የኢትዮ ጃዝ ሙዚቃ ፈጣሪው አርቲስት ሙላቱ አስታጥቄ ታላቁ የበርክሌይ ዩኒቨርስቲ የክብር ድግሪ እንደሰጠው “ዘ ቦስተን ግሎብ” ዘገበ፡፡ ባለፈው ሳምንት የበርክሌይ ኮሌጅ በቦስተን ባከናወነው የምረቃ ስነስርዓት ከ58 አገራት የተውጣጡ 900 ተማሪዎችን ያስመረቀ ሲሆን ምሩቃኑ የክብር ዲግሪ ላገኙ ባለሙያዎች ልዮ የሙዚቃ ኮንሰርት አቅርበዋል፡፡  ከሙላቱ አስታጥቄ ጋር የክብር ድግሪ ከተሰጣቸው ባለሙያዎች መካከል ኪውንሲ ጆንስና ጆን ሜየር የተባሉ የሙዚቃ ባለሙያዎች ሲገኙበት ባለሙያዎቹ በጋራ ከ221 በላይ የግራሚ ሽልማቶችን እንዳገኙ ቦስተን ግሎብ አመልክቷል፡፡ በምረቃ ስነስርዓቱ ላይ ከ4ሺ በላይ እንግዶች እንደነበሩ የጠቀሰው ዘገባው፤ ሙላቱ አስታጥቄ በኮሌጁ ከተመረቁ የሙዚቃ ባለሙያዎች የመጀመርያው አፍሪካዊ እንደሆነ ጠቁሟል፡፡