተመስገን እያልኩ አርፌ እታዘብ ጀመርኩ፤ ኑሮዋን።
አንድ ዕለት ሶፋ ላይ ጋደም ብዬ ቴሌቪዢን እመለከታለሁ። ልጄ እያለቀሰች መጥታ በር ላይ ቆመች። ድምጽ አታወጣም፤ በአፍንጫዋ አየር ስትስብ ያወጣችው የሚነፋነፍ ድምጽ ነው፤ እያለቀሰች መሆኗን ያስታወቀኝ። ቀና አልኩና ፊቷን አትኩሬ ማየት እንደጀመርኩ፣ ያልጠራሁት እንባ ከዐይኔ ክንብል አለብኝ። ምክንያቱን እንኳን አልነገረችኝም፤ ገና እየተያየን እናለቅሳለን። “ማሚ ቺት አረገብኝ እኮ” አለችኝ፤ ከቆመችበት ሳትነቃነቅ። ልትጠጋኝ ፈልጋ በመሃላችን የከረመው መገራመም እንደተገዳደራት ገመትኩና እጄን ዘረጋሁላት ‹ነይ› እንደማለት። በመሃላችን ያለው ሦስት የትልቅ ሰው እርምጃ ቢሆን ነው። ከውጪ በር እንደምትመጣ ነገር እየሮጠች መጥታ አንገቴ ሥር ገባች። አለቀሰች፤ በመከፋት። አለቀስሁ እኔም። ለሁለት ነገር፥ አንድም ልጄን ስላስለቀሰብኝ፣ አንድም ልጄን ማቀፍ ስለቻልኩ ተደስቼ። በአንድ ነገር  እየተከፋሁ ተደሰትኩ።  ልጄ ከፍቷት መጥታ ለማልቀሻ የኔን አንገት መምረጧ አዲስ እንደወለድኋት ያህል አንሰፈሰፈኝ። ደስታዬ ግን “ብየሽ ነበር ድሮም” የሚለው ሳይሆን ወንድ ልጅ ከሚባል ነገር እጆች ውስጥ ልጄ በመውጣቷ ቢሆንም ይሄን በሚያህል ጥላቻዬ ራሴን እየታዘብኩ ነበር። መብቴን አላስነካም በሚል ሰበብ ልጄን ከመብቷ እየከለከልኩ ልኖር እንደነበር ሳስብ፣ የልጄን እንቢ ባይነት አደነቅሁ፤ ምንም እንኳን መጨረሻ ላይ እኔ ያልኩት ቢሆንም።
ስሜት መንበልበል ሲደክመኝ ተረጋግቼ ማዘን ጀመርኩ። ልጆቻችን ወንድነታቸውን የሚያሳዩበትን መንገድ አለማወቃቸው ሆዴን አስጨነቀው። የኔን መኪና የያዘው ወንድ ቢሆን ኖሮ ልጁ እንደዚህ እንደማያደርግ አውቃለሁ። ልረግመው አስባለሁ፤ አንዱ ባለተሳቢ መኪና በሆነ ጎደሎ ቀን ከነባጃጁ ጨፍልቆት ሲሄድ ቁልጭ ብሎ እየታየኝ። ሲመስለኝ ብዙ መልስ ያጣንላቸው ክስተቶች የሚፈጠሩት በእርግማን ምክንያት ነው። አሁን ይሄ ልጅ ባደገበት ሰፈር የተመረቀ፤ እናትና አባቱን ያስመሰገነ ይሆናል።  እዚህ ደሞ እኔ ጋር መጥቶ እንዲህ ያለ ያልተገባ ነገር አደረገ። ‘ረገምሁት እንበል። ባለተሳቢ መኪና ይወጣበታል። [‘ርግማንሽ እንደሚደርስ በምን አወቅሽ የሚል አይጠፋም፡ አጭርና ግልጹ መልስ “ስለተበደልኩ” የሚል ነው። በአካላዊ የመልስ ምት ወይም በሰዎች ፍርድ ልቀጣው ወይም ላስቀጣው ስላልቻልኩ በልቤ   እፈርድበታለሁ። ይህም ይፈጸማል። ሞኚት ያሉኝ እንደሆነ፣ የራስዎት ጉዳይ]  ታዲያ የሰፈሩ ሰዎች “ውይ ምን አገኘው? ምን መዐት መጣበት?” ይባባላሉ። መዐቱን ራሱ ላይ እንዳመጣ ግን ማንም አያውቅም። በዚህች ቀላል በመሰለች ትዕቢቱ፣ እናት አባቱን ሀዘን ላይ ይጥላል፤ የሰፈሩን ሰዎች ከመረጃ ውጪ ያስኬዳል፤ የባለተሳቢውን መኪና ሾፌርና  የሚያስተዳድረውን ቤተሰብ የእንጀራ ገመድ ይበጥሳል።
እንዲህ ዐይነት ጉዳይ ታዲያ እስከ ሀገር ድረስ ሊሰፋ ይችላል። መጠርጠር ነውኮ። መንስኤና ውጤቱ ርቱዕነት እጅጉን የጎደለው መሆኑ እንዳለ ሆኖ  ይሄን ጉዳይ [የእርግማኑን ተፈጻሚነት] ማን እንደሚያስፈጽም ብትጠይቁኝ አላውቅም። ግን ያዘነች ልብ በጽኑ የሻተችው ነገር ሁሉ እንደሚፈጸምላት ከሰው ሰምቼ ሳይሆን በሕይወቴ ያየሁት ነው። በእድሜዬ ከዚህም በላይ ንቅዘቶችን የተመለከትኩ ነኝና እናትም ስለሆንኩ የልጅን ነገር ስለማውቀው፤ ወዲህም እነዚህን ወንድ ልጆች ከድርጊታቸው ለማቀብ ያደረግሁት አንድ እንኳን የሚጠቀስ እኔቅስቃሴ ስለሌለኝ፤ ይኸም ከኃላፊነት እንደመጉደል ተሰምቶኝ ‹እንግዲህ ይሄ ልጅ እናቱ እድሜ የጠገቡ ደሃ ይሆናሉ፤ ይቺን ባጃጅ የገዙለት ቦታቸውን ሸጠው ይሆናል› ምናምን ምናምን በሚሉ ማስተባበያዎች ራሴን አግባብቼ ሳልረግመው ቀረሁ። እድሜ እንዲህ እንዲህ ያሉትን ብስለቶች እየደረበብኝ ሲሄድ እመለከታለሁ በየጊዜው። ይሄንን እያሰብኩ ፈገግ አልኩ።
ለተወሰኑ ደቂቃዎች እንደዚያ እያደረገ ካሽከረከረ በኋላ ሰለቸው መሰለኝ፤ ወይም ረሳው... በሥርዓት ማሽከርከር ጀመረ። በቀስታ ተከታተልኩትና ከሚያቆምበት ራቅ አድርጌ መኪናዬን አቆምኩ።  ከመኪናው ወርጄ በግሬ ሄድኩና በኋላው በኩል አልፌ ዞሬ ከፊቱ ቆምኩ። “የኔ ልጅ አንዴ ላናግርህ?” አልኩት። እኔ መሆኔን ሲያይ ደንገጥ አለ። ፈገግ አልኩለት አደጋ እንደማይመጣበት እንዲያውቅ ብዬ።
“ቅድም ያደረግኸው ትክክል ነው?” አልኩት
“ይቅርታ” አለኝ። አንገቱን ደፋ።
“የጠየቅሁህ ግን ይቅርታ እንድትለኝ አይደለም”
“ትክክል አይደለም”
“ታዲያ ለምን አደረ’ከው?”
አቀርቅሮ ዝም አለ። ምክንያቱን ልቤ ይነግረኛል።  ምክንያቱ ጓደኞቹ ያደረጉትን ሁሉ የማድረግ ፍላጎት ነው፤ ምክንያቱ ተሞላቅቀው ያደጉ የሀብታም ልጆች ያደረጉትን ድርጊት ሁሉ አራዳነት አድርጎ መውሰድ ነው።


 የበርካታ ታላላቅ አለማቀፍ ሽልማቶች ባለቤት የሆነውና ዘ ዊክንድ በሚል ቅጽል ስሙ የሚታወቀው ትውልደ ኢትዮጵያዊው የዘመናችን የአርኤንድቢ ሙዚቃ ኮከብ አቤል ተስፋዬ በቅርቡ በ70 ሚሊዮን ዶላር በሎሳንጀለስ የገዛው እጅግ ያማረና ቅንጡ የመኖሪያ ቤት የበርካታ መገናኛ ብዙሃን መነጋገሪያ አጀንዳ ሆኗል፡፡
አቤል ከሆላንዳውያን ባለጸጎች በ70 ሚሊዮን ዶላር የገዛውና ቤቨርሊ ሂልስ በሚባል አካባቢ በ33 ሺህ ስኩየር ጫማ መሬት ላይ ያረፈው ይህ መኖሪያ ቤት፣ በዚህ አመት በሎሳንጀለስ ከፍተኛ ገንዘብ ወጥቶበት የተሸጠ እጅግ ውድ ቤት እንደሆነ ዎል ስትሪት ጆርናል ዘግቧል፡፡
መኖሪያ ቤቱ ዘጠኝ የመኝታ ክፍሎች፣ የስፖርት ማዘውተሪያ ስፍራ፣ ሁለት መዋኛ ገንዳዎች፣ ሰው ሰራሽ ፏፏቴ፣ ሲኒማ ቤት፣ ጂምናዚየም፣ የሙዚቃ ስቱዲዮና ጨምሮ የተለያዩ ደረጃቸውን የጠበቁ የመዝናኛ ስፍራዎች እንዳሉትና በተክሎች የተዋበው ግቢው በእጅጉ ማራኪ ገጽታ እንዳለውም ተዘግቧል፡፡
የ31 አመቱ የሙዚቃ ኮከብ አቤል ከጥቂት አመታት በፊት በዚያው አካባቢ በ25 ሚሊዮን ዶላር በገዛው መኖሪያ ቤት ውስጥ ይኖር እንደነበር ያስታወሰው ዘገባው፣ ብላይንዲንግ ላይትስ የሚለው አዲስ ነጠላ ዜማው በቢልቦርድ የሙዚቃ ሰንጠረዥ ለ88 ሳምንታት በመሪነት የቆየለት አቤል ተስፋዬ በዚህም ከሳምንታት በፊት ለረጅም ተከታታይ ሳምንታት ቢልቦርድን በመምራት አዲስ የአለም ክብረ ወሰን ማስመዝገቡን ጨምሮ አስታውሷል፡፡

Page 4 of 546