Administrator

Administrator

   የህንድ መንግስት ያወጣውን ሰራተኞችን የሚጎዳ አዲስ ህግ የተቃወሙ 50 ሚሊዮን ያህል የአገሪቱ ዜጎች ባለፈው ሰኞ እና ማክሰኞ የስራ ማቆም አድማ ማድረጋቸው ተዘግቧል፡፡
የባንክ፣ የፋብሪካና የህዝብ ትራንስፖርት ሰራተኞችን ጨምሮ በተለያዩ መስኮች ተቀጥረው የሚሰሩ ዜጎች በአገሪቱ ስድስት ግዛቶች በስራ ማቆም አድማው ላይ እንደተሳተፉም ዴይሊ ሜይል አስነብቧል፡፡
መንግስት በቅርቡ ያወጣው ህግ የሰራተኞችን መብቶችና ጥቅማጥቅሞች የሚጻረር በመሆኑ ሊስተካከል ይገባል፤ ዝቅተኛ ደመወዝ ከፍ ሊል ይገባል፣ የማህበራዊ ዋስትና ይሰጠን በሚል በተጠራው የስራ ማቆም አድማ ላይ ከ200 ሚሊዮን በላይ ሰዎች ይሳተፋሉ ተብሎ ቢጠበቅም ያን ያህል ቁጥር አለመመዝገቡን የጠቆመው ዘገባው፤ አድማው ተጽዕኖ የማድረስ አቅሙ ግን አነስተኛ ነው መባሉን አመልክቷል፡፡


Saturday, 02 April 2022 12:08

ባይንሽ እያየሁት!

ማንምን ከለመድሽ
ለእኔ ግድ ካጣሽ
(ካመታት በኋላ መስታወት ፊት ቆሜ)
አንቺን እየፈለኩ
እኔን አየዋለሁ
የምትወጂው አይኔን
ባይንሽ እያየሁት
እብሰለሰላለሁ!
ዛሬማ ደፍርሷል
ብርሃን መርጨት ትቷል
ናፍቆት አሟምቶታል
እንባ አበላሽቶታል
ስል እተክዛለሁ
--
ስብሃት! ለማማሩ
ስብሃት! ለጣዕሙ
ያልሽለት ከንፈሬን
በድድር መዳፌ እየደባበስኩት
ባይንሽ አየዋለሁ
“ሲጃር አጥቁሮታል
ማጣት ሰንጥቆታል. . .”
ስትይ እሰማለሁ
አብዝቼ አለቅሳለሁ
--
የማይቻል ሰጥቶት
ያላቅሙ አሸክሞት
የጎበጠ ጫንቃዬን
የምትወጂው ትከሻዬን
በመስታወቱ ውስጥ ባይንሽ አየው እና
“ይሄስ ኮስማና ነው!” ስትይ እሰማለሁ
ወዮ ለእኔ እላለሁ።
--
እምወዳት እኔ እንጂ ምትወዳቸው
የሉም
ስለዚህ አትመጣም
ብትመጣም አትቆይም
የሚል ድምፅ እሰማለሁ
እነፈርቃለሁ
ወዮ ለእኔ እላለሁ።
ናሆም አየለ

Saturday, 02 April 2022 12:09

ነብር አዳኝዋ እቴጌ

  የእቴጌዋ ፍላጎት አንድና አንድ ነው - ነብሮን መግደል፡፡ ያንን ማድረግ የፈለገችው ደግሞ  የዱር እንስሳ የመግደል አባዜ ኖሮባት ወይም ደሞ ነብሩ ሰው እየበላ አስቸግሮ፣ እሱን ገድላ ህንዶቹን ከስጋት ለመገላገል አይደለም፡፡ እንደ አንድ አስፈሪ አውሬ ለመቁጠር እንኳ የሚያዳግት ያረጀ ነብር ገድላ ምንም የምትፈይደው ነገር እንደሌለ ሳይታለም የተፈታ ነው፡፡ ከዚያ ይልቅ እቴጌይቷን ያሳሰባት ‘ነብር ገዳይዋ’ እየተባለች ለጉድ ስትወደስ የከረመችው ሉና፤ እንደዚያ ትልቅ መነጋገሪያ መሆን ነው። እናም ጋዜጦች ሁሉ የገደለችውን ነብር ቆዳ ለብሳ በተነሳቻቸው የሉና ፎቶግራፎች ሲጥለቀለቁ አይታ ነው፣ እኔም እንደዚያ ማድረግ አለብኝ ብላ የተነሳችው፡፡
መጀመሪያውኑም ይህንን እቅድ ስታወጣ ነብሩን ገድላ ወደ ሃገሯ እንደተመለሰች ሉናን የክብር እንግዳ አድርጋ በመኖሪያ ቤቷ የምታዘጋጀውን በአይነቱ የተለየ ትልቅ የምሳ ግብዣ በአእምሮዋ እየሳለች ነው። ልደቷን አስመልክታ የምትገለውን ነብር ጥፍር በስጦታ መልክ ለሉና ስታበረክትላት፣ ግብዣው ላይ የሚገኙት የታወቁና የተከበሩ ትላልቅ ግለሰቦች ብሎም ያገሬው ሰው በሙሉ ሉናን እረስተው የሷን ገድል በመደነቅ ሲያወሩ ሁሉ ይታያት ነበር፡፡
ሰዎች በረሃብና በፍቅር እጦት እየተንገበገቡ በሚኖሩባት ምድር ላይ እቴጌይቷን ከምንም በላይ የሚያስጨንቃት ና የሚያሳስባት ጉዳይ ሌላ ነው፡፡ እንደ እውነቱ ከሆነ በሉና ላይ ትቀናለች ብቻ ሳይሆን እንደውም እንደሷ የምትጠላው ሰው የለም፡፡ እናም ነገረ ስራዋ ሁሉ ከሷ ጋር መፎካከር ብቻ ነው፡፡ ከሉና በልጣ ለመታየት የማትፈነቅለው ድንጋይ  የለም። በቃ የሷ ትልቁ ህልምና ቅዠቷ ያ ነው። ሉናን የምታስንቅ አይነት ሰው ሆና ከመገኘት የበለጠ የሚያስደስታት ነገር የለም፡፡ ለዚህም ነው በጣም ብዙ ገንዘብ መድባ ነብር ልትገድል ቆርጣ የተነሳችው፡፡
በተያዘው ፕሮግራም መሰረት፤ እቴጌ ነብሯን ለመግደል ሃገር አቋርጣ ቦታው ላይ ስትደርስ፣ ህይወቷን ለአደጋ በማያጋልጥ መልኩ ግዳይዋን መጣል ትችል ዘንድ ለአካባቢው ነዋሪዎች ተገቢው ገንዘብ ተከፍሎ ሁሉ ነገር ተመቻችቶ ነው የሚጠብቃት፡፡ እርግጥ ነው ነገርዬው የገቢ ምንጫቸው ለደረቀባቸው የመንደሩ ሰዎችም በጣም ጥሩ መላ ነበር የሆነላቸው፡፡ በዚያ ላይ ከማርጀቱ የተነሳ ለራሱም አድኖ መብላት አቅቶት ፊቱን ቀለል ወደሚሉት ትናንሽ የቤት እንስሳት ያዞረ አንድ ጨምባሳ ነብር ነው የምትገለው፡፡ እናም ደግሞ በተሰጣቸው ዳጎስ ያለ ገንዘብ የተደሰቱት ያገሬው ሰዎች፣ ከተቻለ እንደውም በዚያ አጋጣሚ መንደራቸውን ለማስተዋወቅና ሌሎች መሰል አዳኞችን ለመሳብም ጭምር በማሰብ የአደን ትርኢቱ በተሳካ ሁኔታ እንዲከናወን የሚጠበቅባቸውን ሁሉ ለማድረግ በከፍተኛ ሞራል ነው የተንቀሳቀሱት፡፡ እናም የሰፈሩ ልጆች በሙሉ መንደራቸው አፋፍ ላይ ወዳለው ጫካ ሄደው፣ ነብሩን ከጠዋት እስከ ማታ እንዲጠብቁ ተደረገ፡፡ የልጆቹ ተልእኮ - ምንም እንኳ እንደዚያ የማድረግ እድሉ የሞተ ቢሆንም፣ እንዲያው ግን ምናልባት ወደ ሌላ ቦታ እንዳይሄድ - ነብሩን በብልሃት ጠብቆ ማቆየት ሲሆን ለዚህ ደግሞ በየቀኑ ልክ እንደሱ ሙትት ያሉ፣ አንድ ሃሙስ የቀራቸው ፍየሎችን እያመጡ፣ በግብር መልክ ለሱ አመቻችተው ማቅረብ ነበረባቸው፡፡ ያለዚያ  አዳኝዋ  እመቤት ሳትመጣ ነብሩ ቀድሞ እጃቸው ላይ ሊሞትባቸው ይችላል፡፡ የነብሩ ሁኔታ በጣም ያሳሰባቸው ከመሆኑ የተነሳ ማገዶ የሚለቅሙ እናቶች ሳይቀሩ በዚያ በኩል ሲያልፉ ያን ያረጀ ነብር ላለመበጥበጥ የሚጥም ዘፈን ያንጎራጉሩለታል፡፡
በዚህ መልክ ነው ነብሩን እየተንከባከቡ በህይወት ጠብቀው ያቆዩት፡፡ እናም ያው መቼስ አይደርስ የለምና የተቆረጠለት ቀን ደርሶ አዳኝዋ እቴጌ ዝናሯን ታጥቃ ከተፍ አለች፡፡ እሷን ለመቀበል የነበረው ሽርጉድ ታዲያ ልዩ ነበር፡፡ በተያዘው ዕቅድ መሰረት፤ እቴጌ ግዳይዋን የምትፈፅመው በዚያው ምሽት ስለሆነ፣ ነዋሪዎች የሚጠበቅባቸውን የመጨረሻውን ወጥመድ አዘጋጁ፡፡ ምንም እንኳን በቅጡ የማይሰማ ሙትቻ ነብር ቢሆንም፣ እንዳይስታት አመቻችተው ፍየል አምጥተው ዛፍ ስር አሰሩለት፡፡ ደግነቱ የምሽቱ ጨረቃም ደማቅ ነበረች። ይኸኔ ነው ነብር አዳኟ  አንዳንድ ነገሮችን እንድታግዛት የተቀጠረችላትን ብላቴና አስከትላ፣ ከተባለችው ዋርካ ስር ተኝታ፣ መሳሪያዋን ደግና የነብሩን መምጣት መጠባበቅ የጀመረችው፡፡
‘እትዬ - እኔ ግን ይሄ ነገር አልጣመኝም! እንጃ ብቻ የሆነ ነገር ሳይኖር አይቀርም፡፡’ አለች ብላቴናዪቷ፤ ድምፅዋን ዝቅ አድርጋ። እውነት ነብሩ አሳስቧት ሳይሆን ዝም ብላ ስታካብድ ነው እንደዚያ ያለቻት፡፡
‘ባክሽ ዝም ብለሽ የማይመስል ነገር አታውሪ፡፡ በጣም ያረጀ ነብርም አይደል እንዴ? እንደው ደርሶ ልሞክር ቢል እንኳ በፍፁም ሊደርስብን የሚችል አይነት አይደለም፡፡’ በማለት ነገሩን አቃለለችባት  እቴጌ፡፡
‘አይ እትዬ! እንደምትዪው በጣም የጃጀ ነብር ቢሆን ኖሮ፣ ያን ያህል ብዙ ገንዘብ ያስከፍሉሽ ነበር ብለሽ ነው?’
ብላቴናዪቷ በጥቅሉ ገንዘብን ወዳጇ አርጋ የያዘች ብልጣ-ብልጥ ፍጡር ነች። ገንዘብ ለማግኘት የትም ትገባለች፣ ምንም ታደርጋለች፡፡ ብትችል  ለሃገሯ ልጆች የሚወረወሩትን ጉርሻዎች ሳይቀር ብትቆረጭም ደስታዋ ነው፡፡
የሆነው ይሁንና የተፈጠረው ነገር በየቦታው ሲለፈፍ የምትሰማውን የነብሮች ቁጥር ማሽቆልቆል በውኑ ደርሶባት ቀብሩን እያየች እንዳለች አይነት ስሜት ነው የፈጠረባት፡፡
ነብሩ የታሰረችውን ፍየል እንዳየ ብቻ በደረቱ ነው ለጥ ብሎ የተኛው፡፡ አኳኃኑ ግን ቀስ ብሎ አድፍጦ ሳይታይ መሬት ለመሬት እየተሳበ ሄዶ ሊቀጭማት ሳይሆን፣ የትም የማታመልጠው ግዳዩ ላይ ከመውደቁ በፊት ትንሽ ማረፍ ፈልጎ አይነት ነው፡፡
‘ኧረ! ይሄ ነብር በጣም አሞታል መሰለኝ’ አለች ብላቴናዋ - በህንድኛ፡፡ ለእቴጌዋ ሳይሆን ከነሱ ትንሽ እራቅ ብሎ እየተሽሎከለከ ለነበረው የጎበዝ አለቃ ነው መልእክቷ፡፡
‘እሽሽሽ ዝም በይ!’ አለቻት እቴጌዋ፡፡
በዚህ መሃል ነው ነብሩ የተጣለለት ፍሪዳው ላይ ሊሰፍር ብድግ ያለው፡፡
‘አሁን ነው! ይሄኔ ነው ማለት - በዪው! በዪው!’ አለች ልጂት፤ ‘አሁን ብትገድዪው እኮ የፍየሏን ዋጋ ማስቀነስ እንችላለን፡፡’ - የራሷን አየር እያመቻቸች ነው፡፡
እቴጌ ጥይታቸውን ተኮሱት፡፡ ነብሩ ጥምልምል ብሎ ወደቀ፡፡ ወዲያው ያገሬው ልጆች በደስታ እየተጯጯሁ አካባቢውን ወረሩት፡፡ በመቅፅበት ውስጥ ነው ዜናው መንደራቸው የደረሰው፤ እናም ነዋሪዎቹ ወጥተው ጡሩምባቸውን እየነፉ የምስራቹን በእልልታ ማስተጋባት ጀመሩ፡፡ ነብር ገዳይዋ እቴጌ ግን በዚያ ጩኸትና ጭፈራ መሃል ሆና ታስብ የነበረው ሃገሯ ተመልሳ ቤተ መንግስት በመሰለው መኖሪያ ቤቷ ውስጥ የምታዘጋጀውን ድል ያለ ድግስ እና የሚጠብቃት ቸበርቻቻ ነበር፡፡
በጥይት የተመታው ነብሩ ሳይሆን ፍየሏ እንደሆነች መጀመሪያ ያየችው፣ ያቺ ተንከሲስ ብላቴናይት ነበረች፡፡ እንዳለችውም - ሲታይ የቆሰለችው ፍየሏ እንጂ ነብሩን ጥይት የሚባል ነገር አልነካውም፡፡ እሱ ለራሱ እንዲሁ ጫፍ ላይ ነበርና፣ በጥይቱ ድምፅ ደንብሮ ወድቆ ነው፣ በዚያው ፀጥ ያለው፡፡
ክስተቱ ገድሏን በእጅጉ የሚያኮስስባት ነገር ስለሆነ የአደን ትርኢቱ በዚያ መልክ መቋጨቱ እቴጌዋን በእጅጉ አበሳጭቷታል። ቢያንስ ግን የሞተው ነብር እጇ ላይ ስለወደቀ በዚያ እየተፅናናች ነው፣ ያገሬው ሰው ‘ነብር ገዳይዋ’ እያለ በዘፈን እያወደሰ ሲጨፍርላት ትሰማ የነበረው፡፡
እንዲያም ሆኖ እቴጌይቱ በነብሩ ሬሳ ላይ እየተኩነሰነሰች፣ እልፍ ፎቶዎችን ተነሳች፣ እናም ዜናው በስፋት ተሰራጨ። ጋዜጦችና መፅሄቶችም የአዳኟን እቴጌ ጀብዱ የሚያዳምቁ ዘገባዎችን ይዘው ወጡ። በተራዋ የእቴጌ ዝና እንዲህ መናኘት ያላስደሰታት ሉናን ብቻ ነበር፡፡ በቅናት እርር ድብን ከማለቷ የተነሳ ለተወሰኑ ሳምንታት ራሷን ከጋዜጣና መጽሄቶች አገደች፡፡ ይሁንና እቴጌ የነብሩን ጥፍር በስጦታ መልክ ለልደቷ ስለላከችላት ሳትወድ በግዷም ቢሆን - የምንተ እፍረቷን፣ የምስጋና ደብዳቤ መፃፏ አልቀረም፡፡ በግብዣው ላይ ግን ለመገኘት አልደፈረችም፡፡
እቴጌ የነብሩን ቆዳ አገልድማ በኩራት እየተምነሸነሸች እቤቷ ስትገባ የተደረገላት አቀባበል ጉድ የሚያሰኝ ነበር፡፡ አጀባና ከበርቻቻው በጣም የሚገርም ነው። ሰዉ ሁሉ በሆይታው ከመዋጡ የተነሳ የቆዳውን ሁኔታ የሚያስተውልበት ቀልብ አልነበረውም፡፡ ታዲያ እቴጌዋም ኮራ ብላ ነው፣ በቄንጥ እየተሸከረከረች ስትሸልልባቸው የነበረው፡፡ የነብር ቆዳዋን ተጎናፅፋ ልክ እንደ ታላቋ ዳያና በክብር ተሞሽራ፣ በታወቀው የሃገረ ገዢ እልፍኝ አዳራሽ እየተንፈላሰሰች ስትዘባነን፣ የሆነች ለየት ያለች አስደማሚ ግርማዊት ንግስት ነበር የምትመስለው፡፡ እንደውም አንድ ወዳጇ እንዳላት፣ ዝግጅቱን ልክ እንደ ጥንቱ ዘመን ስርአተ-ጭፈራ፣ ታዳሚዎቹ በሙሉ ያላቸውን የአራዊት ቆዳ ለብሰው የሚገኙበት፣ በአይነቱ የተለየ አስደናቂ ዝግጅት ለማድረግ ሁሉ ታስቦ ነበር፡፡
‘እንደዛ ሲያዳንቁና ሲጨፍሩ የነበሩት ሰዎች ግን በትክክል የሆነውን ነገር ቢያውቁ እንዲያው ምን ይሉ ይሆን?’ ነገሩ ሁሉ ካለቀ በኋላ በሁለተኛው ቀን ነበር፣ ብላቴናዋ የጠየቀቻት፡፡ ‘ምን ለማለት ፈልገሽ ነው?’ አለች እቴጌዋ፤ ቆምጨጭ ብላ፡፡
‘ማለቴ በአንድ ድንጋይ ሁለት ወፍ አይነት እኮ ነው ያደረግሽው፤ በጣም ይገርማል። እንደው ግን ፍየሏን መትተሽ ነብሩን በድንጋጤ ፀጥ እንዳደረግሽው ቢያውቁ ምን ሊሉ እንደሚችሉ ሳስበው ይገርመኛል፡፡’
‘እንዲች ብለሽ እንዳታስቢያት! በጭራሽ የሚያምነኝ ሰው ይኖራል ብለሽ እንዳትጠብቂ! ማንም ያንቺን ወሬ አምኖ እንደማይቀበልሽ ነው የምነግርሽ፡፡’ የእቴጌዋ ፊት ፍም መስሏል፡፡
‘ቢያንስ ግን ሉና አትቀበለኝም ብለሽ ነው?’
‘ያን ያህል ጨክነሽ አሳልፈሽ ትሰጪኛለሽ ብዬ አላስብም፡፡’ ከመደራደር ውጪ ሌላ አማራጭ እንደሌላት ገብቷታል፤እቴጌ፡፡
‘ኧረ እትዬ እኔም እንደዛ የማድረግ ፍላጎት የለኝም፡፡ ግን አንዳንዴ እየሄድኩ አረፍ የምልበት - ሃገር ቤት ልገዛው የምፈልገው አንድ ቦታ አለ፡፡ ደግሞ ያን ያህል እንደምታስቢው ብዙ ገንዘብ አልጠይቅሽም። የሆኑ ሺዎች ብቻ ጣል ካደረግሽብኝ በቂዬ ነው፡፡’
ብላቴናዋ እንዳለችው በኋላ ላይ ‹አለ የተባለ› ጉደኛ ቤት ነው ሃገሯ ላይ የሰራችው። ከምንም በላይ ያገሬውን ሰው በጣም ያስገረመው ግን ቤቱን የሰራችበት መንገድ ነው፡፡
በእቴጌዋ በኩል ደግሞ አንድ የተገነዘበችው ነገር ቢኖር፣ እንደዚህ ያሉ ያልታሰቡ ወጪዎች ሰውን ምን ያህል እንደሚያሰክሩና አደጋ ላይ እንደሚጥሉ ነው። አደን የሚባለውን ነገር እርግፍ አድርጋ የተወችውም ከዚያን ጊዜ ጀምሮ ነው፡፡



           አዘውትረው ከሚያመሹባት ‘Sol Dallas’ የምትባል ለሚ ኩራ...ፍየል ቤት አካባቢ ካለች ትንሽዬ ቤት በረንዳ ላይ ጥገኛውን ጠረጴዛ ይዛ ቁጭ ብላለች። ፊት ለፊቷ ያቆማት መኪናውን መሪ ከላይ ሁለት እጆቹን አጋጥሞ እንደጨበጠ በትንሽዬ ፈገግታ ትኩር ብሎ ለአፍታ ታዘባት።
ከሩቅ ሀገር የሚጣራ ግርማ ሞገስ እንደተላበሰች የምታውቅ ሁላ አትመስልም... አቀርቅራ ከተከዘችበት ስልኳ ተፋትታ ቀና ስትል፣ ጠረጴዛዋን በአፍንጫዋ ልትነካ የመወስወስ ያህል ተጠግታት የቆመችው መኪና የእርሱ አሮጌ ቢመር መሆኗን አይታ፣ በዐይኖቿም... በጉንጮቿም... በከናፍሯም አንድ ላይ ፍንድቅድቅ አለች።
ወዳጁ ብቻ እንደሆነች ያውቃል። እንዴት ወዳጁ ብቻ እንደሆነች አይገባውም። ብቻ የተዋወቁ ሰሞን “አስተምርሀለው...” ያለችውን፣ ተስማምቶ “...እሺ” ያላትን ላለመርሳት ከራሱ ተማምሏል።
“...ነገሮችን ከሆኑት በላይ አወሳስበህ እየተረጎምክ ሰላምህን የምታጣውን ነገር እንዴት እንደምትጥል እኔ ሀላፊነቱን ወስጄ አስተምርሀለው... አንዳንዴ ነገሮች የሚመስሉትን ብቻ ናቸው... ሌላ ድብቅ ትርጉም ከጀርባቸው የለም!” ብላው ነው፤ ይኸው አሁን ይሄን ያኽል አንዳቸው በሌላኛቸው ቀን ውስጥ እስኪገዝፉ ድረስ ያደገው ወዳጅነታቸው ዳዴ ማለት የጀመረው።
በእርሷ ቤት ትምህርቷን አጣጥሞ በሚደንቅ ፍጥነት ነፃ እንደወጣ እርግጠኛ እንደሆነች ያውቃል። እርግጠኛ ነው። ከዚህ ሁሉ ጊዜ በኋላ ስታየው ከሚገነፍል ፍንደቃዋ ውስጥ ከወዳጅነት የላቀ ፍቅር ላለማንበብ እንደሚታገል ሊነግራት አይችልም። ምክር ሲያስፈልገው ከቅዱሱ መፅሐፍ “...ይህን ያህል ዘመን ከእናንተ ጋር ስኖር አታውቀኝምን?” የሚል ጥቅስ እየመዘዘ እራሱን ይገስፃል።
“ተው እንጂ ፊሊጶስ...” እያለ እራሱን ይጎሽማል።
“አንዳንዴ ሰማያዊ አስተማሪ ለምድራዊ ተማሪ አይገባ እንደሁ እንጂ መልዕክቱ ፍፁም፤ ያልተገለጠም የሌለው ነው!” ሲል ተስፋውን እራቅ አድርጎ ይጥላል።
በተቀመጠችበት ከናፍሯን አሞጥሙጣ ቀኝ ጉንጯን ሰጠችው። የከናፍሯ ድርሻ እንደ መሳም ያለ ድምፅ ማውጣት ብቻ እንደሆነ ያውቃል። ነገር ከሆነው በላይ የማይተረጎምበት ወዳጅነት ውስጥ ግርታ ለመፍጠር እንኳ አቅም አጥታ የተሰነቀረች የሰላምታ ድግግሞሻቸው ናት ይቺ... በቃ።
ሊቀመጥበት ያለውን ወንበር ከራሷ ወንበር በስሱ ወደተረፈ ዳሌዋ ጎተት እያደረገች... “ ንገረኝ እስቲ... እንዴት ሆነልህ?” አለችው በጉጉት።
“እህ... ሰላምዬ ደሞ... ቁጭ ልበል እስቲ ቆይ...” አላት ላለመሳቅና ለመኮሳተር እኩል እየታገለ።
መፅሐፉን እንዲያሳትም ድፍን ዐመት ጀንጅና ካሳመነችው በኋላ በስልክ ካገናኘችው አሳታሚ ጋ የከሰዐት ቀጠሮውን ጨርሶ እስኪመለስ አላስቻላት ሆኖ ፣ ቀድማው ከትንሿ ማምሻቸው ቤት በረንዳ ላይ የጠበቀችው።
“አትሟዘዝ እንግዲ... ንገረኝ። አነበብኩት አለህ? ወደደው? ደስ የሚል ሰው ነው ኣ?...” አጣደፈችው።
“ደስ የሚል ሰው ነው።” እየሳቀባት ቀጠለ...
“... ወዶታል መሰለኝ ነገር... ትንሽ ጦልቦኛል ግን ያው... የወደደው ይመስለኛል።”
“እና ምን አለህ? ይታተማል አለህ?...” ፊቷ ላይ በተትረፈረፈ ደስታዋ፣ እንዳልረካች አይነት ግራ እጁን ቀጨም አድርጋ፣ ዐይን ዐይኑን እያየች ጠየቀችው።
“እ... ‘ነገር’ የሚለውን ቃል አብዝቼ እንደምጠቀም... እ... ምዕራፍ ሶስት ላይ ብቻ እንኳን ወደ አስራ ሶስት ጊዜ ‘ነገር’ እንዳልኩ ነገረኝ ይኸውልሽ...”
“ነገረኛ ስለሆንክ እንደሆነ ነገርከው?...” አለችው ሳቋን እየታገለች።
“እ... እንደዛ ነገር...” ብሏት ግንባራቸው እስኪጋጠም ተጠጋግተው፣ አብረው ድክም አሉ...
ሲዋሻት ውስጡ ከመገላበጥ የሚጀምረው መረበሽ እየተጣደፈ፣ ፊቱ ላይ እንደሚሳፈር ከተረዳ ጊዜ ጀምሮ ያገኘው ድኩም መላ እየቧለተ እንድትስቅ ማድረግ ነው። እንድትስቅ አድርጎ ደግሞ በሳቋ መልሶ መሳቅ... ስትስቅ ከፊቱ ላይ የማይባረር መረበሽ ሊኖር አይችልም። አብሯት ሲስቅ ደግሞ ከሚጠብቡ ጨፍጋጋ ዐይኖቹ ውስጥ እውነቱን በሚያንሰፈስፉ ዐይኖቿ እንዳትፈልግ ያዘናጋታል።
አሳታሚው ጎልማሳ የላከለትን ጥራዝ በወጉ እንኳን እንዳላገላበጠው የተረዳው፣ ገና ወደ ቢሮው ገብቶ ከግብዳ ጠረጴዛ ስር የተወሸቀች የእንግዳ ማስተናገጃ ወንበር ላይ ተደላድሎ ሳይቀመጥ ነው። ቀጠሮውንም የያዘለት በአግባቡ እንዳልተገላበጠ በሚያሳብቅ መልኩ፣ ከፊቱ ያስቀመጠው ፅሁፍ ውስጥ ቁምነገር አግኝቶ ሳይሆን የሚወሰወስባትን ሰላም ደውሎ መጀንጀኛ ርዕስ ፍለጋ እንደሆነ ገብቶታል ነገር...
የመታተም እቅድ ኖሮት ስለማያውቅ ብዙም አልከፋውም። የደበረው የሰላሙ ደስታ ላይ ውሀ ላለመቸለስ አሁን እየተወነ ያለው የማስመሰል ድራማ ነው።
ሰላሳ ደቂቃ ከዘለቀ ደጅ ጥናቱ ሀያውን ያጠፋው ጎልማሳው ሰውዬ፣ ስለ ሰላም የጠየቀውን ጥያቄዎች በመመለስ እንደሆነ እያስታወሰ ፈገግ አለና፣ ቀጥሎ ለምትጠይቀው ጥያቄ፣ ከአስሯ ደቂቃ ውስጥ የእውነት የሚመስል መልስ መፈለግ ጀመረ።  
“እ... እና መቼ እናሳትመዋለን አለህ? ብሩ እንደማይቸግረን ነገርከው ኣ? ያው እሱ የሚያስፈልገን ገበያውን ስለሚያውቀው ምናምን እንደሆነ?” አሁን ደስታዋ ወደ መኩራራት ተንጠራርቷል።
“በርግጥ ፅሁፉን ወዶታል ያው... ግን ምን አሪፍ ነገር አነሳ መሰለሽ? መፅሀፉ ላይ ያሉት ብዙዎቹ ገፀ-ባህሪዎች የሌሉ ናቸው... በሌሉ ሰዎች የሚረካ የአንድ ምስኪን ትዝታ ላይ የተንጠለጠለ ጨለምተኛ መልዕክት ነው የሚያስተላልፈው... እና ያው ሰዎች ሲያነብቡት እንደሱ አድርገው ነው የሚስሉኝ... እንደርሱ እንደሆንኩ እንድታውቁ የምፈቅደው ደግሞ ለጥቂት የልቤ ሰዎች ብቻ ነው መሆን ያለበት... አይመስልሽም? እና ‘ሌላ ቆንጆ ነገር ብፅፍልህ ይሻላል፤ ይኼንን እንተወው’ ልለው እያሰብኩ ነው... ሙች ሙች የመታተሙን እቅድ እየተውኩት አይደለም ሰላምዬ...” በስስት እያያት ተንተባተበ...
“እኔን... አስጨነቅኩህ ኣ? ዋናው ፅሁፎችህን ለማካፈል መወሰንህ ነው... የኔ ጎበዝዬ...” እጁን ለቀቅ አድርጋ የሚያግል እጇን አንገቱ ስር አስገባች...
ጋደድ ብሎ በጆሮና በትከሻው መሀል ትንሽ ቆልፎ አቆየው...
“...ይሄንን ጨለምተኛ... የሌለ ሰው... ምናምን የምትለውን ነገር ግን ብትተው ነው እሚሻልህ...” አለች ኮስተር ብላ እጇን እየነጠቀችው...
“ምን ማለቴ እንደሆነ ገብቶሻል ባክሽ... አንዳንድ ሰው ሳይኖር ነው እሚሻለው። ሲኖር የሚያስቀይም ነፍ ሰው አለ ሰላምዬ። እኔ አባቴን የማዝንበት ልጅነቴን በሙሉ ስላልነበረ አይደለም። ያው እንደምታውቂውና ደጋግሜ እንደጎረርኩብሽ መልኳን በመልኬ የቀየረች ጀግና እናት ናት ያሳደገቺኝ። ምንም አልጎደለብኝም። አባቴ እንዳይጠላው እየተገራ ያደገ ልቤን ያስከፋው ባለመኖሩ ሳይሆን ሰልባጅና ጥራጥሬ ሽጣ ያስተማረችኝ ሴትዮ ልታስመርቀኝ በደገሰችው ድግስ፣ ‘እንደ አባት ካልተገኘሁ’ በማለቱ ነው። ኤክሴን የማልወዳት ስለሄደች አይደለም... ‘ለካ ያቺኛዋን የወሰድክብኝ እንደዚህችኛዋ አይነት ድንቅ ልትለግሰኝ ነው’ ብዬ አመስግኜ ሳልጨርስ ተመልሳ መጥታ ስላደፈረሰችው ሰላሜ ነው...” ፊቷ ላይ የነበረው ደስታ ሲከስም እንኳ እስከማያስተውል ድረስ ዝለቱን ዝርግፍ አደረገባት...
“እና ብትሄጂም አይከፋኝም... እግዜሩ የተሻለ ያዘጋጅልኛል ነው?” አለችው፤ አፍንጫዋን ነፍታ ወንበሯን ወደ ኋላ እስከ መጨረሻ እየተደገፈች።
ስታኮርፍ እንዴት እንደሚያፅናናት ያውቃል... ዐይኖቹን አጨፍግጎ ምላሱን እያወጣባት፣ ጎተት አደረገና ግንባሯን ሳም አደረጋት...
ብዙም የተፅናናች አትመስልም... እንዳያስቃት ፊቷን እያዞረችበት...
“ለማንኛውም ወዳጅ አታርቅ... ወዳጅ አስፈላጊ ነገር ነው...” አለችው።
ቀልድ... ቀልድ ያስፈልገዋል... ሳትሄድ መሳቅ አለባት...
“ወዳጅማ ግድ ነው... እንኳን የሰው የእንሰሳ እንኳን ወዳጅ ያስፈልጋል። አልነገርኩሽም? ግቢ ገና እንደገባን...”
ቆንጆ ፊቷን ቀስ አድርጋ አዞረችና ልትሰማው ቀና አለች።
“... ነፍሱን ይማረው ሶል ካሳ ‘sketching’ እያስተማረን፣ አንድ አርብ ቀን ‘ወደ ቤታችሁ ስትሄዱ አንድ መንደራችሁን የሚገልፅ scene ምረጡና sketch አድርጉ’ ብሎ ይልከናል። እናልሽ ሰኞ ስንመለስ ሰፈሩ እዛው ልደትዬ ጋ የሆነ አንድ ቀልድ አዋቂ ጀለሳችን፣ ውሻ ስልክ እንጨት ስር እግሩን አንስቶ እየሸና sketch አድርጎ ከች ይልልሻል። ሶል ካሳ ግራ በመጋባት እያየው፣ ‘ይሄንንማ ከፎቶ አልያም ከስዕል ላይ ነው የወሰድከው’ ይለዋል። ጀለስካ ግግም ብሎ ‘ኧረ ሰክቼው ነው’ ማለት... ‘sketch አድርገኸው እስክትጨርስ እንደዚህ ሆኖ ጠበቀህ?’ ይለዋል፤ ሶል ካሳ ቆጣ ብሎ... ጀለስካ ምን ቢል ጥሩ ነው? ‘የሰፈር ውሻ እኮ ነው... አውቀዋለሁ... ወዳጄ ነው!’... እና ምን ልልሽ ነው? ወዳጅ ሲሆን ውሻም ይቸገርልሻል፤ ይኸውልሽ... ወዳጅማ አስፈላጊ ነው...”
እየተፍለቀለቀች በስሱ በጥፊ አለችው...
“እ... እንዴት እንደምታስቀኝማ ታውቅበታለህ... ለማንኛውም በቃ ልግባ፤ ሰውዬዬም ያው ዛሬ እንደማገኝህ ስለሚያውቅ ከዚህ በላይ ካመሸሁ አፍንጫውን መንፋቱ አይቀርም... እንኳን ተነፋፍቶ ስቆም የሚጨንቅ ሶዬ...” ለመነሳት ተቁነጠነጠች...
ከጥቂት ወራት ወዲህ ሰውዬዋ አብሯቸው ካልተቀመጠ፣ ዘይራው እንኳን የጠገበች ሳይመስላት ነው በግዜ ጥላው የምትሄደው።
እንደ ልማዳቸው ብድግ ብሎ እራቅ እድርጋ የምታቆመው መኪናዋ ድረስ አደረሳትና፣ ገብታ ስትደላደል ጠብቆ የዘጋላትን በር መስታወት ስታንሸራትትለት፣ ወደ ትከሻዋ ስር ዝቅ አለ...
በጣቷ ብቻ ተረክ አድርጋ ስትቀሰቅሰው መኪናዋ ማዜሙን ካቆመበት ይቀጥላል... ምን እየሰማች እንደነበር ለመስማት ጆሮውን ለአፍታ የሚቀስራት ነገር፣ አሁን የሁልጊዜ ልምምዳቸው ሆናለች። ‘ኢንትሮውን’ እየሰማ...
“ታውቀዋለህ ኣ ይሄን ዘፈን?” አለችው ፈገግ ብላ።
“ of course...” አለ አፉን እያጣመመ።
ብዙ ፕሌይ ሊስቷን የሰራው እርሱው እራሱው ነው።
“ለማንኛውም ለዛሬ የደስደስ የምሰጥህ ነበረኝ... ገግመህ ግማሽ አድርገኸዋል... ይኸው እንግዲ...” ብላ ግማሽ ከንፈሩን በከንፈሯ አስነክታ ፈትለክ አለች።
ከቆመበት ሳይነቃነቅ ትንሽ ከቆየ በኋላ፣ እየተንገዳገደ ወደ ጠረጴዛው ተመለሰ። ስልኩን አውጥቶ የመኪናዋን ዜማ ቀጠለው...
“50 ways to leave your lover”ን ከሌላው ጊዜ በተለየ ትኩረት እያዳመጠ ነው...
Paul Simon ቀለል አድርጎ ይወርደዋል...
“...She said why don’t we both
Just sleep on it tonight
And I believe in the morning
You’ll begin to see the light
And then she kissed me
And I realized she probably was right
There must be fifty ways
To leave your lover
Fifty ways to leave your lover...”
ዐይኖቹ ፈጠጡ...
“ምን እያለችኝ ነው?...” አለ በለሆሳስ አጠገቡ ለሌለ ሰው።
አዲስ ውዝግብ የሚያስተናግድበት አቅምና ሰላም እንደሌለው ያውቃል። እንዳይጠይቃት አይነት አካሄድ የሄደችውስ ነገር? “ሰውዬሽ ጋ ሰላም ገባሽ?” ብሎስ እንዴት ነው የሚደውለው?


Saturday, 02 April 2022 11:55

የቻይናው ወጣት ቢሊዬነር

 “መቼም ቢሆን ህልሜን እንጂ ሌላ ነገር ሰርቼ አላውቅም”

             በወጣትነቱ ምርጥ መካኒካል ኢንጂነሪንግ የመሆን ህልም ነበረው - ቻይናዊው ዲንግ ሊ። በሰው ልጆች ታሪክ ውስጥ የተከሰቱትን ታላላቅ ሳይንቲስቶች፣ እነ ቶማስ ኤዲሰንና አልበርት አንስታይንን ሲያደንቃቸው ለጉድ ነው። ገና የአስራ ሶስት ዓመት ልጅ ሳለ ለኤሌክትሮኒክስ እቃዎች ልዩ ፍቅርና ዝንባሌ ነበረው። በአስራ ስድስት ዓመቱ የሬዲዮ የተለያዩ ክፍሎችን የመገጣጠም ችሎታ አዳብሯል።
በኮሌጅ ያሳለፋቸው አራት ዓመታት የዲንግ ወርቃማ ጊዜያት ሲሆኑ፤የቀለም ትምህርቱን ከማጥናት ይልቅ በኤሌክትሮኒክስ ዙሪያ የተፃፉ 300ሺ መፃሕፍት ከነበራቸው የት/ቤቱ ቤተ-መጻሕፍት የሚያገኛቸው የኢንፎርሜሽን ቴክኖሎጂ (IT) መፃሕፍትን ማንበብ ያስደስተው ነበር። በሁሉም ጉዳዮች ላይ የራሱ ሃሳብ እንደነበረው የሚያስታውሱት የመመረቂያ ፅሁፍ  አማካሪው ፌንግ ሊን፤ ዲንግ ከሌሎች ተማሪዎች የተለየ እንደነበር ይናገራሉ - ብዙ ጊዜ እንግዳ የሆኑ ጥያቄዎችን እንደሚያነሳ በመጥቀስ። ዲንግ ከኮሌጅ የተማረው ነገር ቢኖር ከልብ ማጥናትን ሲሆን አሁንም ድረስ እስከ እኩለ ሌሊት ከማጥናት አላረፈም። ከኮሌጅ ገና ሳይመረቅ ሶፍትዌር በመስራት ከዘመነኞቹ እንደሚልቅ ያስመሰከረ ተማሪም ነበር። ህልሙን እውን ለማድረግ ከቻይና ቴሌኮም ሥራው ብቻ ሳይሆን የውጭ አገር ድጋፍ ከሚደረግለትና ጥሩ ደሞዝ ከሚከፍለው አንድ ተቋምም በገዛ ፈቃዱ ለቋል።
ዲንግ ሊ Net Ease የተሰኘውን የኢንተርትኔት ቢዝነስ በጁን 1997 ዓ.ም ሲጀምር ከአስራ ሁለት የማይበልጡ ሠራተኞች ነበሩት፤ ይሁንና ሥራውን በማስፋፋት በአጭር ጊዜ ውስጥ የሠራተኞቹን ቁጥር 300 ማድረስ ችሏል።
በመጀመሪያዎቹ ሁለት ዓመታት ገንዘቡንና ጉልበቱን የኢንተርኔት ሶፍትዌር ፈጠራ ላይ በማዋል ሲሰራ የቆየው ዲንግ; በቻይና በዓይነቱ የመጀመሪያ የሆነውን ባለሁለት ቋንቋ የኢ-ሜይል ሲስተም ሥራ ላይ ለማዋል የቻለ ትጉህ ሰው ነው። የዚህ ኢ-ሜይል ሲስተም መተዋወቅ በቻይና ኢንተርኔት እንዲለመድና እንዲስፋፋ ምክንያት እንደሆነ ብዙዎች ያወሳሉ። በእርግጥ ዲንግ የቢዝነሱን ማደግና መውደቅ በወረቀት ላይ ማስላት አይወድም። ሆኖም የቢዝነሱ ስኬት በብርሀን ፍጥነት የሚለካ እስኪባል ድረስ እጅግ አስደናቂ ነው።
በአንድ ዓመት ከግማሽ ብቻ የኩባንያው የአንድ አረቦን መሸጫ ዋጋ ከዘጠና ሳንቲም ወደ ሠባ ዶላር ተተኩሷል። 2001 ዓ.ም ለዲንግ ኩባንያ ክፉ ጊዜ ነበር። በ2000 ዓ.ም የተሳሳተ የገቢ ሪፖርት አቅርቧል የሚል ወሬ ስለተሰራጨበት በሩ ለደንበኞች ክፍት አልነበረም። በዚህም ሳቢያ የአንድ አረቦን መሸጫ ዋጋ ሲጀምር እንደነበረው ወደ ዘጠና ሳንቲም ለመውረድ ተገደደ።
በእርግጥ ዲንግ የቻይና ባለጸጋ እሆናለሁ ብሎ አስቦ አያውቅም። የNet Ease ኩባንያ ስኬትም ሆነ ውጣ ውረዱን ሲናገር አንዳችም በስሜት መዋጥም ሆነ መጥለቅለቅ አይስተዋልበትም። አንዳንዶች ዕድል ለስኬት እንዳበቃው ቢናገሩም፣ እሱ በዚህ ረገድ ከሌሎች የተለየ አቋም አለው።
በኢንጅነሪንግ የባችለር ዲግሪውን ባገኘበትና በቼንግዱ ግዛት በሚገኘው በቻይና የኤሌክትሮኒክ ሳይንስና ቴክኖሎጂ ዩኒቨርስቲ ለተማሪዎች ንግግር ሲያደርግ፤ “ጠንካራ መሆን የሚፈልጉ ሰዎች ሁልጊዜም መልካም  አጋጣሚዎችን ይፈጥራሉ፤ ብልሆቹ መልካም አጋጣሚዎች እንዳያመልጧቸው በጥንቃቄ ሲጠቀሙባቸው፣ ራሳቸውን ደካማ አድርገው የሚያስቡ ደግሞ መልካም አጋጣሚዎች እስኪፈጠሩላቸው ይጠብቃሉ” ብሏል።
የቢዝነስ ጨዋታው አዝናኝም አስተማሪም እንደሚሆን ተስፋ የሚያደርገው ዲንግ፤ በመጪዎቹ አስርት ዓመታት በቻይና አስደናቂ የኢንተርኔት ዕድገት እንደሚታይ ፅኑ ዕምነት አለው፤ በተለይ በኤሌክትሮኒክስ ቢዝነስ።
ገንዘብ የማይሰሩ ቢዝነሶች በየቦታው እንዳሉ የሚናገረው ዲንግ፤ በተጨባጭ ግን ገንዘብ የማይሰራ ቢዝነስ የሚባል ነገር እንደሌለ የራሱን ኩባንያ አሰራር በመጥቀስ ያስረዳል፡- “የኔ ግብ ቀላልና ግልፅ ነው….”ይላል፤ “Net Ease …. የላቀ አገልግሎት እንዲሰጥ የምችለውን ሁሉ መስራት”።
ለውጭ ተመልካች ኩባንያው ፈፅሞ የስኬት ተምሳሌት ለመሰኘት የሚበቃ አይደለም። ለምን ቢባል ብዙ በዓይን የሚታይ ነገር ስለሌለው። በዲንግ ልብ ውስጥ ያሉትን ትላልቅ ህልሞች የሚያውቀው ግን ፈጣሪና ራሱ  ባለቤቱ ብቻ ነው። ይኼ የቻይና ቢሊኒየር ስላቋቋመው ኩባንያ ሲናገር፤ ሥራችን ሃላፊነትን መወጣት ነው፤ ይላል። “ለኢንቨስተሮች፤ ለደንበኞች፣ ለተጠቃሚዎች፣ ለሰራተኞችና ለኢንተርኔት… ያለብንን ሃላፊነት መወጣት።”
ዲንግ በዕድሜው ወጣት ቢሆንም ከህይወት አንድ ነገር ተምሯል - መልካምነትን። የአንድ ቢሊዮን ዶላር ሃብት ለዚህ ባለፀጋ ምንም ማለት አይደለም። የቻይና ባለፀጋ መሰኘቱም ከባልንጀሮቹ ጋር የታሸገ ምግብ  ከመካፈል አላገደውም።
“ሃብት ማለት፡- ለእኔ ሁለት ነገሮች ማለት ነው፤ ገንዘብና ተሰጥኦ። ዛሬ በእጄ ላይ ያለው የትናንት ውጤት ነው፤አዕምሮዬ ውስጥ ያለው ግን የወደፊቱን ዓለም ይፈጥራል” ይላል።
ለዚህም ይመስላል ዲንግ የሰራተኞቹን ዕውቀትና ሙያ ለማሻሻል በየጊዜው ሥልጠናዎች የሚሰጠው። ከተለያዩ ዩኒቨርስቲዎች አዳዲስ ምሩቆችን እየለመለመ የሚቀጥረው ወጣቱ ቢሊኒየር፤ የኩባንያውን ብቃት ለማሳደግ ከሁለት ሺህ እስከ ሶስት ሺህ የሚደርሱ ሰራተኞችን የመቅጠር ዕቅድ አለው።
የዛሬው ባለፀጋ ዲንግ የዩኒቨርስቲ የተማሪነት ዘመኑ ሁሌም እንደሚናፍቀው ይናገራል - በተለይ ደግሞ ቤተ-መፃሕፍቱና በጥያቄዎች የታጨቀው ጭንቅላቱ።
“አንዳንዴ ድክም ሲለኝ ደጉ ጊዜ ይለኛል፤ እናም ኢንተርኔት አካባቢ አንዣብባለሁ” የሚለው ዲንግ፤ “መቼም ቢሆን ግን ህልሜን እንጂ ሌላ ነገር ሰርቼ አላውቅም” ይላል፡፡
የዚህን ቻይናዊ ሥራ ፈጣሪ የስኬት ታሪክ አስመልክቶ የቅርብ ወዳጁ በሰጠው አስተያየት፡- “ባህሪውን እወድለታለሁ፤ እንደ ንግድ ሰው የላቀና ብልጣብልጥ ነው፤ ግን ደግሞ የህጻን ልጅ የዋህ ልብ አለው።” ብሏል።
("ታላላቅ ህልሞች፤ የሚሊዬነሮች የስኬት ጉዞ" ከተሰኘው መጽሐፍ የተወሰደ)

Sunday, 03 April 2022 00:00

ፅናትና እልኸኝነት

"እልኸኝነት በእግዚአብሔርም የተጠላ ነው፤ እልኸኛ ሰው ከራሱ ጋርም የተጣላ ነው፡፡ እልኸኞች አጥፍቶ ጠፊዎች ናቸው፡፡ ስለዚህም መንገዳችንን እንመርምር እንፈትን፣ በፅናትም ወደ መልካም ነገር እንገስግስ!"

              ፅናት ለሚለው (Perseverance) እልከኝነት /ግትርነት/ በሚለው ደግሞ (Obstinacy /Obstinate/) የተባሉት የእንግሊዝኛ ቃላት አቻዎቻቸው ናቸው፡፡
የፅናት መነሻውም መድረሻውም መልካምነት፣ሰላምና ዕድገት ነው፡፡ ፅናት አዎንታዊነት ይበዛበታል፡፡ እልኸኝነት ደግሞ መሠረቱ ቅናት፣ ተጋፊነትና ግድየለሽነት ነው። ዕድገትንም የሚያስበው በሌሎች መውደቅ ላይ ተመስርቶ ነው፡፡
የቀደመው ዘመን የአሜሪካ ዕድገት፣ ከሁለተኛው የአለም ጦርነት ውድቀቷ በኋላ ጃፓን በአጭር ጊዜ የተቀዳጀችው ሥልጣኔ፤ የቻይና ከድህነት መላቀቅና ማደግ የፅናት ተምሳሌት ናቸው፡፡ በተለይም ቻይና ከሰባት መቶ ሰማንያ ሚሊዮን /780,000,000/ በላይ ሕዝቦቿን ከድህነት አዘቅት አውጥታ ለዛሬው ዕድገት መብቃት፣ የእነ አሜሪካ ኢኮኖሚስቶችና ባለሙያዎች ጭምር ጉድ የተሰኙበት ነው፡፡
እልኸኞቹ /ግትሮቹ/ የጀርመኑ ናዚ ሂትለርና የኢጣሊያው ፋሽስት ሙሶሊኒ ደግሞ ሃገራቸውን ጎድተው፣ የአለምንም ሕዝብ ጦርነት ውስጥ ማግደው ከፍተኛ እልቂት አድርሰዋል፡፡
ፅናት በግለሰብም ደረጃ ብናየው ግቡ ካለበት ዝቅተኛ ኑሮ፣ ራሱን በተገቢው መንገድ ጥሮ-ግሮ ማሻሻል ነው፡፡ ይኸውም በመማር፣ የመፍጠር ችሎታን በማሳደግ፣ ከሌሎች ተገቢ ድጋፍ በማግኘትና የመሳሰሉትን በመጠቀም ሊሆን ይችላል፡፡ እልኸኛው /ግትሩ/ ሰው ደግሞ እሱ ላለበት ዝቅተኝነት ምክንያቱ ሌሎች ናቸው በማለት ይጀምራል፡፡ ስለዚህ እኔ እንዳድግ ሌሎች መውደቅ አለባቸው ይላል፡፡
ከሃይማኖትም አንፃር ብንመለከት ፅናት ያለው ሰው፣ የራሱን ሃጢአት ይገነዘብና ከልብ ንስሃ ይገባል፣ ይፆማል፣ ይፀልያል። እልኸኛው /ግትሩ/ ግን ስለ ክፉ ሥራው ተፀፅቶ ሳይሆን፣ በግብዝነት ወይም በማስመሰል ይቀርባል፡፡
በፅናት አለም አቀፍ ድርጅቶችም ተወልደዋል፡፡ የቀይ መስቀል ድርጅት፣ የተባበሩት መንግስታት ድርጅት፣ የአፍሪካ አንድነት /ሕብረት/፣ የጤና ተቋማት፣ የኢሎምፒክ ውድድሮች፣ ኢንተር-ፖል ወዘተ፡፡ የዚህ ተቃራኒ ደግሞ አሉ፤ አክራሪና በዕልቂት ላይ የተመሰረቱ አካባቢያዊና አለም አቀፋዊ “ሃይማኖት" መልስ ድርጅቶች፣ ዶፒንግ ተጠቃሚዎች ወዘተ--
ልብ ካላችሁ፤ ለመልካም ነገር፣ በግለሰብም ይሁን በሃገር አቀፍ ደረጃ በፅናት የሚንቀሳቀሱ ሰዎች፤ ጥርት ያለ አላማና ግልፅ የሆነ ስልት ስላላቸው፣ ዘለቄታዊ ድጋፍ ያገኛሉ፡፡ በሌላ በኩል ደግሞ ግትሮቹ አላማቸው ተለዋዋጭነት ይታይበትና፣ ስልታቸውም በሐሰት ላይ የተመሰረተ ስለሆነ ለትብብር አይመቹም፣ ገልበጥባጣ ናቸው፡፡
ድክመቱንም ጥንካሬውንም በግልፅ ስለሚያወያይበትና ለሕዝብ ክፍት ስለሚያደርግ፣ በፅናት የሚደረግ ጉዞ ክስረት አይበዛበትም፡፡ እልኸኛው ግን በተለይ ድክመቶቹን በሌላው ላይ ያላክካል፡፡ (Scapegoat)፣ እናም ማምለጫ ይፈልጋል እንጂ አያምንም፤ ስለዚህም ውሸትን በውሸት ላይ፣ ሽንፈትን በሌላ ሽንፈት ይደራርባል- እስከሚወድቅ ድረስ፡፡
የእግር ኳስ ጨዋታም፣ ሌሎች ስፖርቶችም ከዚህ እውነታ አይርቁም፤ ተዘጋጅቶና በጥሩ ጨዋታ ብቻ ለማሸነፍ የገባ ቡድን በፅናት ቆይቶ፣ የባከነ ጊዜንም ተጠቅሞ ለድል ሊበቃ ይችላል-ይህ ቡድን አቤት የደጋፊው ብዛት!! ያኛው ግን - እልኸኛው ግን - በተለይማ በቅድሚያ ጎል ከገባበት፣ ፋውል ጨዋታ ያበዛና የመከላከልም ሆነ የማጥቃት ስልቱ ተበላሽቶበት ሊሸነፍ ይቸችላል፡፡
በሌላ በኩል፤ ጎበዝ ተማሪ የሚባለው በራስ መተማመን ያለው፣ በሚገባ አጥንቶ በፅናት ፈተናውን የሚያልፍ፣ ዝቅተኛ ነጥብ እንኳን አንዳንዴ ቢገጥመው፣ የእኔ ድክመት ነው የሚል ነው፡፡ ግትሩ /ሰነፉ/ ግን ሰበብ ያበዛል፣ ኮራጅ ነው፤ ደግሞም ከስህተቱም አይማርም፤ በዚሁ ከቀጠለ ለራሱም፣ ለቤተሰቡም . . . . አይበጅም፡፡
የሰከነ ውይይት፣ ግልፅ የሆነና ለሁሉም የሚታወቅ ስትራተጂ ለእልኸኞች አይጥማቸውም- ድብቅ ነገር አያጡምና!! ማንም ይሁን ምንም የሚደጉማቸው ከሆነ ወዳጅ ያደርጉታል፡ በፅናት የሚጓዘው ግን ከእነዚህ ነገሮች የፀዳ ነው፡፡ ለትውልዱ ያስባል፤ መልካም ነገርም ልተውለት ይላል-በፅናት የሚታገል ሰው፡፡ "እኔ ከሞትኩ ሰርዶ አይብቀል" ደግሞ የእልኸኞች መርህ ነው- ለትውልድ ማሰብ አይሆንለትም፡፡
መልካሞች በትክክል ያፈሩትን ሃብታቸውን ለመልካም ነገር እንዲውል ይናዘዙና ይሰጣሉ- የኖቤል ሽልማት ድርጅት ምሥረታ ለዚህ ምሳሌ ነው፡፡ ወይም ጊዜንና ሥራን ሁሉ ለመልካም ማዋል- ማዘር ቴሬዛ ምሳሌያችን ናቸው፡፡ የእኛዋ አበበች ጎበናም ጥሩ አርአያችን ናቸው፡፡
ቆም ብለን እናስተውል፤ አንዳንድ ጊዜ ለበጎ ነገር የተጀመረ የፅናት ጉዞ፣ የተወሰነ ውጤት ካመጣ በኋላ በአመራር ብልሹነት አቅጣጫ ሊስት ይችላል፡፡ አፍሪካችንን ማየት ብቻ በቂ ነው፡፡ አብዛኞቹ የነፃነት ትግሎች በነጮቹ ገዥዎች ላይ ድልን ከተቀዳጁ በኋላ፣ ሥልጣን የጨበጡት የሀገሬው መሪዎች ከመሪነት ላለመውረድ ሲሉ ግትር ሆነው፣ ነፃ ምርጫን ከልክለው፣ ሕዝባቸውን በድህነት እንዲማቅቅ አድርገዋል፡፡
እልኸኝነት በእግዚአብሔርም የተጠላ ነው፤ እልኸኛ ሰው ከራሱ ጋርም የተጣላ ነው፡፡ እልኸኞች አጥፍቶ ጠፊዎች ናቸው። ስለዚህም መንገዳችንን እንመርምር እንፈትን፣ በፅናትም ወደ መልካም ነገር እንገስግስ!


    በአገራችን ሰሜናዊ ክፍል በተካሄደው ጦርነት ሣቢያ ከፍተኛ ጉዳት ከደረሰባቸው ተቋማት መካከል የጤና ተቋማት ዋነኞቹ ናቸው፡፡  የህወኃት ታጣቂ ቡድን በአማራና አፋር ክልሎች በፈፀመው መጠነ ሰፊ ወረራ ሳቢያ በሺዎች የሚቆጠሩ የጤና ተቋማት ከፍተኛ ጉዳት ደርሶባቸዋል፡፡ በሚሊዮን ለሚቆጠሩ የክልሉ ነዋሪ ህዝብ፣ የህክምና አገልግሎትን ሲሠጡ የኖሩት እነዚህ ተቋማት፣ በአሸባሪው ሃይል ሙሉ በሙሉ እንዲወድሙ አሊያም ከአገልግሎት ውጪ እንዲሆኑ ተደርገዋል፡፡
ከእነዚህ በጦርነት ሳቢያ ለከፋ ጉዳት ተዳርገው አገልግሎት መስጠት አቁመው ከነበሩት የጤና ተቋማት መካከል በአማራ ክልል ሰሜን ሸዋ ዞን ሸዋሮቢት ከተማና ቀወት ወረዳ ውስጥ የሚገኙ የጤና ተቋማትን  በማገዝ ለህብረተሰቡ አገልግሎት መስጠት እንዲችሉ በማድረጉ ረገድ የኢትዮጵያ ጤና መድህን አገልግሎት የሚያከናውናቸው ተግባራት ከፍተኛ ናቸው፡፡ ሰሞኑን ተቋሙ በነዚሁ ወረዳዎች ውስጥ በጤናው ዘርፍ እየተከናወኑ ያሉ ተግባራትን ለመገናኛ ብዙሃን ባለሙያዎች አስጎብኝቶ ነበር፡፡
በአማራ ክልል ሰሜን ሸዋ ዞን ሸዋሮቢት ከተማና ቀወት ወረዳ ውስጥ በጦርነቱ ሳቢያ የገጠማቸው ችግር አልፈው ወደ መደበኛ ስራቸው የተመለሱ የጤና ተቋማት የጉብኝቱ አካል ነበሩ፡፡
በጉብኝቱ ወቅት የሰሜን ሸዋ ዞን ቀውት ወረዳ የማህበረሰብ አቀፍ ጤና መድህን ቢሮ ኃላፊ አቶ ሰይድ ሃሰን ገበየሁ እንደተናገሩት፤  በወረዳው ከሚገኙና በጦርነቱ ሳቢያ ጉዳት ደርሶባቸው አገልግሎት መስጠት ካቆሙ የጤና ተቋማት መካከል 3 ጤና ጣቢያዎችንና 18 ጤና ኬላዎችን የጤና መድህን አገልግሎቱ ወደ ስራቸው እንዲመለሱ አድርጓቸዋል፡፡ ተቋማቱ  በጦርነቱ የወደመባቸውንና ጉዳት የደረሰባቸውን የህክምና መሳሪያዎችና መድሃኒቶች በማሟላት ወደ አገልግሎት እንዲገቡ በማድረግ፣ በሺዎች የሚቆጠሩ ነዋሪዎችን ጤና እና ህይወት ለመታደግ ችሏል፡፡
በሸዋሮቢት ከተማ በሚገኘው የጤና ጣቢያ ውስጥ ያገኛቸው በርካታ የአካባቢው ነዋሪዎች እንደነግሩን፤ በጦርነቱ ወቅት የጤና ተቋማቱ ከፍተኛ ጉዳት ስለደረሰባቸው የህክምና አገልግሎት ለማግኘት ባለመቻላቸው፣ በርካታ የአካባቢው ነዋሪዎች ለከፋ የጤና ችግርና ለሞት ተጋልጠዋል፡፡ ወራሪው የህወኃት ኃይል ከተማውን ተቆጣጥሮ በቆየባቸው ዘጠኝ ቀናት፣ ከፍተኛ ጉዳት የደረሰበት የሸዋሮቢት ከተማ ጤና ጣቢያ ዛሬ በሙሉ አቅሙ ለህብረተሰቡ አገልግሎት በመስጠት ላይ ይገኛል፡፡ ከ62 ሺ በላይ ለሆነው የሸዋሮቢት ከተማ ህዝብና ለቀወትና አጣዬ ወረዳዎች እንዲሁም በአፋርና በኦሮሚያ ክልል ውስጥ ነዋሪ ለሆኑና ከ100 ሺ በላይ ለሚጠጉ ህዝቦች አገልግሎት በመስጠት ለይ የሚገኘው ይህንኑ ጤና ጣቢያ፤ የዞኑ የማህበረሰብ አቀፍ ጤና  መድን ቢሮ ወደ አገልግሎት እንዲመለሱ በማድረግ፣ በሺዎች የሚቆጠሩ የአካባቢው ነዋሪዎች የህክምና አገልግሎት ለማግኘት እንዲችሉ አድርጓቸዋል፡፡
በዚሁ ጤና ጣቢያ ህክምናቸውን ለመከታተል መጥተው ያገኘናቸው  የአካባቢው ነዋሪዎች፤ በጦርነቱ ወቅት በጤና ጣቢያው ላይ በደረሰ ጉዳት ሳቢያ አገልግሎት መስጠት በተቋረጠባቸው ጊዚያት እጅግ ለከፋ ችግር ተጋልጠው   እንደነበር ነግረውናል፡፡ የአካባቢው የማህበረሰብ አቀፍ ጤና መድህን አገልግሎት ተጠቃሚ በመሆናቸውም ህክምና ለማግኘት  ያጋጥማቸው የነበረው ችግር ተቀርፎ ህመም በተሰማቸው ጊዜ ሁሉ ያለ ሃሳብ ህክምና ማግኘት መቻላቸውን ይገልፃሉ “እንደእኛ ኑሮው ከእጅ ወደ አፍ የሆነ ምንም ጥሪትና አቅም ለሌለው ችግረኛ፣ የጤና መድህን የሚሰጠው ጠቀሜታ ከፍተኛ ነው” የሚሉት  ነዋሪዎቹ፤ ይህ ባይሆን ኖሮ ከቀን ወደ ቀን እየናረ የመጣውን የህክምና ወጪ ችሎ ለመታከም አንችልም ነበር ብለዋል፡፡
የኢትዮጵያ ጤና መድህን አገልግሎት የአባላት ምዝገባ ዳይሬክተር አቶ ጉደታ አበበ እንደተናገሩት፤ በአካባቢው ማህበረሰብቡን የጤና መድህን አገልግሎት ተጠቃሚ እንዲሆን በማድረግ፣ ህብረተሰቡ እንደ አቅሙ አዋጥቶ፣ እንደ በሽታው እንዲታከም በማድረጉ ረገድ የተሳካ ስራ  ተሰርቷል ብለዋል፡፡ በአማራ፣ኦሮሚያ፣ትግራይና ደቡብ ክልሎች በ13 ወረዳዎች ውስጥ የተጀመረው የጤና መድህን አገልግሎት፤ በአሁኑ ወቅት በመላው አገሪቱ በ853 ወረዳዎች ውስጥ ተግባራዊ ሆኖ 8.9 ሚሊዮን አባወራዎች ወይም እማወራዎችን አቅፎ በአጠቃላይ ከ40 ሚሊዮን በላይ ህዝብን ተጠቃሚ እንዲሆን አድርጓል፡፡
የጤና መድህን አገልግሎቱ ህብረተሰቡ ለህክምናው የሚያወጣውን ያልተጠበቀ ወጪ በማሰቀረት ፍትሃዊ የሆነ የጤና አገልግሎት አሰጣጥ እንዲኖር ለማድረግ ያስችላልም ተብሏል፡፡ አገልግሎቱ ህብረተሰቡ ለህክምና የሚጠየቀውን የከፍተኛ ወጪ ፍራቻ  ወደ ህክምና ተቋማት ከመሄድ እንዳይታቀብ በማድረግ፣ በማንኛውመ ጊዜና ሁኔታ ህመም ሲሰማው ወደ ጤና ጣቢያዎችና ሆስፒታሎች በመሄድ፣ የህክምና አገልግሎት ለማግኘት እንዲችል ያደርገዋል ተብሏል፡፡

Saturday, 02 April 2022 11:38

ከፌስቡክ ገጾች በጨረፍታ

 ብልጽግና እውነታውን መጋፈጥ ይኖርበታል!
                                  ጌታሁን ሔራሞ


           ከእንግዲህ የብልፅግና ፓርቲ “illusionist” መሆኑን አቁሞ እውነታውን ፊት ለፊት መጋፈጥ ይጠበቅበታል!
ሰሞኑን የብልፅግና ፓርቲ ካካሄዳቸው ሕዝባዊ ስብሰባዎች ወትሮም ብዙዎቻችን አስቀድመን ስንጮህ የነበረውን አንድ ቁም ነገር ፓርቲው ሊገነዘብ ይችላል ብዬ አስባለሁ...ፓርቲው ራሱን በቅዥት ዓለም ውስጥ (illusionist) ሆኖ በመቀጠል ከእውነታው ጋር ለመላተም እስካልፈለገ ድረስ ማለቴ ነው።
Just to say that the PP party has drastically lost the political trust from the public...ማለትም የፓርቲው ፖለቲካዊ ትምምን በእጅጉ ተሸርሽሯል፤ ከዚህም የተነሳ ሕዝቡ የጥበቃ ቀውስ (Expectation crisis) ውስጥ ተዘፍቋል።
የብልፅግና ፓርቲ ፖለቲካዊ ትምምኑን ለማጣቱ የሞጆው ስብሰባ አንዱም ማሳያ ነው። በዚህ ስብሰባ መድረኩ ላይ ሶስት የብልፅግና ተወካዮች ነበሩ፦ ብዙዎቻችን ከተለቀቀው ቪዲዮ እንደተከታተልነው አንዱ የስብሰባ ተሳታፊ፣ “ምናልባትም ከሶስታችሁ ሁለታችሁ ሸኔ ልትሆኑ ትችላላችሁ” ማለቱ የብልፅግና ፓርቲ “political trust” የቱን ያህል መቀመቅ እንደወረደ አመልካች ነው። “Political trust” የሌለው ፓርቲ ደግሞ በቁም እንደሞተ ይቆጠራል። እናም “PP”ዎች ከኢሊዩዥን ዓለም ወጥታችሁ ወደ እውነታው ዓለም እንድትመጡ አንድዬ ያግዛችሁ። ሕዝብም ሆነ ሌሎች በመዋቅራችሁ ውስጥ ያልታቀፉ ምራቅ የዋጡ የፖለቲካና የአስተዳደር ምሁራን የሚሰጡዋችሁን ምክር የሚሰማ ጆሮ ይኑራችሁ። እዚያቹ እርስ በእርስ መሞጋገሱ በዘለቄታዊነት የሚያመጣው ውጤት የለም። ሕዝብ ከተቆጣ ደግሞ ጊዜም ይከዳል፤ በአፍሪካ ደረጃ እንኳን የሚገዳደረን ኃይል የለም ብለው በታንካቸውና በባንካቸው የተመኩ ሕወሓቶች፤ ጊዜ ሲከዳቸው ከቤተ መንግስት ተፈንግለው፣ ከ30 እና 40 ዓመታት በፊት ወደ ነበሩበት ደደቢት በረሃና ዋሻ ውስጥ ገብተው እንደተሸሸጉና አንዳንዶቹም ትግላቸውን በጀመሩበት በረሃ፣ ፍፃሜአቸውም እዚያው እንደሆነ ባለ ሾርት ሚሞሪ ሰለባ ካልሆንን በቀር ከቶ እንዴት ይረሳል?
በተለይ “ጊዜው የእኛ ነው” በሚል እብሪት የሕወሓትን ስህተት መድገም ውድቀቱን ለመድገም እንደመዘጋጀት ይቆጠራል። ካወቃችሁበት በመከባበር ላይ የተመሠረተ አንድነትን በማስረፅ በኢትዮጵያ ዝንተ ዓለም የሚዘከርላችሁን ሥራ ለመስራት ዕድሉን አግኝታችኋልና በሚገባ ተጠቀሙበት። በመጨረሻም ሁለት ገጠመኞቼን ላካፍላችሁ፦
1. በግምት በ1990ዎቹ መባቻ በመለስ ዜናዊ የአገዛዝ ዘመን ነው። ታክሲ ተሳፍሬ ወደ አቃቂ ስሄድ በሾፌሩና በሁለት ወጣት ተሳፊሪዎች መካከል ንትርክ ተፈጠረ። ወጣቶቹ ታክሲው ጉዞውን ከጀመረ በኋላ በትግርኛ አክሰንት “የሠራዊቱ አባል ስለሆንን በታሪፉ መሠረት አንከፍልህም” ማለታቸው ነበር የግጭቱ መንስኤው። የሠራዊቱ አባል ነን ያሉ እነዚህ ወጣቶች በየመኸሉ የወቅቱ ገዥ ብሔር አባል መሆናቸውን ለማሳወቅ “ቧዋ” የምትለውን ቃል በተለመደ ቅላፄ ያስተጋቡ ነበር። ሾፌሩ እንደምንም ታግሶ በወቅቱ የፍተሻ ጣቢያ ወደነበረበት ቃሊቲ እንደደረሰ መኪናውን አቁሞ ለፈታሽ ፖሊሶች ችግሩን ለማስረዳት ወረደ (ፈታሾቹ የኦሮሞ ብሔር ተወላጆች ነበሩ)። ከጀርባዬ የነበሩ ሁለቱም ወጣቶች “ቧዋ...ጉቦ ሊሰጣቸው ነው” እያሉ እነርሱም ወረዱ። መውረድ ብቻ ሳይሆን ለፖሊሶቹም ማንነታቸውን systemic በሆነ መልኩ ለማሳወቅ “ቧዋ...ዋይ...የሠራዊቱ አባል ነን” በማለት ለማስፈራራት ሞከሩ። ታዲያ ፖሊሶቹ ምን ቢሏቸው ጥሩ ነው?” ‘ቧዋ’ኣችሁን ቀቅላችሁ ብሉት፤ እንዲያውም ሕዝብን በማወክ ትጠየቃላችሁ፤ የሠራዊቱ አባል መሆናችሁም ተጣርቶ አስፈላጊው እርምጃ ይወሰድባችኋል” በማለት ሾፌሩ ተሳፋሪዎቹን አቃቂ እንዲያደርሳቸው ነግረውት፣ ወጣቶቹን ከነ”ቧዋ”ኣቸው እዚያው አስቀሯቸው...እኛም ተሳፋሪዎች የኦሮሞ ብሔር ተወላጆች በወቅቱ ሰፍኖ በነበረው “ቧዋ እና ዋይ” ፍርሃት ሳይበገሩ እርምጃውን በመውሰዳቸው ድጋፋችንን በጭብጨባ አረጋገጥንላቸው።
2. ይኼኛው ደግሞ ከሁለት ቀናት በፊት ያጋጠመኝ ነው፦ እዚሁ አዲስ አበባ በጧቱ ወደ አንድ የፌዴራል መስሪያ ቤት ተቋም አምርቼ መኪናዬን ሳቆም አንድ የጥበቃ አባል የሆነ ወጣት ቀረብ ብሎ በኦሮምኛ ቋንቋ አናገረኝ። እኔም ኦሮምኛ ቋንቋ እንደማልችልና እንድፈፅምለት የሚፈልገውን ትዕዛዝ በሚገባኝ ቋንቋ እንዲነግረኝ በትህትና ሳስረዳው በአማርኛ “ለምንድነው ያልቻልከው?” በማለት በኦሮምኛ መናገሩን ቀጠለበት፤ በዚሁ መኸል ከላይ ያካፈልኳችሁ ዘመነ “ዋ” እና ዘመነ “ቧዋ” ትዝ አለኝ። እኔም #የምትለው ስላልገባኝ ትዕዛዝህን መፈፀም አልቻልኩምና እባክህ በአዲስ አበባ የፌዴራሉ የሥራ ቋንቋ በሆነው በአማርኛ አስረዳኝ; አልኩት። ንትርካችንን ያስተዋሉ ሌሎች ሶስት የጥበቃ አባላትም ወደ እኛ በመምጣታቸው ስለ ተፈጠረው ውዝግብ አስረዳኋቸው። ከሶስቱ አንዱ ኦሮምኛ ተናጋሪ ስለነበረ የሥራ ባልደረባውን ፍላጎት ምን እንደሆነ በእኔው ፊት በአማርኛ በማናገር ጠየቀው። ጓደኛው በኦሮምኛ መለሰለት። የሚገርመው ኦሮምኛ ተናጋሪው ጥበቃ “እዚህ ግቢ ውስጥ የሥራ ቋንቋ አማርኛ ስለሆነ አሁን ለኔ የተናገርከውን ለባለጉዳይ በአማርኛ አስረዳው” ብሎ አስገደደውና በኋላም መኪናዬን ፓርክ ለማድረግ የሞከርኩበት ቦታ ለድርጅቱ ሠራተኞች ብቻ የተፈቀደ መሆኑን በአማርኛ አስረድቶኝ፣ ለተፈጠረውም ሁኔታ ይቅርታ ተጠይቄ ተለያየን። በዚሁ አጋጣሚ ከጅምላ ፍረጃ መጠንቀቅ እንዳለብኝ ለራሴም ትምህርት ወስጄ፣ ያስታረቀንንም ኦሮምኛ ተናጋሪ የጥበቃ አባሉን አመስግኜው ወደ ቢሮዬ ተመለስኩ።
አሁንም ደግሜ እላለሁ፤ “ጊዜው የኛ ነው” በሚል ቁንፅል ዕይታ ሕወሓት የፈፀመውን ስህተት በመድገም ውድቀቱንም እንዳትደግሙት፣ እባካችሁ መላ የኢትዮጵያ ብሔሮችን በእኩልነት አስተናግዱ። በሚሊተሪው የምንተማመን ከሆነ እንደ ሕወሓት ባደራጀው የመከላከያ ኃይሉ የሚተማመን አልነበረም፤ በደህንነትና ስለላ መረቡም የምትመኩ ከሆነ፣ ወያኔ ምናልባትም የአሁኑን በብዙ እጥፍ የሚበልጥ የደህንነትና ስለላ መረብ ነበራት፤ ፅዋው ሲሞላ ይህ ሁሉ ዋስትናዋ አልሆነላትም፤ እነ ደፂ ወደ በረሃ በተመለሱበት ቅፅበት አንድ የከምባታ “ኮሜዲያን” የገጠመው እንደዚህ በማለት ነበር፦
ደብረ ፂዮን ሀኑታ ኣጎ?
ደብረ ፂዮን ሀኑታ ኣጎ?
ጨሪች ፉሎጋ ጨራን ኣጎ
ሲተረጎም፦
ደብረፂዮን ወዴት ገባ?
ደብረፂዮን ወዴት ገባ?
ከዱር እንደተነሳ ወደ ዱር ገባ(ተመለሰ)!
እንደማለት ነው።
ሰናይ ሰንበት!



____________________________________
                       ጥቆማ
                           በእውቀቱ ስዩም


             ራይድ ለመዲናይቱ አሪፍ ጸጋ ነው፤ ለብዙ ሰው ስራ ፈጥሮ የብዙ መንገደኞችን ኑሮ አቅልሏል፥ ራይድ ከሚሰሩ ሰዎች መካከል አንዳንዶቹ እንደኔ የክፍለሀገር ልጆች መሆናቸውን መርሳት አይገባም። ባለፈው አንዱ ባለ ቢትስ መጣልኝ፥ ጢንጥዬ መኪና ናት፤ አራት ጎማ ያላት የዲዮጋን ቀፎ በላት፤ (አሁን በመንሽ እግሩ ያዲሳባን አቧራ ሲቀዝፍ የሚውል እንደ እኔ ያለ ዘመን አይሽሬ እግረኛ ሰው፣ መኪና ላይ ሙድ መያዝ ነበረበት? ሰው ምን ይለኛል አይባልም? ሆ!)
“ጋቢና ትገባለህ ወይስ ከሁዋላ?” ሲል አማረጠኝ፥
የመኪናይቱን በር እንደ መርቲ ጣሳ ክዳን ከፍቼ፤ እንደ ሰርከስ ባለሙያ ተጣጥፌ ከሁዋላ ገባሁ፥ እንደ እውነቱ ከሆነ የመኪናይቱ መላ አካል ለሁለት የተከፈለ ጋቢና ቢባል ያስኬዳል፤ መኪናዋ ከመጥበቧ የተነሳ ከሾፌሩ ጋራ አንድ ቀበቶ ለሁለት አስረን መሄድ ጀመርን፤
“የት ነው መዳረሻህ ?”
“ቀበና ፥ሳንፎርድ ‘
“የት ጋ ነው እሱ ደሞ? ”
“እኔም እንግዳ ነኝ፤ ባካባቢው ህብረተሰብ ርብርብ ልናገኘው እንችላለን”
ሹፌሩ በሰፈር መሀል እየነዳ የሆነ ቅያስ ላይ ሲደርስ፣ አንድ ሽማግሌ አስቆመና አድራሻ ጠየቃቸው፥
“በዚህ ቀጥ ብለህ ሂድና ወደ ግራ ስትዞር ያፈንጉስ ነሲቡን ድልድይ ትሻገራለህ” ብለው ጀመሩ፤
“አሀ” አለ ሹፌሩ፥
“ድልድይ ማለት፤ ከገደል ገደል የተዘረጋ ጥፍጥፍ ብረት፤ ጣውላ፥ አለት፥ ወይም ግንድ ሊሆን ይችላል”
“ገባኝ”
“አፈንጉስ ነሲቡ ማለት ደግሞ ባጤ ምኒልክ ዘመን የታፈሩና የተከበሩ ዳኛ ናቸው; ቀጠሉ፤ አረጋዊው፤
“ሰውየው በሙስናም የታወቁ ነበሩ” የሚል ጨመርኩ፤
(በታሪክ ዙርያ የመከራከር ስር የሰደደ ሱስ አለብኝ)
“የተጨበጠ ማስረጃ አለህ ወይስ ከኪስህ እያወጣህ ነው እምትናገረው?!” አሉኝ ሰውየው ደማቸው ፈልቶ፤
እኔና ጠቋሚው ሰውዬ በታሪክ ዙርያ ስንጨቃጨቅ ሾፌሩ ትግስቱ አልቆበት ከጎረቤት ሹፌር ተበደረ፤
“ያፈንጉስ ነሲቡን ድልድይ ካለፍን በኋላስ?” አለ፥ ሹፌሩ በመጨረሻ፥
"ያፈንጉስ ነሲቡን ድልድይ ካለፋችሁ በሁዋላ ያፈንጉስ ነሲቡን አደባባይ ትዞሩታላችሁ”
“ከዞርን በሁዋላስ?”
“ደርቡት!”
በመጨረሻ፥ ሳንፎርድ አካባቢ ደረስኩ፤ ትንሽ ተራምጄ አንዱን ሎተሪ አዟሪ አስቁሜ፤
“ዠለስ እዚህ አካባቢ፤ ንግድ ባንክ አለ?”
“ልታስገባ ነው ልታስወጣ?”
______________________________________________

                        "ከመቼ ወዲህ ነው ጨለምተኛ የሆንከው?;"
                             አንዷለም ቡኬቶ ገዳ

                 አልጄሪያ ለስራ አጥ ዜጎቿ ወርሃዊ ዳረጎት ልትቆርጥ ነው።
ኢትዮጵያ ስራ አጥ ዜጎቿ መቼም የማያገኙትን ስራ ሲፈልጉ ውለው ሲደክማቸው አረፍ የሚሉበትን አደባባይና ፓርክ በመስራት ተጠምዳለች! የሁለቱም አካሄድ አስቂኝ ነው!
የስራ እድል መመናመን፣ የኑሮ ውድነትና የመሰረታዊ ሸቀጦች ከገበያ መጥፋት ቀጣዩ የመንግስት ፈተና ይመስለኛል! በቀደም እለት ካንድ የበለጸገ ወዳጄ ጋር (የበለጸገ ስል የፓርቲ አባል የሆነ ማለቴ ነበር ..ግን ደግሞ አባል ከሆነም መበልጸጉም አይቀርም”) በአጋጣሚ ነዳጅ ለመሙላት የተወሰነች አንድ የሶስት ወረፋ የምትሆን የማትንቀሳቀስ ሰልፍ ላይ ተገናኝተን፣ ከመኪናችን ውጪ ቆመን ስንወያይ ስለ ኑሮ ውድነቱ አነሳሁበት!
ወዳጄ በምንም ጉዳይ ቢሆን መንግስት ላይ የሚያማርር ሰው አይወድም!
‘እኔ የምልህ!’ አልኩት ‘እኔ ምልህ ስጋ እንደ ቀልድ አንድ ሺ ብር ገባ አይደል?!’
‘ምን ችግር አለው፤ ሁዳዴ አይደል እንዴ!!’ አለኝ።
ያው እንደ አለቆቹ አብዛኛው መፍትሄዎቹ ባለ አጭር ርቀት ናቸው!
‘ይሄንንስ ሰልፍ ምን ትለዋለህ?!’ አልኩት እንደ አባይ ወንዝ ተጠማዝዞ፣ የትናየት የደረሰውን ወረፋ እየጠቆምኩ።
(ሰልፉ ከመርዘሙ የተነሳ የመጀመሪያዎቹና የመጨረሻዎቹ ተሰላፊዎች መሃል፣ የ2 ብር የታክሲ መንገድ አለ! ተራ አስከባሪዎቹ እራሱ ተሰላፊውን ‘የታችኛውና የላይኛው ተፋሰስ’ ተሰላፊዎች ብለው ነው የሚጠሩን!)
ወዳጄ ምንም አልመሰለውም ..
‘ጨለምተኛ አትሁን!’ አለኝ ትከሻውን እየሰበቀ።
‘ጨለምተኛ አትሁን አንዲ! በዚህ ሰልፍ እራሱ እንደምታየው ከ15 በላይ ለሚሆኑ ተራ አስከባሪ ወጣቶች የስራ እድል ተፈጥሯል!!’ አለኝ።
የምለው አጣሁ!
‘ግን ከሰሞኑ በተደረገ ጥናት አዲስ አበባ ከአፍሪካ በኑሮ ውድነት አንደኛ እንደተባለች ሰምተሃል?!’ አልኩት፡፡
አይኑን በልጥጦ በመገረም አየኝ!
‘አንዲ ከመቼ ወዲህ ነው እንዲህ ጨለምተኛና ያልተጣራ መረጃ አሰራጭ የሆንከው !?’ አለኝ
‘ምኑ ነው ያልተጣራ መረጃ ?!’ አልኩት በንዴት ስልኬን ለማስረጃነት እያወጣሁ!
‘የቢዝነስ ኢንሳይደርን ኢንዴክስ ተመልክተኸዋል !? ወሬ ብቻ እንጂ አታዩማ!!!’
አለኝና በረዥሙ ተንፍሶ ሲያበቃ ..
‘ለማንኛውም አንተ እንደምታናፍሰው ያልተጨበጠ በሬ ወለደ እና አሸባሪ ወሬ ሳይሆን፣ አዲስ አበባችን በዚህ ወር በኑሮ ውድነት ከአፍሪካ 2ኛ ነች!!’ ብሎኝ ወደ መኪናው ገባ!
ደህና ዋሉ!
_____________________________________________

                      ስለ ኤችአር 6600 ያለኝ ሀሳብ
                            መኮንን ከተማ


            ኤችአር 6600 የ"nomore" ደጋፊዎችና የለም ጣልቃ መግባት አለባቸው ብለው ከሚያምኑት ጋር ያለውን ትንቅንቅ በትልቁ መድረክ እያሳየን ነው። "nomore"ተብሎ በየከተሞቹ ሰልፍ ሲወጣ የነበረው፣ በሀገራችን ጉዳይ ጣልቃ አትግቡ ለማለት ነበር። በሌላ በኩል ደግሞ ጣልቃ ግቡ የሚሉ አሉ። የትኛው ይሻላል ብለን ስንጠይቅ፣ ብዙ መልሶች እናገኛለን። የእኔ መልስ ይሄ ነው።
ጣልቃ ግቡ ተብሎ የተጀመረው ዛሬ አይደለም። ደርግ ስልጣን ላይ በነበረ ጊዜ በትንሹ ተጀምሮ ነበር። ከዛም በፊት ነበር የሚሉ አሉ። በደርግ ጊዜ ወጣት ስለነበርኩ ብዙም አላውቅም ነበር። የማውቀው በደርግ መንግስት ብዙ ሰው እየተገደለና እንደተሰቃየ ስለነበር ጣልቃ ገብነትን እደግፍ ነበር። ልጅ ነበርኩኝ። ደርግን ተክቶ ኢህአዴግ ሲመጣም ውጭ ሀገር ብዙ ሰልፎች ነበሩ። ማዕቀብ እንዲደረግ የሚፈልጉም ብዙዎች ነበሩ።
በዚህን ጊዜ እድሜ ጨምሬ ብዙ ማወቅ ችዬ ነበር። ታድያ በዛን ሰዓት ሶስት ነገሮች ገብተውኝ ነበር፡፡ አንደኛው፤ ለውጥ በምንም ተዓምር ከውጭ መምጣት እንደማይችል ነው፡፡ ሁለተኛው፤ ማዕቀብ ምንም አድርገው አሳምረው ቢያቀርቡትም፣ ህዝብንም እንደሚጎዳ ገብቶኝ ነበር። ሶስተኛው ደግሞ ጣልቃ ግቡ ብሎ ማለት ለዘላለም የማይዘጋ በር መክፈት መሆኑን ነው፡፡ ፈረንጆች setting a precedent የሚሉት ነው። ያንን በር ከከፈትን በኋላ የምንደግፈው መንግስት ከመጣ በዛው በተከፈተው በር ጣልቃ ገቦቹ መልሰው መግባታቸው አይቀርም።
ኤችአር 6600ን በዚህ መልኩ ነው ማየው። ደጋፊዎቹ ባደረጉት ሊደሰቱ ይችላሉ፤ ግን መንግስት ብዙም አይጨንቀውም። መንግስትን ጎዳን ሊሉ ይችላሉ፤ ግን ህዝብንም እንደሚጎዱ መረዳት አለባቸው።  ለምሳሌ ኤችአር 6600 የአለም ባንክና አለም አቀፍ የገንዘብ ፈንድ ያሉ አለምአቀፍ ኤጀንሲዎች ለኢትዮጵያ የሚሰጧትን ብድር አሜሪካ እንዲያቆሙ ታስገድዳቸዋለች። ያንንም የጣልቃ ገቦች በር ከፍተን፣ ነገ ተመልሰን "nomore"ብንል የሚሰማም ጆሮ አይኖርም።
የትኛው ይሻላል ተብሎ ለተጠየቀው ጥያቄ መልሴ፤ #nomore ይሁንልኝ።

____________________________________

                        የአሜሪካ መንግስት የሚመሰርትልን "ቅምጥ መንግስት" መፍትሄ አይሆንም
                                   ሙሼ ሰሙ


             አሁን የት እንደገቡ ባላውቅም “ጣሊያን ቅኝ ገዝታን” ቢሆን ኖሮ፣ ችግሮቻችን ሁሉ ጠፍተው ሀገራችን ትለማ ነበር ብለው ከልባቸው የሚያምኑ፣ የአባቶቻችን እምቢኝ አሻፈረኝ አልገዛም ባይነት ለዛሬ ምቾታቸው አለመሳካትና ተንደላቆ ላለመኖራቸው እንደ ደንቃራ የሚወስዱ “ዜጎች” እንደነበሩን አስታውሳለሁ፡፡
ዛሬ ደግሞ "የሕዝቤን መብትና ጥቅም ለማስከበር ተደራጅቼና አደራጅቼ አማራጭ ያልኩትን የትግል ስልት ተጠቅሜ እታገላለሁ፤ ታስሬ፣ ተሰድጄና ተሰውቼ የሕዝቤን መከራና ስቃይ እካፈላለሁ፤ ነጻነቱንም አረጋግጣለሁ" ከሚል ሕዝባዊ ጽናትና ቁርጠኛነት ይልቅ የልዕለ ሃያላን አውዳሚ ማዕቀብ እንዲሰብረን መማጸን የሚያኮራ ተግባር ሆኗል።
ሉዐላዊነት ትርጉም ከማጣቱ የተነሳ አማራጫችን ሁሉ አንድ ጊዜ የቻይና መንግስት ይድረስልን፣ ሌላ ጊዜ የራሽያ መንግስት ከጉድ ያውጣን አሊያም የአሜሪካ ሴኔት መንግስታችንን ያንበርክክልን የሚል ነው። ማዕቀብ መንግስትን ከማንበርከኩ በፊት ሀገርና ሕዝብን እንደሚያንበረክክ ከኢራቅ፣ ከሶርያና ከየመን መማር አልፈለግንም።
በዚህ ላይ አሳዛኙ ጉዳይ መርህ አልባነቱ ነው። ትናንት አሜሪካ እጅግ የለዘበ ሪዞልዮሽን ልታጸድቅ ስታቅድ በውስጥ ጉዳያችን ጣልቃ መግባት ነው ሲሉ የነበሩ ሁላ፣ ዛሬ መለስ ብለው አሜሪካ አውዳሚ ሪዞሉሽን በማጽደቅ በውስጥ ጉዳያችን ጣልቃ ትግባልን እያሉ ሲማጸኑ ማየት እኛን አይደለም አሜሪካኖቹም ቢሆኑ “መርህ” የሚባለው ቃል በመዝገበ ቃላታችን ውስጥ መኖሩን እንዲጠራጠሩ የሚያደርግ ነው፡፡
መንግስት ላይስማማን ይችላል። እንዲለወጥ መታገል የዜግነት መብትና የውዴታ ግዴታችን ነው። ዘለቄታ ያለው መንገድ ከታሰበም፤ ውድ ዋጋ ቢያስከፍልም ብቸኛው መንገድ በሕዝብ መፍትሔ ሰጭነት ላይ መተማመን ብቻ ነው።
ፈተናና ችግር ባጋጠመን ቁጥር የአሜሪካ መንግስት ማዕቀብ ጥሎ ሕዝብ አዋርዶ፣ ሀገር አዳክሞ፣ መንግስት ገልብጦ የሚመሰርትልን ቅምጥ መንግስት፣ መፍትሔ ከመሰለን ፍጹም ተሳስተናል። ይህ መንገድ ከውድቀት ባሻገር ማቆምያ ወደ ሌለው የግጭት አዙሪት ይወስደን እንደሁ እንጂ የታሪካችን አኩሪ ምዕራፍ ሊሆን አይችልም።

_____________________________________________

                             የተፋለሰ ነገርማ አለ?
                                    Pace Negaa

              መጀመሪያ ብላ፣ ጠጣ፣ ነፍስ ዝራ፣ በህይወት ኑር፣ ተጫወት።
እየተጫወትክ ሌሎችን ተመልከት፣ አስተውል፣ ተማር።
ከሌሎች ተማር፣ ተማር፣ ተማር - እግራቸው ሥር ቁጭ ብለህ ተማር።
ከዚያ ተነስና ቁም - መጀመሪያ ተደግፈህ፣ ከዚያ ተስተካክለህ በራስህ እግር ቁም።
ከዚያ መራመድ ልመድ። እንዴትም ይሁን ወዴት .... ብቻ ተራመድ።
ከዚያ አቅጣጫ ምረጥ። በመረጥከው አቅጣጫ ወደፊት ተራመድ፤ አልፎ አልፎም ዱብ ዱብ፣ እመር ማለት ልመድ።
ከዚያ ብረር! ብርርርር ብለህ ብረር።
የህይወትህ ፀሃይ ማዘቅዘቅ ስትጀምር ሌሎችን አስተምር፤ ልምድህን አካፍል። ከልምድህ የተረዳኸውን የተሻለውን መንገድ ጠቁም። ለመሆኑ ከህይወት ልምድህ ምን ተረድተሃል? የምትሠራውን ሥራ፣ ከድሮው አንተ ስትጀምር ከነበረው በምን የተሻለ አድርገሃል? ነው አሁንም ገና እየተማርክ ነው? እውነት ነው ትምህርት አያልቅም። ግን ሁሌ መማር በራሱ ትርፍ የለውም። መማር ብቻውን በራሱ ግብም አይደለም - ጉዞ እንጂ! በእርግጥ የሚያስደስት ጉዞ ነው። አንዳንዴ ሲበዛ ግን እንደ ስካር ያለ ነው - የሚያስደስት ግን ቁም-ነገርና ፍሬ የሌለው።
ጃምቦ :- ማንም ሰው አንተ ስለተማርከው ትምህርት፣ ስላገኘኸው ነጥብና ሜዳልያ፣ ስላካበትከው ሀብትና ስለሠራኸው ቤት ግድ የለውም። ይህንን ልብ በል።
ታሪክ ቁም-ነገሬ ብሎ የሚከትብህ፣ ለሌሎች የሚተርፍ ሥራ ካለህ ብቻ ነው።
ለመሆኑ የአጼ ምኒልክ ሚኒስትሮች እነማን ነበሩ? የደርግ ሚኒስትሮችስ? የደርግ የመብራት ኃይል ኃላፊ ማን ነበሩ? የመለስ የኢንዱስትሪ ሚኒስትርስ ማን ነበሩ? የአሁኑስ? ምን ሠሩ? በምን ይታወሳሉ?
ማን አለማን? ማን አጠፋን? ለምን ሁነኛ ሰው አጣን? እስኪ እንጠይቅ።
መኮንን ሀብተወልድ፣ ሙሉጌታ ቡሊ፣ አበበ አረጋይ፣ ዑመር ሰመተር፣ ገርማሜ ነዋይ፣ መስፍን ስለሺ፣ ስንዱ ገብሩ፣ መንገሻ ስዩም፣ መኮንን ሙላት፣ ሰናይ ልኬ፣ በዓሉ ግርማ፣ አፈወርቅ ተክሌ፣ ተሰማ አባደራሽ፣ ተስፋዬ ዲንቃ፣ አስራት ወልደየስ፣ አበበች ጎበና፣ ይድነቃቸው ተሰማ፣ ንጉሤ ሮባ፣ አበበ ቢቂላ፣ ወልደመስቀል ኮስትሬ፣ ሳህሌ ደጋጎ፣ ኤልያስ መልካ፣ ... ምን ዓይነት ሰዎች ነበሩ? ምን ሠሩ? በምን ትዝ ይሉሃል?
ከድር ኤባ፣ ማሞ ካቻ፣ ተካ ኤገኖ፣ በቀለ ሞላ፣ ፊታውራሪ አመዴ፣ ሞላ ማሩ፣ መኮንን ነጋሽ፣ ዱጉማ ሁንዴ፣ ... እነማን ነበሩ? ከየት ተነስተው የት ደረሱ?
ጃምቦ:- የሠራኸው ነገር ከሌለ ስልጣን ኖሮህም፣ ሀብትና ጥሩ ቤት ኖሮህም፣ ሃርቫርድ ተምረህም ያለ ማርክ፣ ያለ አሻራ ታልፋለህ። ለነገሩ ዋናው ቁም-ነገር፣ አሻራ ማስቀመጥ ቢያቅት፣ ህይወትን ካለ ጠባሳ ማሳለፍን ማወቅ ላይ ነው።
የህይወትህ ጉዞ እንዴት ነው? መጀመሪያ ፊሪሃ-እግዚአብሔር፣ ከዚያ እውቀት፣ ከዚያ ሥራ፣ ከዚያ ስልጣን ከዚያ ሀብት የሚል ነበር፤ የተለመደው የጉዞ መስመር።
አሁን ደግሞ መጀመሪያ ስልጣን፣ ከዚያ ሥራ፣ ከዚያ ሀብት፣ ከዚያ እውቀት፣ ከዚያ ንስሃ የሆነ ይመስላል።
እናም ያለ እውቀት ሥራ በርክቷል፤ ነገሩ ተዛብቷል።
የሆነ የተፋለሰ ነገርማ አለ!
በሉ ፋልሶው እንዲስተካከል ንስሃ እንግባ።
አይሻልም?



   የአባይን ወንዝ እና  በወንዙ ዙሪያ ኢትዮጵያ ከበፊት ጀምሮ የሚገጥማትን ፈተና፣የአባይ ወንዝ ለሰው ስልጣኔ ያለውን ፋይዳና በአጠቃላይ በአባይና በአባይ ዙሪያ ያሉ በረከቶችንና ተግዳሮቾችን መሰረት አድርጎ የተሰናዳው “አባይ” ህብረ ዝማሬ ሀሙስ  መጋቢት 29 ቀን 2014 ዓ.ም በጎንደር ከተማ ይመረቃል፡፡
በሙዚቃ ባለሙያው ገብረማርያም ይርጋ ግጥምና ዜማው ተሰርቶ በጎንደር ፋሲለደስ የኪነት ቡድን የተዘመረው ይኸው ህብረ ዝማሬ፣ በአበጋዝ ክብረ ወርቅ ሺዎታ ቅንብሩ የተሰራለት ሲሆን በክብር ዶ/ር ቴዎድሮስ ካሳሁን (ቴዲ አፍሮ) ፕሮዲዩስ መደረጉን የህብረ ዝማሬው ግጥምና ዜማ ደራሲ የሙዚቃ ባለሙያ ገብረማሪያም ይርጋ ተናግሯል፡፡ የጎንደር ዩኒቨርስቲ የህብረ ዝማሬው ኤክስኪዩቲቭ ፕሮዲዩሰር ሲሆን፣ ቀረፃና ኤዲቲንጉ የአርቲስት አምለሰት ሙጬ ኩባንያ በሆነው “ማያ ፊልም ፕሮዳክሽን” መሰራቱም ታውቋል፡፡
ህብረ ዝማሬው በጎንደር ዩኒቨርስቲ አጋፋሪነት በጎንደር ከተማ በድምቀት ይመረቃል የተባለ ሲሆን በእለቱ ቴዲ አፍሮን ጨምሮ በህብረ ዝማሬው ስራ ላይ የተሳተፉ ከያንያንና የከተማ አስተዳደሩ ከፍተኛ  አመራሮች ታዋቂ ግለሰቦችና ጥሪ የተደረገላቸው እንግዶች በተገኙበት እንደሚመረቅ ገብረማርያም ይርጋ ለአዲስ አድማስ ተናግረዋል፡፡


       “ኢትዮጵያ ሪድስ” የተሰኘውና በልጆች ንባብ  ላይ ትኩረቱን አድርጎ የሚሰራው ዓለም አቀፍ ግብረ ሰናይ ድርጅት በጎተራ የጋራ መኖሪያ መንደር ውስጥ ዘመናዊ የህፃናት ቤተ መፃሀፍት አስመረቀ፡፡ ግብረ ሰናይ ድርጅቱ ቤተ መፃሀፍቱን የህፃናት አዕምሮ በሚገነቡ በርካታ መፃፍትና ቁሳቁሶች አሟልቶ ያስመረቀው ባለፈው ቅዳሜ መጋቢት 17 ቀን 2014 ዓ.ም ረፋድ ላይ ነው በምረቃ ሥነ ስርአቱ ላይ የኢትዮጵያ ሪድስ የአገር ውስጥ ተጠሪ ወይዘሪት የምስራች ወርቁ የጋራ መኖሪያ መንደሩ ነዋሪዎች፣ህፃናት የመንግስት የስራ ኃላፊዎች ተገኝተዋል፡፡
በምረቃው ስነ ስርዓቱ ላይ ተጋባዥ እንግዶችና የህፃናት መፃህፍት ደራሲያን ለህፃናት ተረት ያነበቡ ሲሆን ህፃናትም ህብረ ዝማሬን ለታዳሚ አቅርበዋል፡፡ ኢትዮጵያ ሪድስ ባለፉት 20 ዓመታት የህፃናት ንባብ ላይ ትኩረቱን አድርጎ ቤተ መፃፍትን በከተማና በገጠር በመገንባት በርካታ ቋንቋዎች የህፃናት መፅህፍትን በማሳተምና በመለገስ እየሰራ ይገኛል፡፡