Sunday, 03 October 2021 18:25

የግጥም ጥግ

Written by 
Rate this item
(4 votes)

መልሱ አልተሰጠም
አንተነህ ግዛው

ምን ይረባታል፣ መልሱ ቢጠፋኝ
እያዟዟረች፣ የምታለፋኝ

አጉል ጠያቂ - ልክ የለው ሲጠም
ያደናግራል - እያማረጠም
ልማድ ሆኖበት - ዙሪያ መጠምጠም
መልስ ነው ይላል - መልስ አልተሰጠም

መላም የለው፣ መልስም የለው፣ መላም የለው፣ የሷስ ነገር
ሆነ ብሎ ማወናበድ፣ ሆነ ብሎ ማደናገር

የአንዳንዱ ጠያቂ፣ ንፍገትስ ይደንቃል
መርጠህ መልስ ብሎ፣ መልሱን ይደብቃል
ትክክል የመሆን - ዕድልን ነፍገሽኝ
ምረጥ ትይኛለሽ - መልሱን ሸሽገሽኝ

መላም መልስም የለው - መላም የለው የሷስ ነገር
ሆነ ብሎ ለማሳሳት - በጥያቄ ማደናገር
አስመርጣ መጣል ሲያምራት - ታዞራለች ዙሪያ ጥምጥም
መልስ ብላ ስታስጨንቅ - ልከኛውን መልስ አትሰጥም

ያንቺ ቢጤ ፈታኝ፣ አውቆ ሲያሰናክል
መልስ አልተሰጠምን፣ ያደርጋል ትክክል
ፈትነሺኝ ላላልፍ፣ አልወጣም አልወርድም
ጠማማ ጥያቄሽ፣ ቀና መልስ አይወልድም።

Read 428 times