Print this page
Sunday, 03 March 2019 00:00

የኦዴፓ ክንብንብ ሲወርድ

Written by  በመስከረም አበራ
Rate this item
(1 Vote)



ሃገራችን ኢትዮጵያ ከህወሃት አረመኔያዊ አገዛዝ ለመላቀቅ ባደረገችው የትግል ምጥ፣ “የለማ ቡድን” የተባለ የድንገቴ ልጅ ታቀፈች፡፡ ይህ ቡድን አለ ወይስ የለም የሚለው ራሱ ሲያጠራጥር ነበረ፡፡ መኖሩ ከተረጋገጠ በኋላ ደግሞ ከህወሃት ባርነት ነፃ የመሆን አለመሆኑ ነገር ብዙ ሲያከራክር ቆየ፡፡ ከህወሃት ነፃ መሆኑን ፈጣሪ ጌታውን ራሱን ህወሃትን ከስልጣን ገፍትሮ ጥሎ አሳየ፡፡ በስተመጨረሻው እንደ አውሬ አድርጎት የነበረውን ህወሃትን ገፍትሮ በጣለ ቅፅበት፣ ኦዴፓ የኢትዮጵያን ህዝብም በአደንዛዥ ፍቅር ጣለ፡፡ የፍቅር ብዛት ትንታግ ተቃዋሚውን ገራም ባለሟል፣ አዋቂውን አላዋቂ፣ ተጠራጣሪውን አማኝ አደረገለት፡፡ የወዳጅ ጠላቱ በፍቅር ሰመመን ውስጥ መውደቅ  ኦዴፓ የሚሰራው ሁሉ በመላዕክት ጉባኤ የተወሰነ ቅዱስ ሃሳብ ተደርጎ እንዲወሰድ አደረገ። ብዙው ሰው በፅኑ ፍቅር መመታቱን ያጤነው ኦዴፓ፤ ከአባቱ ኦነግ፣ ከጌታው ህወሃት የወረሰውን ዘረኝነቱን ፈራ ተባ ሳይል ያስኬደው ጀመር፡፡
የመጀመሪያው የኦዴፓ እውነተኛ ማንነት የተገለጠው፣ ስልጣን በያዘ ማግስት፣ ህግ ጠረማምሶ፣ የአዲስ አበባ ምክር ቤት አባል ያልሆነ ሰው የከተማዋ ከንቲባ አድርጎ ሲሾም ነው፡፡ ኦዴፓ የፌደራል ስልጣን ላይ ተስተካክሎ ሳይቀመጥ ገና እንዲህ ያለ ህግ የመጣስ ድፍረት ያሳየው፣ በአዲስ አበባ ላይ የነበረውን አላማ ለማስፈፀም ካለው ጉጉት አንፃር ነው፡፡ አቶ ታከለ ዑማ፣ የአዲስ አበባ ከንቲባ ተደርጎ የተሾመው ሰውየው ከኦሮሞነቱ በተጨማሪ  የሰፈረበት የኦነግ መንፈስ ብርታት ስለተፈለገ ጭምር ነው እንጅ፣ በአዲስ አበባ ካውንስል ውስጥ ኦሮሞ ፈልጎ ማግኘት አስቸግሮ አይደለም፡፡ ከሁሉም በላይ ግራ አጋቢው፣ አዲስ አበባን መምራት ያለበት ኦሮሞ ብቻ ነው የሚለው ህግ ከየት እንደመጣ ነው፡፡
የኦዴፓ ክንብንብ የወረደበት ሌላው አጋጣሚ፣ የ”ኦነግ ሼኔ” አመራሮችን ወደ አዲስ አበባ መግባት ተከትሎ፣ በቡራዩ የተደረገውን አሳዛኝ  ጭፍጨፋ ማዳን ሲችል አለማዳኑ፣ ነገሩ ከተከሰተ በኋላም ገዳዩን በጥብቅ የህግ ክትትል ስር ለማድረግ ወገቤን ማለቱ ነው፡፡ ይህ ሳያንስ የአዲስ አበባ ወጣቶችን ለቃቅሞ፣ ከሃገር ዳር አውጥቶ፣ ሁለትም ወር ሙሉ በበረሃ እስር ቤት ማጎሩ ነው፡፡ በበኩሌ፤ የኦዴፓ ነገር የበቃኝ የዚህ ጊዜ ነው፡፡ ኦዴፓ መራሹ መንግስት፤ ያንን ሁሉ የአዲስ አበባ ወጣት ያለ ምክንያት ሲያስር፣ ለመታሰራቸው በቂ ምክንያት ያላቸውን የቡራዩ ነፍሰ-ገዳዮች በብር ዋስ እየፈታ ነበር፡፡ በዚህ ላይ የአዲስ አበባ ልጆች መታሰራቸው ትክክል እንደሆነ ጠቅላይ ሚኒስትሩን ጨምሮ፣ የኦዴፓ ዋና ዋና ባለስልጣናት እየተፈራረቁ ያስረዱን ነበር፡፡ የአዲስ አበባ ወጣቶች እስር ደግሞ ማንን ለማስደሰት እንደሆነ ግልፅ ነበር፡፡ ከዚህ በኋላ ኦዴፓ ከህወሃት ባላነሰ ስልጣንና ዘረኝነት የሚያመጡትን ብልግና የመድገም “ብቃት” እንዳለው መገመት ከባድ አልነበረም፡፡ አሁን እያደረገ ያለውም ይሄንኑ ነው፡፡
በሶስተኝነት የማስቀምጠው፣ በግሌ ኦዴፓን የመረመርኩበት አጋጣሚ፣ የሃገር መከላከያ ሰራዊት አባላት፣ ቤተ-መንግስት መግባታቸውን ተከትሎ፣ ጠቅላይ ሚኒስትሩ በፓርላማ የተናገሩት ንግግር ነው። ጠ/ሚ ዐቢይ በፓርላማ ተገኝተው፤ “የወታደሮቹን ቤተ-መንግስት ሰተት ብሎ መግባት እንደ ቀላል ነገር በቴሌቪዥን ያወራሁት፣ በአዲስ አበባ ዙሪያ ያሉ ኦሮሞዎች፣ መንግስታችን ወደቀ ብለው በፈረስ እንዳይደርሱ ፈርቼ ነው” ብለዋል። ፍቅር አይኑን ላልሸበበው ሰው፣ ይህ ንግግር ብዙ ትርጉም አለው፡፡ ከሁሉም በላይ ግን ዐብይ “የሁሉም ኢትዮጵያዊ ጠቅላይ ሚኒስትር ነኝ” ሲሉ የባጁትን ንግግር ልባዊነት ጥያቄ ውስጥ ይከታል፡፡ ዐቢይ ቦምብ ሲወረወርባቸው በእጁ የተከላከለላቸው የአዲስ አበባ ህዝብ ቢሆንም፣ ለእርሳቸው የክፉ ቀን ደራሽ፣ የዙፋናቸው ደጀን ሆኖ የሚታያቸው የሆለታና የሱሉልታ ፈረሰኛ ኦሮሞ ነው፡፡ ከዚህ መረዳት የሚቻለው የዘር ፖለቲከኛ፣ የአንገትና የአንጀት ወዳጅ እንዳለው ነው፡፡ የዘር ፖለቲከኛ፤ ከዘሩ ህዝብ ጋር እኩል ያየኛል፣ የእኩልነት ፖለቲካ ያመጣልኛል ብሎ መድከምም፣ ለቂልነት የሚዋሰን ነገር ነው፡፡
አራተኛውና ዋናው ክንብን አውራጅ ስራ የተሰራው፣ ህግንና ደምብን ባልተከተለ መንገድ፣ ከኦሮሚያ ክልል ለመጡ ሰዎች፣ የአዲስ አበባ ነዋሪነት መታወቂያ በገፍ መታደል ሲጀምር ነው፡፡ ነገሩን በጣም አሳፋሪ የሚያደርገው ነገር ደግሞ መታወቂያው የተሰጠው ከንቲባው በገዛ አንደበታቸው “በአዲስ አበባ ማንኛውንም አይነት መታወቂያ መስጠት አቁመናል” እያሉ በሚያወሩበት ጊዜ መሆኑ ነው፡፡ ከዚህ የባሰው አስገማች ነገር ደግሞ ይህን የእብሪትና ማንአለብኝነት ህገወጥ አሰራር ያጋለጠችን፣ ወ/ሮ ሰናይት የተባለች የእውነት ሴት ከስራ ማባረሩ ነው፡፡ ከስራ መባረሯ ተሰምቶ በህዝብ ዘንድ ጉም ጉም ሲያስነሳ፣ ሴትዮዋን ወደ ስራዋ ለመመለስ ተብሎ የተፃፈው ደብዳቤ አስተዛዛቢ ነው፡፡ የደብዳቤው ይዘት ኦዴፓ በህወሃት ቤት በአሽከርነት ሲያድግ፣ እንዴት ጌታውን መስሎ እንዳደገ አመላካች ነው፡፡ የህወሃትን መልክ ጠልቶ ቢቸግረው ኦዴፓን ያመነው ህዝብ ደግሞ፣ በማንም ውስጥ መልሶ የህወሃትን መልክ የማየት ፍላጎትም ትዕግስትም የለውም፡፡ ይህን አለመረዳት የውርደት ሞት ይገድላል!
ቀድሞ ከተገለፁት በልጦ በኦዴፓ እውነተኛ ማንነት ላይ ግልፅ ምስክር የሆነው፣ የለገጣፎ ቤት የማፍረስ ክስተት ነው፡፡ ይህ በምላስ ሊጋርዱት የማይችሉት ያፈጠጠ ገበና ነው፡፡ የለገጣፎው ነገር ኢህአዴግን የመሰለ ዘረኛ ድርጅት፣ ዙፋን ላይ አስቀምጦ፣ ስለ ሰብዓዊ መብት ማውራት፣ ለቅሶ ቤት እንደ መዝፈን ያለ ዕብደት እንደሆነ ያስመሰከረ ሃቅ ነው፡፡ የለገጣፎው ቤት የማፍረስ ዘመቻ ኢ-ሰብአዊነት ብዙ የተባለለት ስለሆነ፣ ወደዛ መግባቱ ላያስፈልገኝ ይችላል፡፡ ይልቅስ ጉዳዩን አስመልክቶ፣ የኦዴፓ አመራሮች የሚናገሯቸውን ንግግሮች ተንተርሰን፣ የፓርቲውን ማንነት ወደ መመርመሩ ማለፉ የተሻለ ይሆናል፡፡
የለገጣፎው ቤት የማፍረስ አካሄድ እንዴት ትክክል እንደሆነ የሚያስረዱ የኦዴፓ ባለስልጣናት፤ በተለይ ከንቲባዋ ወ/ሮ ሃቢባ ነገራቸውን የሚጀምሩት፣ የለውጥ/የተሃድሶ አመራር መሆናቸውን በመጥቀስ ነው፡፡ የለውጥ አመራር ነኝ ባይዋ ሴትየዋ፤ ወ/ሮ አዜብ እንዳደረጉት፣ በኢሳቷ ጋዜጠኛ ኢየሩሳሌም ተክለፃዲቅ ጆሮ ላይ ስልክ ጠርቅመው ዘግተዋል፡፡ ስልክ መዝጋቱን ያመጣው፣ ጋዜጠኛዋ የማያፈናፍን ጥያቄ በማቅረቧ ነው፡፡ ወ/ሮ ሃቢባ ስልክ ከመዝጋታቸው በፊት ምንም አይነት ሰው እንዳላፈናቀሉ፣ የመፈናቀሉን ወሬ የሰሙት በ”ኢሳት” እንደሆነ ተናግረው ሳይጨርሱ ደግሞ የፈረሰው ቤት ሁለት መቶ ሆኖ ሳለ፣ “ኢሳት” አራት መቶ ብሎ ማውራቱ ልክ እንዳልሆነ ይናገራሉ፡፡ ሁለት መቶ ቤት ፈርሶ ምንም ሰው የማይፈናቀለው እንዴት እንደሆነ ለማወቅ እንደጓጓሁ፣ ስልኩን ጠርቅመው  አረፉት፡፡
ከ”ኢሳት” እንዲህ የተሰናበቱት የለገጣፎ ከንቲባ ወ/ሮ ሃቢባ፤ የቡራዩውን ከንቲባ አስክትለው “OMN” በተባለው ቴሌቪዥን ላይ በአካል ቀርበው ሰፋ ያለ ማብራሪያ ሰጥተዋል፡፡ ቤት ማፍረሱ እንዴት ትክክል እንደሆነ ለማስረዳት ሁለቱም ከንቲባዎች፣ ከ2004 በፊትና በኋላ የሚል ነገር ያስቀምጣሉ፡፡ ከ2004 በፊት ግንባታ ያደረጉ ሰዎች ህጋዊ ካርታ እንዳገኙ ጠቅሰው፣ ከ2004 በኋላ የሰፈሩቱና ከከተማው ማስተር ፕላን ጋር ግጭት ያለው አሰፋፈር የሰፈሩ (ለምሳሌ፡- በማስተር ፕላኑ የኦሮሞን ባህል ለማሳደግ ሲባል፣ የፈረስ መጋለቢያ፣ የአረንጓዴ መናፈሻ ቦታዎች ተደርገው የተቀመጡ ቦታዎች ላይ የገነቡ) ሰዎች፤ ቤታቸው መፍረሱ ህግን የማስከበር ስራ እንደሆነ ደጋግመው አስረድተዋል፡፡
ቤት የፈረሰባቸውን ሰዎች፣ ገበሬውን አታለው፣ በትንሽ ዋጋ መሬቱን ገዝተው፣ የሰፈሩ መሬት ወራሪዎች እንደሆኑ፣ ሁለቱም ከንቲባዎች ያስረዳሉ። ይህ የዘር ፖለቲካ አይነተኛ መገለጫ ነው፡፡ መሬት የብሄር ብሄረሰቦች ነው በሚለው ህገ መንግስታዊ ድንጋጌ መሰረት፣ ገንዘብ ሲፈልግ መሬቱን መጤ ለተባለ ሰው የሸጠ ብሄር ብሄረሰብ፣ ገንዘቡ ሲያልቅበት መሬቱንም የመከጀል መብት ያለው ይመስለዋል፡፡ ይሄን አስቂኝ ክርክር ከገበሬው እሻላለሁ ብሎ ስልጣን ላይ የተወዘፈ የዘር ፖለቲካ፣ ባለስልጣንም እንደሚጋራው፣ የለገጣፎዋ ከንቲባ ወ/ሮ ሃቢባና ቢጤዋ የቡራዩው ከንቲባ ምስክር ናቸው፡፡ ወ/ሮ ሃቢባ ህዝብን ማፈናቀላቸው፣ ከቤት ጋር ህይወት ማፍረሳቸው፣ ለኦሮሞ ህዝብ ጥቅም የመስራታቸው መገለጫ እንደሆነ፣ ከዚህ በፊትም እንዲሁ ለኦሮሞ ህዝብ ጥቅም ሲታገሉ እንደኖሩ፣ ወደፊትም በዚህ እንደሚቀጥሉ ኮራ ብለው ተናግረዋል፡፡ ከዚህ የምንረዳው፣ የኦህዴድ የለውጥ አመራር ተብዬው፣ በዘረኝነቱ ህወሃትን የሚያስንቅ እንደሆነ ነው፡፡  
“ገበሬው ተታሎ በዝቅተኛ ዋጋ መሬት ሸጠ” የሚለው ከእውቀት ነፃ የሆኑ ዘረኛ ባለስልጣናት ክርክር፣ አስቂኝም አስገራሚም ነው፡፡ ገበሬው ተታሎ በትንሽ ዋጋ የሚሸጠው መሬቱን ብቻ የሆነው እንዴት ነው? ገበሬው ምነው ተታሎ ኩንታል ጤፉን  በአምስት መቶ ብር ሸጦ አያውቅ?  ምነው ተታሎ ሰንጋ በሬውን በአንድ ሺህ ብር ሲሸጥ አልታየ? ይህ ከአዝጋሚ ጭንቅላት የሚመነጭ ክርክር አላማው፤ “ወገንን” አድኖ “መጤን” ለማጥቃት ነው፡፡ ገበሬው ተታለለ የሚለው፣ መሬት መሸጥ ህገ ወጥ መሆኑንም ሳያውቅ ነው የሸጠው፣ ተታሎ በትንሽ ዋጋ ስለሸጠ፣ የሚገባውንም ጥቅም አላገኘም በሚል፣ መሬቱን ሸጦ የበላውን “ወገን” አርሶ አደር ነፃ በማድረግ፣ “መጤው” ላይ እርምጃ ለመውስድ ያለመ አካሄድ ነው፡፡ እውነታው ግን ሌላ ነው፡፡ ገበሬው መሬቱን የሚሸጠው ግራ ቀኝ አስቦ፣ የሚጠቅመውን አውቆ ነው፡፡ በተለይ ከ1997 ወዲህ፣ ህወሃት መራሹ ኢህአዴግ፣ የአዲስ አበባ ዙሪያ መሬቶችን በኢንቨስትመንት ስም እየቀማ፣ ለገበሬው የአይብ መግዣ የማይሆን ካሳ ከፍሎ ማፈናቀል ጀምሮ ነበር። ይሄኔ ገበሬው መንግስት መጥቶ በማይረባ ገንዘብ  ሳያፈናቅለው በፊት፣ መሬቱን በጣም በተሻለ ዋጋ ለግለሰቦች መሸጡን አማራጭ አድርጎ ወስዶ ነበር። እንዲህ ጥቅም ጉዳቱን አመዛዝኖ የሸጠው ገበሬ ነው፣ እንግዲህ ተታሎ በርካሽ ሸጠ የሚባለው፡፡      
ከገበሬው ቀጥሎ ማዳን የተፈለገው ደላላም፣ ባለስልጣንም ሆኖ መሬቱን ሲቸበችብ የነበረውን የኦህዴድ ባለስልጣን ነው፡፡ ከገዥም ከሻጭም የበለጠው ጥፋተኝነት ያለው በነዚህ ካድሬዎች ላይ ሆኖ ሳለ፣ የእነሱ ጥፋተኝነት በለሆሳስ ይታለፍና ጦሱ ሁሉ የሚወድቀው ኦደፓ ከቆመለት የኦሮሞ ህዝብ ውጭ የተወለዱ፣ “ያለ ግዛታቸው መጥተው ቤት የሰሩ ሰዎች” ላይ ነው፡፡ ይህ የኢህአዴግ ዘረኝነት አይነተኛ መለያ ነው፡፡ እነዚህ በስልጣናቸው ላይ ደላላነትና ሌብነት የደረቡ ባለስልጣናት ላይ የማይጨከነው፣ አሁን ደግሞ ተገልብጠው፣ “የለውጥ አመራር” ተብለው፣ የዐቢይንና የለማን ዙፋን የሚሸከሙ ስለማይጠፉ ነው፡፡
ከለገጣፎ ቤቶች መፍረስ ጋር ተያይዞ በ”OMN” ማብራሪያ ከሰጡት የቡራዩ ከንቲባ ንግግር ደግሞ ጉዳዩ ህገ-ወጥ ያሉትን ግንባታ ከማፍረስ አለፍ ያለ አላማ እንዳለው መረዳት ይቻላል፡፡ ከንቲባው ስለ ጉዳዩ ሲያስረዱ፣ መሬት ወራሪዎቹ አንድ ቤት ከገዙ በኋላ ብዙ ዘመድ አዝማዳቸውን እየጎተቱ እንደሚያመጡ፣ በአንድ መሬት ግዥ ሰበብ፣ በተገዛው ግቢ ውስጥ ብዙ ሰው እንደሚሰፍር በምሬት ገልፀዋል፡፡ ይህ ንግግራቸው የፓርቲው ጠብ ከቤቱ ግንባታ ብቻ ሳይሆን በቤቱ ውስጥ ከሚኖሩ ግለሰቦች ማንነትና ብዛት ጋር የተያያዘ እንደሆነ ሳያውቁት ጠቁመዋል፡፡
ወ/ሮ ሃቢባ በመቀጠል፣ እነዚህ ሰዎች እዚህ አካባቢ መጥተው የሰፈሩት የሆነ ድብቅ ዓላማ ይዘው እንደሆነ ተናግረዋል፡፡ በሴትዮዋ አስተሳሰብ ሰዎቹን ለገጣፎ የወሰዳቸው የቤት ችግር ሳይሆን ኦሮሞ ሳይሆኑ ኦሮሚያን የመውረስ “እኩይ” ሃሳብ ነው፡፡ በዚህ ያልበቃቸው ሃቢባ፤ የሰዎቹ መፈናቀል ከፍተኛ የሚዲያ ሽፋን ያገኘው (በሃቢባ አነጋገር “ጫጫታ” ያስከተለው)፣ ተፈናቃዮቹ ሚዲያ ከሚጮህበት ሁለት ክልል የመጡ በመሆኑ እንደሆነ ንዴት እየተናነቃቸው ተናገሩ፡፡ አሁንም ሳያውቁት፣ ማፈናቀሉ ዘር የለየ እንደነበር በገዛ አንደበታቸው አወጁ! ስልጣን ለመያዝ የዘረኝነት ልክፍት እንጂ፣ እውቀትና ማገናዘብ ከማይጠየቅበት ከኢህአዴግ ቤት፣ እንዲህ ያለ ኩርማን ሃሳብ ያለው ሰው፣ ከንቲባ ሆኖ ቢገኝ ገራሚ ነገር የለውም፡፡
የሃገሪቱን ህዝብ በሰፊው ሲያነጋግር፣ የኦዴፓን ማንነትም በገሃድ ሲያሳይ የሰነበተውን የለገጣፎውን የቤት ማፍረስ ተግባር አስመልክቶ ገዥውን ኦዴፓን የሚመሩት ዶ/ር ዐቢይም ሆኑ ክልሉን ኦሮሚያን የሚመሩት፣ የእነ ወ/ሮ ሃቢባ አለቃ አቶ ለማ መገርሳ፣ ትንፍሽ ሳይሉ መሰንበታቸው የሚያሳየው፣ ከግፉ ተቃራኒ መቆማቸውን ሊሆን አይችልም፡፡ ሳምንት ቆይተው ስለ ጉዳዩ ሲናገሩም፣ ጠ/ሚኒስትሩ ጭራሽ  አልሰማሁም ሲሉ፣ አቶ ለማ በዝምታቸው ቀጥለዋል። ከሁሉ የሚብሰው ደግሞ የዜግነት ፖለቲካን እናራምዳለን የሚሉ ፓርቲዎች ዝምታ ነው፡፡ ይህ ነገር የዜግነት ፖለቲካ ሁነኛ ጠበቃ የሌለው፣ የፖለቲካ አሰላለፍ ለመሆኑ ፍንጭ ሰጭ ነው፡፡
ከአዘጋጁ፡- ጽሁፉ የሚያንጸባርቀው የጸሃፊዋ/ውን ሃሳብ ብቻ መሆኑን ልንገልጽ እንወዳለን፡፡




Read 622 times