Administrator

Administrator

    በሮያል የማስታወቂያ ድርጅት በየወሩ የሚሰናዳውና የትልልቅ ኢትዮጵያውያንን ስራና ታሪክ የሚዘክረው ‹‹ኢትዮጵያውያን ለኢትዮጵያውያን›› የተሰኘው የኪነ ጥበብ ዝግጅት የፊታችን አርብ የካቲት 27 ቀን 2012 ዓ.ም ከቀኑ 7፡00 ጀምሮ በአገር ፍቅር ቴአትር ይካሄዳል፡፡
በዚህ ወር የሚዘከሩት ፊታውራሪ አመዴ ለማ ሲሆኑ ልጃቸው አቶ ካሱ አመዴ ለማ በክብር እንግድነት እንደሚገኙ አዘጋጆቹ ገልፀዋል፡፡ በዚህ የኪነ ጥበብ መሰናዶ ኮሜዲያን አሰፋ ተገኝ፣ ገጣሚና ተዋናይ ዮሐንስ አፈወርቅ፣ ድምፃዊያኑ ታረቀኝ ሙሉ፣ በእውቀቱ ሰውመሆን (ጉስም)፣ ኢየሩሳሌም  አስፋው (ጄሪ)፣ ወደሬ ታደሰ፣ ሞላ ካሳ (ሙለር ኮንሶ)፣ አንተነህ በፍቃዱ፣ ተስፋሁን ሀይሉና ሌሎችም ስራዎቻቸውን የሚያቀርቡ ሲሆን፣ መድረኩ በዋና አዘጋጁና አንጋፋው ጋዜጠኛ ሲመራ አጠቃላይ መርሃ ግብሩን አንጋፋው ጋዜጠኛ ይጥና ደምሴና ወጣቱ ጋዜጠኛ ኢዮብ አባተ እንደሚያስተባብሩትም ተገልጿል፡፡    

    ከዕለታት አንድ ቀን አባትና ልጅ ስለ አንድ ስላስቸገራቸው ጅብ ይወያያሉ፡፡
አባት - እኔ የምልህ የኔ ልጅ ይሄ የሠፈራችን ጅብኮ ለያዥ ለገራዥ አስቸገረ፤ ምን ይሻላል?
ልጅ - አባዬ፤ እኔም ግራ ገብቶኛል
አባት - እንዴ በቅርቡ ጋሼ ታደሰ ግቢ ገብቶ አንድ ጊደር ወሰደ፡፡ ባለፈው ሰሞን የባሻ እንዳይላሉን ጥጃ ቦትርፎ ሸሸ፡፡
ልጅ - ለምን የሠፈሩን ሰው አስተባብረን ወጥመድ አበጅተን፤ አጥምደን አንጠብቀውም?
አባት - ሰው መቼ ይተባበራል? ገና እርስ በርስ ከመዘራረፍ ያልወጣ ህዝብ መቼ ተሰባስቦ የረባ ሥራ ይሠራል?
ልጅ - ግዴለህም አባዬ “ለአንድ ብርቱ ሁለት መዳኒቱ” ይባላል፡፡ እንስማማና መላ እንምታ!
አባት - ይሁን ካልክ ከታች ሰፈር አብዬ ገለታን፣ ከላይ ሰፈር እትዬ ቦጌን፣ ከመካከል አቶ ውርጌሣን እንይዝና አንድ ዘዴ እንዘይድ?
ልጅ - አባዬ፤ እኔ አሁኑኑ ሄጄ እጠራቸዋለሁ፤ አለና ወደ አብዬ ገለታ፣ እትዬ ቦጋለችና አቶ ውርጌሣ ቤት ሄዱ፡፡ ሶስቱ ሰዎች ተሰባሰቡና ምን ብልሃት እንደሚያበጁ ተወያዩ፡፡
አቶ ውርጌሣ አንድ ዘዴ ታያቸውና
“እኔ አንድ ፍቱን መፍትሔ ታይቶኛል” አሉ፡፡
እትዬ ቦጌ፡-
“ምን ታየዎት?”
አቶ ውርጌሣ፤
“እኔ ጠመንጃ አለኝ አደለ?”
“እንምታው እንዳይሉ ብቻ?”
“አይደለም፡፡ ለጅቡ ወጥመድ እንስራ”
“እንዴት?”
አቶ ውርጌሣ፤
“እኔ የታየኝ፤ ጠመንጃዬ አፈሙዝ ላይ ሙዳ ሥጋ እናስቀምጥና፤ ሙዳውን በገመድ አሥረን ገመዱን ከጠመንጃዬ ቃታ ጋር እናያይዘው፡፡ ከዛ ጅብ ሆዬ ሥጋውን አገኘሁ ብሎ ሲጐትት ቃታውን አብሮ ይስበውና ያልቅለታል!”
ሁሉም ዘዴው ደስ አላቸውና
“ይሁን! ይሁን! ይሁን!” አሉ፡፡
ሙዳው ከጠመንጃው አፈሙዝ ጋር ታሠረና ጅቡ የሚያዘወትርበት በረት ፊት ለፊት ተጠመደ::
ልጅ “በል ውጤቱን ጠብቅ  ተባለና ይጠብቅ ጀመር፡፡
ከጥቂት ጊዜ በኋላ ወደ አባቱ ሲሮጥ ይመጣና፤
“አባዬ ጉድ ሆነናል”
“እንዴት? ምን ተፈጠረ?”
“ጅቡ ጠመንጃችንን ይዞት ሄደ”
“እንዴት አድርጐ?”
“ጠመንጃውን በአፈሙዙ በኩል ሳይሆን በሰደፉ በኩል ነክሶ ይዞት ሮጠ!”
አባትም፤
“አዬ ጉድ! እንኳን ጠመንጃ ሰጥተኸው እንዲሁም አልቻልነው!” አሉ ይባላል፡፡  
የአገራችንም ችግር ይሄን መሳይ ነው፡፡ ለአንዱ ያጠመድነው መልሶ ለራሳችን ወጥመድ ይሆንብናል፡፡ ባለ ቀረርቶ ፎካሪ አለው እንደተባለው ይሆናል ማለት ነው፤ ፎካሪው የሚከተለውን አለ አሉ፡-
‹‹ላይተኩስ ላይመታ
ፎካሪው በረታ
ጥይቱ አግድም ሲሄድ ተኳሹ ሳይነቃ
ኢላማው ሳይሰምር አላሚው ተጠቃ
መሣሪያው ሳያብል ጥይቱ ሳያንሰው
እንዴት ልሙት ብሎ እጁን ይሰጣል ሰው?!››
ላንመታ የምናልመው ብዙ ነው፡፡ ሁለት አይናችንን ጨፍነን እንደ መተኮስ ያለ የእውር የድንበር ጉዞ ነው። ይልቁንም በደምብ አልመንና በሚገባ አውጠንጥነን፤
‹‹አለ አንዳንድ ነገር
አለ ብዙም ነገር
‹‹እኛ መላው ጠፍቶን ስንደነጋገር
በዚህ ቢሉት በዚያ ከመሆን የማይቀር››
እንዲል መጽሐፍ፣ ጠንቀቅን አስተውለን እንጓዝ፡፡ የወጣቱን በባዶ መንከራተት እናስብና ከሁሉም በፊት በወጣቱ ላይና ከወጣቱ ጋር እንስራ፡፡ ከትምህርቱ ተፋቶ ያላአንዳች መላ፣ ለቤተሰቡና ለአገሩ ሸክም እየሆነ እንደመጣ እያደርም ከድጡ ወደማጡ እየዘቀጠ እየመጣ መሆኑን ሳንሸነጋገል እንወያይበት፡፡
የትምህርቱ ሁኔታ አሳሳቢ ነው!
የጤናው ሁኔታ አሳሳቢ ነው! ነገ የሚያልፈው ለመጪው የረባ ቅርስ ሳይተው በዋል ፈሰስ ትውልድ ሆኖ እንዲቀር ማድረጋችንን ከልብ እናስብ፡፡ አስፋልት ብለን የሰራነውን መንገድ በነጋታው ሲፈርስ እያየን ‹‹ዱሮም ሹሮ ፈሰስ ነበርኮ!›› እያልን እያሾፍን እስከ መቼ እንገፋለን? በራሳችን እያፌዝን በመንግሥት እያላከክን፣ ተስፋችንን እያጨለምን፣ አገር እየገደልን የቱን የሕይወት ልምላሜ እንጠብቃለን?! እስከ መቼስ መንገዳችን ቁልቁል እያንደረደረን እንዘልቀዋለን? ጎበዝ ሕልውናችን ጥያቄ ውስጥ መሆኑን አንዘንጋ፡፡ ዝም የማይባሉ በርካታ የፖለቲካ፣ የኢኮኖሚና የማህበራዊ ሳንካ መናኸሪያ እየሆንን እየመጣን መሆኑን ለአፍታም አንርሳ፡፡ ለወትሮው  Silver is Golden/ዝምታ ወርቅ ነው/ እንል ነበር፡፡ እየዋልን እያደርን ስናየው ግን ዝምታችን ወርቅ አይደለም! አይበጀንምም፡፡ ኤሊ አዝግማ ጥንቸልን መቅደሟ ዛሬ ተረት ነው፡፡ ዝም ባለ አፍ ዝምብ አይገባበትም የሚለውም አባባል ዛሬ ተረት ነው፡፡ ጉዳያችንና ጉዟችን ሁሉ Boumerang ‹‹አንጋጠው ቢተፉ ተመልሶ ባፉ›› እንዳይሆን ከትላንት እንማር፡፡ ዛሬን እንገንባ፡፡ ነገን ከዛሬ እንጀምረው፡፡ አናመንታ ቆርጠን መጓዝ የነገን ሙሉ ልብ ይፈጥርልናል፡፡ ሕልማችንን እውን ለማድረግ እንትጋ! የነገው ብርሃን ከዛሬው ጨለማ አብራክ መወለዱ አይቀሬ ነው፡፡ ይህ ግን ልባችንን ካላጨለምን ነው!
አለበለዚያ አባትየው አሉ እንደተባለው ‹‹እንኳን ጠመንጃ ሰጥተኸው እንዲሁም አልቻልነው›› ይሆንብናል! ጠንቀቅ እንበልና ነገን ከዛሬ እንገንባው!!




         በአርባ ምንጭ ዩኒቨርሲቲ መምህርና ተመራማሪ በሆኑት አቶ መኮንን ተካ የተዘጋጀው መጽሐፍ በሁሉም የመጽሐፍት መደብሮች ለገበያ ቀርቧል፡፡ መምህር መኮንን ተካ የጋዜጠኝነትና ተግባቦት መምህር ሲሆኑ ከዚህ መጽሐፍ በተጨማሪ ዝናቸው ከፍ ባሉ አለም አቀፍ የምርምር ጆርናሎች የተለያዩ
የምርምር መጣጥፎችን አበርክተዋል፡፡ ለ3ኛ ጊዜ የታተመና ጠለቅ ያለ ማሻሻያ የተደረገበት ይህ መጽሐፍ የሚከተሉትን ጉዳዮች ይዳስሳል፡-
- የሚዲያን ተጽዕኖና የማህበረሰብ ግንኙነትን በተመለከተ በቂ መረጃ ያቀርባል፣
- ስለ ሚዲያና ህዝብ ግንኙነት ዝርዝር ፍልስፍናዎችንና የአሠራር መርሆዎችን ይተነትናል፣
- ለተለያዩ የሚዲያ ዘውጐች የሚሆኑ ዘገባዎች እንዴት መሰናዳት እንዳለባቸው ያብራራል፣
- የሃሳብ ነፃነትን፣ የሚዲያ ህጐችንና የጋዜጠኝነት አተገባበር ምን መምሰል እንዳለበት ሃሳብ ያቀርባል፣
- በሀገራችን የሚዲያና የህዝብ ግንኙነት አተገባበር ላይ በንድፈ - ሀሳባዊ ቅኝት በመታገዝ አውዳዊ እውቀትን ያስጨብጣል፡፡
- መረጃና እውቀት እንዴት በጋዜጠኝነት መደራጀት እንዳለበት ያብራራል፣
- ከህትመትና ከአርትኦት ጋር በተገናኙ ርእሰ ጉዳዮች፣ ከጋዜጠኝነት አተገባበር አንፃር በቂ መረጃ ያቀርባል፡፡


* ታህሳስ 29 ቀን 1992ዓ.ም የመጀመሪያው "አዲስ አድማስ" ጋዜጣ፣ በመጀመሪያው ዕለት ቅዳሜ ለንባብ በቃ!!
*ላለፉት 20 ዓመታት በየሳምንቱ ቅዳሜ፤ እውነተኛና ትክክለኛ፣ ምሉዕና ሚዛናዊ ዜናዎችን…በመረጃ የበለፀጉ ፖሎቲካዊና ኢኮኖሚያዊ ዘገባዎችን…ጠንካራ ትንታኔዎችን…በኪናዊ ውበታችው የላቁ ማህበራዊና ጥበባዊ ጽሑፎችን አስነብበናል!!
*አምስት አገራዊ ምርጫዎችን ዘግበን፣ ከአገራችንና ከአንባቢዎቻችን ጋር ብዙ ውጣ ውረዶችን አልፈናል፤ ለዘንድሮው ምርጫም እየተዘጋጀን ነው!!
*ድንቅ ጽሁፎችን በፍቅር እያበረከታችሁ ለዘለቃችሁ የአድማስ ብዕርተኞች ሁሉ፤ ባለውለታዎቻችን ናችሁ!!
*ለሁለት አስርት ዐመታት በፍቅር ያነበባችሁን ሁሉ እናመሰግናለን፤ እንወዳችኋለን!!
*ምርትን አገልግሎታችሁን ለማስተዋወቅ እኛና ለመረጣችሁ ድርጅቶች ሁሉ አክብሮታችንን እንገልጻን!!
*ዓላማችን መረጃንና ዕውቀትን በማክበር፤ በአዕምሮና በሥራ የሚበለጽግ፣ ራሱን ችሎ የሚያስብና የሚቆም፣ ምክንያታዊና አስተዋይ ትውልድ ይበረከት ዘንድ መትጋት ነው!!

Saturday, 22 February 2020 12:32

የልጆች ጥግ


       ውድ ልጆች፡- በቤት ውስጥ ሁሉም ነገር የየራሱ ቦታ አለው፡፡ ፍራፍሬ (ሙዝ፣ ብርቱካን፣ ወይን፣ ወዘተ) በቅርጫት ወይም በፍራፍሬ ቦውል ውስጥ ይቀመጣል:: የቆሸሸ ልብስ ደግሞ ቅርጫት ውስጥ ይጠራቀማል፡፡ የሕጻናት መጫዎቻዎች ተሰብስበው የሚቀመጡበት ሳጥን ወይም ካርቶን ይኖራቸዋል፡፡ ማናቸውንም ነገሮች በምትፈልጓቸው ጊዜ ብቻ  ነው አውጥታችሁ መጠቀም ያለባችሁ፡፡ ተጠቅማችሁ ስትጨርሱም… ወዲያውኑ እቦታቸው መመለስ አለባችሁ፡፡ ያለበለዚያ ግን ሌላ ጊዜ ስትፈልጓቸው በቀላሉ አታገኟቸው፡፡ አንዳንድ ነገሮች እየጠፋብችሁ የምትቸገሩት ለምን ይመስላችሁ? በትክክለኛ ቦታቸው ስለማታስቀምጧቸው ነው፡፡ ስለዚህ ሁሉንም ነገር በቦታ በቦታው ማስቀመጣችሁን አትዘንጉ!  
ውድ ልጆች፡- ቤት ውስጥ የተበላሸ ወይም የተዘበራረቀ ነገር ካለ ወዲያውኑ አስተካክሉት፡፡ የሚያደናቅፍ ነገር ካያችሁ፣ ቶሎ ብላችሁ አንሱት፡፡ እናንተን ወይም ሌላ ሰው ሊጥል ይችላል፡፡ ውሃ ወይም ለስላሳ ወለሉ ላይ ከፈሰሰ ዝም ብላችሁ አትለፉት፤ አድርቁት፡፡ መሬት ላይ የወደቀ ሶፍት ወይም ወረቀት ከተመለከታችሁ አንስታችሁ የቆሻሻ ቅርጫት ውስጥ ጨምሩት፡፡ እናንተ መስራት የምትችሉትን ነገር፣ ሌላ ሰው እንዲሰራላችሁ አትጠብቁ፡፡
ውድ ልጆች፡- ከት/ቤት ስትመለሱ፣ ዩኑፎርማችሁን ቀይራችሁ፣ አልጋ ላይ ወይም እዚህና እዚያ  መጣል ተገቢ አይደለም:: በትክክል አጣጥፋችሁ ማስቀመጥ  አለባችሁ:: ጫማና ካልሲያችሁንም እንደዚያው፡፡ መኝታ ቤታችሁንና የጥናት ክፍላችሁን ምንጊዜም ንፁህ አድርጉት:: ወላጆቻችሁ፤ “ክፍላችሁን አጽዱ” ብለው እስኪነግሯችሁ ድረስ አትጠብቁ፡፡ የራሳችሁን ሥራ ራሳችሁ ተወጡ፡፡
ውድ ልጆች፡- ታናናሽ ወንድሞችና እህቶቻችሁን ማጫወት፣ መምከርና ማገዝ እንጂ ማብሸቅና ማስለቀስ የለባችሁም:: ተገቢም አይደለም፡፡ የትም ቦታ ቢሆን ታላላቆቻችሁን አክብሩ፡፡ ቤተሰባችሁንም ውደዱ፡፡
እደጉ! ተመንደጉ!

Monday, 24 February 2020 00:00

ኮሮና ቫይረስ በሳምንቱ

   ከዕለት ወደ ዕለት መስፋፋቱንና ብዙዎችን ተጠቂ ማድረጉን የቀጠለው ኮሮና ቫይረስ እስከ ትናንት በስቲያ ድረስ በመላው አለም ከ75 ሺህ በላይ ሰዎችን ማጥቃቱንና ለሞት መዳረጉን አለማቀፍ መገናኛ ብዙሃን ዘግበዋል፡፡
ወረርሽኙ በተቀሰቀሰባት ቻይና እስከ ትናንት በስቲያ ድረስ 74 ሺህ 185 ሰዎች በቫይረሱ ሲጠቁ፤ የሟቾች ቁጥር ደግሞ 2004 መድረሱ ተነግሯል፡፡ ኢራንና ግብጽ በሳምንቱ አዳዲስ የኮሮና ቫይረስ ተጠቂዎች የተገኙባቸው ሁለቱ የአለማችን አገራት ሲሆኑ በኢራን 2፣ በግብጽ ደግሞ 1 ሰው በቫይረሱ መያዙ ተረጋግጧል ሲል ሮይተርስ ዘግቧል፡፡ በደቡብ ኮርያ ባለፈው ረቡዕ ብቻ 20 አዳዲስ የቫይረሱ ተጠቂዎች መገኘታቸውን የጠቆመው ዘገባው፤ የተጠቂዎች ቁጥር ወደ 51 ከፍ ማለቱንም አመልክቷል፡፡ በሺህዎች የሚቆጠሩ መንገደኞችን አሳፍራ በጃፓን የባህር ዳርቻ ለቀናት ታፍና በቆየችው መርከብ ውስጥ የነበሩት 542 ሰዎች ቫይረሱ እንዳለባቸው የተረጋገጠ ሲሆን የሩስያ መንግስት ከትናንት በስቲያ ጀምሮ ቻይናውያን ወደ ግዛቱ እንዳይገቡ እገዳ መጣሉን የዘገበው ዘ ጋርዲያን፤ እገዳው እስከ መቼ እንደሚቆይ የታወቀ ነገር የለም ብሏል፡፡
የአሜሪካ የንግድ ምክር ቤት ሰራሁት ያለውን ጥናት ጠቅሶ ዘ ኢንዲፔንደንት እንደዘገበው ደግሞ፣ በቻይና ከሚገኙት የአሜሪካ ኩባንያዎች መካከል ግማሹ በኮሮና ቫይረስ ሳቢያ እንቅስቃሴያቸው በከፍተኛ ሁኔታ መገታቱን መግለጻቸውና 78 በመቶ የሚሆኑት ደግሞ የሰው ሃይል እጥረት እንደገጠማቸው መናገራቸው ተወስቷል፡፡

Saturday, 22 February 2020 12:16

መልዕክቶቻችሁ

       የኤልቲቪ ‹‹ሌላው ገጽታ››?!

        እስካሁን በኤልቲቪ ‹‹ሌላው ገጽታ›› ፕሮግራም ላይ ለቃለ መጠይቅ ከቀረቡ እንግዶች ውስጥ የማየት ዕድል የገጠመኝ የጥቂቶቹን ብቻ ነው። የፖለቲከኛ አቶ ልደቱ አያሌውን፣ የሰብዓዊ መብት ተሟጋቹ አቶ ኦባንግ ሜቶና የማስታወቂያ ባለሙያው ጋዜጠኛ ሳምሶን ማሞን ቃለ መጠይቅ ነው፡፡ የዚህ ፕሮግራም ሁለተኛው ወይም የመጨረሻው ክፍሉ… ከጥያቄው ፎርማት እስከ ቅጣቱ (ቃሪያና ቆጭቆጫ መብላት) በጣም ያስገርመኛል፡፡ አንጋፋና ታዋቂ ሰዎችን በቴሌቪዥን ፕሮግራም በእንግድነት ጋብዞ፣ በቃሪያና ሚጥሚጣ መለብለብ ምን የሚሉት ሙያ ነው? በእርግጠኝነት መናገር የሚቻለው ለእንግዳውም ሆነ ለተመልካቹ ብዙም የሚያዝናና አለመሆኑን ነው፡፡ (በነገራችን ላይ የተከበሩና የታወቁ ሰዎችን እየጋበዙ የማይመጥናቸው ቀልድና ጨዋታዎች ላይ ሳይወዱ በግድ የሚያሳትፉ የቲቪ ፕሮግራሞች እየበዙ ነውና ያሳስባል) የፕሮግራሙ አቅራቢ ጋዜጠኛ፤ ለእንግዶቿ ባትጨነቅ እንኳን ለራሷ ስትል የ‹ቃጠሎ› ጨዋታውን በሌላ ቁም ነገር ያለው ጨዋታ ብትለውጠው ይመረጣል - እሷም የጥያቄና መልሱ ተሳታፊ ናትና፡፡ ከጋዜጠኛ ሳምሶን ማሞ ጋር ባደረገችው ቆይታም ፊቷ ፍም መስሎ አይተናል፡፡ በየሳምንቱ እንዲህ እሆነች… እንዴት ልትዘልቀው ነው? ለጤናዋም ብታስብበትም ጥሩ ነው፡፡
       ሳሚ - ከሸገር

Saturday, 22 February 2020 11:59

መልዕክቶቻችሁ

   ከስህተት ውስጥ የፈለቀ አስደማሚ ማስታወቂያ!


           በአሜሪካ በምግብ አብሳይነት (Cook) የምትሰራ አንዲት እንስት ዕድል ቀናትና በገዛችው ሎተሪ ወደ ሀብት ማማ የሚያወጣ ብዙ ገንዘብ ደረሳት፡፡ የሚሊዮን ዶላር አሸናፊ ሆነች፡፡ በዚህም የተነሳ የሚዲያ ትኩረት ሳበች፡፡ አንዱ ታዋቂ የቴሌቪዥን ቻናልም ቃለ መጠይቅ አደረገላት፡፡ ይህቺ ባለ አዱኛ ከምግብ አብሳይነት ሙያዋ ውጭ በሌሎች አጠቃላይ ጉዳዮች ላይ እምብዛም ዕውቀትና ግንዛቤ የላትም፡፡ (በኛ አገር አባባል “ጨዋ” ናት)
የቴሌቪዥኑ ጋዜጠኛ በሎተሪ አሸናፊነቷ ዙሪያ ጥቂት ጥያቄዎችን ከጠየቃት በኋላ አንድ ለየት ያለ ጥያቄ አቀረበላት-  “What do you know about American president in general?”  (ስለ አሜሪካ ፕሬዚዳንት በአጠቃላይ ምን ታውቂያለሽ?) የሚል፡፡ የወጥ ቤት ባለሙያዋ እንስትም እንዲህ ስትል መለሰች፡- “I know only about General Motors›› (እኔ የማውቀው ስለ ጀነራል  ሞተርስ ብቻ ነው) ይሄን በቴሌቪዥን የቀጥታ ሥርጭት ሲከታተሉ የነበሩት የጀነራል ሞተርስ ፕሬዚዳንት ወደ ቴሌቪዥን ጣቢያው ደወሉና “ቃለምልልሱ በአየር ላይ ይቆይ፤ አሁን መጣሁ” አሉ፡፡
ፕሬዚዳንቱ ቴሌቪዥን ጣቢያው የደረሱት የአዲስ (ብራንድ) ጀነራል ሞተርስ አውቶሞቢል ቁልፍ ይዘው ነበር፡፡
የመኪናውን ቁልፍ ለዚያች የሎተሪ አሸናፊና የወጥ ቤት ባለሙያ ከሸለሙ በኋላ “የአሜሪካ ፕሬዚዳንትን ስም የማያውቁ ዜጐች እንኳን እኛን ጠንቅቀው ያውቁናል” በማለት ተናገሩ - ለድርጅታቸው አስደማሚ ማስታወቂያ ሰሩ፡፡ ከተሳሳተ ምላሽ የተፈለቀቀ ምርጥ ማስታቂያ አይደል?!

            ጄፍ ቤዞስ 10 በመቶ ሃብታቸውን ለአየር ንብረት ለውጥ ድጋፍ እንደሚያደርጉ ተናግረዋል

         የናሚቢያ ቀዳማዊት እመቤት ሞኒካ ጄኒጎስ ከዚህ አለም በሞት ሲለዩ 3 ሚሊዮን ዶላር የሚገመት ሃብታቸው በሙሉ ለበጎ አድራጎት እንዲውል መወሰናቸውን እንዲሁም የአለማችን ቁጥር አንድ ቢሊየነር ጄፍ ቤዞስ ከአጠቃላይ ሃብታቸው 10 በመቶ ያህሉን ወይም 10 ቢሊዮን ዶላር ለአየር ንብረት ለውጥ መከላከል ተግባር እንደሚለግሱ መናገራቸው ተዘግቧል፡፡
በአገራቸው የጾታ ልዩነትን ማጥፋትን ጨምሮ የተለያዩ የበጎ ምግባር ስራዎችን በመስራት የአፍሪካውያን ቀዳማዊ እመቤቶችን ገጽታ ለመገንባት እየጣሩ የሚገኙት ሞኒካ ጄኒጎስ፤ሃብታቸውን ለበጎ ምግባር ለማዋል መወሰናቸውን እንዳስታወቁ ዘገባው አመልክቷል፡፡ በሌላ ዜና ደግሞ አሜሪካዊው የአለማችን ቁጥር አንድ ቢሊየነር ጄፍ ቤዞስ፤ ከአጠቃላይ ሃብታቸው 10 በመቶ ያህሉን ወይም 10 ቢሊዮን ዶላር ለአየር ንብረት ለውጥ መከላከል ተግባር እንደሚለግሱ ባለፈው ሰኞ ማስታወቃቸው ተነግሯል፡፡
የአማዞኑ መስራችና ዋና ስራ አስፈጻሚ ጄፍ ቤዞስ አዲስ ባቋቋሙት ቤዞስ አርዝ ፈንድ የተባለ ፋውንዴሽን አማካይነት በአለማቀፍ ዙሪያ ለሚደረጉ ከአየር ንብረት ለውጥ ጋር የተያያዙ እንቅስቃሴዎች የ10 ቢሊዮን ዶላር ድጋፍ እንደሚያደርጉ ነው የተናገሩት፡፡ የገንዘብ ድጋፉ ከሚደረግላቸው መካከል በአየር ንብረት ለውጥ ዙሪያ የሚሰሩ ተመራማሪዎች፣ አክቲቪስቶች፣ መንግስታዊ ያልሆኑ ድርጅቶች እንደሚገኙበት የዘገበው ፎርብስ መጽሄት፣ ተፈጥሮን በመንከባከብ ላይ ትኩረት ላደረጉ ቅድሚያ ይሰጣል መባሉንም ገልጧል፡፡ የአለማችን ቁጥር አንድ ባለጸጋ የሆኑት ጄፍ ቤዞስ አጠቃላይ የተጣራ ሃብታቸው 129.9 ቢሊዮን ዶላር እንደሚደርስም ዘገባው አክሎ አስታውሷል፡፡

 ከኮሮና ቫይረስ ወረርሽኝ መስፋፋት ጋር በተያያዘ በቻይና የሩብ አመቱ የሞባይል ምርት በ50 በመቶ ያህል ይቀንሳል ተብሎ እንደሚጠበቅ፤ በአለማቀፉ የሞባይል ስልኮች ገበያ ላይ መቀዛቀዝ እንደሚከሰትና በ5 አመት ውስጥ ዝቅተኛው የሩብ አመት የሞባይል ሽያጭ ይመዘገባል ተብሎ እንደሚጠበቅ ሮይተርስ ዘግቧል፡፡
በቻይናም ሆነ በሌሎች አገራት የሚገኙ ታላላቅ የሞባይል አምራች ኩባንያዎች ከቫይረሱ ስርጭት ጋር በተያያዘ ስራቸው መስተጓጎሉንና የሰው ሃይል እጥረት ማጋጠሙን ተከትሎ፣ የሩብ አመቱ የሞባይል ምርት መጠን በ12 በመቶ ያህል ሊቀንስ እንደሚችል መነገሩን ዘገባው አመልክቷል፡፡
በሩብ አመቱ የሞባይል ሽያጩ በከፍተኛ ሁኔታ ይቀንሳል ተብሎ የሚጠበቀው ኩባንያ አፕል ሲሆን ኩባንያው የሚያመርተው አይፎን ሞባይል፤ የሩብ አመት ሽያጭ በ10 በመቶ ይቀንሳል ተብሎ እንደሚጠበቅ ተነግሯል፡፡
ተፎካካሪው የደቡብ ኮርያው ሞባይል አምራች ኩባንያ ሳምሰንግ በበኩሉ፤ የሽያጭ መጠኑ በ3 በመቶ ያህል ሊቀንስበት እንደሚችልም ዘገባው አመልክቷል፡፡