Administrator

Administrator

ፓርቲ ማቋቋም እንደ ነውር መታየት የለበትም

        የመጀመሪያ፣ ሁለተኛና ሶስተኛ ድግሪያቸውን ያገኙት በምጣኔ ሀብት ነው፡፡ በምጣኔ ሀብት ባለሙያነትና ተመራማሪነት በበርካታ ሀገር በቀል መንግስታዊና መንግስታዊ ያልሆኑ ድርጅቶች ውስጥ ሠርተዋል፡፡ ባለፉት 8 አመታትም ኑሮአቸውን በውጭ ሀገር አድርገው፣ የሀገሪቱን የፖለቲካና ምጣኔ ሃብት ሁኔታ ሲከታተሉ መቆየታቸውን ይገልፃሉ፡፡ ከወዳጆቻቸው ጋር የፖለቲካ ድርጅት ለማቋቋም ካቀዱ 10 አመታት ተቆጥረዋል፡፡ ያኔ የተፀነሰው ሃሳብ በኢትዮጵያ ባለፈው 1 አመት ውስጥ የመጣውን ፖለቲካዊ ለውጥ ተከትሎ ዛሬ ተወልዷል ይላሉ - ዶ/ር ዐብዱል ቃድር አደም፡፡ አዲሱ ፓርቲያቸው ነፃነትና እኩልነትን በዋናነት ያቀነቅናል፡፡ ስያሜውም “ነፃነት እና እኩልነት ፓርቲ” ነው፡፡ ፓርቲውን ከመሠረቱት አንዱ የሆኑትና በፕሬዚዳንትነት የሚመሩት ዶ/ር አብዱል በፓርቲው አላማ፣ ግብና በፖለቲካ ፕሮግራሙ እንዲሁም በአገሪቱ የፖለቲካ እንቅስቃሴ ዙሪያ ከአዲስ አድማስ ጋዜጠኛ አለማየሁ አንበሴ ጋር እንደሚከተለው ቆይታ አድርገዋል፡፡


              “ነፃነት እና እኩልነት ፓርቲ” እንዴት ተወጠነ?
የምጣኔ ሃብት ባለሙያ ብሆንም፣ እኔ በግሌ ከድሮ ጀምሮ የፖለቲካ ፍላጐት ነበረኝ፡፡ ብዙ ጊዜዬንም በሀገራችን የፖለቲካ ጉዳዮች ላይ አተኩሬ እንቀሳቀስ ነበር፡፡ ነገር ግን ቀደም ሲል ጊዜ በሀገራችን የነበረው ሁኔታ ለእውነተኛ ፖለቲካ ትግል የሚመች አልነበረም፡፡ ስለዚህ ዝም ብሎ እጅን አጣጥፎ ከመቀመጥ ብዬ በሲቪክ ማህበራት በኩል እንቅስቃሴ አደርግ ነበር፡፡ በተለይ አርብቶ አደር አካባቢዎች ላይ በአገልግሎትና ማህበረሰብን በማንቃት ስራዎች ስሳተፍ ቆይቻለሁ፡፡ ያን ማድረጌ የሀገሪቷ አቅጣጫ ወዴት ነው መሄድ ያለበት? ያለንን አቅም ምን ላይ ነው ማዋል ያለብን? የሚለውን ከጓደኞቼ ጋር ሆነን ስናጠና ቆይተናል፡፡ ውጪ ትምህርት ላይ እያለሁም ከበርካታ ኢትዮጵያውያን ጋር በዚህ ባለራዕይ ፓርቲ ምስረታ ላይ  ለረጅም ጊዜያት፣ ውይይትና ምክክር ስናደርግ ቆይተናል፡፡
ርዕዮተ አላማችሁ ምንድን ነው? የሀገሪቱን ወቅታዊ የፖለቲካ ፍላጐትስ ያማከለ ነው ትላላችሁ?
በመጀመሪያ ደረጃ አሁን በሀገሪቷ ውስጥ በግልጽ የሚታይ ለውጥ አለ፡፡ በአስተሳሰብም በተግባርም ለውጥ አለ፡፡ ይሄን እኔም ባልደረቦቼም ገምግመን ተረድተናል፡፡ ምርጫ ቦርድ ኃላፊነት ሠራተኞችም ጥሩ ድጋፍ ነበር ሲያደርጉልን የነበረው እኛ ፓርቲውን ለመመስረት ከተንቀሳቀስንበት ያለፉት 5 ዓመት ውስጥ የምርጫ ቦርድ ኃላፊዎችናት ባለሙያዎች ከፍተኛ ድገፍ ነው ያደረጉልን፡፡ በተለያዩ ውይይቶች ላይ ስንሳተፍ ቆይተናል። በቅርብ ጊዜ በተዘጋጀወ የቃል ኪዳን ሰነድ ላይም ፈርመናል፡፡ ገና ሳንመሠረት እንድንፈርም ምርጫ ቦርድ ከፍተኛ ድጋፍ አድርጐልናል። እኛ የተጀመረ የለውጥ በር ውስጥ ገብተን፣ ማስፋት አለብን የሚል አላማ ነው፣ ያለን፡፡ ስንቋቋም ሁለት ዋነኛ ጉዳዮች መነሻ አድርገን ነው፡፡ አንደኛ የኢኮኖሚ ችግር ነው፡፡ ሀገራችን በጣም ድሃ ከሚባሉት ሀገሮች ውስጥ ናት፡፡ ሁለተኛው ጊዜያዊ ችግሮች ናቸው፤ ሠላምና መረጋጋት ጠፍቷል፡፡
በቀጣይ ምን ሊሆን እንደሚችል አናውቅም። ስለዚህ ይሄን ሁኔታ ለአጋጣሚ ወይም ለእድል ከመተው እኛ የምንችለውን ያህል ተሳትፈንበት ማስተካከል አለብን ከሚል ነው፡፡ በሶስተኛ ደረጃ በሀገራችን ብዙ ያልተሞከሩ የኢኮኖሚና የፖለቲካ አካሄዶች አሉ እነዚያን አውጥቶ ለህዝባችን አዲስ ነገር ለማበርከት ነው፡፡
ርዕዮተ አለማችንም ከዚህ ተነስቶ የተቀረፀው ነው፡፡ ለዘብተኛ ሊበራል አስተሳሰብ ነው፡፡ ለዘብተኛ ሊበራሊዝምን የመረጥነው ከሀገራችን ነባራዊ ሁኔታ ጋር ይጣጣማል በሚል ነው። ጭልጥ ያለ ሊበራሊዝም አይጠቅመንም። ከሶሻል ዲሞክራሲም በጐ የሆነውን እንወስዳለን። መሀል ላይ ያለውን አስተሳሰብ ነው ይዞን የምንራመደው፡፡
ትግላችንም ሙሉ ለሙሉ ርዕዮተ አለምን መሠረት ያደረገ ነው የሚሆነው፡፡ የራሳችንን የኢኮኖሚ ፕሮግራምም ቀርፀናል፡፡ ማህበራዊ ጉዳዮችን በተመለከተም በዋናነት ባህላችንን መነሻ የሚያደርግ ይሆናል እንጂ ከአውሮፓ ሊበራሊዝም የሚቀዳ አይሆንም፡፡ ለዚህ ነው ለዘብተኛ ሊበራሊዝምን አማራጫችን ያደረግነው፡፡ በነገራችን ላይ ከሊበራሊዝም ብቻ ሳይሆን ከሶሻል ዲሞክራቶች ጠቃሚ ነገር ሲኖር እንወስዳለን፡፡ ርዕዮት አለማችን የማይለወጥ የማይቀየር ነው ብለን አናስቀምጥም፡፡
“ነፃነት እኩልነት” የሚለውን ስያሜ ስትመርጡ ምንን ታሳቢ በማድረግ ነው?
የፓርቲ ስያሜ ለማውጣት ብዙ ተጨንቀንበታል። ተግባራችንን በትክክል ሊገልጽ እንደሚገባ ስንነጋገር ነበር፡፡ አኛ በፖለቲካ ትግላችን አማካዩን ፍለጋ ላይ ነው የምናተኩረው፡፡ ኦሮሞነትን አማራነትን፣ ጉራጌነትን፣ ሲዳማነትን የማያኮስስ፣ ኢትዮጵያዊነትን የማያኮስስ፣ ሁለቱንም በእኩል የሚመለከት የፖለቲካ አካሄድ ነው የመረጥነው።
ስለዚህ ነፃነት ስንል፣ ሁሉን አቀፍ ነፃነት፡- የመደራጀት፣ ሃሳብን የመግለጽ፣ ሠርቶ የመበልፀግ የመሳሰሉትን ማንሳት እንችላለን። እኩልነት ስንል በህዝቦች፣ በፆታ፣ በብሔር … ማንም ከማንም የማይበልጥ እንዲሆን ነው። ነፃነትና እኩልነት ሁለቱም የወቅቱ የፖለቲካ ጥያቄዎች ናቸው፡፡ ስለዚህ እነዚህን ሁለት አንኳር ጉዳዮች ማሳካት እንደተቀመጠው፤ ሀገሪቱን በሚገባ አስተማማኝ አድርጐ ያሻግራታል የሚል ጽኑ እምነት ነው ያለን። በሀገሪቱ የብዙ ችግሮች መነሻ፣ የእኩልነት ጉዳይ ነው፡፡ ኤርትራን ያሳጣን ስንመራመር ብንውል መጨረሻው የእኩልነት ጥያቄ ሆኖ እናገኘዋለን። አሁንም ያለው የብሔር የግዛት ይገባኛል ጥያቄ መነሻው የእኩልነት ጉዳይ ነው፡፡
ፓርቲያችሁ ምን አይነት አባላትን ነው ያሰባሰበው?
ሁሉም መስራች አባላት ከዚህ ቀደም ቀጥተኛ የፓርቲ ፖለቲካ ተሳትፎ የሌላቸው አዳዲሶች ናቸው፡፡ በመተዳደሪያ ደንባችን እንደተቀመጠው፤ በምስረታ ጉባኤያችን 50 የማዕከላዊ ኮሚቴ አባላት ተመርጠዋል፡፡ ከእነዚያ 50 የማዕከላዊ ኮሚቴ አባላት መካከል 11 የስራ አስፈፃሚ ኮሚቴ አባላት ተመርጠዋል። ሁሉም እኔን ጨምሮ ለፓርቲ ፖለቲካ አዲስ ነን፤ ግን እንዳልኩት ለረጅም አመታት ዝግጅት በማድረግ ሂደት ውስጥ ሠፋፊ ልምዶችን ለመቅሰም ሞክረናል፡፡ ፓርቲያችን ከኢትዮጵያ የፖለቲካ ፓርቲዎች መጥፎና እና ነገሮች ለይቶ ጠቃሚውን እየሰወደ ነው ወደፊት የሚጓዘው። ፓርቲው ተቋማዊ እንዲሆን ነው እየሠራን ያለነው፡፡
የሀገሪቱን ወቅታዊ ፖለቲካ እንደ ፓርቲ እንዴት ነው የምትረዱት?
ጥያቄ ውስጥ የማይገባ ለውጥ አለ፡፡ ሠፊ የፖለቲካ ምህዳር አለ፡፡ አስቸኳይ ሁኔታዎች አሉ። መንግስት ጠንካራ ድጋፍ እያደረገልን ነው። ተግዳሮት ሊሆን የሚችለው በሀገሪቱ ያለው የፀጥታ መደፍረስ ካልሆነ በስተቀር፣ ጥያቄ ውስጥ የማይገባ አስቸኳይ ሁኔታ፣ አሁን በሀገሪቱ አለ፡፡ እርግጥ ነው የሽግግሩ ጊዜ በጣም ማጠር አለበት፤ በተራዘመ ቁጥር ብዙ ችግር ነው የሚፈጥረው። ግጭቶችና አለመግባባትን በአንድ ጊዜ ማስቆም ከባድ እንደሆነ ይታወቃል። ስለዚህ በዚህ ጉዳይ ከመተቸት ይልቅ አማራጭ ሃሳቦችን ማቅረቡ የተሻለ ይሆናል፡፡ የኛ ፓርቲ በፖለቲካ ትግሉም ከመተቸት ይልቅ አማራጭ ሃሳቦችን በማቅረብ ላይ ያተኩራል። አሁን ጥሩ የሽግግር ጊዜ ላይ ነን፤ በዚያው ልክ የታዩ ክፍተቶች አሉ፡፡ እነዚህን በአማራጭ ሃሳቦችና ምክሮች ማቃናት ያስፈልጋል፡፡ ለዚህ ነው ከመረረ ትችት ወጥተን፣ መንገድና አቅጣጫ ማመላከት አለብን የምንለው፡፡
ለውጡ ወዴት ሊያመራ ይችላል? ተገማች ሁኔታዎች ይኖራሉ?
አሁን ብዙዎቻችን ያለን አስተሳሰብ ጥናት ላይ ያተኮረ አይደለም፡፡ ያለው አካሄድ ብሔር ላይ መሠረት ያደረገው በአንድ ጐራ፣ የዜግነት ፖለቲካ የሚባለው ደግሞ በሌላ ጐራ ነው። ብሔር ላይ የተመሠረተው ሀገሪቱ ወደ አሃዳዊነት እንዳትሄድ ነው የሚታገለው፡፡ በእነዚህ ሁለት አካሄዶች መሃል አማካይ ካለ፣ ጥሩ የለውጥ አካሄድ ይኖረናል፡፡ አሁን እንዲህ ያሉ አስተሳሰቦች እንዲበራከቱ ነው እኛም የምንሠራው፡፡
በፌደራሊዝሙና በብሔር ብሔረሰቦች መብት እስከ መገንጠል ጉዳይ አቋማችሁ ምንድን ነው?
እኛ በምንም መመዘኛ የመገንጠል ጥያቄን አንደግፍም፡፡ ፌደራሊዝሙ ግን ከአለም ተሞክሮም አንፃር የተጠና መሆን አለበት። ፌደራሊዝም ጠንካራ ስርአት መፍጠር የሚያስችል ነው፡፡ ኢትዮጵያ ውስጥ ሲተገበር ግን አንድን ብሔር ከሌላው ጋር እንዲጠራጠር፣ እንዲጋጭ በሚያደርግ የከፋፍለህ ግዛው አይነት ነው፡፡ ይሄ ለአገዛዝ እንዲመች የተደረገ ነው፡፡ ስለዚህ እውነተኛ ፌደራሊዝም እንዴት ይምጣ የሚለው ምክክር ሊደረግበት ይገባል፡፡
የአማራ፣ የትግራይ፣ የኦሮሚያ፣ የሌላውም ህዝብ በቋንቋው መናገር፣ ባህሉን የሚያሳድግበት መንገድ ተፈጥሮ እውነተኛው ፌደራሊዝም መተግበር አለበት ነው አቋማችን። የመንግስት ስልቱ ፕሬዚዳንታዊ ነው፡፡ ጽንፍ የሄደ ብሔርተኝነትንም ሆነ ጽንፍ የተረገጠ የአንድነት ንቅናቄን ወደ አማካይ ማምጣትን ታሣቢ አድርገን ነው የምንንቀሳቀሰው። ሁሉም ቦታ ኖሮት፣ ሳይከፋ፣ ሀገሩን እንዲወድ የሚያደርግን ስርአት ነው እውን ማድረግ ያለብን፡፡ እኛ እንደ ፓርቲ፣ እንድንፈጠር ያደረገን ይሄ ነው፡፡
አንድነቱንም ብዝሃነቱንም በእኩል ደረጃ እንፈልገዋለን፡፡ ይህ እውን እንዲሆንም እንታገላለን። መሀከለኛ ፖለቲካን ማለማመድ አለብን፡፡ ብሔር እና አንድነት የሚሉት፣ ሁለቱም ጋ ጥሩ ነገር አለ፡፡ ከሁለቱም የሚወሰድ አማካይ ነገር ደግሞ የበለጠ ለሀገራችን ፈውስ ይሆናል፡፡
“ፓርቲዎች ተሰባሰቡ” እየባበለ … እናንተ ተጨማሪ ፓርቲ መፍጠራችሁ ትችት አያስነሳም?
በመርህ ደረጃ መሠባሰብ አብሮ መስራት ተገቢ ነው፡፡ ይሄ መሆን ያለበት ግን ራሱን በቻለ ሂደት ነው፡፡ ሲሮጡ የታጠቁት አካሄድ፣ ህዝባችንን ያሰለቸ ነው፡፡ መንግስት “ተሰብሰቡና ልርዳችሁ” ስላለም መሠብሰብ አያስፈልልም። መንግስት ገንዘብ ይሠጠኛል ብሎ መሰብሰብ የትም አያደርስም። ሌሎች ሀገሮችም እኮ በርካታ ፓርቲ ነው፤ ያላቸው። ለምሣሌ አሜሪካ ሁላችንም የምናውቀው ሪፐብሊካኖችንና ዲሞክራቶችን ነው ነገር ግን ከ90 በላይ ፓርቲዎች ናቸው ያሉት፡፡ በሌላውም ሀገር እንደዚያው ነው፡፡ ኢትዮጵያ ደገሞ ብዙሃነት አገር ስለሆነች በርካቶች በፈለጉት መንገድ ቢደራጁ የሚደንቅ መሆን የለበትም፡፡ በሌላ በኩል ባለፉት 27 አመታት ዝም በለው ለቁጥር ማሟላት የውሸት ፓርቲዎች ጭምር ሲቋቋሙ ነበር፡፡ አሁን ግን እውነተኛ ፓርቲዎችን ማቋቋም የሚቻልበት ጊዜ ላይ ነን፡፡ ዋናው ፓርቲዎች ይዘውት የሚነሱት ሃሳብ ነው፡፡ ሃሳብ በመድረኩ ቀርቦ አሸናፊ የሆነው ነጥሮ ይወጣል። ስለዚህ ሰዎች አሁንም በፈለጉት መንገድ ይደራጁ በኋላ ብዙሃኑ የተቀበሉት ሃሳብ ገዥ ይሆናል። ሌላው በወንፊት እየተንገዋለለ ወደ ኋላ ይቀራል፡፡ ይከስማል፡፡ እኛ ሀገር ገና ብዙ አይነት አደረጃጀቶች መፈጠር አለባቸው፡፡ አሜሪካ በ10ሺዎች የሚቆጠሩ የሲቪክ ተቋማት አሉ፡፡ በኛ ሀገር ግን በመቶዎች ናቸው፡፡
አዲስ ፓርቲ ከመመስረት ለምን ሃሳባችሁን ከሚገራ የተቋቋመ ድርጅት ጋር አትጣመሩም ነበር ነው ጥያቄው?
ይሄ ተገቢ ጥያቄ አይደለም፡፡ አዲስ ሃሳብ አለን የምንል ሰዎች ለምን? አንደራጅም፡፡ ለምን ሃሳባችንን ሌሎች ይቀበላሉ አይቀበሉም ማለት አስፈለገ? ፓርቲ ማቋቋም እዚህ ሀገር ላይ እንደ ነውር መታየት የለበትም፡፡ የተቋቋመው ፓርቲ ምን አዲስ ነገር ይዞ መጣ? የሚለው ነው መጠየቅ ያለበት፡፡ ያመጣው ሃሳብ ገዥ ከሆነ መደገፍ ይቻላል፡፡ ካልሆነ መተው፡፡ ይሄ ነው ተፈጥሮአዊ ሂደቱ፡፡ እውነተኛ አላማ ያለው፣ በህዝብ የተመረጡ ሆኖ ይቀጥላል፡፡ ሌላው በራሱ ጊዜ ይከስማል፡፡ አብሮ የመስራት ቅንጅት፣ ግንባር፣ ውህደት ግን በሂደት የሚመጣ  ነው እንጂ በአንድ ሰሞን ሆያ ሆዬ የሚሆን አይደለም፡፡ ተሰብሰቡ ስለተባለ መሰብሰብ መርህ አልባነት ነው፡፡
ፓርቲያችሁ ኢትዮጵያውያን እንዴት ነው የሚረዳት? ለሀገሪቱ ያላችሁ አላማስ ምንድን ነው?
ኢትዮጵያ የረጅም ጊዜ ታሪክ ያላት ነች፡፡ የነፃነት ምድር ነች፡፡ በሌላ መልኩ ስናይ ደግሞ ደሃ ነን። እኛ ትልቅና ገናና ሀገር እንድትሆን እንፈልጋለን፡፡ እርጥ ነው እስከ ዛሬ በታሪካችን አልተስማማንም፡፡ ሁላችንንም ያግባባ ጀግና የለንም፡፡ ከዚህ አንፃር ጥሩ ታሪኮችን እንቀበል መጥፎ ታሪኮችን እንማርባቸው የሚል አቋም ነው ያለን፡፡ ባለፈ ታሪክ መቆዘም አይገባም የሚል ጽኑ እምነት አለን፡፡
ስለዚህ “እኛ አፄ እገሌ በድሎናል” ከሚል ወጥተን፣ ኢትዮጵያ ዛሬ ላይ ምንድን ነች? ከ25 አመት በኋላ ምን ትሁን የሚለው ላይ እናተኩራለን። የወደፊቱን ተመልካች ፓርቲ ነው የመሠረትነው። ከ25 አመት በኋላ ከአፍሪካ ስንተኛ ግዙፍ ኢኮኖሚ ነው የምንገነባው? ስንት ሰው ከድህነት እናወጣለን? የሚለው ላይ ነው ትኩረታችን፡፡ ያለፈ በደልን እየቆጠሩ መቆዘም የትም አያሻግረንም። ሩዋንዳ በዚህ ጥሩ ምሣሌ ነች፡፡ ሁቱም ቱትሲ የተጨፈጨፉት በቅርቡ ነው ግን ከዚያ ቁዘማ ወጥተው ዛሬ ታሪኩን እንደ መማሪያ እንጂ እንደ መበቀያ አያዩም። የወደፊታቸውን አሻግረው ነው የሚያዩት፡፡ ከብሶትና ቁዘማ ወጥተዋል፡፡ እኛም እንደዚህ ነው የምናስበው፡፡   


 “ቢካሚንግ” የሚል ርዕስ ያለውና በቀድሞዋ የአሜሪካ ቀዳማዊት እመቤት ሚሼል ኦባማ የተጻፈው ተወዳጅ መጽሃፍ በአለማችን የግለታሪክ ማስታወሻ መጽሃፍት ሽያጭ ታሪክ ክብረወሰን ሊያስመዘገብ መቃረቡን ዘ ጋርዲያን ዘግቧል፡፡
በወረቀት፣ በሶፍት ኮፒና በድምጽ ቅጂ በአለም አቀፍ ደረጃ 10 ሚሊዮን ኮፒዎች የተሸጡለትና በአለማችን የግለታሪክ ማስታወሻ መጽሃፍት ታሪክ ክብረወሰን ለማስመዝገብ የተቃረበው መጽሃፉ፣ ባለፈው ህዳር ወር ላይ ለህትመት የበቃውና በሰሜን አሜሪካ ብቻ በአንድ ቀን ውስጥ 725 ሺህ ኮፒዎች፣ በሁለት ሳምንታት ጊዜ ውስጥ ደግሞ 2 ሚሊዮን ኮፒዎች እንደተሸጠ ዘገባው አስታውሷል፡፡
በከፍተኛ ደረጃ ተወዳጅነትን ያተረፈው “ቢካሚንግ” በታተመ በአጭር ጊዜ ውስጥ በአመቱ ከፍተኛ ሽያጭ ካስመዘገቡ መጽሃፍት ተርታ ለመሰለፍ መቻሉንም፣ መጽሃፉ ከ6.2 ሚሊዮን ኮፒ በላይ ከተሸጠበት አሜሪካ ባለፈ እንግሊዝና ጀርመንን ጨምሮ በሌሎች አገራትም በከፍተኛ ሽያጭ ክብረወሰን ማስመዝገቡን ዘገባው አክሎ ገልጧል፡፡

መምህሩ ከደመወዙ 80 በመቶውን ለት/ቤቱ ይረዳ ነበር


          በኬንያ በሚገኝ የሁለተኛ ደረጃ ትምህርት ቤት ውስጥ በመምህርነት በማገልገል ላይ የሚገኘውና ከወርሃዊ ደመወዙ 80 በመቶውን ትምህርት ቤቱን በቁሳቁስ ለማሟላት በማዋል ተጠቃሽ ተግባር የፈጸመው ኬንያዊው ፒተር ታባቺ፤ የአመቱ የአለማችን ምርጥ መምህር ሆኖ በመመረጥ 1 ሚሊዮን ዶላር መሸለሙ ተዘግቧል፡፡
በኬንያ የገጠር መንደር በሚገኝ አንድ ኮምፒውተር ብቻ ያለበት ትምህርት ቤት ውስጥ የሳይንስ መምህር የሆነው ታባቺ፤ የደመወዙን 80 በመቶ ገንዘብ ኮምፒውተርና ሌሎች የመማሪያ ቁሳቁሶችን ለማሟላትና ተማሪዎች በሳይንስ የላቀ ውጤት እንዲያስመዘግቡ ለማስቻል ጥረት ሲያደርግ የነበረው መምህሩ፤ ጥረቱ ተሳክቶለት ትምህርት ቤቱን በአገር አቀፍ የሳይንስ ውድድር አንደኛ ማድረግ መቻሉንና በዚህ ተጠቃሽ ስራው ለታላቁ የአለማችን ምርጥ ሽልማት መብቃቱን ሲኤንኤን ዘግቧል፡፡  
ታባቺ በዱባይ በተከናወነው ደማቅ ስነስርዓት ላይ ተገኝቶ ከዱባዩ ልዑል ሼክ ሃምዳን ቢን ሞሃመድ ቢን ራሺድ አል ማክቱም እጅ ሽልማቱን ከተቀበለ በኋላ ባደረገው ንግግር፤ በሽልማቱ በእጅጉ መደሰቱን ገልጾ በሽልማት ያገኘውን ገንዘብም ትምህርት ቤቱን ለማሻሻል እንደሚያውለው ተናግሯል፡፡ በአለማቀፍ ደረጃ በትምህርቱ መስክ ተጠቃሽ ስራን ያከናወኑ መምህራንን በማወዳደር በየአመቱ የአለማችን ምርጥ መምህር ከሚል ማዕረግ ጋር የ1 ሚሊዮን ዶላር ሽልማት የሚሰጠው የዱባዩ ቫርኬይ ፋውንዴሽን፣ ከሰሞኑም ተማሪዎቹን በሳይንስ ዘርፍ ውጤታማ እንዲሆኑ ለማስቻል ከገንዘብ ድጋፍ ባለፈ የተለያዩ ተጠቃሽ ድጋፎችን በማድረጉ የተመሰከረለትን ይህን ኬንያዊ መምህር፣ የ2019 ምርጥ መምህር በማለት ሽልማቱን አበርክቶለታል፡፡
ለዱባዩ ቫርኬይ ፋውንዴሽን የ2019 የአለማችን ምርጥ መምህር ሽልማት ከ179 የአለማችን አገራት 10 ሺህ መምህራን በዕጩነት ቀርበው እንደነበር የጠቆመው ዘገባው፤ ተቋሙ የአመቱ ምርጥ መምህር ሽልማትን ሲሰጥ የዘንድሮው ለአምስተኛ ጊዜ እንደሆነም አስታውሷል፡፡

 አፍሮባሮሜትር የተባለው የጥናት ተቋም በ34 የአፍሪካ አገራት ላይ በቅርቡ ባከናወነው ጥናት፣ ከ37 በመቶ በላይ የሚሆኑት አፍሪካውያን አገራቸውን ጥለው ለመሰደድ እንደሚፈልጉ ማረጋገጡን ይፋ አድርጓል፡፡
ተቋሙ ይፋ ያደረገውን ጥናት ዋቢ አድርጎ ቢቢሲ እንደዘገበው፣ አገራቸውን ጥለው ለመሰደድ ከሚፈልጉ አፍሪካውያን መካከል አብዛኞቹ ወጣቶችና የተማሩ መሆናቸውንም ለማወቅ የተቻለ ሲሆን፣ ለመሰደድ ከመፈለግ ባለፈ ለስደት ዝግጅት በማድረግ ላይ የሚገኙት አፍሪካውያን 3 በመቶ ያህል እንደሆኑ ተነግሯል፡፡ አገራቸውን ጥለው መሰደድ ከሚፈልጉት አፍሪካውያን መካከል 44 በመቶ የሚሆኑት ለስደስት ያነሳሳቸው ምክንያት የተሻለ ስራ ፍለጋ መሆኑን የተናገሩ ሲሆን፣ 29 በመቶ ያህሉ ደግሞ ከድህነትና ከኢኮኖሚያዊ ጫናዎች ለማምለጥ ሲሉ ስደትን እንደመረጡ ገልጸዋል፡፡
የጥናት ውጤቱን ጠቅሶ ቢቢሲ እንደዘገበው፣ መሰደድ እንደሚፈልጉ ከገለጹት አፍሪካውያን መካከል አብዛኞቹ በወደ አውሮፓና ሰሜን አሜሪካ ሳይሆን ወደ ሌሎች የአፍሪካ አገራት ለመሰሰድ እንደሚፈልጉ ቢገልጹም፣ በርከት ያለ ቁጥር ያላቸውም ወደ አውሮፓ ለመሄድ እንደሚፈልጉ ለማወቅ ተችሏል፡፡ ጥናቱ በተሰራባቸው 34 የአፍሪካ አገራት ውስጥ ከሚኖሩ ወንዶች 40 በመቶው ወደ ሌሎች አገራት የመሰደድ ፍላጎት ያላቸው ናቸው ያለው ዘገባው፤ ተመሳሳይ ፍላጎት ያሳዩ ሴቶች ደግሞ 33 በመቶ መሆናቸውን አመልክቷል፡፡
ኢትዮጵያን ያልዳሰሰው ጥናቱ ካካተታቸው አገራት መካከል ለመሰደድ የሚፈልጉ በርካታ ዜጎች መኖሪያ በመሆን ቀዳሚነቱን የያዙት ኬፕ ቨርዴና ሴራሊዮን ሲሆኑ፣ ከሁለቱም አገራት ዜጎች መካከል 57 በመቶ ያህሉ ለመሰደድ እንደሚፈልጉ መናገራቸውን ዘገባው ገልጧል፡፡
ጋምቢያ 56 በመቶ እንዲሁም ቶጎ 54 በመቶ ዜጎቻቸው ለመሰደድ እንደሚፈልጉ የገለጹባቸውና ሁለተኛና ሶስተኛ ደረጃ ላይ የተቀመጡ አገራት ሆነዋል፡፡
ለስደት ዝግጅት እያደረጉ የሚገኙ በርካታ ቁጥር ያላቸው ዜጎች ያሉባቸው አገራት በመሆን የአንደኛ ደረጃ ላይ የተቀመጡት አገራት ዚምባቡዌና ሌሴቶ ሲሆኑ፣ በአገራቱ 7 በመቶ ያህሉ ህዝብ ለስደት በመዘጋጀት ላይ እንደሚገኝ ጥናቱ ጠቁሟል፡፡ 6 በመቶ የሚሆነው ህዝባቸው ለስደት እየተዘጋጀ የሚገኝባቸው ጋምቢያ፣ ኬፕ ቨርዴና ኒጀር ሁለተኛ ደረጃን ሲይዙ፣ 5 በመቶ ህዝቧ ለስደት እየተዘጋጀ የሚገኝባት ሳኦ ቶሜና ፕሪሲፔ በሶስተኛነት ደረጃ ላይ ተቀምጣለች፡፡

Saturday, 30 March 2019 13:16

እዛም ቤት እሳት አለ

 ከዕለታት አንድ ቀን አንድ የንጉሥ ሰለሞን አጫዋች ነበረ፡፡ በየቀኑ ንጉሡን የማጫወት ተግባራትን ያከናውናል፡፡ አንድ ቀን እንደተለመደው ንጉሡን እያጫወተ ሳለ መልዐከ - ሞት መጥቶ ትኩር ብሎ ሲያየው ተመለከተና በጣም ደነገጠ፡፡ ከዚያም ወደ ንጉሥ ሰለሞን ሄደ፡-
“ንጉሥ ሆይ!
እኔ እርስዎን ለማዝናናት ቀን ከሌት እየጣርኩ ሳለ፤ መልዐከ - ሞት መጥቶ ትኩር ብሎ አይቶኝ ሄደ፡፡ ንጉሥ ሆይ ያድኑኝ” አለና ተማጠናቸው፡፡
ንጉሡም፤
“አይዞህ፡፡ እኔ መልዐከ - ሞትን በፀሎት እስከማገኘው፤ ለጊዜው ራቅ ወዳለ ቦታ ወደ ህንድ እልክሃለሁ፤ ከዚያ መልዐከ - ሞትን ካነጋገርኩት በኋላ ትመለሳለህ፡፡”
“አመሰግናለሁ ንጉሥ ሆይ!” ብሎ እጅ ነስቶ ወጣ፡፡ ንጉሡ ፀሎታቸውን ተያያዙት፡፡ ከቀናት በኋላ መልዐከ ሞት ተገለጠላቸው፡፡
“መልዐክ ሆይ! ምን አድርጌ ነው አገልጋዬንና አጫዋቼን ልትወስድብኝ የመጣኸው?” ሲሉ ጠየቁት፡፡
መልዐከ ሞትም፤
“አይ ገርሞኝ ነው፡፡ እኔ አምጣው የተባልኩት ከህንድ፣ እሱ እዚህ ምን ያደርጋል ብዬ ነው ትኩር ብዬ ያየሁት” አለ፡፡
*   *   *
ይህች አገራችን የአህያ ሥጋ አልጋ ሲሉት አመድ የሚባለውን ዓይነት ናት፡፡
ወይም ፀጋዬ ገ/መድህን እንደሚለን “ኢትዮጵያ ትወልዳለች እንጂ አታሳድግም! ለነገሩ አቅሙም የላትም፡፡ የሶስት ሺ ዘመን ታሪክ እንጂ የቅርብ ጊዜ የድል ትርክት የላትም፡፡ ትተረክልናለች እንጂ አልኖርንባትም፡፡ አላደግንባትም፡፡ የረባ ትምህርት አልተማርንባትም፡፡ የረባ ጤና አላገኘንባትም፡፡ ባጠቃላይ ተወለድን እንጂ አላደግንባትም፡፡ ያም ሆኖ አንጠላትም - እናታችን ናታ! ገና እንታገልላታለን! ገና እንሞትላታለን፡፡ ገና ድል እናደርግላታለን፡፡
ከድህነት አረንቋ ትወጣም ዘንድ እስከመጨረሻው እንፍረመረምላታለን፡፡ እንጮህላታለን፡፡ እንዘምርላታለን፡፡ እንሟገትላታለን፡፡ ማሰብ እስከምንችለው ጥግ ድረስ እናስብላታለን፡፡
እኛ፣
“When Rome was burning Nero was dancing”
ሮማ እንደነደደች ኔሮ እየደነሰ ነበር - የምትባል ዓይነት እናት አገር ያለን ህዝቦች አይደለንም፡፡ ብትፈርስ ከፍርስራሿ ውስጥ ህንፃ እናበቅላለን እንጂ ዳር ቆመን የምናለቅስ አንሆንም! እናውቃለን፤ ብንናገር እናልቃለን ሳይሆን፤ እናውቃለን ባንናገር እናልቃለን የምንል ነን!
የመጪውን ዘመን ምርጫ “እኔና እኔ ብቻ” ሳንል፤ መሸነፋችንንም በፀጋ ተቀብለን፣ ተጨባብጠን የምንለያይበት ያደርግልን ዘንድ ትምህርታችንን ይግለጥልን! ከሁሉም በላይ ደግሞ እዛም ቤት እሳት አለ የሚባል ልቦና ይስጠን!!

Saturday, 23 March 2019 15:07

የግጥም ጥግ

 የአንበሳው ሹርባ

መቅደላ ጋራ ላይ - ያለፈው አንበሳ፣
ታላቁ ባለህልም - ያ ገናና ካሳ፣
ሽጉጡን ሲጠጣ፣ ሲቅመው ጥይቱን፣
ራሱን - ሲያጠፋ፣ በትኖት እውነቱን፣
ሀሳብና ትልሙን፣ ዕቅዱን ሲያፈሰው፣
ፅንስና ውጥኑን - ቃሉን ሲያላውሰው፣
ከላይ ተጎዝጉዞ፣ ተጎንጉኖ ከድኖት አክሊል
የነበረ፣
ሹሩባ - ውበቱ፣ እንግሊዝ - ያደረ፣
ውጥኑ እንደሞላ ህልሙ እንደሰመረ፣
መታሰሪያው ጉንጉን መጣልን እያለ፣
መንፈሴ ዘመረ፡፡
(ደረጀ በላይነህ)

 የናይጀሪያ መንግስት ልጆቻቸውን ወደ ትምህርት ቤት ልከው በማያስተምሩ ወላጆች ላይ ክስ እንደሚመሰርትና ቅጣት እንደሚጥል ማስጠንቀቁን ቢቢሲ ዘግቧል፡፡
በናይጀሪያ ከ5 እስከ 14 አመት የዕድሜ ክልል ውስጥ የሚገኙ 10.5 ሚሊዮን ያህል ህጻናት ትምህርት እንደማይማሩ የጠቆመው ዘገባው፣ የአገሪቱ መንግስት የማይማሩ ህጻናትን ቁጥር ለመቀነስ በማሰብ ልጆቻቸውን በማያስተምሩ ወላጆች ላይ ክስ ለመመስረት መወሰኑን የአገሪቱ የትምህርት ሚኒስትር አዳሙ አዳሙ እንዳስታወቁ አመልክቷል፡፡
በአገሪቱ በርካታ ወላጆች ልጆቻቸውን ለማስተማር የሚሆን በቂ ገንዘብ ስለሌላቸው ወደ ትምህርት ቤት ከመላክ ይልቅ በጎዳና ላይ ንግድ እንደሚያሰማሯቸው የጠቆመው ዘገባው፣ ትምህርታቸውን ከማይከታተሉት የአገሪቱ ህጻናት መካከል 60 በመቶ ያህሉ የሚገኙት የአሸባሪው ቡድን ቦኮ ሃራም በሚንቀሳቀስበት የአገሪቱ ሰሜናዊ ክፍል ውስጥ እንደሆነም አመልክቷል፡፡ ዩኒሴፍ በቅርቡ ባወጣው መረጃ፤ ናይጀሪያ በአለማችን እጅግ በርካታ ቁጥር ያላቸው ከትምህርት ገበታ ውጭ የሆኑ ህጻናት ከሚገኙባቸው ቀዳሚዎቹ አገራት አንዷ ናት ማለቱንም አስታውሷል፡፡

35 በመቶ አፍሪካውያን የውሃ እጥረት ችግር ተጠቂ ናቸው

          በመላው አለም የሚገኙ 2.1 ቢሊዮን የተለያዩ አገራት ዜጎች አሁንም ድረስ ንጹህ የመጠጥ ውሃ እንደማያገኙ የተባበሩት መንግስታት ድርጅት ባወጣው ሪፖርት አስታውቋል፡፡
ተመድ ባለፈው ማክሰኞ ይፋ ባደረገው አለማቀፍ የውሃ ልማት ሪፖርት እንዳለው፤ በአለማችን 4 ቢሊዮን ያህል ሰዎች ለከፋ የውሃ እጥረት ተጋልጠው ይገኛሉ፡፡ የከፋ የውሃ እጥረት ያለባቸው አገራት አብዛኞቹ በአፍሪካ እንደሚገኙና በአህጉሪቱ ከ35 በመቶ በላይ የሚሆነው ህዝብ የውሃ እጥረት ችግር ሰለባ እንደሆነ የጠቆመው ሪፖርቱ፣ የአፍሪካ አገራት የህዝብ ቁጥር ከማደጉ ጋር በተያያዘ የውሃ ፍላጎት በከፍተኛ ሁኔታ እየጨመረ ቢሆንም የውሃ አቅርቦትን ግን ለማሳደግ አለመቻሉን አመልክቷል፡፡
የአፍሪካ ልማት ባንክ ያወጣውን መረጃ ጠቅሶ ቢዝነስ ኢንሳይደር እንደዘገበው፣ በአፍሪካ አጠቃላይ የውሃና የስነ-ንጽህና አቅርቦትን ለማሟላት 66 ቢሊዮን ዶላር ያህል ገንዘብ እንደሚስፈልግ ይገመታል፡፡

 - ፊንላንድ ዘንድሮም የአለማችን እጅግ ደስተኛዋ አገር ናት ተብሏል
         - ኢትዮጵያ በደስተኛነት ከ156 የአለማችን አገራት 134ኛ ደረጃን ይዛለች


         ዘ ኢኮኖሚስት ሰሞኑን ይፋ ባደረገው የ2018 የፈረንጆች አመት የአለማችን ከተሞች የዋጋ ውድነት ደረጃ ሲንጋፖር፣ ሆንግ ኮንግ እና ፓሪስ እጅግ ውድ ከተሞች በመሆን በእኩል የአንደኛ ደረጃን መያዛቸው ተዘግቧል፡፡
ዘ ኢኮኖሚስት በ133 የአለማችን ከተሞች ውስጥ የ160 አይነት ሸቀጦችን ዋጋ በማጥናት የሰራውን ግምገማ መሰረት አድርጎ ይፋ ባደረገው ሪፖርት እንዳለው፣ ላለፉት አራት ተከታታይ አመታት በአንደኛነት ደረጃ ላይ የዘለቀችው ሲንጋፖር፣ ዘንድሮም ቀዳሚነቷን ከሆንግ ኮንግና ከፓሪስ ጋር ተጋርታለች፡፡
ዙሪክ፣ ጄኔቫ፣ ኦሳካ፣ ሴኡል፣ ኮፐንሃገን፣ ኒው ዮርክ፣ ቴል አቪቭ እና ሎሳንጀለስ እንደ ቅደም ተከተላቸው ከአራተኛ እስከ አስረኛ ደረጃን የያዙ የአለማችን ውድ ከተሞች ሆነዋል፡፡ የቬንዙዌላዋ ካራካስ እጅግ አነስተኛ የዋጋ ውድነት ያላት የመጀመሪያዋ የአለማችን ከተማ ናት ያለው ሪፖርቱ፣ የሶርያዋ ደማስቆና የኡዝቤኪስታኗ ታሽኬንት ሁለተኛና ሶስተኛ ሆነው እንደሚከተሏት አመልክቷል፡፡
በአነስተኛ የዋጋ ውድነት የካዛኪስታኗ አልማቲ፣ የህንዷ ባንጋሎር፣ የፓኪስታኗ ካራቺ፣ የናይጀሪያዋ ሌጎስ፣ የአርጀንቲናዋ ቦነስ አይረስ፣ የህንዷ ቼናይ እና ሌላኛዋ የህንድ ከተማ ኒው ዴልሂ በቅደም ተከተላቸው እስከ አስረኛ ያለውን ስፍራ ይዘዋል፡፡ ዘ ኢኮኖሚስት የከተሞችን የዋጋ ውድነት ደረጃ ለማውጣት ከተጠቀመባቸው መገምገሚያ መስፈርቶች መካከል የምግብና የመጠጥ ዋጋ፣ የመኪኖች ዋጋ፣ የህክምና አገልግሎቶች ዋጋ ይገኙበታል፡፡
በተያያዘ ዜና ደግሞ የአመቱ የአለማችን አገራት የደስተኛነት ደረጃ ከሰሞኑ ይፋ የተደረገ ሲሆን፣ ፊንላንድ ዘንድሮም በአንደኛ ደረጃ ላይ ተቀምጣለች፡፡ በተባበሩት መንግስታት ድርጅት የዘላቂ ልማት መፍትሄዎች ኔትወርክ ለ7ኛ ጊዜ ይፋ ባደረገው የዘንድሮው የአለማችን አገራት የደስተኛነት ደረጃ፣ ዴንማርክ በሁለተኛነት ስትቀመጥ ኖርዌይ ትከተላለች፡፡
156 የተለያዩ የአለማችን አገራትን ባካተተው የዘንድሮው የአገራት የደስተኝነት ደረጃ ዝርዝር አይስላንድ፣ ኔዘርላንድ፣ ስዊዘርላንድ፣ ስዊድን፣ ኒው ዚላንድ፣ ካናዳና ኦስትሪያ በቅደም ተከተላቸው እስከ አስረኛ ደረጃን የያዙ ሲሆን ኢትዮጵያ በ134ኛ ደረጃ ላይ ተቀምጣለች፡፡ በአመቱ ከአለማችን አገራት እጅግ ደስታ የራቃት አገር ደቡብ ሱዳን እንደሆነች የጠቆመው ሪፖርቱ፣ የማዕከላዊ አፍሪካ ሪፐብሊክ፣ አፍጋኒስታን፣ ታንዛኒያ፣ ሩዋንዳ፣ የመን፣ ማላዊ፣ ሶርያ፣ ቦትሱዋና እና ሃይቲ በቅደም ተከተላቸው እስከ አስረኛ ያለውን ደረጃ ይዘዋል፡፡
ተቋሙ የአለማችንን አገራት የደስተኛነት ደረጃ ለመገምገም ከተጠቀመባቸው መስፈርቶች መካከል የዜጎች የነፍስ ወከፍ ገቢ፣ አማካይ ዕድሜ፣ የህይወት ምርጫን የማድረግ ነጻነት፣ ለመንግስት ሙስና ያለው አመለካከት ወዘተ ይገኙበታል፡፡

ይህን ወግ፤ “we told it earlier as no one listened we shall repeat it again” ይላል ቮልቴር፡፡ እኛም ከዕለታት አንድ ቀን ብለነው ዛሬ የሚሰማ ሰው እንዳጣን ስለተገነዘብን ልንደግመው ተገደድን!
ከዕለታት አንድ ቀን ገበሬ ቀኑን ሙሉ ዘር ሲዘራ ውሎ ወደ ቤቱ እየተለመሰ ነው፡፡ ጦጢት ዛፍ አናት ላይ ሆና ገበሬው የሚዘራውን እህል፤ መቱንም፣ ፈሩንም ስታስተውል ቆይታለች፡፡
አሁን ገበሬው ወደ ቤቱ እየተመለሰ ነው፡፡ ጦጢት ሄዳ የዘራውን ሁሉ እየበረበረች እንደምትበላበት ያውቃል - ገበሬው፡፡ ጦጢትም ምንም ጥያቄ ብትጠይቀው ቀና መልስ እንደማይመልስላት ታውቃለች፡፡
ገበሬው ጦጢት ያለችበት ዛፍ ስር ደረሰና፤
“እንደምን ውልሃል ገበሬ?” ስትል ሰላምታ አቀረበች፡፡
“ደህና፡፡ አንቺስ ደህና ከረምሽ?”
“እኔ በጣም ደህና ነኝ”
ገበሬ የሚቀጥለውን ጥያቄ በመገመት መልስ አዘጋጅቷል፡፡
“ገበሬ ሆይ፤ ዛሬ ምን ዘራህ?” አለችው፡፡
ገበሬም የጦጣን ተንኮል ያውቃልና፤
“ተልባ፤ ተልባ ነው የዘራሁት”
ጦጣ የማትፈለፍለውንና የሚያሟልጫትን እህል እንደጠቀሰና፤ ተስፋ እንድትቆርጥ እንደሆነ ገባት - ጦጣ ናትና!
ጦጣ፤
“አይ ደህና፤ ወርደን እናየዋለን!” አለችው፡፡
***
“ነገሩ አልሆን ብሎ ሁኔታው ሲጠጥር፣
ጠጣሩ እንዲላላ፣ የላላውን ወጥር” ይለናል አንበሳው ገሞራው፡፡ የዱሮ ትግል ስሜት ግጥም ነው፡፡ የዛሬ መሪዎች ለዚህ አልታደሉም፡፡ ቢታደሉና በየግጥሙ ጉባኤ ቢታደሙ ደስ ባለን። ምክንያቱም ቢያንስ “እረኛ ምናለ?” ከሚል ዘይቤ ይገላግለን ነበር፡፡ ወትሮ ግጥምና ሥነ ፅሁፍ አንዱ ዕውነት የመናገሪያ መንገድ ነበር፡፡ ጃንሆይን አስቀይሞ ነበር ቢባልም፣ መንግስት መለዋወጡን ባይተውም፣ ግጥምም የራሱ የደረጃ አካሄድ አለው፡፡ ሚዛኔ አገርና ህዝብ ነውና! ከአገርና ከህዝብ መንገድ ሲወጣ ዲሞክራሲ ፌዝ ነው፡፡ ፍትህ ተራ ሙግት ነው፡፡ እኩልነት እኩል ያለመሆን ልማድ ነው፡፡ መልካም አስተዳደር፣ መልካም አስተዳዳሪ በሌለበት “የደረባ  - ደረብራባ” ጨዋታ ነው፡፡ የሰው ኃይላችንን አቅም እንመርምር! የሰው ኃይላችንን ሥነ ምግባርና መልካም ግብረገብነት እናጢን!
ስለ ንፁህ መንገዳችን በብርቱ አውርተናል፡፡ ንፁህ አለመሆናችንን ግን ልባችን ያውቀዋል! መሄዳችንን እንጂ መድረሻችንን አለማወቁ አንዱ ታላቅ እርግማናችን ነው፡፡ መታመማችንን በቅጡ ሳናውቅ ሐኪም ፍለጋ መዳከር ክፉ ልማድ ሆኖብናል፡፡
ዱሮ፤
“የእኛ ተግባር
መማር፣ መማር፣ መማር!” እንል ነበር - ሌኒን ባለው እየተመራን፡፡ ዛሬስ? የማንም መፈክር ስለሌለን ለምንምነታችን እጃችንን ሰጥተናል፡፡ ስለዚህ ብዙ ጥያቄዎች አናታችን ላይ ይንቀዋለላሉ። እንደምን?
ለምሳሌ፤
የጠቅላይ ሚኒስትሩ አካሄድ ተመቸን፤ እኛ እኛ ነን፤ ግን እሱ ተመችቶች እየገዛን ነው?
ከእሱ በኋላ (ኦህዴድ፣ ደህንነትና መከላከያ፣ እንደሆነ ሳንረሳ፤ ብጥብጥ ለምን በዛ/አሁንም የወደቁት ዛፎች ላይ ምሳር ሳናበዛ ራሳችንን እያየን ብንነጋገር፣ ወደ መፍትሄው እንቃረብ ይሆናል። አለበለዚያ በተለመደው አባዜያችን ስንረጋገም መኖራችን ነው (ነብሱን ይማረውና አሰፋ ጫቦ “ውሃ ወቀጣ!” ይለው ነበር!”)
አንድ ጊዜ ጓድ ሊቀ መንበር መንግስቱ ኃ/ማርያም “የምንለውን ብለናል፤ የምናደርገውን እንጀምር” ብለው ነበር፡፡ የወቅቱን እሳቸውን የማድነቅ ግዴታ ባይኖርብንም፣ አነጋገራቸው ግን ዕውነቱን የሚያንፀባርቅ ነበረ! ዛሬም ከንግግር አባዜ (Rhetoric) ወጥተን መሬት ብንይዝ፣ ቢያንስ “አይ መሬት ያለ ሰው?!” የሚል መሬት ያለ ሰው አይኖርብንም!
ዋናው ጉዳይ ግብረገብነታችንን ወደ ቆራጥ ተግባር እንለውጠው ነው! እርምጃ እሚያስፈልገውን አናስታምም! To satisfy all is to satisfy none! የሚለውን አባባል ለአንዲት ደቂቃም አንርሳ! (‹ሁሉንም ማርካት ማንንም አለማርካት ነው› እንደማለት ነው)
ምቀኝነት ያለባቸው አያሌ ናቸው፡፡ ቢችሉ በአካል አሊያም በመንፈስ ሊያኮላሹን የሚሹ ተዘርዝረው አያልቁም! ያም ሆኖ ሁሉም ቤት ያፈራቸው ናቸውና በጥንቃቄ መቀበል ግድና ዋና ነገር ነው፡፡ ከሀገራችን ዋና ዋና ችግሮች አንዱ፣ ወንጀል ወንጀሉን ሌሎች ላይ መላከክ ነው፡፡
“የአብዬን እከክ እምዬ ላይ ልክክ” እንዲል ማለት ነው፡፡ ወንጀለኞቹና ሴረኞቹ ሌላ ቦታ፣ ተወንጃዮቹ ሌላ ቦታ ናቸው፡፡ የሚሰጠው ሰበብም እንደዚያው፡፡ ገጣሚና ፀሐፌ ተውኔት ፀጋዬ ገብረመድህን፤
“የሚያባርረኝ ጣሊያን እንቅፋት መትቶት በሞተ፣ ጀግና ነው ብለው
አሰሩኝ እንጂ እኔስ አርበኛ አይደለሁም” የሚለን ለዚሁ ነው፡፡  

Page 7 of 428