Administrator

Administrator

    የአሜሪካ የህዝብ ተወካዮች ምክር ቤት፤ ፕሬዚዳንት ዶናልድ ትራምፕ ስልጣናቸውን ያላግባብ በመጠቀምና የምክር ቤቱን ስራ በማደናቀፍ እንዲከሰሱና ከስልጣናቸው እንዲወርዱ ባለፈው ረቡዕ በአብላጫ ድምጽ መወሰኑን ተከትሎ፣ ትራምፕ በአገሪቱ ታሪክ ሴኔት ፊት ቀርበው ክሳቸውን እንዲከላከሉ የተወሰነባቸው ሶስተኛው ፕሬዚዳንት ሆነዋል፡፡
ፕሬዚዳንት ዶናልድ ትራምፕ፣ የዩክሬን አቻቸው ቭላድሚር ዘለንስኪን በቀድሞው የአሜሪካ ምክትል ፕሬዚዳንትና በምርጫ ተቀናቃኛቸው ጆ ባይደን እና በልጃቸው ላይ የሙስና ምርመራ እንዲያደርጉ በመደለልና ጫና በማድረግ ስልጣንን ያለአግባብ በመጠቀም፤ እንዲሁም ከዚህ ጋር በተያያዘ ለሚደረግባቸው ምርመራ መረጃዎችን ባለመስጠትና የምክር ቤቱን ስራ በማደናቀፍ እንዲከሰሱ በቀረበባቸው የውሳኔ ሃሳብ ዙሪያ፣ ለአስር ሰዓታት ያህል ክርክር ያደረጉት የምክር ቤቱ አባላት፣ በስተመጨረሻም ፕሬዚዳንቱ  እንዲከሰሱና ሴኔት ፊት ቀርበው የቀረቡባቸውን ክሶች እንዲከላከሉ በአብላጫ ድምጽ መወሰናቸውን ሮይተርስ ዘግቧል::
ዩክሬን በቀጣዩ የአሜሪካ ምርጫ ዴሞክራቶችን ለመወከል እየተፎካከሩ ባሉት ጆ ባይደን ላይ ምርመራ እንድታደርግ ጫና ማሳደር በሚል የቀረበው ክስ፤ በ230 የኮንግረሱ አባላት ድጋፍና በ197 ተቃውሞ፣ የቀረበባቸውን ክስ ለማጣራት በተጀመረው ጥረት ምስክሮች ቃላቸውን እንዳይሰጡ በመከላከልና መረጃ በመከልከል የምክር ቤቱን ስራ ማደናቀፍ የሚለው ክስ ደግሞ በ229 ድጋፍና በ198 ተቃውሞ ሁለቱም በአብላጫ ድምጽ መወሰናቸውን ዘገባው አመልክቷል፡፡
የኮንግረሱ አባላት በአፈ ጉባኤዋ ናንሲ ፔሎሲ አነሳሽነት በቀረቡት ሁለት ክሶች ላይ የሚያደርጉትን የድምጽ ስነስርዓት ሚቺጋን ውስጥ የምረጡኝ ቅስቀሳ እያደረጉ፣ በቴሌቪዥን በቀጥታ የተከታተሉት ዶናልድ ትራምፕ፣ የቀረበባቸውን ክስ የአክራሪ ግራ ዘመሞች ነጭ ቅጥፈትና በሪፐብሊካን ላይ የተሰነዘረ ጥቃት ሲሉ እንዳጣጣሉት ተነግሯል፡፡
ሴኔቱ ከሳምንታት በኋላ በጉዳዩ ዙሪያ መክሮ ውሳኔ ያሳልፋል ተብሎ እንደሚጠበቅ የጠቆመው ዘገባው፤ ፕሬዚዳንት ትራምፕ ስልጣናቸውን የሚለቅቁት ከሴኔቱ አባላት ሁለት ሶስተኛው የድጋፍ ድምጽ ከሰጡበት ብቻ እንደሆነና ያም ሆኖ ግን  ሴኔቱ ሪፐብሊካን የሚበዙበት እንደመሆኑ በፕሬዚዳንቱ ላይ ውሳኔው የመተላለፉ ዕድል አነስተኛ እንደሆነ መነገሩን አመልክቷል፡፡
ኮንግረሱ ውሳኔውን ማስተላለፉን ቀጥሎ ዋይት ሃውስ ባወጣው መግለጫ፣ ሴኔቱ በትራምፕ ላይ የቀረበውን ክስ ውድቅ እንደሚያደርገውና በነጻ እንደሚያሰናብታቸው ሳይታለም የተፈታ ነው ማለቱን ዘገባው አክሎ ገልጧል፡፡
ዋይት ሃውስ እርግጠኛ እንደሆነውና ብዙዎች እንደገመቱት ሳይሆን ቀርቶ፣፣ ሴኔቱ ፕሬዚዳንት ትራምፕ ከስልጣን እንዲሰናበቱ ውሳኔ የሚያስተላልፍ ከሆነ፣ ምክትላቸው ማይክ ፔንስ መንበረ ስልጣኑን ተረክበው እስከ መጪው የ2021 የአሜሪካ ፕሬዚዳንታዊ ምርጫ፤ አገሪቱን ማስተዳደር እንደሚቀጥሉ ተነግሯል፡፡
በአሜሪካ ፕሬዚዳንቶች ታሪክ በመሰል የኮንግረስ ውሳኔ ሴነት ፊት ቀርበው ክስ እንዲመሰረትባቸው የተወሰነባቸው ሁለት የአገሪቱ መሪዎች አንድሪው ጆንሰንና ቢል ክሊንተን እንደነበሩ ያስታወሰው ዘገባው፣ ያም ሆኖ ግን ሁለቱም ከስልጣን እንዲለቅቁ እንዳልተወሰነባቸው አክሎ ገልጧል፡፡



የፓኪስታን መንግስት በቀድሞው የአገሪቱ ፕሬዚዳንትና የጦር መሪ ጄኔራል ፔርቬዝ ሙሻራፍ ላይ ባለፈው ማክሰኞ የተላለፈውን የሞት ፍርድ ቅጣት እንደሚቃወምና ውሳኔውን ለማስቀየር እንደሚሰራ ማስታወቁን ዴይሊ መይል ዘግቧል፡፡
የአገሪቱ ልዩ ፍርድ ቤት በስልጣን ዘመናቸው ባልተገባ ሁኔታ አስቸኳይ ጊዜ አዋጅ በማወጅ አገሪቱን ወደ ቀውስ አስገብተዋታል ተብለው በተከሰሱት የቀድሞው የአገሪቱ ፕሬዚዳንት ፔርቬዝ ሙሻራፍ ላይ በሌሉበት የሞት ፍርድ መወሰኑን ያስታወሰው ዘገባው፤ የአገሪቱ መንግስት ግን ተከሳሹ ምላሻቸውን ባልሰጡበትና በከፍተኛ ህመም እየተሰቃዩ ባሉበት ሁኔታ በጥድፊያ የተላለፈው ፍርድ ተገቢ አለመሆኑን በመግለጽ ይግባኝ ለመጠየቅና ውሳኔውን ለማስቀየር መዘጋጀቱን እንዳስታወቀ አመልክቷል፡፡
በ2008 አገራቸውን ጥለው ወደ ዱባይ የተሰደዱትና በአሁኑ ወቅት በዱባይ በሚገኝ ሆስፒታል የህክምና ድጋፍ እየተደረገላቸው የሚገኙት የ76 አመቱ ሙሻራፍ፤ በ2007 ባልተገባ ሁኔታ ጥለውታል በተባለው የአስቸኳይ ጊዜ አዋጅ የተባበሯቸው ባለስልጣናትና አጋሮች በክሱ አለመካተታቸውን እንደ አንድ መቃወሚያ የጠቀሱት የአገሪቱ ጠቅላይ ሚኒስትር ኢምራን ካሃን ቃል አቀባይ በበኩላቸው፤ “በዱባይ ህክምና የሚያደርጉላቸው ሃኪሞችም ሙሻራፍ ፍርድ ቤት መቅረብ እንደማይችሉ ባረጋገጡበት ሁኔታ ፍርድ ቤቱ ውሳኔውን ማስተላለፉ አግባብነት የለውም” ሲሉ መቃወማቸውንም ዘገባው አስረድቷል፡፡
እ.ኤ.አ በ1999 በወታደራዊ መፈንቅለ መንግስት ስልጣን በመያዝ አገሪቱን ከ2001 እስከ 2008 በፕሬዚዳንትነት የመሩት ጄኔራል ፔርቬዝ ሙሻራፍ የሞት ፍርዱ ቢተላለፍባቸውም፣ ዱባይና ፓኪስታን ወንጀለኞችን አሳልፎ የመስጠት ስምምነት ስለሌላቸው ዱባይ አሳልፋ አትሰጣቸውም ተብሎ እንደሚጠበቅም ዘገባው ገልጧል፡፡ ሙሻራፍ፤ወደ አገራቸው ተመልሰው በፍርድ ቤት ለመቅረብ ፈቃደኛ ቢሆኑም ሃኪሞቻቸው እንዳልፈቀዱላቸው ነግረውኛል ሲሉ የተናገሩት የሙሻራፍ ጠበቃ አክታር ሻፍ በበኩላቸው፣ ደምበኛቸው በዱባይ ከሚገኙበት ሆስፒታል በቪዲዮ መልዕክት ለፍርድ ቤቱ ምላሻቸውን እንዲሰጡ ቢጠይቁም፤ ፍርድ ቤቱ እንዳልተቀበላቸውና በዚህ ሁኔታ የሞት ፍርዱ መተላለፉ አግባብ አለመሆኑን እንደገለጸ ዘገባው አመልክቷል፡፡ ሙሻራፍ ከዚህ በተጨማሪም የቀድሞው ጠቅላይ ሚኒስትር ቤናዚር ቡቶ በተገደሉበት ሴራ ውስጥ እጃቸው አለበት በሚል ክስ ተመስርቶባቸው እንደነበርም ዘገባው አስታውሷል፡፡

 አንጎላ በ2019 ብቻ ከመንግስት የተመዘበረ 5 ቢ. ዶላር ማስመለሷን ገልጻለች


            የናይጀሪያ የፍትህ ሚኒስትር አቡበከር ማላሚ፣ የአገሪቱ ከፍተኛ ባለስልጣናት፣ 400 ቢሊዮን ዶላር ያህል የህዝብ ገንዘብ ዘርፈው ወደ ውጭ አገራት ማሸሻቸውን እንዳስታወቁ ኦልአፍሪካን ኒውስ ዘግቧል፡፡ ሚኒስትሩ በተባበሩት አረብ ኤሜሬትስ በመካሄድ ላይ በሚገኘው የተባበሩት መንግስታት ድርጅት የጸረ ሙስና ጉባኤ ላይ ያደረጉትን ንግግር ጠቅሶ ዘገባው እንዳለው፤ ባለስልጣናቱ በውጭ አገራት ከሚገኙ ታላላቅ ኩባንያዎችና አጋሮቻቸው ጋር በመተባበር፣ አገሪቱን 400 ቢሊዮን ዶላር ያህል ዘርፈዋታል፡፡
የአገሪቱ መንግስት ባለስልጣናት ከውጭ ሃይሎች ጋር በመተባበር፣ የሚፈጽሙትን መሰል ዘረፋ ለመከላከል ከመቼውም ጊዜ በበለጠ የተቀናጀ ስራ በመስራት ላይ እንደሚገኝ ሚኒስትሩ ማስታወቃቸውንም ዘገባው አክሎ ገልጧል፡፡ በሌላ ዜና ደግሞ አንጎላ ባለፉት 12 ወራት ጊዜ ውስጥ ብቻ በባለስልጣናት የተዘረፈ ከ5 ቢሊዮን ዶላር በላይ የህዝብ ሃብት እንዲመለስ ማድረጓን አልጀዚራ ባለፈው ረቡዕ ዘግቧል፡፡
የአገሪቱ የፍትህ ሚኒስትር ፍራንሲስኮ ኩየሮዝ እንዳሉት፤ የአገሪቱ መንግስት በተገባደደው የፈረንጆች አመት 2019 ብቻ ከመንግስት ካዘና የተዘረፈ ከ5 ቢሊዮን ዶላር በላይ ሃብት ከሃገር ውስጥና ከውጭ ለማስመለስ የተቻለ ሲሆን፣ በተለይም ፕሬዚዳንት ጃኦ ሎሬንሶ አገሪቱን ለ40 አመታት ያህል የመሩትንና ልጃቸውን ጨምሮ በሙስና እንደተጨማለቁ የሚነገርላቸውን ጆሴ ኤዱዋርዶ ዶስ ሳንቶስን ተክተው ስልጣን ከያዙ በኋላ ባለፉት 2 አመታት መሰል የህዝብ ሃብት ምዝበራንና ሙስናን ለመዋጋት እርብርብ እየተደረገ እንደሚገኝ ተገልጧል፡፡


 የዚምባቡዌ ምክትል ፕሬዚዳንት ኮንስታንቲኖ ቺዌንጋ ባለቤት፣ ሜሪ ቺዌንጋ ባላቸውን በመግደል ሙከራና በከፍተኛ የገንዘብ ማጭበርበር ክስ እንደተመሰረተባቸው ተዘግቧል፡፡ ባለፈው ሰኞ በመዲናዋ ሃራሪ በሚገኝ ፍርድ ቤት የቀረቡት ሜሪ ቺዌንጋ፤ ባለፈው ሃምሌ ወር ደቡብ አፍሪካ ውስጥ ባለቤታቸውን ኮንስታንቲኖ ቺዌንጋን ወደ ህክምና እንዳይሄዱ በመከልከል አንዲሁም ሆስፒታል ከገቡ በኋላም የተተከለላቸውን የህክምና መሳሪያ በመንቀል ለሞት ለመዳረግ ሞክረዋል በሚል መከሰሳቸውን አልጀዚራ ዘግቧል፡፡
የ38 አመቷ ሜሪ ቺዌንጋ፣ ከዚህ በተጨማሪም፣ 1 ሚሊዮን ዶላር ያህል በማጭበርበር፣ ወደ ደቡብ አፍሪካ አሸሽተዋል በሚል የከፍተኛ ገንዘብ ማጭበርበርና የሙስና ክሶች እንደተመሰረቱባቸው የጠቆመው ዘገባው፤ ፍርድ ቤት በቅርቡ ውሳኔ ያስተላልፍባቸዋል ተብሎ እንደሚጠበቅ አመልክቷል፡፡

Saturday, 21 December 2019 13:21

የዝነኛ ሴቶች ጥግ

• ‹‹በአገሪቱ ድንቅ የጥበብ ታሪክ ውስጥ የራሴን አሻራ ማስቀመጥ በሚያስችለኝ የሙያ መስክ መሰማራት በመቻሌ፣ ራሴን እንደ ዕድለኛ ነው የምቆጥረው፡፡…››
   ሳራ አበራ (ፋሽን ዲዛይነር)
• ‹‹ለአገሬ ትልልቅ ህልሞች አሉኝ:: ዴሞክራሲ እንዲሁ ለአፍ ያህል ብቻ የ ምናወራለት ሳ ይሆን ት ርጉም ያለው የሕይወታችን ዘይቤ እንዲሆን እፈልጋለሁ::››
   ሶፊ ይልማ (ጋዜጠኛና ፖለቲከኛ)
• ‹‹ለስኬቴ ምስጢሩ ለሥራዬ ያለኝ ከፍተኛ ፍቅር ነው፡፡ ሥራዬ ለእኔ ሕይወቴና በጋለ ውስጣዊ ፍቅር የምተጋለት ሁሉ ነገሬም ነው፡፡››
   ቆንጂት ሥነ ጊዮርጊስ (አምባሳደር)
• ‹‹ከህክምና ዶክተሮች የላቀ ገቢ የሚያገኙ የጫማ ዲዛይን ሰሪዎች፣ ከባንክ ተቆጣጣሪዎች የበለጠ የሚከፈላቸው የስፌት ሠራተኞች በሶልሬብልስ ውስጥ
መኖራቸው ያኮራኛል፡፡ ብልፅግና ይሏል ይሄ ነው!››
   ቤተልሔም ጥላሁን (የሶልሬብልስ መሥራች)
• ‹‹ወደ ውስጣችሁ ተመልከቱ፤ በሕይወታችሁ ልትሰሩ ስለምትችሉት ታላቅ ነገር ራሳችሁን ጠይቁ፤ እናም አድርጉት!››
   ብሩክታዊት ጥጋቡ (የሕጻናት ቴሌቪዥን ፕሮግራም ፈጣሪ)
• ‹‹እያንዳንዷን ነገር በጥልቀት እንደ መፈተሽና ውስጣዊ ባህርያቱን እንደማወቅ የሚያጓጓ ነገር የለም፡፡››
   ዶ/ር ታደለች አቶምሳ (የፊዚክስ ባለሙያ፤ ተመራማሪ)
• ‹‹በኢትዮጵያ የትኛዋም ሴት ከጥቃት ነፃ አይደለችም ብዬ አምናለሁ፡፡ የፆታ ጥቃት ባይሆን እንኳን የሞራል ጥቃት አይቀርላትም፡፡››
    ወንጌል ተስፋዬ (ረዳት ሳጂን፤ ወንጀል መርማሪ)
(ከ‹‹ተምሳሌት - ዕፁብ ድንቅ ኢትዮጵያውያን ሴቶች›› የተወሰደ

Sunday, 22 December 2019 00:00

የፖለቲካ ጥግ

• ዛሬ ኢየሱስ ክርስቶስ ምድር ላይ ቢሆን ኖሮ፤ በአህያ ጀርባ ላይ አይጓዝም ነበር:: በአውሮፕላን ይበራል፤ በሚዲያ ይጠቀማል፡፡
   ጆኤል ኦስቲን
• በዲጂታል ሚዲያና በህትመት ሚዲያ መካከል ድንበር ያለ አይመስለኝም፡፡
   ያልታወቀ ሰው
• ትላንትና በእንግሊዝም በአሜሪካም የሶሻሊዝም ርዕዮተ-ዓለም ድል ተደርጓል፡፡
   ፎክስ ኒውስ (በቅርቡ የእንግሊዝ ሌበር ፓርቲ በዝረራ ሲሸነፍ)
• አብዛኛውን ጊዜ፣ መደበኛ ሚዲያዎች፣ አንድን ጉዳይ ላይ ሲዘግቡ፤ ሙሉ ታሪኩን አይናገሩም፡፡
   ሼንስሚዝ
• ዓይናችን እያየ የፖለቲካ ፓርቲ እየሞተ ነው፤ ዲሞክራቶችን ማለቴ አይደለም:: የማወራው፤ በተቃዋሚዎች እየጠፋ ስላለው መደበኛ ሚዲያው ነው፡፡
   ሆዋርድ ፊንማን
• እንጋፈጠው፡፡ ዊኪሊክስ የመጣው መደበኛ ሚዲያው ስራውን በቅጡ ባለመስራቱ ነው፡፡
   ጄሲ ቬንቱራ
• ጋዜጠኛ የሆንኩት፤ ለመረጃ በጋዜጦች ላይ እምነቴን እንዳልጥል ነው፡፡
   ክሪስቶፈር ሂችንስ
• መደበኛ ሚዲያው የሚያተኩርበትን ነገር ተጠንቀቅ፡፡ መደበኛ ሚዲያው ችላ ያለውን ጉዳይ ደግሞ አትኩርበት፡፡
   ሶቴሮሜ ሌፔዝ
• ሴቶች በአመራር ከወንዶች የተሻሉ ናቸው፡፡
   ባራክ ኦባማ

Saturday, 21 December 2019 13:19

የስኬት ጥግ

• ሁሉም ሰ ው የ ሚኖረው አ ንድ ነ ገር እ የሸጠ ነው፡፡
   ሮበርት ሉዊስ ስቲቨንሰን
• ሰብዕናን ቅጠር፡፡ ሙያን አሰልጥን፡፡
   ጂተር ሹትዝ
• ጊዜህ ውስን ነው፡፡ እናም የሌሎችን ሕይወት በመኖር አታባክነው፡፡
   ስቲቭ ጆቭስ
• ከተፎካካሪዎችህ ይልቅ ለደንበኞችህ ምቹ ሁን፡፡
   ሪቻርድ ሪድ
• ህልምና እውነታ ተቃራኒዎች ናቸው፡፡ ድርጊት ያጣምራቸዋል፡፡
   ኦሳታ ሻኩር
• የምትጓዝበትን መንገድ ካልወደድከው፣ ሌላ መጥረግ ጀምር፡፡
   ዶሊ ፓርተን
• በጭንቅላትህ ሳይሆን በልብህ ምራ፡፡
   ልዕልት ዲያና
• ለአዲስ ጅማሮ ተመራጩ ጊዜ አሁን ነው::
   ማንነቱ ያልታወቀ
• በሕይወቴ ደግሜ ደጋግሜ ተሸንፌአለሁ፤ ለዚያ ነው የተሳካልኝ፡፡
   ማይክል ጆርዳን
• አንዳንዴ ትውስታ እስኪሆን ድረስ የቅጽበትን ዋጋ ፈጽሞ አታውቀውም፡፡
   ዶ/ር ሴዩስ
• ሕይወቴን መቀየር የምችለው እኔ ብቻ ነኝ:: ሌላ ማንም ሊቀይርልኝ አይደችልም::
   ካርል ቡርኔት
• ሕይወት ራስህን የማግኘት ጉዳይ አይደለም፤ ራስህን መፍጠር ነው፡፡
   ጆርጅ በርናርድ ሾው
• ሕይወትን ከወደድካት፣ ሕይወት መልሳ እንደምትወድህ ተገንዝቤአለሁ፡፡
   አርተር ሩቢንስቴይን



Saturday, 21 December 2019 13:14

የቦርድ ሊቀ መንበሩ

     ኤልያስ የሆስፒታሉ እንግዳና መቀበያ አግዳሚ ወንበር ላይ ተቀምጦ፣ ስሙ እስኪጠራ እየተጠባበቀ ነው፡፡ ይህ አዲስ ሆስፒታል ከተቋቋመ አመት እንኳን ያልሞላው ቢሆንም፤ በአጭር ጊዜ ውስጥ ዝነኛ ለመሆን የበቃው በምንም ሳይሆን፣ አሉ የተባሉ አገሪቱ ያፈራቻቸውን ሃኪሞች በውድ ገንዘብ መቅጠር በመቻሉ እንደሆነ ኤልያስ ከሁነኛ ሰው ሰምቷል። ሌላው ይህን ሆስፒታል ልዩ የሚያደርገው የፕላስቲክ ሰርጀሪ ህክምና አገልግሎት የሚሰጥ ብቸኛው ሆስፒታል በመሆኑም ጭምር ነው፡፡ የኤልያስ አመጣጥም ዋናው ምክንያት ይኸው ነበር፡።
ከወር በፊት መልካም መልካም የነበረው ፊቱ፤ የተጨማደደ የጨርቅ ኳስ ስለመሰለ፣ የተጠየቀውን ከፍሎ የቀድሞ ገፅታውን ለማስመለስ ቆርጦ ተነስቷል፡፡ የሕክምናው ቦርድ ሊቀመንበር ከመጀመርያው እንዳልወደደው መግለጽ እንወዳለን፡፡ ‹‹የባንክ ሂሳብ ደብተርህንና አንዳንድ ማንነትህን የሚገልጽ ማስረጃ አምጣ?” ባለው መሰረት፤ መታወቂያውንና የኢትዮጵያ ንግድ ባንክ ሰሜን ቅርንጫፍ የቁጠባ ሂሳብ ደብተሩን ይዟል፡፡ የባንክ ደብተሩ ተቀማጭ ሂሳብ፣ አንድ ሚሊዮን ሁለት መቶ ሃምሳ ስድስት ሺህ ብር ከሃያ አምስት ሳንቲም ጥሪት እንዳለው ያሳያል። እንግዲህ ህክምናው ምን ያህል ወጪ እንደሚፈጅ አሁን ነው የሚለየው፡፡ መቼም ይሄን ገንዘብ አንድ የሕንጻ ጥበቃ ሰራተኛ ‹እንዴት በስድስት ወራት ውስጥ ሊያፈራ ቻለ? ብሎ መጠየቅ ከማንኛውም ማሰብ የሚችል ሰው የሚጠበቅ እንደሆነ ምንም ጥርጥር የለውም፡፡ እኛም ይህንን ለማብራራት ዝግጁ ነን፡፡
የወር ደሞዙ ሁለት ሺህ አምስት መቶ ብር የሆነው የሰላሳ አምስት አመቱ ኮበሌ ኤልያስ ተሰማ፤ ከቤት ኪራይ፤ ከምግብና ከአረቄው (አንዳንድ ወጪዎቹን ሳይጨምር) ውጭ ከደሞዙ ምንም አይተርፈውም፡፡
ሕንጻው ስር ካለው ምድር ቤት፣ ሁለት ፎቆች ወደ ታች - ሶስት መቶ መኪኖች ሲያድሩ ጠባቂው እሱ ነው፡፡ ታዲያ አንድ ቀን ከሕንጻው ሰባተኛ ፎቅ ላይ የሚኖር ሃብታም፤ ጀሪካንና የፕላስቲክ ቱቦ ይዞ መጣና የመኪናውን የነዳጅ ታንከር ከፍቶ ጎማውን ወደ ታንከሩ ሰዶ፣ በአፉ ነዳጁን በመሳብ ወደ ጀሪካኑ ሲቀደ ተመለከተ፡፡ ቱጃሩ ወደ አስር ሊትር ያህል ቀዳና ጀሪካኑን ይዞ ወደ ፎቅ ወጣ። ከዚያ ቀን በኋላ የኤልያስ የሲሳይ በር ተከፈተ ማለት ይቻላል። ከሚጠብቃቸው መኪኖች ውስጥ እሩብ ያህሉ የነዳጅ ታንከራቸው ቁልፍ የለውም፡፡ በቀን ከሃምሳ መኪኖች ከአንድ ሊትር እስከ አምስት ሊትር መቅዳት ጀመረ፡፡ ከግብረ አበሮቹ ጋር ከህንጻው እያወጣም አንዱን ሊትር በሃያ ብር ይቸበቸብ ያዘ፡፡ ይሄም በጣም አስደሳችና የማይነጥፍ የገቢ ምንጭ ሆነለት፡፡ ለስድስት ወራት ያህል ሁኔታው ሳይቋረጥ ቀጠለ፡፡ ልክ የዛሬ ወር ያልተጠበቀ ነገር ተፈጠረ፡፡ የገቢ ምንጩ ድንገት ተቋረጠ፡፡ ነገሩ እንዲያው ዝም ብሎ አልነበረም የቆመው፡፡ የሱ ያልነበረው ነገር ከሱ ሲሄድ፤ የሱ የነበረውንም ይዞበት ጭምር ነው የሄደው፡፡
አንድ ቀን እንደለመደው አንዱን መኪና ከፍቶ ጎማውን ወደ ታንከሩ ካስገባ በኋላ ነዳጁን ሲመጥ፣ አፉና ፊቱ ላይ ተደፋ፡፡ ያኔ ፊቱ በእሳት ተጠበሰ፡፡ የላይኛው ከንፈሩ፣ አፍንጫውና አገጩ እንዳልነበሩ ሆኑ፡፡ መልከ መልካሙ ኤልያስ፤ ሌላ አሰቃቂ ፍጡር መሰለ፡፡
ቀን ላይ ባለመኪናው አንድ ጀሪካን ነዳጅ ይዞ ወደ አንድ የሕንጻ መሳርያ ጎራ ብሎ ነበር፡፡ የገዛውን ገዝቶ ሲወጣ፣ አጠገቡ የሱ አይነት ቢጫ ጀሪካን ሰልፈሪክ አሲድ የያዘ የሌላ ገበያተኛ ጀሪካን መሬት ላይ ተቀምጧል፡፡ ባለመኪናው ሂሳብ ሲከፍል ሌላው ገበያተኛ፣ የባለመኪናውን ነዳጅ የያዘ ጀሪካን የራሱ መስሎት ይዞት እብስ አለ፡፡ ባለመኪናው ከፍሎ ሲጨርስ፣ አሲድ የያዘውን የሱ ያልሆነ ጀሪካን ይዞ ከሱቁ ወጣ፡፡ መኪናውን ምድር ቤት ሕንጻው ጋ አቁሞ፣ ወደ ቤቱ ከመሄዱ በፊት በጀሪካን የነበረውን አሲድ ወደ መኪናው የነዳጅ ታንከር ገለበጠው፡፡ እንግዲህ ያንን አሲድ ነበር ኤልያስ የተጋተው፡፡
***
ሆስፒታሉ ውስጥ ተራውን ሲጠብቅ የነበረው ኤልያስ፤ ስሙ ተጠራና የቦርዱ ሊቀ መንበር ወዳለበት ዘጠኝ ቁጥር ቢሮ አመራ:: ፊቱ በስካርቭ ቢሸፈንም ጉዳቱ ክፉኛ ስለነበር፤ ሊደብቀው አልቻለም፡፡ ሰው ሁሉ አፍጦ ያየዋል፡። ወደ ቢሮው ገባና ወንበር ላይ ተቀመጠ፡፡
ጉረኛው የሆስፒታሉ የቦርድ ሊቀ መንበር ገና እንዳየው ነበር የጠላው፡፡ ሃይሉንና ስልጣኑን እሱ ላይ ለማሳየት ቆርጦ የተነሳ ይመስላል፡፡ ነገሩ ሥራው፤ እንደ ትልቅ ሆስፒታል ስራ አስኪያጅ ያደርገዋል፡፡ ግን ይህ ሆስፒታል ከሌሎች በምን ይበልጣል? በምንም፡፡ የፕላስቲክ ሰርጀሪ ህክምና ስላለው ብቻ እንጂ ሌላ ምን አለው? ምንም!
‹‹ጉዳቱ ከባድ ስለሆነ ሕክምናው ቀላል አይደለም›› አለ ጉረኛው የቦርድ ሊቀ መንበር፤ መነጽሩን ወደ ላይ ገፋ እያደረገ፡፡ ‹‹ባደረግነው ምርመራ ብዙ ድካምና ጥበብ የሚጠይቅ ሕክምና የሚያስፈልገው እንደሆነ ደርሰንበታል። ስለዚህ ሕክምናው የሚጠይቀው ወጪ ይህን ያህል ነው” አለና፤ ትልቅ አሃዝ የተጻፈበት ወረቀት ሰጠው - እየተጀነነ፡፡ ኤልያስ ወረቀቱን ተቀብሎ በግርምት አትኩሮ ተመለከተው፡፡ ሊቀ መንበሩ የባንክ ደብተሩን አልተመለከተም፡፡ ታዲያ እንዴት ይህንን ቁጥር ሊጽፍ ቻለ? አንድ ሚሊዮን ሁለት መቶ ሃምሳ ስድስት ሺህ ብር ከሃያ አምስት ሳንቲም፡፡ ኤልያስን ወደ ተፈጥሮ መልኩ ለመመለስ የተጠየቀው ገንዘብ የባንክ ደብተሩ ላይ የሰፈረው ነው - እቅጯን!       


            ከዕለታት አንድ ቀን የሰፈር ባለቅኔዎችና ገጣሚያን አንድ ድግስ ላይ ተገናኙ፡፡ ቀጥለው ሙግት ገጠሙ፡፡
የመጀመሪያው ገጣሚ፡-
‹‹እባክሽ እናቴ ራቤን ተቆጭው
አንቺን ይፈራሻል አንጉተሽ ስትሰጪው››
ሁለተኛው ገጣሚ፡-
የትልቅነት ማቆሚያው እምን ድረስ ነው?
ሦስተኛው መለሰ፡-
የእኛ ልብ የፈቀደው ድረስ ነው
አራተኛው፡-
ተነሳ ወንድሜ መንገድ እንጀምር
እኔም ቅሌን ይዤ አንተም አገልግል
የመጀመሪያው ተበለጥኩኝ በሚል ስሜታዊ ትኩሳት፡-
አስቤ ጨረስኩት የፈረሴን ጉልበት
አንድ ቀን ደስ ብሎኝ ሳልቀመጥበት  
…ሲል ግጥም አዋጣ፡፡
ተወዳጅ የሆነው ግጥም ግን ሶስተኛው ሆነ፡፡
***
ተስፋችን ወደ ላይ እንጂ ቁልቁል ለማሽቆልቆል ከቶም አይገባውም፡፡ ምነው ቢሉ ኋላ ቀና ማለት እንዳይቸግረን ነው፡፡ አንዴ ያጣነውን እድል መልሰን እንዳናጣው፣ በጥንቃቄ መጓዝ ያለብን ያለ ጥርጥር አሁን ነው፡፡ በጭራሽ ታላቅ ነን እያልን ስንኩራራ፡-
‹‹ኩራትና ትዕቢት የሞሉት አናት
ሰይፍና ጎራዴ የመቱት አንገት
አይገላገሉም እንዲህ በቀላሉ
እመሬት ላይ ወድቀው ሳይንከባለሉ››
የትውልድን ተስፋና ምኞት ቀርፀንና አሳምረን፣ መማር ላለበት ተረካቢ ትውልድ በወግ በማዕረጉ ተገቢውን ርክክብ ለማድረግ ጥኑ ጥረት ይጠይቃል፡፡ ተረካቢው ትውልድ፤ በከባድ መራሄ - ግብር ውስጥ ለመጓዝ፣ የሕብረተሰባችንን ተቋማዊ መዋቅር፣ ተገቢውን አስተውሎት ለመቸር፣ ብርቱ ጥረት መፍጠርና መታገል መጀመር ይኖርባቸዋል፡፡
አካሄዳችንን ወደ ተቋማዊ መልክ ማፅዳት ያሻናል። ተቋማዊ ዕድገት ጥናት ይፈልጋል። ጥናቱ ደግሞ አጥኚ ይሻል፡፡
‹‹ሳይማር ያስተማረንን ሕዝብ›› ተገቢውን ምስጋና እናደርግለት ዘንድ አንድም የእኛን ቅንነት ይጠይቃል፣ አንድም ቀናነታችንን ከልቡ የሚያዳምጠን ቀና ጆሮ ያስፈልጋል፡፡ በሦስተኛ ደረጃ፤ ሥራዬ ብለው በአንድን ሕብረተሰብ ንቃተ ህሊና ለማበልፀግ ጥረት በማድረግ የሚታትሩ የተባ አዕምሮ ባለቤት ለመሆን የሚጓዝ ሞቅ ያለ ሀሳብ፣ በሳል የሆነ ንባብ፣ ውይይትና ሬኮርድ ወደ ማባዛት የመሄድ ጤናማ መንገድ ላይ ያሉ አሉ፡፡
‹‹ሳይማር ያስተማረንን ሕዝብ›› የሚለው አባባል፣ አንድ ሰሞን የፋሽን ያህል የሚጠቀስበት ዘመን ነበር፡፡ ዛሬም ከልብ ካሰብንበት ‹‹ሳይማር ያስተማረንን ሕዝብ›› ማስታወስ ጥንካሬን፣ ልባዊነትን፣ የበሰለ ትምህርትን፣ ብርቱ ንቃተ ህሊና ይጠይቃል፡፡
በገጣሚና ፀሐፌ ተውኔት መንግሥቱ ለማ ‹‹የባለ ካባና ባለዳባ መስመሮች እንደምድም፡-
‹‹ቀማኛን መቀማት ከሌባ መስረቅ
ለማቅለል ከሆነ የድሆችን ጭንቅ
በኔ ቤት ፅድቅ ነው አንድ ሰው ይሙት
አንድ መቶ ሺ ሰው ሲኖር በምፅዋት
በምናውቀው ስንሰቃይ የማናውቀውንም ፈርተን
በህሊናችን ማቅማማት ወኔያችንንም ተሰልበን
የነጋ ጠባ ሕይወት የመንቀሳወስ አቅሙ
የሕሊናችን ትርጉሙ የአዕምሮ ሚዛን ህልሙ
እያደር ከህሊናችን ይደመሰሳል ትርጉሙ››     

Page 5 of 461