Administrator

Administrator

የወቅቱ የአለማችን ቁጥር አንድ ባለጸጋ የሆኑት አሜሪካዊው ቢሊየነር ጄፍ ቤዞስ በአመቱ ከፍተኛ ገንዘብ ለበጎ አድራጎት ተግባራት በመለገስ በአለማችን በአንደኛ ደረጃ ላይ መቀመጣቸው ተዘግቧል፡፡
የአማዞን ኩባንያ መስራቹ ጄፍ ቤዞስ ባለፈው የፈረንጆች አመት 2018 ብቻ ከባለቤታቸው ጋር ባቋቋሙት ቤዞስ ዴይ ዋን ፈንድ በተባለው ድርጅት በኩል ለተለያዩ የበጎ አድራጎት ስራዎች 2 ቢሊዮን ዶላር መለገሳቸውንና በክሮኒክል ኦፍ ፌላንትሮፒ ተቋም የአመቱ ምርጥ 50 ለጋሾች ዝርዝር ውስጥ በቀዳሚነት መቀመጣቸው ተነግሯል፡፡
ለኪነጥበብ፣ ትምህርት፣ ጤናና ሌሎች ዘርፎች 767 ሚሊዮን ዶላር የለገሱትና በሚዲያና መዝናኛው መስክ ስኬታማ ለመሆን የቻሉት ማይክል ብሉምበርግ፣ በአመቱ ምርጥ 50 ለጋሾች ዝርዝር ውስጥ የሁለተኛነት ደረጃን የያዙ ሲሆን፣ የኢቤይ ኩባንያ መስራቾቹ ጥንዶቹ ፔሪ እና ፓም ኦሚዲያር 392 ሚሊዮን ዶላር በመለገስ በሶስተኛነት ደረጃ ላይ ተቀምጠዋል፡፡
በምርጥ ለጋሾች ዝርዝር ውስጥ ከተካተቱት ሌሎች ታዋቂ ሰዎች መካከል 213.56 ሚሊዮን ዶላር በመለገስ በሰባተኛ ደረጃ ላይ የተቀመጡት የፌስቡኩ መስራች ማርክ ዙከርበርግና ባለቤቱ ፕሪሲሊካ ቻን ይገኙበታል፡፡




ትራምፕንና ኪም ጆንግ ኡንን በመምሰል ያታለሉም ተይዘዋል

ከአነጋገርና አካሄዱ እስከ አለባበሱ መላ ሁኔታውን በመቀየር ራሱን ልክ እንደ ኬንያው ፕሬዚዳንት ኡሁሩ ኬንያታ በማስመሰል፣ ከአንድ ባለሃብት 100 ሺህ ዶላር ያጭበረበረው ጄሴፍ ዋሳዋ የተባለ ኬንያዊ፣ ከሰባት ግብረ አበሮቹ ጋር ተይዞ ክስ እንደተመሰረተበት ተነግሯል፡፡
አጭበርባሪው ጆሴፍ ዋሳዋ ከግብረ አበሮቹ ጋር በመተባበር ራሱን ልክ እንደ ፕሬዚዳንቱ በማስመሰል በናይጀሪያ ስመ ጥር ለሆነ አንድ የመኪና ጎማ ኩባንያ ባለቤት በመደወል፣ መሬት ልሽጥልዎት የሚል ጥያቄ ማቅረቡን የጠቆመው ዘገባው፣ ድርድሩ በስልክ መጨረሱን አመልክቷል፡፡ የኩባንያው ባለቤት የደወለላቸው ፕሬዚዳንት ቡሃሪ ስለመሆኑ ቅንጣት ታህል ሳይጠራጠሩ ዋጋ መደራደራቸውንና የፋይናንስ ዳይሬክተራቸው ግዢውን እንዲጨርስና ክፍያውን እንዲፈጽም ማዘዛቸውን፣ ይህን ተከትሎም ሌሎች ተባባሪዎች፣ የፕሬዚዳንቱን የሚመስሉ ልዩ መኪኖችን ተከራይተው፣ ወደ ኩባንያው በመሄድ በተጭበረበረ ሰነድ ገንዘቡን መቀበላቸውን ገልጧል፡፡
በተያያዘ ዜና ደግሞ፣ መላ ነገሩ ቁርጥ የሰሜን ኮርያውን ኪም ጆንግ ኡንን የሚመስለው አውስትራሊያዊው ኮሜዲያን ሆዋርድ ኤክስ እና በሚገርም ሁኔታ ከትራምፕ ጋር የሚመሳሰለው ግብረ አበሩ፣ ባለፈው አርብ በቬትናም መዲና ሃኖኢ፣ ሁለቱን ፕሬዚዳንቶች መስለው፣ ለመገናኛ ብዙሃን መግለጫ ሲሰጡ በቁጥጥር ስር መዋላቸው ተነግሯል፡፡
አጭበርባሪዎቹ ፕሬዚዳንቶች ትክክለኛዎቹ ኪምና ትራምፕ፣ በቬትናም ለመገናኘት የያዙትን ቀጠሮ እንደ መልካም አጋጣሚ በመጠቀም እነሱን መስለው፣ ህዝቡን ለመሸወድ ሲሞክሩ፣ እንደተነቃባቸውና ባለፈው ሰኞ ከአገር መባረራቸውን ሮይተርስ ዘግቧል፡፡




ባልተለመደ ሁኔታ እጅግና ከፍተኛ ሃይል ያለው ግዙፍ ባትሪ የተገጠመለትና ለ2 ተከታታይ ሰዓት ያህል ያለ ማቋረጥ ቪዲዮ ማጫወት የሚችል አዲስ ሞባይል ለእይታ መብቃቱ ተነግሯል፡፡ከሰሞኑ በባርሴሎና በተጀመረው አለማቀፍ የሞባይል አውደርዕይ ላይ ለእይታ የበቃውና በፈረንሳዩ የስልክ አምራች ኩባንያ አቬኒር ቴሌኮም የተመረተው ይህ የሞባይል ስልክ ፣ ከጎኑ ትልቅ ባትሪ የሚገጠምለትና 18 ሚሊሜትር ውፍረት ያለው ነው።
ፒ18ኬ ፖፕ የተባለው ይህ ሞባይል ስልክ የሚጠቀመው ባትሪ በግዝፈቱና በሃይሉ በአለማችን አቻ የሌለውና በአጭር ጊዜ ውስጥ ሙሉ ለሙሉ ቻርጅ መደረግ የሚችል ሲሆን፣ የሞባይል ስልኩ ለረጅም ሰዓታት ከማገልገሉ ውጭ ከሌሎች ስማርት ስልኮች የተለየ ነገር እንደሌለው ተነግሯል፡፡




ታዋቂው ብሉምበርግ መጽሄት የ2019 የአለማችን አገራት የጤናማነት ደረጃን ዝርዝር ከሰሞኑ ይፋ ያደረገ ሲሆን፣ ስፔን የአንደኛነቱን ደረጃ ከጣሊያን በመረከብ በቀዳሚነት መቀመጧ ታውቋል፡፡
በአለማችን 169 አገራት ውስጥ ለአጠቃላይ የዜጎች ጤናማነት መሰረት የሆኑ ጉዳዮችን ይዞታ በመገምገም የአገራቱን የጤናማነት ደረጃ ይፋ ያደረገው ብሉምበርግ፣ ጣሊያንን በሁለተኛነት አይስላንድን በሶስተኛነት ደረጃ ላይ አስቀምጧቸዋል። ጃፓን አራተኛ፣ ስዊዘርላንድ አምስተኛ፣ ስዊድን ስድስተኛ፣ አውስትራሊያ ሰባተኛ፣ ሲንጋፖር ስምንተኛ፣ ኖርዌይ ዘጠነኛ፣ እስራኤል አስረኛ ደረጃ ላይ ተቀምጠዋል፡፡
እጅግ አነስተኛ የጤናማነት ደረጃ ያላቸው ተብለው ከተዘረዘሩት 30 አገራት መካከል 27ቱ በአፍሪካና በመካከለኛው ምስራቅ ውስጥ እንደሚገኙ የጠቆመው ብሉምበርግ፣ የአገራቱን የጤናማነት ይዞታ ከገመገመባቸው መስፈርቶች መካከል የጤና አገልግሎቶች መስፋፋትና ጥራት፣ የንጹህ ውሃ አቅርቦት፣ ንጽህና፣ አማካይ እድሜ፣ የሲጋራና የአደንዛዥ ዕጾች ተጠቃሚነት፣ ከፍተኛ የሰውነት ክብደት ይገኙበታል፡፡

ከዕለታት አንድ ቀን አንድ ንጉሥ ሶስት ወንጀለኞች ላይ ሞት ፈረዱ፡፡ ከተፈረደባቸው አንዱ፤
“ንጉሥ ሆይ! አንድ ዕድል ቢሰጡኝ ፈረስዎትን ቋንቋ አስተምሬው እሞት ነበር፡፡” አላቸው፡፡
“በምን ያህል ጊዜ ልታስተምርልኝ ትችላለህ?”
“በአንድ ዓመት ጊዜ ውስጥ” ሲል መለሰ፡፡
“ጥሩ፣ አንድ ዓመት እሰጥሃለሁ”
“እኔም በአንድ ዓመት ተዓምር አሳይዎታለሁ!” አላቸው፡፡
አብሮት የታሰረው ሰው፤
“እንዲህ ያለ ቃል ለምን ገባህ? ለምንስ ይጠቅምሃል? በትክክል ምክንያታዊስ ነህ ወይ?”
“አዎን”
“እንዴት?”
“ምክንያቱ ምን መሰለህ?”
አየህ 1ኛ ወይ ንጉሡ ይሞታሉ
     2ኛ ወይ እኛ ማምለጫ እናገኛለን
     3ኛ ወይ ፈረሱ ይማራል
ማን ያውቃል?”
“ለካ ይሄ ሁሉ ዕድል አለ”?!
*   *   *
ብዙ ዕድል እያለን የማንጠቀም እኛ ኢትዮጵያውያን ብቻ ነን፡፡ ምክንያቱን በአጭሩ መንቆጥ ይቻላል፡፡
አንሄድም፣ አንንቀሳቀስም!
ከሄድንበት አንማርም!
የተማርነውን አናሻሽልም!
የተሻሻልነውን ለማንም አናካፍልም! አናስተላልፍም፡፡ መቼም እንዴትም እኒህን ነጥቦች ውል እንደምናስይዛቸው አይታወቅም፡፡ ከጥንቱ ከጠዋቱ የተማሪዎች እንቅስቃሴ ጀምሮ ጥያቄዎች አሉን፡-
“መቼ ነው ዲሞክራሲ ኢትዮጵያ የሚገባው?”
“መቼ ነው ፍትህ የሚሰፍነው?”
“መቼ ነው ነገን የምናምነው?”
ሳይመለሱ የቆዩ ጥያቄዎቻችን ዕጣ ፈንታቸው ምንድን ነው? የት ይደርሳሉ? ዛሬስ ምን ያህል ዕድሜ አላቸው?
መሪዎቻችን ህዝባቸውን አያስቡም፡፡ ህዝቦች መሪዎቻቸውን ያለምክንያት ይጠምዷቸዋል፡፡ ጊዜ አይሰጡም፡፡ ቦታ አይሰጡም፡፡ ተስፋ አይሰጡም፡፡ ሀሳባቸውን አይገልጡም! ሀሳባቸውን አያገናኙም!
አንድ አሳቢ፤
“The whole theory of development is knowing what change is all about” የዕድገት ምስጢሩ ለውጥ ምንድን ነው ማለት ላይ ነው እንደማለት ነው፡፡
ገጣሚና ፀሐፌ ተውኔት መንግሥቱ ለማ፣ “በባለካባና ባለዳባ” ቴያትር፣
“አንድ ዓለም ተሰጠ ለአዳም ለሄዋን
ለሁለቱ፣ ተረቱ፣ እንደሚነግረን
ምንስ ልጆቻቸው ቢረቡስ ቢራቡ
ጥቂቶቹ ጠግበው ብዙዎች ይራቡ?
ጥቂቶች ሲያምራቸው ያንሱ ጦርነት
ብዙዎችም ይሂዱ ለመሞት ለእልቂት፣”
የአገራችን ዕውነት ይሄው ነው! ጥቂቶች ይኖራሉ፤ ብዙዎች ይሞታሉ! ማንም ምንም ሳይጠይቅ መንገዳችንን እንቀጥላለን፡፡ የሞኞቹን አገር ምሳሌ ሆነን መጓዛችን መሆኑ ነው!
“ሞኙን ላኩትና ሞኞች ሞኞች አገር
ሞኙም አልጠየቃት
ሞኟም አትናገር!”  
የሚለው ተረት የሚመለከተን እዚህ ጋ ነው፡፡ እንጠይቅ! እንጠይቅ! እንጠይቅ!

“የምከተለው የኢኮኖሚ ሞዴል
ካፒታሊዝም ነው” ጠ/ሚ ዶ/ር ዐቢይ አህመድ

የቴሌ ኮሚኒኬሽን 49 በመቶ ድርሻ ወደ ግል ለማዘዋወር አስፈላጊ ዝግጅቶች መጠናቀቃቸውንና በዚህ ዓመት መጨረሻ የከፊል ሽያጩ እንደሚከናወን ጠ/ሚኒስትር ዶ/ር ዐቢይ አህመድ ማስታወቃቸውን ጠቅሶ ፋይናንሻል ታይምስ ዘግቧል፡፡
በሳምንቱ አጋማሽ ከፋይናንሻል ታይምስ ጋዜጣ ጋር ቃለ ምልልስ ያደረጉት ጠቅላይ ሚኒስትር ዶ/ር ዐቢይ አህመድ የሚከተሉት የኢኮኖሚ ሞዴል ካፒታሊዝም መሆኑን አስታውቀው በዚህም ባለፉት 28 ዓመታት በመንግስት ቁጥጥር ስር ቆዩ ግዙፍ ተቋማትን ወደ ግል ማዘዋወር ኢኮኖሚውን ለማነቃቃት የሚወስዱት የመጀመሪያ እርምጃ መሆኑን አስታውቀዋል፡፡
በሚከተሉት የካፒታሊዝም የኢኮኖሚ ሞዴል እና ተቋማትን ወደ ግል የማዘዋወር ፖሊሲ ከራሳቸው ፓርቲ (ኢህአዴግ) ከፍተኛ ተቃውሞ ገጥሟቸው እንደነበር የጠቀሰው ፋይናንሻል ታይምስ ጠ/ሚኒስትሩ በውሳኔያቸው ገፍተውበት ኢትዮ ቴሌኮምን በከፊል ወደ ግል ለማዘዋወር ዝግጅቶችን ማጠናቀቃቸውን አስታውቋል፡፡
መንግስት የኢትዮ ቴሌኮምን 49 በመቶ ድርሻ ወደ ግል እንደሚያዘዋውር ቀሪውን 51 በመቶ በራሱ እያስተዳደረ እንደሚቀጥል ጠ/ሚኒስትሩ ከፋይናንሻል ታይምስ ጋር በነበራቸው ቆይታ አስረድተዋል፡፡
ኢትዮ ቴሌኮም በአሁኑ ወቅት በአጠቃላይ 60 ሚሊዮን ደንበኞች ያሉት ግዙፍ የቴሌኮም ኩባንያ ሲሆን ይህ አመት ከመጠናቀቁ በፊት በከፊል ወደ ግል ይዘዋወራል ተብሏል፡፡
ወደ ግል መዘዋወሩም ለሃገሪቱ በቢሊዮን ዶላር ገቢ እንደሚያስገኝም ጠ/ሚኒስትሩ በቃለ ምልልሳቸው ያስገነዘቡ ሲሆን የአገልግሎት ቅልጥፍና እና ተወዳዳሪነትም ይጨምራል ደንበኞች ጥራት ያለው አገልግሎት ለማግኘት ያስችላቸዋል ተብሏል፡፡   




በጅቡቲ የሚገኙ ስደተኞች ወደ ሃገር ቤት እየተመለሱ ነው


ሳውዲ አረቢያ እና ፑንት ላንድ ከሰሞኑ 1 ሺህ ያህል ኢትዮጵያውያን ስደተኞችን በግዳጅ ወደ ሃገር ቤት የመለሱ ሲሆን በጅቡቲ የሚኙ ኢትዮጵያውያን ስደተኞችም በገዛ ፈቃዳቸው በብዛት ወደ ሃገር ቤት እየተመለሱ መሆኑን የአለማቀፉ የስደተኞች ተቋም ሪፖርት አመልክቷል፡፡
በተለይ ባለፈው ጥር 21 ቀን 2011 ዓ.ም ከ50 በላይ ኢትዮጵያውያን ከጅቡቲ ወደ የመን የባህር ጉዞ ላይ እያሉ በጀልባ መገልበጥ ህይወታቸው ማለፉን ተከትሎ በጅቡቲ የተለያዩ ህገ ወጥ የስደተኞች ማከማቻ ውስጥ የሚገኙና ተራቸውን የሚጠባበቁ ከ3 ሺህ በላይ ኢትዮጵያውያን ወደ ሃገር ቤት ለመመለስ ለአይኦኤም የእርዳታ ጥሪ ማቅረባቸው ታውቋል፡፡
ጅቡቲ ኢትዮጵያውያን ስደተኞች ለቀጣይ የባህር ላይ ጉዞ የሚዘጋጁባት ዋነኛ ቦታ መሆንዋን የጠቆመው የአለማቀፉ የስደተኞች ተቋም ሪፖርት የስደተኞች ስቃይ የሚጀምረው በዚህችው ሃገር ነው ብሏል፡፡
በጥር ያጋጠመውን የጀልባ አደጋ ሳይጨምር በ5 ዓታት ውስጥም ሁለት በመቶ ያህል ዜጎች በጅቡቲው ኦቦክ የባህር ዳርቻ ከጀልባ ተወርውረው የባህር ሲሳይ መሆናቸውን ሪፖርቱ አትቷል፡፡
እድሜያቸው ከ20 ዓመት በታች የሆኑ ታዳሚ ወጣቶች እያንዳንዳቸው እስከ 15 ሺህ ብር ለደላላ በመክፈል ወደ ጅቡቲ እንደሚያቀኑ ያተተው ሪፖርቱ የጥሩ የጀልባ አደጋን ተከትሎ ከ3 ሺህ በላይ ስደተኞች ወደ ሃገራቸው ለመመለስ ፍላጎት እንዳላቸው የገለፁ ሲሆን እስካሁን 1,327 ያሉ በአይኦኤም እርዳታ ተመልሰዋል ብሏል፡፡
በሌላ በኩል ጎረቤት ፑንትላንድ 415 እንዲሁም ሳውዲ አረቢያ 6 መቶ ያህል ህገ ወጥ ያሏቸውን ኢትዮጵያውያን ከሰሞኑ በኃይል ወደ ሃገር ቤት መመለሳቸው ታውቋል፡፡
ከሶማሊያ ተገንጥላ ራስ ገዝ ግዛትነቷን ያወጀችው ፑንትላንድ ሰሞኑን ጠርዛ ወደ ሃገር ቤት ከመለሰቻቸው ኢትዮጵያውያን በተጨማሪ 517 ኢትዮጵያውያን በቁጥጥር ስር ማዋሏንና ከሰሞኑ ወደ ሃገራቸው እንደምትመልስ አስታውቃለች፡፡
አለማቀፉ የስደተኞች ተቋም (አይኦኤም) በአሁኑ ወቅት ኢትዮጵያውያን ስደተኞን ወደ ሃገር ቤት በመመለስ ስራ መወጠሩን አስታውቋል፡፡

ረዘም ላለ ጊዜ መቀመጥ በዕድሜ የገፉ ሴቶችን ለልብ ህመም ሊያጋልጥ እንደሚችል በዩኒቨርሲቲ ኦፍ ካሊፎርኒያ የተሰራ አንድ ጥናት ማመልከቱን ፎርብስ መጽሄት ዘግቧል፡፡ የዩኒቨርሲቲው ተመራማሪዎች ከ63 እስከ 97 አመት የዕድሜ ክልል ውስጥ በሚገኙ 5 ሺህ ሴቶች ላይ የሰሩትን ጥናት መሰረት አድርገው ባወጡት ሪፖርት፤ ለተራዘመ ጊዜ ቁጭ የሚሉ ሴቶች ለልብ ህመም የመጋለጥ እድላቸው ከፍ ያለ መሆኑን አመልክተዋል፡፡
በአንድ ቀን ውስጥ በመቀመጥ የሚያሳልፉትን ጊዜ በአንድ ሰዓት መቀነስ የቻሉ ሴቶች፣ ለልብ ህመም የመጋለጥ ዕድላቸውን በ26 በመቶ መቀነስ እንደሚችሉም ተመራማሪዎቹ ተናግረዋል፡፡
ለረጅም ጊዜ ያለምንም እረፍት የሚቀመጡ ሴቶች፣ መየመሃሉ ከመቀመጫቸው እየተነሱ ለተመሳሳይ ጊዜ ከሚቀመጡ ሴቶች ጋር ሲነጻጸር ለልብ ህመም የመጋለጥ እድላቸው በ52 በመቶ ከፍ እንደሚል ማረጋገጣቸውንም ተመራማሪዎቹ አስታውቀዋል፡፡
ለተራዘመ ጊዜ መቀመጥ የደም ዝውውርን እንደሚቀንስና በደም ስሮች ግድግዳዎች ላይ የሚገኙ  ህዋሶችን እንደሚጎዳ የጠቆሙት አጥኚዎቹ፣ በአንድ ቀን ውስጥ ለ11 ሰኣታት ያህል የሚቀመጡ ሴቶች፣ የስኳር በሽታንና የደም ግፊትን ጨምሮ ለተለያዩ ህመሞች የመጋለጥ እድላቸው ከፍ ያለ መሆኑንም ገልጸዋል፡፡

    አውሮፓዊቷ አገር ጀርመን የሰው ሃይል ፍላጎቷን በአግባቡ ለማሟላት በመጪዎቹ አራት አስርት አመታት ጊዜ ውስጥ በየአመቱ ቢያንስ 260 ሺህ ያህል ስደተኞች እንደሚያስፈልጋጓት አንድ ጥናት አመልክቷል፡፡
ጀርመን አብዛኛው የህዝቧ በእርጅና ዘመን ምዕራፍ ላይ የሚገኝ ከመሆኑ ጋር ተያይዞ የተፈጠረባት የሰራተኛ የሰው ሃይል እጥረት እየተባባሰ እንደሚገኝ የዘገበው ዘ ኢንዲፔንደንት፤ ይህንን ክፍተት ለመሙላት በየአመቱ ከ260 ሺህ በላይ የሌሎች አገራት ስደተኞችን አስገብታ ወደ ስራ ማሰማራት እንደሚገባት በጥናቱ መገለጹን አስታውቋል፡፡
ጀርመን የሰው ሃይል ፍላጎቷን ለማሟላት በየአመቱ ማስገባት ከሚጠበቅባት ስደተኞች መካከል 146 ሺህ ያህሉ የአውሮፓ ህብረት አባል ያልሆኑ አገራት ዜጎች መሆን እንዳለባቸውም ብሬልስማን ፋውንዴሽን የተባለው ተቋም ያወጣው ጥናት አመልክቷል፡፡ የጀርመን የህዝብ ቁጥር እ.ኤ.አ እስከ 2016 ድረስ ከ30 በመቶ በላይ ይቀንሳል ተብሎ እንደሚገመት የጠቆመው ጥናቱ፣ ይህም የአገሪቱን ኢኮኖሚ አደጋ ላይ የሚጥል በመሆኑ አገሪቱ ስደተኞችን በማስገባት የሰው ሃይል እጥረቷን ማቃለል እንደሚገባትና ለዚህም ምቹ ሁኔታ የሚፈጥር የስደተኞች ፖሊሲ ማሻሻያዎችን ማድረግ እንደሚኖርባት መክሯል፡፡

Wednesday, 27 February 2019 12:53

አሸናፊ ግጥሞች


ባወጣው “የመደመር የግጥም ውድድር” በርካቶች  የተሳተፉ ሲሆን የዩኒቨርሲቲ የግጥም ባለሙያዎችና የሥነጽሁፍ ሃያሲያን ግጥሞቹን ገምግመው ከ1ኛ-3ኛ

የወጡትን ይፋአድርገዋል፡፡ አሸናፊዎቹም በቅርቡ በብሔራዊ ቴአትር በተካሄደ “የመደመር” እና የፍቅር የኪነጥበብ ምሽት ላይ ግጥሞቻቸውን ለታዳሚያን እያነበቡ

ሽልማቶቻቸውን ተቀብለዋል፡፡ 1ኛ የወጣው ላፕቶፕ፣ 2ኛ የወጣው ዘመናዊ ስማርት ፎን፣ 3ኛ የወጣው መለስተኛ ስማርት ፎን ተሸልመዋል፡፡ ባለፈው ሳምንት

3ኛ የወጣውን ያቀረብን ሲሆን ዛሬ ደግሞ 2ኛ የወጣውን እነሆ ብለናል፡፡



ከዋርካው ሥር እንሰብሰብ
ሐገር ፍቅር ደግ’ሣ
ሽርር ጉድ’ስትል በጉጉት የልጆቿን ልብ ልታጠግብ
የሆድ ሳይሆን የሕሊናን
ጠኔ ልትሽር ፣ሰትታትር የመንፈስ ፈውስን ልትመግብ
በአዲሱ ቀን በአዲስ መንፈስ
አዲስ አየር ልንተነፍስ ፣አዲሰ ተሥፋን ልንቀምር
እንሰ’ብሰ’ብ ከዋርካው ሥር!
ከዋርካው ስር እንታደም!
እንዲታ”ጠብ” እንዲነፃ የደም መንገድ በፍቅር ደም፡፡
….
ካየ’ን በዐይነ ልቦና ፣ ካስተዋልን በሕሊና
መጠርመር  እግር የሚጠፍ’ር ለቅን መንገድ ነው ካቴና፡፡
ፍቅርን ፈርቶ፣ብርሐን ሸሽቶ በ”እኔነት ጥግ” ከመጠ’ርነፍ
በነጠላ ከመጠ’ለፍ
ሕብረት ፈርቶ፣ ብርሐን ሸሽቶ በ”እኔነት ጎጥ” ከመኮ”ርመት
ቀና ብሎ በቅንነት፣ የወጣውን “ፀሐይ” ማየት!!

ኑ! ዋርካው ሥር እንሂድ
ድብቅ፣ሽሽግ ጥምረታችን በፍቅር ፊርማ ይውጣ ገሀድ!
በአንድ ልብ እንድንመክር ፣ በአንድ አንደበት እንድንዘምር
ከጠቢባን ከአዛውንት እግር እንሰብሰብ ከዋርካው ሥር፡፡
በቅንነት እንማከር፤በቅንነት እንዋቀስ
በቅንነት እንጋሠጽ ፣ከወል ገድል እንቋደሰ
በወል ታሪክ እንዋደሥ ፤ በወል ፀፀት እንላቀስ!

ፍርሃት እንጂ ፈር ሳናጣ
ስንጨፍን ፀሐይ ስትወጣ
እግር በዝቶን ፤ መንገድ ሞልቶን
ለመራ’መድ ብልሃት ጠፍቶን
ቀን ሳይጎድለን ቅን ሰው ጎድሎ
የወል ራዕይ ፣በግል ቅዠት ተጠቅልሎ
ሕልም እያለ’ን ዒላማ አጥተን
ጥም ሲገድለን፣ ምንጮች መሀል ተጎልትን!
ቁጭት በደል ሸክም ሆኖብን፣ የኋሊዮሽ ሲጎትተን
ቋንቋ ሞልቶን፣ መግባቢያ አጥተን፣ ለወር ጉዞው ዘመን ስንሰርቅ!
እየሄድን ሳንል ፈቀቅ ፣ እየበራን ጎልተን ሳንደምቅ
ከትናንቱ ቁመት ስንደ’ቅ
ማሻ’ገሪያ ብሌን ጠቦን -ከነገ ገፅ ስንደ’በቅ
የተሥፋ አስኳል ያመቀውን ጨንግፈናል እልፍ ዕንቁላል
የከፍታ መውጫችንን ሰባብረናል ሺህ  መሰላል!
ሆኖም የእናት ምርቃቷ እርግማናችንን  ጋርዶ
አንድ አብሣሪ አይነፍገንም፣ ሲጠናብን ጽልመት ፣መርዶ!

እንሰብ’ሰብ ፣ከዋርካው ሥር በጥሞና
በአባቶች ወግ በትህትና ፣ ለመለኞች ከፍተን ጆሮ
ልቦናችን በኪዳን ቃል ተደም’ሮ፣ ፍቅር  በሕብር ተቀም’ሮ
የመጠየ’ቅ ኪን ተክነን
የመጠ’የቅ ቅን ተክነን
ጅራት ሳይሆን አከርካሪ
አእላፍ ኳክብት ሆነን መሪ
እኔነትን በእኛ ማቅለጥ
እኛነትን በእኔ ማስጌጥ ፣ለጋራ ቤት ሆነን ባለ’ጅ
ዋልታ ተክለን ዘመን ’ሚያበጅ፣ ድልድይ ሰርተን ነገር ’ሚበጅ
እንደሥልጡን ሰብዓዊ ግብር ፣ በፍቅር ጸጋ እንድን’ከብር
እንደ ጨቅሎች በንጹህ ልብ፣በሕብረ -ሕዋስ እንድንዘም’ር
ግፍን ገድፈን በምሕረት ፣ከዋርካው ሥር እንደ’መር!

እንደ’መር
ሳናንስ፣ ሳንበልጥ እንቀ’መር
ከማሕፀን፣ ከሃገር ሆድ ዕንሥ
ልጅነትን እንጠንስስ!

እስኪ ይጥናብን የትዕግሥት ኃይል፣እስቲ እንገብ’ር ለይቅርታ
ምሮ በመማ’ማ’ር ጥበብ ፣ የእስራችን ቅኔ ይፈታ!
የወጣልን ፀሐይ ሳይከስም፣በቅንነት ቀን እናክ’ም
የቅያሜን አረም ነቅለን፣ፍቅራችንን እናለምልም!!
እንጋ’መድ እን’ዋደድ፤ እንሽ’መን እንደገና
የ“እኔ” ብለን ምንገባባት ፣ወድቀንላት ምናቆማት የጋራችን ጎጆ ትዕና!
በልብ እምነት ምንሄድበት፣ የሁላችን መንገድ ይቅና!
….
ለማንነት ከጥንት ውል ድር፣በብዝኀነት ጥበብ ሕብር
እንደ’መር ፤ከዋርካው ሥር
ቁጣ፣እልህ ፣ፍርሃት ፣ በቀል
በይቅርታ እንዲቃ’ለል
ትናንትናን መሥዋእት አርገን
አንድነትን ሥንቅ አድርገን፣እንገንባ ታላቅ ነገን
እንሰብሰብ ከዋርካው ሥር
በአንድ እናውጅ ተሥፋ፣ሠላም ፣ብርቱ ፍቅር
በልጅነት በደም-ሥር እስር፣በቁጭት ክንፍ በጋራ እግር
ከከፍታው የብርሃን መስክ፣ ከፍ ብለን እንድንከብር
ከሃገር ድግስ፣ ከፍቅር ዝክር፣እንሰብሰብ ከዋርካው ሥር!
(ሰይፉ ወርቁ)



ባወጣው “የመደመር የግጥም ውድድር” በርካቶች  የተሳተፉ ሲሆን የዩኒቨርሲቲ የግጥም ባለሙያዎችና የሥነጽሁፍ ሃያሲያን ግጥሞቹን ገምግመው ከ1ኛ-3ኛ

የወጡትን ይፋአድርገዋል፡፡ አሸናፊዎቹም በቅርቡ በብሔራዊ ቴአትር በተካሄደ “የመደመር” እና የፍቅር የኪነጥበብ ምሽት ላይ ግጥሞቻቸውን ለታዳሚያን እያነበቡ

ሽልማቶቻቸውን ተቀብለዋል፡፡ 1ኛ የወጣው ላፕቶፕ፣ 2ኛ የወጣው ዘመናዊ ስማርት ፎን፣ 3ኛ የወጣው መለስተኛ ስማርት ፎን ተሸልመዋል፡፡ ባለፈው ሳምንት

3ኛ የወጣውን ያቀረብን ሲሆን ዛሬ ደግሞ 2ኛ የወጣውን እነሆ ብለናል፡፡



ከዋርካው ሥር እንሰብሰብ
ሐገር ፍቅር ደግ’ሣ
ሽርር ጉድ’ስትል በጉጉት የልጆቿን ልብ ልታጠግብ
የሆድ ሳይሆን የሕሊናን
ጠኔ ልትሽር ፣ሰትታትር የመንፈስ ፈውስን ልትመግብ
በአዲሱ ቀን በአዲስ መንፈስ
አዲስ አየር ልንተነፍስ ፣አዲሰ ተሥፋን ልንቀምር
እንሰ’ብሰ’ብ ከዋርካው ሥር!
ከዋርካው ስር እንታደም!
እንዲታ”ጠብ” እንዲነፃ የደም መንገድ በፍቅር ደም፡፡
….
ካየ’ን በዐይነ ልቦና ፣ ካስተዋልን በሕሊና
መጠርመር  እግር የሚጠፍ’ር ለቅን መንገድ ነው ካቴና፡፡
ፍቅርን ፈርቶ፣ብርሐን ሸሽቶ በ”እኔነት ጥግ” ከመጠ’ርነፍ
በነጠላ ከመጠ’ለፍ
ሕብረት ፈርቶ፣ ብርሐን ሸሽቶ በ”እኔነት ጎጥ” ከመኮ”ርመት
ቀና ብሎ በቅንነት፣ የወጣውን “ፀሐይ” ማየት!!

ኑ! ዋርካው ሥር እንሂድ
ድብቅ፣ሽሽግ ጥምረታችን በፍቅር ፊርማ ይውጣ ገሀድ!
በአንድ ልብ እንድንመክር ፣ በአንድ አንደበት እንድንዘምር
ከጠቢባን ከአዛውንት እግር እንሰብሰብ ከዋርካው ሥር፡፡
በቅንነት እንማከር፤በቅንነት እንዋቀስ
በቅንነት እንጋሠጽ ፣ከወል ገድል እንቋደሰ
በወል ታሪክ እንዋደሥ ፤ በወል ፀፀት እንላቀስ!

ፍርሃት እንጂ ፈር ሳናጣ
ስንጨፍን ፀሐይ ስትወጣ
እግር በዝቶን ፤ መንገድ ሞልቶን
ለመራ’መድ ብልሃት ጠፍቶን
ቀን ሳይጎድለን ቅን ሰው ጎድሎ
የወል ራዕይ ፣በግል ቅዠት ተጠቅልሎ
ሕልም እያለ’ን ዒላማ አጥተን
ጥም ሲገድለን፣ ምንጮች መሀል ተጎልትን!
ቁጭት በደል ሸክም ሆኖብን፣ የኋሊዮሽ ሲጎትተን
ቋንቋ ሞልቶን፣ መግባቢያ አጥተን፣ ለወር ጉዞው ዘመን ስንሰርቅ!
እየሄድን ሳንል ፈቀቅ ፣ እየበራን ጎልተን ሳንደምቅ
ከትናንቱ ቁመት ስንደ’ቅ
ማሻ’ገሪያ ብሌን ጠቦን -ከነገ ገፅ ስንደ’በቅ
የተሥፋ አስኳል ያመቀውን ጨንግፈናል እልፍ ዕንቁላል
የከፍታ መውጫችንን ሰባብረናል ሺህ  መሰላል!
ሆኖም የእናት ምርቃቷ እርግማናችንን  ጋርዶ
አንድ አብሣሪ አይነፍገንም፣ ሲጠናብን ጽልመት ፣መርዶ!

እንሰብ’ሰብ ፣ከዋርካው ሥር በጥሞና
በአባቶች ወግ በትህትና ፣ ለመለኞች ከፍተን ጆሮ
ልቦናችን በኪዳን ቃል ተደም’ሮ፣ ፍቅር  በሕብር ተቀም’ሮ
የመጠየ’ቅ ኪን ተክነን
የመጠ’የቅ ቅን ተክነን
ጅራት ሳይሆን አከርካሪ
አእላፍ ኳክብት ሆነን መሪ
እኔነትን በእኛ ማቅለጥ
እኛነትን በእኔ ማስጌጥ ፣ለጋራ ቤት ሆነን ባለ’ጅ
ዋልታ ተክለን ዘመን ’ሚያበጅ፣ ድልድይ ሰርተን ነገር ’ሚበጅ
እንደሥልጡን ሰብዓዊ ግብር ፣ በፍቅር ጸጋ እንድን’ከብር
እንደ ጨቅሎች በንጹህ ልብ፣በሕብረ -ሕዋስ እንድንዘም’ር
ግፍን ገድፈን በምሕረት ፣ከዋርካው ሥር እንደ’መር!

እንደ’መር
ሳናንስ፣ ሳንበልጥ እንቀ’መር
ከማሕፀን፣ ከሃገር ሆድ ዕንሥ
ልጅነትን እንጠንስስ!

እስኪ ይጥናብን የትዕግሥት ኃይል፣እስቲ እንገብ’ር ለይቅርታ
ምሮ በመማ’ማ’ር ጥበብ ፣ የእስራችን ቅኔ ይፈታ!
የወጣልን ፀሐይ ሳይከስም፣በቅንነት ቀን እናክ’ም
የቅያሜን አረም ነቅለን፣ፍቅራችንን እናለምልም!!
እንጋ’መድ እን’ዋደድ፤ እንሽ’መን እንደገና
የ“እኔ” ብለን ምንገባባት ፣ወድቀንላት ምናቆማት የጋራችን ጎጆ ትዕና!
በልብ እምነት ምንሄድበት፣ የሁላችን መንገድ ይቅና!
….
ለማንነት ከጥንት ውል ድር፣በብዝኀነት ጥበብ ሕብር
እንደ’መር ፤ከዋርካው ሥር
ቁጣ፣እልህ ፣ፍርሃት ፣ በቀል
በይቅርታ እንዲቃ’ለል
ትናንትናን መሥዋእት አርገን
አንድነትን ሥንቅ አድርገን፣እንገንባ ታላቅ ነገን
እንሰብሰብ ከዋርካው ሥር
በአንድ እናውጅ ተሥፋ፣ሠላም ፣ብርቱ ፍቅር
በልጅነት በደም-ሥር እስር፣በቁጭት ክንፍ በጋራ እግር
ከከፍታው የብርሃን መስክ፣ ከፍ ብለን እንድንከብር
ከሃገር ድግስ፣ ከፍቅር ዝክር፣እንሰብሰብ ከዋርካው ሥር!
(ሰይፉ ወርቁ)


Page 12 of 430