በአማራ ክልል የገጠር አካባቢዎች ከብት ከሀብት በላይ የሕይወት ምሰሶ እና የማንነት መገለጫ ነው። ይህንን ውድ ሀብት ለማቆየት ከሚከፈሉት መስዋዕትነቶች ሁሉ ግንባር ቀደሙ "ቅራት" የተባለው ጥልቅ ባሕላዊ እሴት ነው። ፀሐይ ስትጠልቅ እና ድቅድቅ ጨለማ ምድርን ሲያለብሳት የሚጀመረው የቅራት ሰዓት፤ ከብቶችን ከሌባ እና ከአውሬ ለመጠበቅ፣ የሰው እና የእንስሳት ማደሪያን በመለየት ጤናን ለመንከባከብ እንዲሁም ማሳውን በተፈጥሮ ማዳበሪያ ለማልማት የሚደረግ የትግል መድረክ ነው።

በዚህ ፈታኝ የሌሊት ሰዓት የቤቱ አባወራ ወይም ደፋር ጎልማሳ ወፍራም ጋቢውን ደርቦ፣ ጦር እና ዱላ ጨብጦ፣ ታማኝ ውሾቹን አስከትሎ ወደ ከብቶች ማደሪያ ጊዜያዊ ጎጆ ያመራል። በቅራት ሌሊት እንቅልፍ የለም፤ ቆፈን የሚያስይዘው ብርድ፣ ካፊያ እና የሚመላለሰው ጅብ የሌሊቱ ቋሚ ፈተናዎች ናቸው። ጠባቂው እሳት አንድዶ ብርዱን ሲታገል፣ በዙሪያው ላለ አዳኝ አካል "አልተኛሁም፣ አለሁ!" ለማለት ኃይለኛ ፉጨቶችን፣ ሽለላዎችን እና ቀረርቶዎችን ያሰማል፤ ከጉያው በሚያወጣት ዋሽንት የልቡን ትርታ ከሌሊቱ ጸጥታ ጋር ያዋህዳል።

ጎህ ሲቀድ እና የንጋት ጮራ ጨለማውን ሲገፍፈው የቅራቱ ሌሊት በድል ይጠናቀቃል። ጠባቂው አርሶ አደር ከብቶቹ በሰላም ማደራቸውን ሲያይ የሌሊቱ ድካም ሁሉ በፈገግታ ይታጠባል፤ በማሳው ላይ የተረፈው የከብቶች ጽዳጅም የነገውን አዝመራ ማማር እያሳየው ልቡ በተስፋ ይሞላል። ቅራት በቀላሉ የሚታይ የግብርና ልማድ ሳይሆን፤ አርሶ አደሩ ለሀብቱ የሚከፍለውን የሕይወት ዋጋ፣ ከተፈጥሮ ጋር የሚያደርገውን ግብ ግብ እና የማይናወጥ ጽናቱን የሚያሳይ ደማቅ የማንነት አሻራ ነው።

AMICO-

የቴሌግራም ቻናልችንን በመቀላቀል የአዲስ አድማስን መረጃ ይከታተሉ…