በኢትዮጵያና አሜሪካ ሙዚቀኞች ጥምረት የሚንቀሳቀሰው ደቦ የሙዚቃ ባንድ፤ የመጀመሪያ  አዲስ አልበሙን ለዓለም ገበያ እንደሚያቀርብ ተገለፀ፡፡ አልበሙ “ደቦ ባንድ” የሚል መጠሪያ የተሰጠው ሲሆን ከሚቀጥለው ማክሰኞ ጀምሮ በሲዲ፤ በኤልፒ እና በተለያዩ የዲጂታል ፎርማቶች ለገበያ እንደሚቀርብ ያመለከተው ኤንፒአር የተባለ ድረገፅ፤ አልበሙ “የፍቅር ወጋገን”፣ “አሻ ገዳዎ” ፤ “ተነሽ ከልቤ ላይ”፤ “ነይ ነይ ወለባ” እና “አካሌ ውቤ” የተባሉት ዕውቅ የአማርኛ ዘፈኖች እንደተካተቱበት ጠቁሟል፡፡  ከኤሌክትሪክ ጊታር አንስቶ ሳስፎን እስከተባለ የትንፋሽ የሙዚቃ መሣሪያ ድረስ የሚጫወቱ ዘጠኝ የመዚቃ ባለሙያዎችንና አንድ ድምፃዊ የያዘው ደቦ ባንድ፤በመላው አሜሪካ ሊሰሙ ከሚገባቸው ምርጥ የኮንሰርት ባንዶች ተርታ የሚሰለፍ ሆኗል፡፡ ዘ ፎኒክስ የተባለ ጋዜጣ ፤ባንዱ ቦስተንን በዓለም አቀፍ መድረክ ለማስጠራት የበቃ አምባሳደር ሲል አወድሶታል፡፡