Administrator

Administrator

Tuesday, 21 May 2019 12:41

የግጥም ጥግ

 ጸሎት- ለኢትዮጵያ
                               ግዛው ለገሠ


 አንተ የሰማየ-ሰማያት ምጥቀት፣
የእልቆ-ቢሱ ጠፈር ባለቤት፣
የድቅድቁ ጨለማ ውበት፤
አንተ የፀሐየ-ፀሐያት ፈጣሪው፣
የከዋክብት ብርሃን አፍላቂው፣
የህይወት ዑደት ዘዋሪው፤
አቤቱ ፈጣሪ ሆይ - ሕዝብህን አሁን አድን፣
አቤቱ ፈጣሪ ሆይ - ልመናችንን ስማን፣
የኋሊት መመልከትን - ተጠማዞ ማየትን፣
እንደ’ለት ግብር ወስደን - ብዙ ዘመናት ኖርን::
ግና አንገትም ደከመና - ጥምዝ መዞር ቢሰለቸው፣
ላለፈ ታሪክ ትርክት - የኋሊት ቁልምም ቢመርረው፣
ዓይን ቦታ ቀየረ፣
ከግንባር ነቀለና ከማጅራት ደኩኖ ከተመ።
እኛም የኋሊት ተቸንክረን - የፊት እይታችን አከተመ፤
የተፈጥሮ ሕግ ተዛብቶ - ራዕያችንን አ.ፀ.ለ.መ፡፡
አቤቱ ፈጣሪ ሆይ - ዛሬ ሕዝብህን አድን፣
ወደፊት ማየት አቅቶን - ወደፊት መሄድ ተሳነን፤
ለደንቡ ብንራመድም - ባለንበት ‘ረገጥን፡፡
አንተም እንደምታውቀው - እኛም ፅፈን እንዳነበብነው፣
የኋላ ታሪካችን - ብዙ ቀለማት አለው፤
ላንዱ ብሶት ቁጭቱ - ላንዱ ኩራት ጌጡ ነው፡፡
እንደ ቃልህ ነጋሪ - እንደ ጳውሎስ ‘ሚመክረን፣
                       ሁነኛ ሰው የታለን
                       የአዋቂ ምንዱባኖች ነን።
ኩራቴ ያለው ብራና - የገዛ ወንድሙን ሲያስከፋ፣
ቀዳዶ ‘ሚጥል ባይኖር፣
«ያለፈ አልፏል» ባይ - እንዴት አንድ ሰው ይጥፋ?!
የፊት ጨለማ ሕዝብህን - አቤቱ ፀሎቱን ስማው፣
የኛ ሰው ዓይኑ - ከኋላው ከማጅራቱ ነው፤
በ’ትየለሌ ጥበብህ - አንተው ቦታው መልሰው!

 ወታደራዊው መንግስት በ3 አመት ስልጣን ሊያስረክብ ተስማማ

                 በህዝባዊ ተቃውሞ ከስልጣናቸው የወረዱት የሱዳኑ የቀድሞ ፕሬዚዳንት ኦማር አልበሽር፣ ተቃዋሚዎችን ገድለዋል በሚል ክስ የተመሰረተባቸው ሲሆን ወታደራዊው መንግስት በ3 አመታት ጊዜ ውስጥ ስልጣኑን ለማስረከብ ከተቃዋሚዎች ጋር መስማማቱም ተዘግቧል፡፡
ፕሬዚዳንት አልበሽር በስልጣን ላይ በነበሩባቸው ጊዜያት በተቀሰቀሱባቸው ተቃውሞዎች የተሳተፉ የአገሪቱ ዜጎችን በመግደል ወንጀል ፈጽመዋል ያለው የአገሪቱ ዋና አቃቤ ህግ ባለፈው ሰኞ ክስ እንደመሰረተባቸው የዘገበው ሮይተርስ፤ ሌሎች ግብር አበሮቻቸውም መከሰሳቸውን አመልክቷል፡፡
አልበሽር ከስልጣን መውረዳቸውን ተከትሎ ወደ ስልጣን የመጣው ጊዜያዊ ወታደራዊ መንግስት ስልጣኑን ለሲቪል ያስረክብ በሚል ተቃውሞው ቀጥሎ ቢሰነብትም፣ ባለፈው ሰኞ ከአገሪቱ ተቃዋሚዎች ጥምረት ጋር በተደረገ ድርድር፣ ስልጣኑን በሶስት አመታት ውስጥ ለማስረከብ ስምምነት ላይ መደረሱን ዘገባው አመልክቷል፡፡
በስልጣን ላይ ያለው የሽግግር መታደራዊ ምክር ቤት፣ ዲክላሬሽን ኦፍ ፍሪደም ኤንድ ቼንጅ ፎርስስ ከተባለው የተቃዋሚዎች ቡድን ጋር ያደረገውን ስምምነት ተከትሎ በሰጠው መግለጫ እንዳለው፣ አገሪቱ ወደ ከፋ እልቂትና ብጥብጥ እንዳትገባ ለማድረግ ሲባል ስምምነት ላይ መደረሱን አስታውቋል፡፡

 ዌልዝ ኤክስ የተባለው የጥናት ተቋም በፈረንጆች አመት 2019 በርካታ ቁጥር ያላቸው ቢሊየነሮች የሚገኙባቸውን የአለማችን አገራትና ከተሞች ደረጃ ይፋ ያደረገ ሲሆን፣ ከአገራት አሜሪካ ከከተሞች ሳን ፍራንሲስኮ ቀዳሚነቱን ይዘዋል፡፡
ተቋሙ ከሰሞኑ ይፋ ባደረገው አመታዊ ሪፖርት እንዳለው፤ 705 ቢሊየነሮች የሚገኙባት አሜሪካ ከአለማችን አገራት በርካታ ባለጸጎች ያሏት ቀዳሚዋ አገር ስትሆን፣ 285 ቢሊየነሮች የሚገኙባት ቻይና በሁለተኛ ደረጃ ላይ ተቀምጣለች፡፡
ጀርመን በ146፣ ሩስያ በ102፣ እንግሊዝ በ97፣ ስዊዘርላንድ በ91፣ ሆንግ ኮንግ በ87፣ ህንድ በ82፣ ሳዑዲ አረቢያ በ57፣ ፈረንሳይ በ55 ቢሊየነሮች እንደ ቅደም ተከተላቸው ከሶስተኛ እስከ አስረኛ ደረጃን መያዛቸውንም ተቋሙ ባወጣው ሪፖርት አስታውቋል፡፡
3 ትሪሊዮን ዶላር የሚደርሰው የአሜሪካ ቢሊየነሮች አጠቃላይ የሃብት መጠን እስከ ዘጠኛ ደረጃ የያዙት ሁሉም አገራት ቢሊየነሮች ካላቸው ድምር የሃብት መጠን እንደሚበልጥ የጠቆመው ሪፖርቱ፤ እስከ 15ኛ ደረጃ ያሉት አገራት 1 ሺህ 942 ቢሊየነሮችን ወይም የአለማችንን 75 በመቶ ቢሊየነሮች እንደያዙ ገልጧል፡፡ በእነዚህ 15 አገራት ውስጥ የሚኖሩት እነዚሁ ቢሊየነሮች በድምሩ 6.8 ትሪሊዮን ዶላር ሃብት እንዳላቸውም ጠቁሟል፡፡
ተቋሙ ባወጣው ሪፖርት ላይ ከአለማችን ከተሞች መካከል ከህዝብ ቁጥር ጋር ሲነጻጸር ከፍተኛ ቁጥር ያላቸው ቢሊየነሮች የሚገኙባት ከተማ ተብላ የተጠቀሰችው የአሜሪካዋ ሳንፍራንሲስኮ ስትሆን፣ ኒው ዮርክ፣ ዱባይ፣ ሆንግ ኮንግ እና ሎሳንጀለስ እስከ አምስተኛ ያለውን ደረጃ ይዘዋል፡፡

 - ለቻይናና ለዱባይ ከተሸጡት ዝሆኖች 2.7 ሚሊዮን ዶላር ተገኝቷል
                            - የኤሌክትሪክ ሃይል እጥረት በመባባሱ ሚኒስትሩ ከስራ ተባርረዋል


                  ከፍተኛ የዶላር እጥረት ያጋጠመው የዚምባቡዌ መንግስት ችግሩን በመጠኑም ቢሆን ለመቅረፍ በማሰብ 98 ዝሆኖችን ለቻይናና ለዱባይ በመሸጥ 2.7 ሚሊዮን ዶላር  ማግኘቱን ሲኤንኤን ዘግቧል፡፡
ባለፈው የፈረንጆች አመት ሙጋቤን ተክተው ወደ ስልጣን የመጡት የአገሪቱ ፕሬዚዳንት ኤመርሰን ምናንጋዋ ያደጉ፣ አገራት ብድር እንዲሰጧቸው ሲለምኑ መክረማቸውንና የዶላር እጥረት መባባሱን ያስታወሰው ዘገባው፤ የዝሆኖቹ መሸጥ የዶላር እጥረትን ለመቅረፍ ጭንቀት የወለደው ውሳኔ ነው ቢባልም፣ የአገሪቱ የፓርኮችና የዱር እንስሳት አስተዳደር ባለስልጣን ቃል አቀባይ ግን ዶላሩ የዱር እንስሳትን ለመንከባከብ የሚውል ነው ሲሉ ማስተባበላቸውን ገልጧል፡፡
አንዱ ዝሆን ከ13 ሺህ 500 እስከ 41 ሺህ 500 ዶላር በሚደርስ ዋጋ መሸጡን የጠቆመው ዘገባው፤ የተሸጡት ዝሆኖች በቻይና እና በዱባይ ወደሚገኙ ፓርኮች መወሰዳቸውንም አመልክቷል:: በዚምባቡዌ ከ85 ሺህ በላይ ዝሆኖች እንደሚገኙ የጠቆሙት ቃል አቀባዩ፤ ድርቅ መከሰቱን ተከትሎ ዝሆኖቹ የሚበሉት በማጣታቸው መንግስት ለምግባቸው ድጎማ ሊያደርግላቸው የቻላቸው 55 ሺህ ያህሉን ብቻ መሆኑንም አስታውሰዋል፡፡
በተያያዘ ዜና ደግሞ በዚምባቡዌ የኤሌክትሪክ ሃይል እጥረትና መቆራረጥ በከፍተኛ ሁኔታ መባባሱንና ህዝቡ ምሬት ውስጥ መግባቱን ተከትሎ፣ የአገሪቱ የኢነርጂ ሚኒስትር ጆራም ጉምብ ከስራ መባረራቸውን ኦል አፍሪካን ኒውስ ዘግቧል፡፡
ለሃይል መቆራረጡ የውጭ ምንዛሬ እጥረትን በምክንያትነት በመጥቀስ የሚታወቁትን ሚኒስትሩን በአጭር ደብዳቤ ከስራቸው ያሰናበቱት ፕሬዚዳንት ኤመርሰን ምናንግዋ፤ በቦታቸው የትራንስፖርት ሚኒስትር የነበሩትን ፎርቹን ቻዚን መሾማቸውንም ዘገባው አመልክቷል፡፡


                 በሜክሲኮ ሲቲ የአየር ብክለት በከፍተኛ ሁኔታ መስፋፋቱንና ለጤና አስጊ መሆኑን ተከትሎ፣ የከተማዋ ነዋሪዎች ከቤታቸው እንዳይወጡ ማስጠንቀቂያ እንደተሰጣቸው ብሉምበርግ ዘግቧል::
የሜክሲኮ ርዕሰ መዲና አየር በዚህ ሳምንት በከፍተኛ ሁኔታ መበከሉ ያሳሰበው የአገሪቱ መንግስት፣ የከተማዋ ነዋሪዎች ከቤታቸው እንዳይወጡና መስኮቶቻቸውን እንዲዘጉ፣ ብስክሌተኞችና እግረኞች ደግሞ ፊታቸውን በጭንብል በመከለል ሳንባቸውን ከመመረዝ እንዲከላከሉ ማስጠንቀቂያ ሰጥቷል፡፡
ከአለማችን ታላላቅ ከተሞች አንዷ እንደሆነች የሚነገርላት ሜክሲኮ ሲቲ፣ በአየር ብክለት በከፍተኛ ሁኔታ ከተጎዱ የአለማችን ከተሞች አንዷ መሆኗን የጠቆመው ዘገባው፤ ለአየር ብክለቱ በምክንያትነት ከሚጠቀሱ ጉዳዮች መካከል ብዛት ካላቸው ተሽከርካሪዎች የሚወጣው በካይ ጭስ አንዱ እንደሆነም አመልክቷል፡፡
ከሰሞኑ የከተማዋ የሙቀት መጠን በመጨመሩና ዝናብ ባለመዝነቡ የደን ቃጠሎዎች በተደጋጋሚ መከሰታቸውንና ይህም  የአየር ብክለት ችግሩን በከፍተኛ ሁኔታ እንዳባባሰው የጠቆመው ዘገባው፤ የከተማዋ አየር ለጤና እጅግ አደገኛ በመሆኑ ነዋሪዎች ከፍተኛ ጥንቃቄ እንዲያደርጉ ማስጠንቀቂያ መሰጠቱንም አክሎ ገልጧል፡፡

አማዞን በ1.5 ቢሊዮን ዶላር አውሮፕላን ማረፊያ እየገነባ ነው

                የታዋቂው ሰዓሊ ክላውድ ስራ የሆነውና “ሚዩሌስ” የተሰኘው ጥንታዊ ስዕል፣ 8 ደቂቃ ብቻ በፈጀ ጨረታ ክብረ ወሰን ባስመዘገበ ዋጋ 110.7 ሚ. ዶላር መሸጡ ተዘግቧል፡፡
እ.ኤ.አ በ1890 የተሳለውና ከፈረንሳዊው ሰዓሊ ምርጥ ስራዎች አንዱ እንደሆነ የተነገረለት ይሄ ስዕል ባለፈው ማክሰኞ ሲዝቤይ በተባለው አጫራች ኩባንያ አማካይነት ኒው ዮርክ ውስጥ ለጨረታ ቀርቦ መሸጡንና በአለማችን በኢምፕሬሽኒስት ዘዬ ከተሳሉ ስዕሎች በከፍተኛ ዋጋ በመሸጥ ክብረ ወሰን ማስመዝገቡን ነው አጃንስ ፍራንስ ፕሬስ የዘገበው፡፡
55 ሚሊዮን ዶላር ያወጣል ተብሎ የተገመተውን ይህን የዘይት ቀለም ስዕል ለመግዛት ስድስት ተጫራቾች መቅረባቸውን ያስታወሰው ዘገባው፤ ስሙና ማንነቱ ያልተገለጸው አንደኛው ተጫራች ከተገመተው በእጥፍ ያህል የሚበልጥ ዋጋ በማቅረብና በማሸነፍ ስዕሉን በእጁ ማስገባቱን አመልክቷል፡፡ በሌላ ዜና ደግሞ፣ የአለማችን ቁጥር አንድ ቢሊየነር የጄፍ ቤዞስ ኩባንያ አማዞን፣ በ1.5 ቢሊዮን ዶላር ግዙፍ የአውሮፕላን ማረፊያ ጣቢያ መገንባት መጀመሩን ዘ ጋርዲያን ዘግቧል፡፡ የተለያዩ ሸቀጦችን በአለም ዙሪያ በማድረስ ከአለማችን ኩባንያዎች ቀዳሚነቱን የያዘው አማዞን፤ አገልግሎቱን የተቀላጠፈ ለማድረግ በማሰብ በኬንተኪ የራሱን ዘመናዊ የአውሮፕላን ማረፊያ ጣቢያ ባለፈው ሰኞ መገንባት ጀምሯል፡፡

 አባቴ ህልምን መተለም አስተምሮኛል:: “ትላልቅ ነገሮችን መስራት እችላለሁ!” የሚል እምነት እንዲያድርብኝ የሚያስችለኝን ልበ ሙሉነት ያስታጠቀኝ እሱ ነው፡፡ ይሄ ለእኔ ታላቅ ስጦታ ነው:: በእርግጥ ይሄን ታላቅ ስጦታ እንዴት መጠቀም እንደምችል ለማወቅ የተወሰነ ጊዜ ፈጅቶብኛል:: ወጣት ሳለሁ፣ ጥሩም ይሁን መጥፎ ሁሉን ነገር የመቃወምና የመፈታተን አመል ነበረብኝ፡፡ በዕድሜ ስበስል ግን፣ ነገሩ ከሰዎች እንደሚያራርቀኝ እየተገነዘብኩ በመምጣቴ ባህሪዬን አስተካከልኩ፡፡ 29 ዓመት ገደማ እስኪሆነኝ ድረስ፣ ከራሴ ማንነት ጋር ሰላም ለመፍጠር የቻልኩ አይመስለኝም:: ይሄኔ ነው ስለ ራሴና ስለ ህይወት ጉዞዬ መፈተሽ የጀመርኩት፡፡ “ለመሆኑ ምን ያል አበረከትኩ?”፣ “እንዴትስ ነው ሰዎች ላይ ተፅዕኖ ያሳደርኩት?”፣ እና “ከመነሻውስ የመኖሬ ፋይዳ ምንድነው”፣ የሚሉትን ጥያቄዎች ለመመለስ በንቃት ማሰብ ያዝኩ፡፡ እነዚህ ጉዳዮች አሁንም ድረስ ለራሴ የማቀርባቸው ጥያቄዎች ናቸው፡፡ በእርግጥም ማንነትን ለሰዎች ከማረጋገጥ ይልቅ፣ ራሴን ሆኜ ለመኖር መቻል ሺ ጊዜ የተሻለ ነው፡፡
እናቴ አሰፋሽ ካሳሁን ብርቱና ለጋስ ሴት ናት:: አምስት ልጆቿን ጨምሮ (እኔ የበኩር ልጅ ነኝ) ከዘመድ አዝማዱ ጋር 16 የሚደርሰውን የቤተሰቡን አባላት ቀጥ አድርጋ ታስተዳድር ነበር፡፡ ቤት ያፈራውን ተካፍሎ መብላትን፣ ከሰዎች ጋር በደስታ መኖርንና ህይወትን ቀለል አድርጎ መመልከት የተማርኩት በለጋ ዕድሜዬ ነው፡፡ ከቤታችን ጠፍቶ የማያውቀውን ሳቅና ጨዋታ እያጣጣምኩ ነበር የልጅነት እድሜዬን ያሳለፍኩት፡፡
እናቴ መምህርት ነበረች፡፡ በ13 ዓመቴ አባቴ ከሞተ በኋላ፣ ያንን ሁሉ ቤተሰብ ከእጅ ወደ አፍ በሆነ ደሞዟ ቀጥ አድርጋ አስተዳድራለች፡፡ ለጊዜው ልንቸገር እንችላለን፡፡ ዋናው ነገር ግን በውስጣችን ያለውን እምነትና የሚገጥመንን መልካም እድሎች እንዴት እንደምንጠቀምባቸው ማወቅ ነው፤ ይሄንንም የተማርኩት ከእናቴ ነበር፡፡
አባቴ በእኔ ህይወት ውስጥ ትልቅ ድርሻ አለው፡፡ መጀመሪያ በዕደማርያም ላብራቶሪ ትምህርት ቤት፣ ከዚያም በአዲስ አበባ ዩኒቨርሲቲ አስተምሯል፡፡ በኋላ ላይ ከጓደኞቹ ጋር “ዓለም የህዝብ ግንኙነት” የተባለ ድርጅት አቋቋመ፡፡ አባቴ በአዕምሮ ብሩህነትም ሆነ በቁንጅና ማንም ጫፌ ላይ እንደማይደርስና የተፈጠርኩትም ታላላቅ ነገሮችን ለማከናወን እንደሆነ እየነገረኝ ነበር ያደግሁትና፣ ራሴን ሰማይ አሳክዬ እንዳስብ አድርጎኛል፡፡ የትምህርት ውጤቴ ጥሩ ይሁን እንጂ፣ በትምህርት ቤት ረባሽ መሆኔ አባቴን አያሳስበውም ነበር፡፡ እንደውም ለረባሽነቴ ሰበብ ይፈጥርልኝ ነበር:: “ሌላው ተማሪ ሙሉ ቀን የሚፈጅበትን ትምህርት፣ የኔ ልጅ በግማሽ ቀን ፉት ትለዋለች፡፡ ከዚያ ምን ታድርግ? ይሰለቻታል፤ ለዚህ ነው ረባሽ የሆነችው” እያለ እናቴን ለማሳመን ሲሞክር አስታውሳለሁ፤ እኔም ታዲያ ያንን አምኜ እቀበል ነበር፡፡ በወ.ወ.ከ.ማ የሚዘጋጀውን የተማሪዎች ክርክር እሱ በሊቀ መንበርነት ሊመራ ሲሄድ፣ እኔንም ይወስደኝና ክርክሩን እንድከታተል ያደርጋል:: ዝግጅቱ ተጠናቆ ወደ ቤታችን ስንመለስ ደግሞ፣ በክርክሩ የተለያዩ ሃሳቦችን ይዘው የተሳተፉትን ሁለቱንም ወገኖች ተከራክሬ የምረታበትን ዘዴና ብልሃት ያስተምረኝ ነበር፡፡ አባቴ በልጅነቴ በውስጤ ያሳደረብኝ ልበ-ሙሉነት አሁንም ድረስ አብሮኝ አለ::
አባቴ በ42 ዓመቱ በመኪና አደጋ ህይወቱ ሲያልፍ፣ ሰማይ የተደፋብኝ መሰለኝ፡። መላ ቤተሰቡን የማስተዳደር ኃላፊነት ጫንቃዋ ላይ የወደቀባት እናቴ፤ የምታፈናፍን አልነበረችም:: ከጓደኞቼ ጋር ወጥቼ ሻይ ቡና እንድል እንኳን አትፈቅድልኝም ነበር፡፡ የሁለተኛ ደረጃ ትምህርቴን ካጠናቀቀቅሁ በኋላ አዲስ አበባ ዩኒቨርሲቲ ብገባም አልተሳካልኝም፡፡ ከቤቴ ወጥቼ በዩኒቨርሲቲ መኖሪያ ቤት ስኖር የመጀመሪያዬ ስለነበር፣ አዲሱን ነፃነቴን ሳጣጥም፣ ትምህርቱን ችላ አልኩና በፈተና ወደቅሁ:: እንደ አባቴ ሃሳብ ቢሆን ኖሮ፣ ወደ አሜሪካ ሄጄ ነበር የዩኒቨርሲቲ ትምህርቴን የምከታተለው:: ይሄ እንደማይሳካ ሲገባኝ፣ ማስቸገር ጀመርኩ፡፡ ይሄኔ ለሩሲያ ነፃ የትምህርት እድል እንዳመለክት ቤተሰቤ ወሰነ፡፡ በወቅቱ ውሳኔውን ተቃውሜ ነበር፤ የሚሰማኝ አላገኘሁም እንጂ፡፡
የሆነው ሆኖ፣ የትምህርት እድሉን አገኘሁና ወደ ሩሲያ ሚኒክስ ተጓዝኩ፡፡ እዚያ የገጠመኝ ነገር ጨርሶ ያልጠበቅሁት ነበር፡፡ ህዝቡንና ባህሉን ወደድኩት፤ ቋንቋውና ሥነ ፅሑፉም ማረከኝ፡፡ ከቤተሰቤ ጋር የምገናኘው በደብዳቤ ብቻ ነበር፡፡ በአጭር ጊዜ ውስጥ ሌላ ሰው ሆንኩ፤ በፍጥነትም በአእምሮ በሰልኩ፡፡ ከአራት ዓመት በኋላ ግን ያላሰብኩት ችግር ተፈጠረ፡፡ እዚያው የተቋቋመ የኢትዮጵያ ወጣቶች ማኅበር፣ ‹ፀረ-አብዮተኛ› ብሎ ወነጀለኝ፡፡ ‹እግሬ አውጪኝ› ብዬ ከሩሲያ በማምለጥ በፖላንድ በኩል ጀርመን ገባሁ፡፡ ሩሲያና ኢትዮጵያ በወዳጅነት የከነፉበት ወቅት ስለነበር፣ መዘዙ ለቤተሰቦቼም እንዳይተርፍ ሰግቼ ደብዳቤ መፃፃፉንም ተውኩት:: ጀርመን ውስጥ የጠበቀኝ የስደት ኑሮ የከፋ ነበር:: በማትፈልገኝ አገር ውስጥ፣ ወይ አልኖርኩ ወይ አልሞትኩ በሚያሰኝ እንጥልጥል ሕይወት ውስጥ፣ ሞራል የሚያላሽቅ አስጨናቂ ጊዜ አሳለፍኩ፡፡ ጥሎ አይጥልም እንዲሉ፣ ደጋግ ሰዎች አላጣሁም፡፡ ያንን ክፉ ጊዜ ያሳለፍኩት በእነሱ እርዳታ ነበር፡፡ የማታ ማታም በአሜሪካ ጥገኝነት አገኘሁ፡፡ አሜሪካ ሄጄም ቢሆን፣ ደጋግ ሰዎች ላይ ነበር የወደቅሁት፡፡ በእነሱ ድጋፍ፣ በማውንት ሆልዩክ ኮሌጅ ነፃ የትምህርት ዕድል አገኘሁ፡፡ በኮሌጁ ትምህርቴን ተከታትዬ፣ በ27 ዓመቴ በዓለም አቀፍ ግንኙነት የመጀመሪያ ዲግሪዬን አገኘሁና፣ የአባቴን ምኞት ለማሳካት በቃሁ፡፡
ከዚያም ወደ ቦስተን ሄጄ ሥራ ጀመርኩ፡፡ ታናናሾቼንና እናቴን ወደ አሜሪካ አምጥቻቸው ስለነበር፣ እነሱን ለመርዳት በሁለት ቦታዎች መሥራት ነበረብኝ፡፡ ከሰኞ እስከ አርብ በስደተኞች ማዕከል ስሰራ፣ ቅዳሜና እሁድን ደግሞ በቦስተን ሎገን አውሮፕላን ማረፊያ፣ የስጦታ መደብር አስተዳድር ነበር፡፡ በኋላ ላይ ወደ ዋሺንግተን ዲሲ ሄጄ፣ የአባቴ ወዳጅ አቶ ፀሐይ ተፈራ በሚመሩት “የኢትዮጵያ ማህበረሰብ ልማት ምክር ቤት” ውስጥ መስራት ጀመርከ፡፡
በ1983 ዓ.ም የደርግ ወታደራዊ መንግስት ከስልጣን ሲገረሰስ፣ በአለቃዬ በአቶ ፀሐይ አማካኝነት ዋሺንግተን ዲሲ በሚገኘው የኢትዮጵያ ኤምባሲ፣ በአምባሳደር ብርሃነ ገ/ክርስቶስ፣ በፕሬስ አማካሪነት ተቀጠርኩ፡፡ በኤምባሲው ስቀጠር፣ ስለ ፕሬስ አማካሪነት የማውቀው ነገር አልነበረም:: ጥልቅ የሥራ ስሜት የነበራቸው የሥራ ባልደረቦቼ ምስጋና ይግባቸውና፣ በእነሱ ድጋፍ ስራ ላይ ሆኜ ሙያውን ተማርኩት፡፡ ከአዲሱ መንግስት ጋር ፖለቲካዊ ግንኙነት ባይኖረኝም፣ ራሱን ችሎ በሁለት እግሩ የመቆም ዕድል እንዲያገኝ ፍላጎት ነበረኝ፡፡ በኤምባሲው ለስድስት ዓመት ካገለገልኩ በኋላ፣ ወደ ኢትዮጵያ ተመልሼ የመስራት ፍላጎቴም ተሳካ፡፡
በቢቢሲ ሞዴል ከመንግስት ጣልቃ ገብነት ነፃ በሆነ መልኩ እንዲሰራ እንደ አዲስ የተቋቋመውን የኢትዮጵያ ሬዲዮና ቴሌቪዥን ድርጅትን በኃላፊነት እንድመራ ተሾምኩ፡፡ የሰራተኞቼን ቁጥር አሳንሼ ባስብም፣ 1500 ሰራተኞች እንደነበሩት ተረዳሁ፤ በዚያ ላይ ፖለቲካ ምን ያህል የስራ ድባቡን እንደሚነው በቅጡ አልመዘንኩትምና እንደ ቀላል ነበር የቆጠርኩት፡፡ ከዚያ ይልቅ፣ አዳዲስ ፕሮግራሞን የመጀመር ጉጉቴ አይሎ ነበርና፡፡ ተወዳጅ የምርመራ ጋዜጠኝነት ፕሮግራም በኢቴቪ ከመጀመራችንም በተጨማሪ፣ ቲቪ አፍሪካ የተሰኘ ፊልሞችን የሚያሰራጭ ሁለተኛ ቻናል ከፍተናል፡፡ በኔ በኩል፣ ህብረተሰቡ ኢቴቪን ወዶትና ተማርኮበት እንዲመለከተው እንጂ፣ አማራጭ የቴሌቪዥን ሥርጭት ስላጣ ብቻ እንዲያየው አልፈልግም ነበር:: ጋዜጠኞች፣ አዳዲሶቹን ፕሮግራሞች ማራኪ ለማድረግ፣ እጥፍ ድርብ ትጋት አሳይተዋል፡፡ ትጋታቸውም ታዲያ መና አልቀረም፡፡ ህብረተሰቡ ፕሮግራሞቹን ወደዳቸው፡፡ በድርጅቱ የአራት ዓመታት ቆይታዬ፣ ግሩም የባለሙያዎች ቡድን ድጋፍ አልተለየኝም፡፡
ድርጅቱን በመራሁባቸው የመጀመሪያዎቹ ሁለት ዓመታት (1990 እስከ 1992 ዓ.ም)፣ በኢትዮ-ኤርትራ ጦርነት ዙሪያ የመንግስት ቃል አቀባይ በመሆን አገልግያለሁ፡፡ ጦርነቱ የፈነዳው ከአሜሪካ ከመጣሁ ከወር በኋላ ነበር፡፡ አገሪቱ በጦርነት ላይ በነበረችበት በዚያ ቀውጢ ሰዓት፣ የተሻለ አስተዋፅኦ በማበረክትበት ዘርፍ የድርሻዬን የመወጣት ኃላፊነት አለብኝ የሚል እምነት ስለነበረኝ፣ ለአገር ውስጥና ለዓለም አቀፍ ጋዜጠኞች፣ ቀንና ሌሊት ሳልል በየእለቱ፣ እስከ አራት ጊዜ በተደጋጋሚ ስለ ጦርነቱ ሁኔታ መግለጫ እሰጥ ነበር፡።
ከኢትዮጵያ ሬዲዮና ቴሌቪዥን ድርጅት ስወጣ፣ ምንም የመስራት እቅድ አልነበረኝም፡፡ በዚህ ሰዓት ነበር፣ መዓዛ አሸናፊ መንግስቱ። የኢትዮጵያ ሴቶች ማህበራት ቅንጅትን ለመመስረት እንዳግትዛት የጠየቀችኝ፡፡ የድርጅቱ አላማ፣ የሴቶችን ድምፅ በማጉላት መብታቸውን ማረጋገጥ ነው፡፡ ድርጅቱን ለማቋቋምና መነሻ የገንዘብ ድጋፍ ለማሰባሰብ፣ ከዚያም ድርጅቱን የምትመራ ዋና ዳይሬክተር ለመቅጠር አመት ያህል ፈጅቶብኛል፡፡ በመቀጠል የሰራሁት፣ በተባበሩት መንግስታት ድርጅት የአፍሪካ ኢኮኖሚ ኮሚሽን የስነ ፆታ ክፍል ውስጥ ነበር:: ከዚያም ከኢትዮጵያ ሴቶች ማህበራት ቅንጅት ጋር ዩኒሴፍ በቀረፀው ፕሮጀክት ላይ በትብብር ሰርቻለሁ፡፡ የልጃገረዶች መድረክ የማቋቋም ዓላማ ያነገበው ይሄ ፕሮጀክት፣ በጣም የማረከኝ ስራ ነበር ማለት እችላለሁ፡፡ በ1994 ዓ.ም የተከሰተውን ረሃብ ለመቋቋም፣ “አንድ ብር ለአንድ ወገን” የተሰኘውን የገንዘብ ማሰባሰቢያ ዘመቻ፣ ከጓደኞቼ ጋር የመራሁትም በዚሁ ጊዜ ነበር፡፡ በበጎ ፈቃደኞች የተጠነሰሰው ይሄው ዘመቻ፣ ከትንሽ ተነስቶ ትልቅ ደረጃ ላይ ለመድረስ የቻለው በህዝቡ የበጎ ፍቃድ ተሳትፎ ነበር፡፡ ያልተሳተፈበት ዜጋ የለም ማለት ይቻላል፡፡ ህፃናትን፣ የንግድ ሰዎችን፣ የመንግስት ባለስልጣትን፣ ዝነኞችንና የዩኒቨርሲቲ ምሁራንን እንዲሁም የወታደሩን ክፍል ሳይቀር ባሳተፈው ፕሮጀክት። 14 ሚሊዮን ብር ተሰብስቧል፡፡ በወቅቱ ለወገኑ ለመድረስ የድጋፍ እጁን የዘረጋው የሰው ብዛት ሲታይ፣ ሁለመናን በስሜት የሚያጥለቀልቅ ኃይል ነበረው፡፡
ከዚህ በኋላ በመላው አፍሪካ የአመራር ሰጪነት ፕሮግራም ከሚቀርፁ አምስት ሴቶች አንዷ እንድሆን ከብሪቲሽ ካውንስል ሃሳብ ቀረበልኝ፡፡ ይህን በመቀበል ፕሮግራም በመቅረፅ ብቻ ሳይሆን፣ ተግባራዊ የሚያደርጉ ሰዎችንም በማሰልጠን ለአራት ዓመታት ሰራሁ፤ ከእውቀታችንና ከተሞክሯችን ጋር አብሮም እያደገ የመጣ መመሪያ አወጣን፡፡ ይሄ አጋጣሚ በአንድ በኩል አፍሪካን በቅጡ እንዳውቃት እድል የፈጠረልኝ ሲሆን፤ በሌላ በኩልም ደግሞ ፕሮግራሞችን ለማቀድና ለመቅረፅ የሚያስችል ልበ-ሙሉነትን እንዳዳብር አስችሎኛል፡፡
‹ኢመርጅ ኃላፊነቱ የተወሰነ የግል ማኅበር› የተባለ የራሴን አማካሪ ድርጅት የዛሬ ሁለት ዓመት ገደማ የመሰረትኩ ሲሆን፣ በቅርቡ ደግሞ የልጃገረዶችን አቅም የሚያጎለብት “የኛ” የተሰኘ ድንቅ ፕሮጀክት ላይ መስራት ጀምረናል፡፡ ኢመርጅን እንደገና በአዲስ መልኩ የማቋቋም ዕድሉ ቢሰጠኝ፣ የምክር አገልግሎት ተቋም ከማድረግ ይልቅ፤ በአመራር፣ በሥነ ፆታና በተግባቦት ዙሪያ ድንቅ ውይይቶች የሚያብቡበት፣ እንዲሁም ለትግበራ የሚመቹ አዳዲስ ሃሳቦች የሚፈልቁበት የልህቀት ማዕከል ነበር የማደርገው፡፡ በአዲስ አበባ እቴጌ ጣይቱ ብጡልን ሃውልት ለማሳነፅና የራሴን የቴሌቪዥን ጣቢያ ለመጀመር አልማለሁ፡፡ የሴቶች ኮሌጅ የመክፈት ህልምም አለኝ፡፡
ለሥራ የሚገፋፋኝ ኃይል የሚመነጨው፣ “እዚህ ምድር ላይ ያለሁት ለዓላማ ነው” ከሚለው እምነቴ ነው፡፡ ይህ እምነቴ “የሚጠበቅብኝን ያህል አልሰራሁም” የሚል ሃሳብ ሽው ሲልብኝ፤ አንዳንዴ የመረበሽና ያለመረጋጋት ስሜት ይፈጥርብኛል:: ይሄም ሆኖ ግን ስሰራ አቅሜን ሁሌ አንጠፍጥፌ እንደምሰራ ስለማውቅ፣ በምሰራው ስራ እኮራለሁ:: ሁሌም ለራሴ ታማኝ ነኝና በምሰራው ሥራ ላይም እምነት አለኝ፡፡
ኢትዮጵያ፣ ሰዎች ሁሉ ያሻቸውን ህልም መተለም የሚችሉባት አገር እንድትሆን እመኛለሁ፡፡ አሜሪካ ታላቅ አገር ለመሆን የበቃችው፣ ሰዎች ያሻቸውን ማለም የሚችሉባት አገር ስለሆነች ነው ብዬ አምናለሁ፡፡ ኢትዮጵያ፣ ብቃትና አቅም እንዲሁም የማለም ችሎታ የሚለመልሙባትና የሚከበሩባት አገር እንድትሆን እሻለሁ፡፡ የኢትዮጵያ ሴቶች እርስ በርስ እንዲደጋገፉና “አንቺ ሲሳካልሽ እኔም ይሳካልኛል፣ አንቹ ስትደምቂ እኔም እደምቃለሁ” የሚል ባህል እንዲኖራቸው እመኛለሁ፡፡
ለልጃገረዶች በራሳችሁ ላይ እምነት ይኑራችሁ፤ ራሳችሁንም አድንቁ፤ የምትሹትን ነገርም እንደሚገባችሁ እመኑ እላለሁ፡፡ መሆን የምትሹትን ሁሉ መሆን ትችላላችሁ፡፡ ለሌሎች ሰዎች ወሬም እምብዛም አትጨነቁ፣ ይልቁንም ከራሳችሁ ጋር ለምታደርጉት ውይይት ትኩረት ስጡ፡፡ ጥላችሁ የምትሄዱት የእግራችሁ አሻራ፣ ለሌሎች በር የሚከፍትና ጥርት ብሎና ደምቆ የሚታይ መሆኑንም እርግጠኞች ሁኑ፡፡     
ምንጭ፡- (የኢትዮጵያ ሴቶች ማህበራት ቅንጅት በመስከረም 2007 ዓ.ም “ተምሳሌት” በሚል ርዕስ ካሳተመውና የስኬታማ ኢትዮጵያውያን ሴቶችን ታሪክ ከሚተርከው መጽሐፍ የተወሰደ)

Saturday, 18 May 2019 00:00

የአድማስ ትውስታ

 ከአዘጋጁ፡-
   ጋዜጣችን አዲስ አድማስ የተመሰረተችበትን 20ኛ ዓመት ከጥቂት ወራት በኋላ ታከብራለች:: የመጀመሪያው የአዲስ አድማስ ዕትም፣ ቅዳሜ ታህሳስ 29 ቀን 1992 ዓ.ም ነበር ለአንባብያን የደረሰው፡፡ ወደ 20ኛው ዓመት በዓላችን በሚያዳርሱን ጥቂት ወራት “የአድማስ ትውስታ” በሚል በሰየምነው በዚህ አዲስ ዓምድ፤ ከቀድሞ ዕትሞች እየመረጥን ጊዜውንና ጋዜጣችንን እናስታውሳችኋለን፡፡

                           አንዳንዴ እብዶችም ጤነኞች ናቸው
                                   ዘካሪያስ አትክልት

             አማኑኤል ሆስፒታል ለሦስተኛ ጊዜ ሄጃለሁ። በሽተኛ ደግፌ ነበር ወደ ሆስፒታሉ የዘለቅኩት:: እንደ ከዚህ በፊቱ ግራ አልገባኝም፡፡ በቃ! ፍርሀት የለ፤ ድንጋጤ የለ፤ ቸስ ነበር ያልኩት:: እማስታምማቸውን አያቴን ወረፋ አይስዤ ወደ መታከሚያ ክፍል አስገባኋቸው፡፡ ብቻዬን ነኝ፡፡ መቶ ብር የለኝ፣ ሀምሳ ብር የለኝ፣ እንዲሁ አንዳንድ ብሮችን ታቅፌ - ብቻዬን:: ቦነት ሚሠማኝ ስቸስት ነው፡፡ ብር ሲጠፋ፣ የደሞዝ ቀን ሲርቅ! አቤት ያን ጊዜ እኔና እኔ ብቻ ምንሆንበት፡፡ ሣቢ ሲኖርማ ጀለሦች ብዙ፣ ሆቴሎች ብዙ … ወይኔ ብር! ብቸኝነቴን ለማርከስ ሠዎች ወደተቀመጡበት መጠለያ አመራሁ፡፡ ገና ቁጭ ከማለቴ ቱታ የለበሰ ታማሚ አጠገቤ መጣ፤ “ጀለሴ ተማሪ ነህ አይደል?” ጠየቀኝ፡፡
ቱታ መልበስ የአዕምሮ እክል ያለባቸው ታማሚዎች ምልክት መሆኑን ስለማውቅ “አዎ” አልኩት፤ በደፈናው ለመጨረስ፡፡
 “የት ነህ?” ብሎ ካጠገቤ ተቀመጠ፡፡
“እዚህ” አልኩት፤ በቸልታ፡፡
 “ካለባበስህና ከጠጉርህ ጋር ፊሎ እንደምታጠና ታውቆኛል፡፡” አለኝ፡፡
ዝም አልኩት፡፡
 “የሚገርምህ እኔም ፍልስፍና ነው እዚህ ያመጣኝ፤ ኦሾ፣ ክርስቶስ፣ ኒቼ ተፈላሠፏ፡፡ የኔ ግን--- የኔ ይለያል፡፡ የራሴ ፍልስፍና ከስብሀት የተለየ አለኝ” አለኝ፤ የተንዠረገገ ጢሙን እየፈተለ፡፡
… አይኑን ወለሉ ላይ ተክሎ ፀጥ አለ፡፡ ከደቂቃዎች በኋላ፤ “What is Philosophy?” ብሎ ጠየቀኝ፡፡ “Philosophy is love of wisdom” መለስኩለት፡፡
ጨበጠኝ፡፡ ተጨባበጥን፡፡ «መጣሁ ጠብቀኝ» ብሎኝ ትቶኝ ሄደ፡፡
ከተቀመጥኩበት መጠለያ ፊት ለፊት ወደ አስራ አምስት ቱታ የለበሱና ጥቂት “ሲቢል” ታማሚ ወንዶች ይታዩኛል፡፡ ሁሉም ስራ ያለባቸው ይመስል ከግራ ወደ ቀኝ፤ ከውስጥ ወደ በረንዳው ይወጣሉ፤ ይገባሉ፡፡ አካሄዳቸው አቀማመጣቸው … ሁሉ ነገራቸው ይገርማል፡፡ ፍዝዝ ብዬ እየሾፍኩ ነው:: “ኢትዮጵያ ትቅደም፡፡ ኢትዮጵያ ትቅደም” እያለ ወታደራዊ አካሄድ የሚሄድ ጐልማሳ ቀልቤን ሳበው:: ይሄድ ይሄድና፣ ሁለት እግሮቹን ገጥሞ ከተረከዙ ከፍ ይልና፣ ቀኝ እጁን ግንባሩ ላይ ተክሎ፣ ወታደራዊ ሠላምታ ያሳያል፡፡ “ጓድ ምን ልታዘዝ?” ይጠይቃል:: ማንም ካጠገቡ የለም፡፡ ከአፍታ በኋላ “እሺ እሺ” ይላል፡፡ ቆይቶ ልክ እንደ ኮረኮሩት ህፃን ከት ብሎ ይስቃል፡፡ …
“አንድ ብር አለህ?” አሉኝ፤ ቅጥን ያሉ ሽበታም ሽማግሌ፡፡
 “አዎ” አልኳቸው፡፡
“ስጠኝ?” ሰጠኋቸው፡፡ ሄዱ፡፡ ሲሄዱ እግራቸውን ደረጃ እንደሚያወርዱ ዓይነት በጥንቃቄ ከጉልበታቸው ሰበር እያደረጉ፣ ሁለት እጃቸውን በተራ እያፈራረቁ፣ አየሩን ይቀዝፉታል፡፡ አየር ላይ የሚዋኙ እንጂ የሚራመዱ አይመስሉም፡፡
“ጀለሴ ጥዬህ ጭልጥ ልበል? ምን ላድርግ ብለህ ነው፤ ፈለጥ ፈለጥ (መቀፈል ወይም ዲሞክራሲያዊ ልመና) ለማጨስ ነው፡፡” ቅድም ካጠገቤ የነበረው ወጣት ታካሚ፣ አፍታ ሳይሰጠኝ በዚያው ቀጠለ፤ “መቀሌ ዩኒቨርስቲ የmanagement ተማሪ ነበርኩ:: ሁለት ሴሚስተር Four ዘግቻለሁ፡፡ ጋንጃ  ስነፋ ተምታታብኝና እዚህ ላኩኝ፡፡ እኔ ግን ጤነኛ ነኝ፡፡ ለሲጋራ ኤካ ላኪ?” ሰጠሁት፡፡ ሲጋራ ገዝቶ መጣ:: ብቻውን ሣይሆን ሁለት ጓደኞቹን ጨምሮ ነበር:: “ተማሪ ነው ተዋወቁት፡፡” አላቸው፡፡ ተዋወቅን፤ ካስዬ፣ ዮናስ፣ ዘካሪያስ፡፡
 “ያንተን ስም’ኮ አልነገርከኝም?” አልኩት፡፡
“ቤንጃሚን፣ ኬቲ፣ ሸበላው፣ አህመድ… ብለህ ብትጠራኝ ሁሉም ያውቀኛል እሺ my brother from another mother!” አለ፡፡ ሣቅሁኝ፡፡ «Ok! My brother from another mother» አልኩት፤ እየሣቅኩኝ፡፡
“ካሴ ቀልድ ይነገራት?” አለ ቤንጃሚን፣ ኬቲ፣ ሸበላው፣ አህመድ፡፡
“የትኛው ይነገረው?” ጠየቀ ካሴ፡፡
 “ቆይ የጥንቱን ልንገረው፡፡” አለ፤ የመጀመሪያው ባለ አራት ስሙ፡፡  ለጨዋታው ደርዝ አንዱን ስም መርጬ እቀጥላለሁ፡፡
“አዎ”
“አንድ በጣም ቀጭን ወጣት ነበር፡፡ ጫካ ገብቶ ጅብ በላው፡፡ እናትየው ልጄን ጅብ በላብኝ ብላ ላካባቢው ዳኛ ታመለክታለች፡፡ ዳኛውም “ከመቼ ወዲህ ነው ሸንኮራን ጅብ የሚበላው?” አላት፤ ሣቅን … ሌላ ቀልድ ቀጠለ፡፡
“አንድ ሊስትሮ ገንዘብ አጠራቅሞ ቡና ቤት ይሄዳል፡፡ አንድ ሁለት ሲል ሞቅ ይለዋል፡፡ ‘ነይ አንቺ’ ይልና ቺኳን (ሸሌዋን) ይጋብዛል፡፡ ተመቸችው:: ‘እሙ አዳር ስንት ነው?’ ይላታል፡፡ ‘ስድስት መቶ  ብር’ … ከስንት ክርክር በኋላ ‘ወንዳ ወንድነትህ ስለማረከኝ፣ አንድ መቶ ብር ብቻ ትከፍላለህ’ ትለዋለች፡፡ ‘ኧረ! Sister ትንሽ ቀንሺ’ ሲላት ቱግ ብላ፣ «ካልቻልከ ከቀበሌ የነፃ ወረቀት አጽፈህ ና” አለችው” በጋራ ሣቅን፡፡
ቦርጫም ጐልማሣ ታማሚ እየሮጠ ወደ ተቀመጥንበት ወንበር መጣ፡፡ “ቤንጃሚን፣ ዮናስ፣ ካሴ፣ ዴች ተቀፈለ፡፡ ቡ… ቡና… ቡ… ቡቡና ይጠጣል” አለ፤ በእልህ፡፡ “ሴት ፐ! … ዴች!” እየተባባሉ ወደ ህሙማን መዝናኛ ካፍቴሪያ መሄድ ጀመሩ፡፡ ሙዳቸው ተመችቶኛል፡፡ ቢጠሩኝ እያልኩ ሳስብ “ጀለሴ፤ ለአንድ ቀን ብታብድ ቅር ይልሀል?” አለኝ ቤንጃሚን፤ የአብረን እንሂድ ምልክት እያሣየ፡፡ አመነታሁ፡፡ ልሂድ አልሂድ፤ ብሄድ ይመቱኛል፣ ይገሉኛል ወይስ የናፈቀኝን አዲስ ዓለም ያሳዩኛል … ብሄድ ብዬ በመከራ ወስኜ አብሬያቸው ሄድኩ፡፡
ካፍቴሪያቸው ገባን፡፡ ካፍቴሪያዋ ውስጥ ካንዲት ቡና ከምታፈላ ሴት በቀር ማንም የለም፡፡ መግቢያዋ ጋ ለሁለት ትከፈላለች - ካፌና ሬስቶራንት ዓይነት ነገር መሠለኝ፡፡ መከፈያዋ መለስተኛ ሱቅ ነች፡፡ ከሱቋ ግርጌ እስከ ግድግዳው ያለው ቦታ በኮንበርሣቶ ተሞልቷል፡፡ … ወገግ ያለ ብርሀን የሌላት፣ አፈር አፈር እምትሸት ካፍቴሪያ፡፡ ተቀመጥን፤ አምስት ቱታ የለበሱ ህሙማንና እኔ፡፡ ከገባሁ በኋላ ፈራኋቸው:: ምን ዓይነት ድፍረትና ራስን መጣል ነው እዚህ ያመጣኝ --- ምናምን እያልኩ ራሴን ወቀስኩት:: በተለይ ከፊቴ የተቀመጠውን ታማሚ ሳይ ልቤ ተንጫጫች፡፡ ጥቁር ነው፤ ሙሉ ጥቁር፡፡ ራሱን ሊያንቅ ሲሞክር አንገቱን የሞዠለቀው በቀጭኑ ያንገቱን ስጋ ያሣያል፡፡
መደናገጤን አይቶ ነው መሠለኝ፤ “ጀለሴ ጀግና ነህ” አለኝ፤ ቤንጃሚን፡፡
ፍርሀቴን ገድዬ፤ “በዚህ ሠውነት ጀግና ይኮናል!” አልኩት፤ ተከታትለው የሚገቡ ታማሚዎችን በፍርሀት እያስተዋልኩ፡፡
“ልብ ነው፤ የጀግንነት መሠረቱ፡፡ ጐሊያድን የጣለው እረኛው ዳዊት አይደለም” አለ፤ እየሣቀ፡፡
በሀሣቡ ተጽናናሁ፡፡ ያ እረጃ በጠጠር ጥሩር የለበሰውን ከጣለ፣ እኔም አንድ ሁለቱን በቡጢ ዘርሬ ወይም ሮጬ ማምለጥ አያቅተኝም ብዬ ለመጫወት ተመቻቸሁ፡፡ ቡናው ቀረበ፡፡ ሁላችንም ያዝን፡፡
“ተጫወት እንጂ ወንድማችን?” አለኝ፤ ካስዬ ብሎ ራሱን ያስተዋወቀኝ፡፡
ፈራ ተባ እያልኩ፤ “እ … እ ምን አመጣህ ወደዚህ?” አልኩት፡፡
“ጃንቦ ጉድ አረገኝ፡፡ ጠዋት አራት ሠዓት ጀምሬ ሌት ድረስ እቀመቅምልሀለሁ፡፡ ፉዞ ሳያረገኝ ይቀራል ብለህ ነው፡፡ አንድ ሁለት ወር Substance ለማስወጣት ብዬ ነው የመጣሁት” አለ፡፡
ቤንጃሚን ሲጋራ ያጤሳል፡፡ አንዱ የራሱን ጂም ፈጥሮ ቁጭ ብድግ ይሰራል፡፡ ሌላኛው ከንፈሩን እያንቀሳቀሰ ሌሎችን በማይረብሽ አኳኋን ያወራል፡፡ ሌላው ይስቃል፡፡ ቁጭ ብድግ የሚሰራውን እያየሁ፤ “ቤንጃሚን ይህ ምን የሚሉት ስፖርት ነው?” አልኩት፡፡
 “ማርሻል አርት ጀምሮ ነው የለቀቀው፡፡” አለኝ፡፡
“እንዴት?” ጠየኩት፡፡
“እንዴት እንዴት ትላለህ? ማርሻል አርት መማር ጀመረ፡፡ የሆነች Bird ቺክ ሾፈ፤ ፎነቀቀ፤ ነቀለ::” ሣቅሁኝ፡፡ ከት ብዬ ሣቅሁኝ፡፡ ጨዋታችንን የሠሙም፤ ያልሠሙም በህብረት ሣቁ፡፡ ከቡና አፍይዋ በስተቀር ሁሉም ከት ብሎ ሣቀ፡፡ ደነገጥኩ:: ‘ፀጥ አልኩ፡፡ አሁንም ይስቃሉ፡፡ ካ-- ካ-- ካ-- ካ፡፡’
“ካሴ የሆነ ጫወታ ጣል አርግ እንጂ ሣቁ እንዳይደበዝዝ” አለ ቤንጃሚን፡፡
“የትሪሱ፣ የቅምቅሞን፣ የሸበጡን የቱን ልንገረው?” ካሴ ጠየቀ፡፡
 “በናትህ እኔ የቅምቅሞውን ልንገረው፡፡” አለ ዮናስ፡፡
“እየውልህ ጀለስ! አንዱ ከጀለሡ ጋር ይቀመቅማል፡፡ አንድ ሁለት ይሉና ይደንሣሉ:: ያስነኩታል፡፡ አንዱ ጋባዥ ሌላው ተጋባዥ ነበር፡፡ አንዱ ከገፋ በኋላ ያስነኩታል፡፡ ዳንሡ ያልጣመው ተጋባዥ፣ የጋባዡን ስሜት ለመጠበቅ ያስነካዋል፡፡ በነጋታው “ትላንት ጋበዝኩህ አይደል” ይላል፤ ጋባዡ “ኧረ ባክህ በላቤ ነው የጠጣሁት” አለው ተጋባዡ:: ሣቅን … ካ … ካ … በመደነስ ያወጣው ላብ … ካ … ካ….፡፡ ”
አያቴ ትውስ አሉኝ፡፡ ተነሣሁ፡፡ “ጀለሶች እጠይቃችኋለሁ፡፡ በቃ ቻዎ!” ብዬ ብሮቼን አደራጅቼ፣ አስር ብር ለቡና ልከፍል ስል “ኧረ ተማሪ ነህ፡፡ እኛ ነን እምንከፍለው፡፡” ምናምን አሉ:: በስንት ጭቅጭቅ ከፍዬ ሁሉንም አቅፌ ወጣሁ፡፡
በቅጽበት ትውውቅ በአዕምሮ ህሙማን መሀል ያለውን ፍቅር አየሁ፡፡ የምወደውን ቡና በጋራ ጠጣሁ፡፡ በልክፈል አትክፈል ንትርካችን ደቂቃዎች ቢያልፉም፣ የእነርሱ ትህትናዊ ፍቅር ልቤን ነካው:: ለምነው ተካፍለው እሚበሉ፣ እሚጋብዙ፣ መሆናቸው ደነቀኝ፡፡ አንዳንዴ ዕብዶች ጤነኞች ናቸው ብንል ሳያስኬደን አይቀርም፡፡
አያቴ ገና ህክምና ላይ ናቸው፡፡ ተመልሼ መጠለያው ጋ ተቀመጥኩ፡፡ ከፊቴ ሦስት ታማሚዎች ቆመዋል፡፡ አንዱ ሲጋራ ያጤሣል:: ሁለቱ ሲጋራዋን ትክ ብለው ያዩዋታል፡፡ ምጥጥ ሲያደርጓት ደማቸውን የመጠጧቸው ይመስል ፊታቸውን ቁምጭጭ ያደርጉታል፡፡ “አስጭሰና” ይላል አንደኛው፡፡ “ቆይ መቼ ጀመርኩትና ነው እማስጨስህ” ብሎ መለሠ፤ የሲጋራው ባለቤት፡፡ ተስፋ በቆረጠ ስሜት ሲጋራዋን ያዩዋታል፡፡ አንዱ ተናዶ “በእጅህ እንዳለ አስበኝ” ብሎ በእጁ እንዳለ ስቦ፣ መንገዱን ቀጠለ፡፡ ሌላው ተስፋ ቆርጦ፣ በዓይኑ ብር እሚለምነውን ሰው መፈለግ ያዘ፡፡
አማኑኤል ሆስፒታል ውስጥ ወርቅ፣ ጥሩ አለባበስ፣ ቄንጠኛ ሞባይል ወዘተ … ዋጋ የላቸውም:: ሲጋራ የያዘ ብቻ ነው፤ ሀብታም፡፡ በረንዳው ላይ ከሠፈሩት አብዛኞቹ ሲጋራ ሲመጡ ማየት የተለመደ ነው፡፡
ትህትና፣ ቅንነት፣ ታታሪነትና አዋቂነት የተጐናፀፉትን የሆስፒታሉ ባለሙያዎች ሳላመሰግን ባልፍ ጽሁፌን ጐደሎ ያደርጋታልና ተመስገኑ፡፡ ፈጣሪ ጥበብን አብዝቶ ይስጣችሁ!
Saturday, 01 September 2012 10:42

 ከዕለታት አንድ ቀን፤ አንዲት አሮጊት ዐይናቸውን በጣም ይታመማሉ፡፡ አንድ ሐኪም ስለህመማቸው ያማክራሉ፡፡ በእማኞች ፊት ውል ይገባሉ፡፡
አሮጊቷ -  እንግዲህ ውላችን ዐይኔን ካዳንክልኝና በደንብ እንዲያይ ካደረግህልኝ ከፍተኛ ገንዘብ እከፍልሃለሁ፡፡ ታድነኝካልቻልክግንበነፃትሰናበታለህ፡፡
ሐኪሙ - ባሉት ሙሉ በሙሉ ተስማምቻለሁ፤ ይሄንኑም በፊርማዬ አረጋግጣለሁ፡፡
ይፈራረማሉ፡፡
ሐኪሙ በውሉ መሠረት መድኃኒት ያዝላቸውና ህክምናቸውን ይጀምርላቸዋል፡፡ በየጊዜው እየመጣም ይጎበኛቸዋል፡፡
ሆኖም መጥቶ በሄደ ቁጥር አንዳንድ የቤት ዕቃ ይዞባቸው ይሄዳል፡፡ ይሄን ዕቃ ይዞ መሄድ በጣም ይደጋግመዋል፡፡
በዚሁ ቀጠለና ልክ መድኃኒቱ ሲያልቅ የቤት ዕቃው ተወስዶ አለቀ፡፡ አሮጊቷ ቤቱ ባዶ እንደቀረ አዩና፤
“አምሥት ሳንቲም አልከፍልህም” አሉት፡፡
 “ሠርቻለሁ፡፡ የሠራሁትን መከፈል አለብኝ” አለ በቁጣ፡፡ ደጋግሞ እንዲከፍሉት ጠየቃቸው፡፡ ደጋግመው፤ “ንብረቴን ዘርፈሃል ስለዚህ ድምቡሎ አልከፍልህም!” አሉት፡፡
“ፍርድ ቤት ወስጄ እገትርዎታለሁ!”
“እሱን እናያለን፡፡ ማን ልብ እንዳለው አሳይሃለሁ”
ከሰሳቸው፡፡
ፍርድ ቤት ቀርበው ተጠየቁ፡፡
ዳኛው  - “ከሳሽ የሚለውን ይቀበላሉ?” ሲሉ ይጠይቋቸዋል፡፡
አሮጊቷ - “ክቡር ፍርድ ቤት! ከሳሼ ያለው ትክክል ነው፡፡”
ዳኛው  -  “ታዲያ ምን ይላሉ? ምንድን ነው መከላከያዎ?”
አሮጊቷ -  “እርግጥ ነው፡፡ እሱ ዐይኔን ሊያክመኝ፤ ካዳነኝ ደህና ገንዘብ ልከፍለው ተስማምተናል፡፡ እሱም በበኩሉ ካላዳነኝ ምንም ላይከፈለውና በነፃ ወደቤቱ ሊሄድ ተስማምተናል፡፡”
ዳኛው  - “እሱም ያለው ይሄንኑ ነው፡፡ ታዲያ ምንድን ነው ችግሩ?”
አሮጊቷ - “አሁን እሱ አድኜሻለሁ ይላል”
ዳኛው  -  “እርስዎስ?”
አሮጊቷ -  “እኔማ፤ አላዳነኝም ጭራሽ የበለጠ አሳውሮኛል ነው የምለው፡፡”
ዳኛው  -  “ለዚህ ኮ ማስረጃ ማቅረብ ያስፈልጋል”
አሮጊቷ -  “አሳምሬ አቀርባለሁ ጌታዬ”
ዳኛው  -  “ጥሩ፡፡ ያቅርቡ”
አሮጊቷ -  “ክቡር ፍርድ ቤት፤ ዐይኔን ባመመኝ ሰዓትና እሱ እንዲያክመኝ በጠራሁት ጊዜ የተወሰነ የማየት ችሎታ ነበረኝ፡፡ ያኔ በማይበት አቅም በቤቴ ውስጥ የተወሰነ የቤት ዕቃና ሌላም ንብረት እንደነበረ እገነዘባለሁ፡፡ አሁን፤ እሱ አድኛታለሁ በሚልበት ጊዜ ግን፤ ምንም ነገር በቤቱ ውስጥ እንደሌለ እስከማላይበት ደረጃ አድርሶኛል፡፡”
 *   *   *
ከሁሉም በላይ ከዐይን ህመምተኛነት ይሰውረን! ዐይንህን እገልጥልሃለሁ ብሎ የበለጠ ከሚያውር ያድነን፡፡ ያ ሳያንስ ቤታችንን ባዶ ከሚያደርግ ያውጣን፡፡ የሚታዘዝልን መድኃኒት በሙሉ ሁሌም ላያድነን እንደሚችል እንገምታለን፡፡ አንዳንዱ ያድናል፤ አንዳንዱ አያድንም፡፡ መድኃኒት ሰጥቼሃለሁ በሚል የቤት ንብረታችንን ሳይቀር የሚያራቁተን ሀገር - አቀፋዊም ሆነ ዓለም- አቀፋዊ መዝባሪ እንዳይመጣብን ግን ይጠብቀን፡፡ ይሄንኑም የሚያይ ያልታመመ ዐይን ያለው ዳኛ አያሳጣን፡፡
ደህና ዐይን ካለን ታሪካችንን በኩራት እናያለን፡፡ የታሪክ አሻራ አይፋቅም - ከልደት እስከሞት አይለወጥም፤ እንዲሉ፡፡ From the Cradle to the grave
I, grieve, yet I achieve!
(“ከአንቀልባ እስከ መቃብር
ባዝንም ማሸነፌ አይቀር” እንደ ማለት ነው፡፡ “የታሪክ ዝማሬ” ተብሎ የተፃፈ ነው፡፡) ሚኒልክን በአድዋ፣ ኃ/ሥላሴን በአፍሪካ አንድነት (ህብረት)፣ መንግሥቱ ኃ/ማርያምን በመሠረተ ትምህርት ማሰብ የበጎ አዕምሮ ሀቅ ነው፡፡ ዛሬ በኢትዮጵያ መሬት፣ በቻይና ገንዘብ፤ የተመረቀው የአፍሪካ ህብረት ህንፃ ፊት የክዋሜ ንኩሩማ ሐውልት ሲቆም የአገራችን መሪዎች ቅር አይላቸውም ለማለት ባያስደፍርም፣ ከሞኝ ደጅ ሞፈር መቆረጡን እንዴት አጡት ማሰኘቱና በማን ተፅዕኖ ተፈፀመ? የሚል ጥያቄ ማስነሳቱ ግድ ነው፡፡ ብዙ እጅ በዙሪያው ለመኖሩ መጠርጠር አያቅትም፡፡ ግን ለምን፤ በዋናነት ኃይለ-ሥላሴን ያካተተ ቢያንስ ዋና ዋና የሚባሉ ሌሎች መሪዎችን የጨመረ ምስል እንኳ መቅረፅ አይቻልም?
“ልትዋጉን ስትፈልጉ ዕድል አንሰጣችሁም - ልታገኙን አትችሉም፡፡ እኛ ልንዋጋችሁ ስንፈልግ ግን እንደማታመልጡ እናረጋግጣለን፡፡ ስንመታችሁ ድርግም ነው፡፡ … ከዚያ ድምጥማጣችሁን ነው የምናጠፋው፡፡ … ጠላት ሲገፋ እናፈገፍጋለን፡፡ ጠላት ካምፑ ውስጥ ሲሰፍር፤ እንልቅፍ እንነሳዋለን፡፡ ሲደክም እናጠቃዋለን፡፡ ሲያፈገፍግ ደግሞ እኛ እንገፋለን!”
ምናልባት ዘመኑ የጃፓኖችን ዝነኛ አባባል ያስታውሰን ይሆናል፡፡ Tada yori takai mono wa nai በነፃ ከተሰጠ ስጦታ በላይ፤ ዋጋ የሚያወጣ ምንም ነገር የለም፤ እንደማለት ነው፡፡ ያንን ዋጋ እኛ እየከፈልን ይሆን?
በእርግጥ ትልቅ ዋጋ ነው፡፡ በነፃ ለተገኘ ስጦታ የምንከፍለው የክብር ዋጋ - የክብር መስዋዕትነት! ስምንም ቅስምንም የሚያም መስዋዕትነት! ምናልባትም ለማያባራው የአፍሪካ ችግር ጭምር ተጨማሪ አበሳ የሚያስመረቅዝ መስዋዕትነት፡፡ ሐውልት የማፍረስ ባህል ቢያንስ ከዓመታት ወዲህ አልምተናልና፤ጊዜ ሲፈቅድ፣ ሁኔታዎች ሲከለሱ፤
“ከተመታህ በኋላ መቆጣት፣ ጅብ ከሄደ አጥር ማጠር” ከሚለው ተረት ይገላግለን ይሆናል፡፡ የህንፃው መቆም “ፍየል-ፈጁን አውሬ፣ ፍየል አርደህ ያዘው” ዓይነት እንዳልሆነ ተስፋ እናረጋለን፡፡ “የስጦታ ፈረስ ጥርሱ አይታይም፡፡” ቢባልም ከፈረሱ ጋር  የመጣውን ጣጣ ሁሉ ቻል አይባልም፡፡ በእርግጥ ለዘመናት “የመተሳሰር አገልግሎት” ሲሰጥ በቆየው የአገር ወህኒ ቤት ላይ የቆመ ህንፃ መሆኑ፣ የወቅቱ ስብሰባ ተናጋሪ Farewell To Prison (ዓለም በቃኝ ደህና ሰንብት) እንዳሉት ብቻ ነው ባይባልም፤ የአፍሪካን ህንፃ በእሥር ቤቱ ላይ መሥራት ትልቅ ፍሬ ያለው እርምጃ የሚሆነው የህዝቦች ሥቃይ ሲያከትም ነው! የመከራውን ሥር መንቀል እንጂ በላዩ ላይ ረጅም ጣራ ያለው ህንፃ ማቆም፤ የመከራውን አጀንዳ የማያነሳ የመሰብሰቢያ ቦታ ከመፍጠር የበለጠ ፋይዳ አይኖረውም፡፡ በስብሰባው በአፅንዖት እንደተነገረው፤ አጋሮቻችን የተባሉት  ቻይና፣ ህንድ፣ ደቡብ ኮርያ እና አሜሪካ ለአፍሪካ ህብረትም ሆነ ለየአገሩ በነብስ-ወከፍ ምኑ ናቸው? ሲባል፤ “ከረጅም ጋር ሲሄድ የዋለ አጭር፣ ሲያቃስት አደረ!“ እንዳያሰኝ ያሰጋል፡፡ ከዚህም ይሰውረን!!

  የእውቁ ፖለቲከኛና ሃኪም ፕ/ር አስራት ወልደስ 20ኛ የሙት አመት፣ ፓርቲዎች፣ የአዲስ አበባ ነዋሪዎችና ጥሪ የተደረገላቸው እንግዶች በተገኙበት ነገ ከ8 ሰአት ጀምሮ በመኢአድ ጽ/ቤት  ይዘከራል፡፡
ባለፈው ማክሰኞ በፕ/ር አስራት የመቃብር ስፍራ ማለትም በአዲስ አበባ መንበረ ፀባኦት ቅድስት ስላሴ ካቴድራል በሶስት የፖለቲካ ድርጅቶች የጉንጉን አበባ የማስቀመጥ የመታሰቢያ መርሃ ግብር የተከናወነ ሲሆን በመርሃ ግብሩ ላይ የአማራ ብሔራዊ ንቅናቄ (አብን)፣ የመላ ኢትዮጵያውያን አንድነት ድርጅት (መኢአድ) እና የመላ አማራ ህዝብ ድርጅት (መዐህድ) አመራሮችና አባላት መገኘታቸውም ታውቋል፡፡
በነገው እለትም የዚሁ መርሃ ግብር ቀጣይ የሆነና መላው የአዲስ አበባ ህዝብ የተጋበዘበት የመታሰቢያ መርሃ ግብር የሚካሄድ ሲሆን ፕ/ር አስራትን የሚያወሱ የኪነጥበብ ስራዎች ለታዳሚያን እንደሚቀርቡና የሻማ ማብራት ስነስርአት እንደሚደረግ  የመኢአድ  ም/ፕሬዚዳንት አቶ ሙሉጌታ አማረ ለአዲስ አድማስ ገልጸዋል፡፡ ፕ/ር አስራት ወልደየስ በአማራ ህዝብ ላይ የሚደርስበትን ግፍና በደል ለመታገል የመላ አማራ ህዝብ ድርጅትን መመሥረታቸው አይዘነጋም፡፡ በወቅቱ በፖለቲካ ልዩነት ምክንያት በእስር ላይ ሳሉ ባደረባቸው ህመም ህይወታቸው ማለፉም ይታወሳል፡፡

Page 1 of 428